मरकुस कर लिखल ईसू कर सुघर-खभेर
ए किताब कर बारे में दम अकन गोएठ
ए सुघर-खभेर ला मरकुस हर लिखीस हे। एमे ईसू मसीह ला परमेसवर कर बेटा कर रूप में देखाथे। ईसू हर परमेसवर कर राएज कर बारे में परचार करीस, बेमरीहा मन ला ठीक करीस अऊ पापी मन ला ओमन कर पाप ले छोंड़ाए बरीक बलीदान कर रूप में कुरूस में अपन जान देहीस। एकर संगे मरकुस हर तीन आने-आने मधे कर मनईसे मन कर बारे में एमे बताथे। पहिलो चेला मन, दूसर भीड़ कर मईनसे मन अऊ तीसर एहूदी धरम कर मुखिया मन हवें। जब ईसू ए दुनिया में रहीस तब एमन नई चिनहींन कि ईसू फूरोंच में कोन लागे। जे घनी ईसू ला कुरूस में चघाए जाए बर रहीस, तेही घनी एहूदी धरम कर मुखिया मन ओके धरीन, चेला मन ओके छोंएड़ के भाएग गईंन अऊ भीड़ हर ओके कुरूस में चघुवाए बर किरलात रहीस। ईसू कर मरे कर पाछू सिरीप रोमी सेना कर एगोट सिपाही हर ओके चिनहीस अऊ कहीस: “फूरोंच में एहर परमेसवर कर बेटा रहीस”।
एकरले ए सुघर-खभेर ला पढ़ के तुंहू मन जाएन जईहा कि ईसू फूरोंच में कोन लागे, ओके चिनहे बर अऊ ओकर दुवारा पाप ले छुटकारा पाए बर अऊ बेमारी ले चंगाई पाए बर परभू तुमन ला आसीस देही। एकरले ए सुघर-खभेर ला बढ़िहां ले पढ़िहा।
ए सुघर-खभेर हर खालहे लिखल भाग में बांटल हे
एहूना बतीसमा देवईया कर संदेस 1:1-8
ईसू कर बतीसमा अऊ परीछा 1:9-13
ईसू हर गलील में सेवकाई करथे 1:14-9:50
ईसू हर गलील ले एरुसलेम कती जाथे 10:1-52
ईसू कर सेवकाई कर आखरी हपता 11:1-15:47
ईसू कर जी उठाई 16:1-8
ईसू अपन चेला मन जग परगट होथे 16:9-20