मती कर लिखल ईसू कर सुघर-खभेर
ईसू मसीह कर खानदान
1
1 एहर ईसू जेहर मसीह लागे ओकर खानदान हवे, ईसू हर राजा दाऊद कर पीढ़ी कर रहीस, अऊ राजा दाऊद हर अबराहम कर पीढ़ी कर रहीस।2 अबराहम हर इसहाक कर दाऊ रहीस, इसहाक हर आकुब कर दाऊ रहीस, आकुब हर एहूदा अऊ ओकर भाई मन कर दाऊ रहीन, 3 एहूदा हर फिरिस अऊ जोहर कर दाऊ रहिन, ओमन कर दाई कर नांव तमार रहीस, फिरिस हर हिसतोरोन कर दाऊ रहीस, अऊ हिसतोरोन हर एराम कर दाऊ रहीस। 4 एराम हर अम्मीनादाब कर दाऊ रहीस, अम्मीनादाब हर नहसोन कर दाऊ रहीस, अऊ नहसोन हर सलमोन कर दाऊ रहीस; 5 सलमोन हर बोअज कर दाऊ रहीस, बोअज कर दाई रहब रहीस, बोअज हर ओबेद कर दाऊ रहीस, अऊ ओबेद कर दाई कर नांव रुत रहीस, ओबेद हर यिसे कर दाऊ रहीस; 6 यिसे हर राजा दाऊद कर दाऊ रहीस।
दाऊद हर सुलेमान कर दाऊ रहीस; सुलेमान हर ओ महतारी ले जनमीस जेहर आगु उरियाह कर परानी रहीस, 7 सुलेमान हर रहबाम कर दाऊ रहीस, रहबाम हर अबियाह कर दाऊ रहीस, अऊ अबियाह हर आसा कर दाऊ रहीस; 8 आसा हर यहोसापात कर दाऊ रहीस, यहोसापात हर योराम कर दाऊ रहीस, अऊ योराम हर उजियाह कर दाऊ रहीस, 9 उजियाह हर योताम कर दाऊ रहीस, योताम हर आहाज कर दाऊ रहीस, अऊ आहाज हर हिजिकियाह कर दाऊ रहीस, 10 हिजिकियाह हर मनससे कर दाऊ रहीस, मनससे हर आमोन कर दाऊ रहीस, अऊ आमोन हर योसियाह कर दाऊ रहीस, 11 अऊ ईसराएल लोग बंधुवा होएके बाबूल देस में जाए कर जुआर यकुनयाह, अऊ ओकर भाई मन योसियाह ले जनम लेहीन।
12 बंधुवा होए के बेबीलोन जाए कर पाछू यकुनयाह हर सालतिएल कर दाऊ रहीस, अऊ सालतिएल हर जरुबाबिल कर दाऊ रहीस, 13 जरुबाबिल हर अबीहूद कर दाऊ रहीस, अबीहूद हर इलयाकीम कर दाऊ रहीस, अऊ इलयाकीम हर अजोर कर दाऊ रहीस, 14 अजोर हर सदोक कर दाऊ रहीस, सदोक हर अखिम कर दाऊ रहीस, अऊ अखिम हर इलीहूद कर दाऊ रहीस, 15 इलीहूद हर एलियाजर कर दाऊ रहीस, एलियाजर हर मतान कर दाऊ रहीस, अऊ मतान हर आकुब कर दाऊ रहीस, 16 आकुब हर यूसुफ कर दाऊ रहीस, यूसुफ कर परानी मरियम रहीस, जेकर ठन ले ईसू जनमीस, जेके ला मसीह कथें।
17 एही कस अबराहम ले दाऊद तक सब लगाए के चौदह पीढ़ी होईस, अऊ दाऊद ले बाबूल में बंधुवा होए के जाए तक चौदह पीढ़ी, अऊ बंधुवा होए के बाबूल में जाए कर जुआर ले मसीह तक चौदह पीढ़ी होईस।
ईसू मसीह कर जनम
18 तेकर ईसू मसीह कर जनम ए नियर होईस, कि जे घनी ओकर दाई मरियम कर मंगनी यूसुफ कर संगे होए रहीस, बकिन ओमन दुनों झे घरवाला-घरवाली कर रूप में एक संग रहे कर आगूच ले मरियम हर पबितर आतमा कती ले आसापती होए गईस। 19 मरियम कर होवईया घरवाला यूसुफ हर परमेसवर कर नजेर में सुघर जिनगी जिवईया मईनसे रहीस, अऊ ओहर मरियम ला मईनसे मन कर आगु में बईदनाम करे बर नई चाहत रहीस, एकरे बर यूसुफ मरियम ला कले-कस छोंड़ देहे कर बिचार करिस। 20 जे घनी ओहर ए सब बात मन कर बिचार करत रहीस, तेहीच घनी परभू कर एगोट दूत हर सपना में ओके दिखीस अऊ ओके कहीस, “दाऊद कर पीढ़ी कर ए यूसुफ! तंए मरियम ला अपन परानी बनाए बर झईन डरा, काबरकि जेहर ओकर गरभ में हवे, ओहर पबितर आतमा कती ले हवे। 21 ओहर एगोट बेटा जनम देही अऊ तंए ओकर नांव ईसू राखबे, काबरकि ओहर अपन मईनसे मन ला ओमन कर पाप ले छुटकारा देही।”
22 ए सब जाएत हर एकर ले होईस कि जे बचन परभू हर अगमजानी मन कर जरिये कहे रहीस, ओहर पूरा होए। 23 ओ बचन हर एहर रहीस “सुना, एगोट कुंवारी हर आसापती होही अऊ एगोट बेटा ला जनम देही, अऊ ओकर नांव इमानुएल राखल जाही, जेकर मतलब होथे, परमेसवर हमर संगे हवे।” 24 तेकर ईसूफ नींद ले जाएग के परभू कर दूत कर अगींया कर अनुसार मरियम ला अपन परानी बनाईस। 25 अऊ जब तक मरियम हर बेटा ला जनम नई देहीस तब तक यूसुफ ओकर संगे नई सुतीस; अऊ ओहर ओ लईका कर नांव ईसू राखीस।