एहूना 3

ईसू हर नांवा जनम कर बारे में सिखाथे

1 नीकूदेमूस नांव कर एगोट एहूदी नेता रहीस, जेहर फरीसी दल कर रहीस। 2 ओहर राती जूआर ईसू कर लिघे आए के कहीस, “ए गुरूजी, हमरे जानथी कि, तंए परमेसवर कती ले हमके सिखाए बर आए हस, काबरकि जे चिनह चमतकार तंए देखाथस, अगर परमेसवर तोर संगे नई रतीस, त तंए देखाए बर नई सकते।”

3 ईसू हर ओके जबाब देहीस, “मंए तोके फूरोंच में कहथों, अगर ककरो नांवा जनम नई होही, त ओहर परमेसवर कर राएज ला देखे बर नई सकही।” 4 निकुदेमुस हर ओकर जग पूछीस, “जब मईनसे हर बाएढ़ जाही, त फेर कईसे जनम ले सकथे? का ओहर अपन महतारी कर पेट में दुबारा जाए के जनम ले सकथे?” 5 ईसू हर जबाब देहीस, “मंए तोके फूरोंच में कहथों, जब तक कोनो मईनसे हर पानी अऊ आतमा ले नई जनम ही, तब तक ओहर परमेसवर कर राएज में ढुके बर नई सकही। 6 काबरकि जेहर देंह ले जनमीसे, ओहर देंह हवे अऊ जेहर पबितर आतमा ले जनमीसे ओहर आतमा हवे। 7 तंए अचमहों झईन कर कि मंए तोके कहे हों, कि तोके ला नांवा जनम लेहे बर जरूरी हवे। 8 मएं एक ठे अहना बताथों, हवा जिते चाहथे ओही कती चलथे अऊ तंए ओकर आरो भर ला सुनथस, बकिन ओला नई समझस कि ओहर कहां कती ले आथे अऊ कहां कती जाथे। सबेच मईनसे जेमन पबितर आतमा ले जनम लेथें, ओमन संगे अईसनेच होथे।” 9 निकुदेमुस हर पूछीस, “ए सब हर कईसे होए सकत हे?”

10 एला सुईन के ईसू हर ओके जबाब देहीस, “भई, तंए इसराईली मन कर गुरू लागस, तबोले ए बात मन ला नई समझस? 11 मंए तोके फूरोंच में कहथों कि हमरे जेला जानथी, ओला कहथी अऊ जेला हमरे देखथी ओकरे गवाही देथी। अऊ तुमन हमर गवाही ला नई अपनावा। 12 जब मंए तुमन के संसार कर बात ला कहें अऊ तुमन बिसवास नई करा, त अगर मंए तुमन जग सरग कर बात मन ला बताहूं, त तुमन कईसे बिसवास करीहा? 13 मएं मईनसे कर बेटा जेहर सरग ले उतेर के आए हवों, मोर छोंएड़ कोनो सरग में नई चघीस हे। 14 जेकस मूसा हर सुनसान जघा में पीतल कर सांप ला ऊपरे चड़हाईस, ओही कस मंए मईनसे कर बेटा मोके ला, मईनसे मन जान ले मारे बर कुरूस में चघाहीं। 15 तेमेकि जे कोनो मोर ऊपर बिसवास करहीं ओमन अमर जिनगी पाहीं।

16 “काबरकि परमेसवर हर दुनिया कर मईनसे मन जग एतना मया करीस, कि ओहर अपन एकेच ठे बेटा ला दे देहीस, तेमेकि जे कोनो ओकर ऊपरे बिसवास करही, ओहर नास नई होही बकिन अमर जिनगी पाही। 17 परमेसवर हर अपन बेटा ला संसार में एकर बर नई भेजीस, कि ओहर संसार ला डंड दे, बकिन एकर ले भेजीस कि संसार ओकर दुवारा उदधार पाएं। 18 जे कोनो हर परमेसवर कर बेटा कर ऊपरे बिसवास करथे, परमेसवर ओके दोसी नई ठहराही, बकिन जेमन ओकर ऊपरे बिसवास नई करें, ओमन दोसी ठहेर चुकीन हवें, काबरकि ओमन परमेसवर कर एकेच ठे बेटा कर ऊपरे बिसवास नई करीन। 19 अऊ ओमन कर दोसी ठहरे कर कारन एहर हवे कि, सचा इंजोर हर संसार में आईस, बलकी संसार कर मईनसे मन अंधार ला इंजोर ले ढेर सुघर जानीन, काबरकि ओमन कर काम हर घिनक रहीस। 20 जेमन घिनक काम करथें, ओमन इंजोर ला नई पतियाएं अऊ इंजोर में आए बर नई करें, काबरकि ओमन ला डर रहथे, कि ओमन कर घिनक काम हर उजागर होए जाही। 21 बकिन जेहर सचाई में चलथे, ओहर इंजोर कर लिघे आथे, ताकि एहर दिख जाथे कि ओकर काम हर परमेसवर कती ले करल गईस हवे।”

एहूना हर ईसू कर बारे में गवाही देथे

22 तनीक दिन कर पाछू ईसू अऊ ओकर चेला मन एहूदिया जिला में आईन, अऊ उहां ईसू हर चेला मन कर संगे रहिके मईनसे मन ला बतीसमा देहे लागीस। 23-24 जब ले एहूना ला जेहल में नई डाले रहीन, तब ले मईनसे मन ओकरो जग बतीसमा लेहे बर आवत रहीन। ओहर सालेम सहर कर लिघे एनोन नांव कर गांव में जाए के बतीसमा देहत रहीस, काबरकि ऊहां ढेरे बगरा पानी रहीस। 25 ओजग एहूना कर चेला मन कर, एगोट एहूदी कर संगे सुध होए कर बारे में बहस होए लागीस। 26 अऊ ओमन एहूना ठे जाए के कहीन, “ए गुरूजी, ओ मईनसे जेहर एरदन नदी कर ओ पार तोर संगे रहीस, अऊ जेकर बारे में तंए गवाही देहे रहे कि ओहर मसीह लागे, देख ओहू हर बतीसमा देहत हवे अऊ ढेरे झेमन ओकर जग जात हवें।”

27 एहूना हर ओमन ला जबाब देहीस, “जब तक कोनो के परमेसवर हर सरग ले कांही करे कर अधिकार नई देही, तब तक ओहर कांहीच नई कएर सके। 28 तुमन खुद मोर गवाह हवा, कि मंए आगुवेच कहे रहें ‘मंए मसीह ना लागों’ बलकी ओकर बर डगर बनाए बर ओकर ले आगु भेजल गए हों।” 29 दुलहा ओही हवे जेके दूलहीन भेंटाथे, बकिन मंए तो एगोट ढेंड़हा कस हों, ओहर दुलहा कर गोएठ ला सूईन के ढेरेच खुस होथे, ओहीच कस तुमन जग ले ईसू कर बारे में सुईन के अब मोर ए खुसी हर पूरा होए गईस हवे। 30 एहर जरूरी हवे कि ओ बढ़े अऊ मंए घटों।”

ईसू सबले महान हवे

31 ईसू जेहर ऊपर ले आथे, ओहर सब ले महान हवे। जेहर संसार ले आथे, ओहर संसार ले जूड़ल रथे, एकरले ओहर संसार कर गोएठ गोठियाथे, बकिन जेहर सरग ले आथे, ओहर सबले बएढ़ के हवे। 32 जे जाएत ला ओहर सरग में देखीस हे अऊ सुनीस हे, ओहीच ला बताथे, बकिन ओकर ओ गवाही ला कोनो नई मानें। 33 जेहर ओकर गवाही ला मानथे, ओहर ए साबित करथे कि परमेसवर सचा हवे। 34 परमेसवर हर ओके ला पबितर आतमा ले भरपूर कएर के भेजीस हवे, तेकरले ओहर परमेसवर कर गोएठ ला गोठियाथे। 35 दाऊ परमेसवर हर अपन बेटा ले मया करथे, अऊ ओहर सबेच जाएत ला ओकर अधिकार में देहीस हवे। 36 जेहर परमेसवर कर बेटा ऊपरे बिसवास करथे, ओहर परमेसवर कर संगे अमर जिनगी पाथे, बकिन जेहर बेटा कर गोएठ ला नई माने, ओके अमर जिनगी नई भेंटाही, बलकी परमेसवर कर दंड ओकर ऊपरे बनल रही।”