मती कर लिखल ईसू कर सुघर-खभेर
ए किताब कर बारे में दम अकन गोएठ
ए सुघर खभेर ला ईसू कर चेला मती हर लिखीस हे। ए सुघर खभेर हर ईसू मसीह ला मुकति देवईया कर रूप में बताथे जेकर अगम बानी आगू ले करल गए रहीस, जेके ला ढेरेच बछर ले मईनसे मन डगर देखत रहींन। परमेसवर हर पुराना नियम में हजारों बछर पहले जे करार ला करे रहिस, ओला एही उद्धार करोईया कर जरिये पूरा करीस। ए सुघर खभेर हर सिरिफ एहुदी मन बर ना लागे, जेमन जग ईसू जनमिस अऊ ओकर पालन पोसन करीन, बकीन समूचा संसार बरिक हवे।
ए सुघर खभेर कर ओर तो ईसू मसीह कर जनम ले होथे। फेर ओकर बतिसमा अऊ परीछा कर बारे में बताल हे। तेकर गलील जिला में ईसू कर परचार, उपदेस अऊ चंगा करे कर सेवा कर बारे में बताल हे। तेकर पाछू ए सुघर खभेर में ईसू कर गलील ले लेके एरुसलेम तक जवाई अऊ ईसू कर आखरी दिन कर बात अऊ ओकर कुरूस में चघाए जाए कर बारे में अऊ ओकर मएर के जी ऊठे कर बारे में लिखल हे।
ए सुघर खभेर में ईसू ला एगोट महान गुरु कर रूप में बताल गईस हे। ओके परमेसवर कर नियम कर मतलब बताए कर अधिकार हे। अऊ ओ सरग कर राएज कर सिकछा देथे। ओकर सिकछा ला पांच हिसा में बांटल जाए सकत हे।
पहिला पहाड़ी उपदेस, जेहर सरग राएज कर मईनसे मन कर चाल सहुर, ओमन कर जिमेदारी, अधिकार अऊ आखरी असरा कर बारे में हवे। दूसरा बारह चेला मन ला परमेसवर कर सेवा बरीक उपदेस देथे। तीसरा सरग राएज कर बारे में अहना। चोथा चेला बने कर बारे में सिकछा। अऊ पांचवा सरग राएज कर बारे में बताल हे।
ए सुघर-खभेर हर खालहे लिखल भाग में बांटल हे
ईसू कर खानदान अऊ ओकर जनम 1:1-2:23
एहुना बतीसमा देवईया कर सेवकाई 3:1-12
ईसू कर बतीसमा अऊ परीछा 3:13- 4:11
ईसू गलील जिला में मईनसे मन कर सेवा करथे 4:12-18:25
ईसू गलील जिला ले एरुसलेम सहर में जाथे 19:1-20:34
एरुसलेम में ईसू कर आखरी हपता 21:1-27:66
परभू ईसू मरल में ले जी उठथे अऊ देखार देथे 28:1-20