एहूना बतीसमा देवईया कर सेवकाई
3
1 एहर ओ समय कर बात हवे जे घनी महाराजा तीबीरीयूस हर पंदरा बछर ले रोमी समराएज में राएज करत रहीस,
अऊ जे घनी पुंनतियुस पीलातूस हर एहूदिया जिला कर राएजपाल रहीस,
अऊ गलील जिला में हेरोदेस हर राएज करत रहीस,
अऊ ओकर भाई फिलीपुस हर,
इतूरिया जिला अऊ तरखोनीतिस जिला में राएज करत रहीस अऊ लिसानियास हर अबिलेने जिला में राएज करत रहीस।
2 अऊ जे घनी हना अऊ काइफा एरुसलेम में महाआजक रहीन,
ते घनी परमेसवर कर बचन हर जकरयाह कर बेटा एहूना जग पहुंचीस,
ओ घनी ओहर सुनसान जघा में रहत रहीस।
3 ओही घनी एहूना हर एरदन नदी कर ठांवें-ठांवें कर सब जिला में जाए के ए परचार करे लागीस,
“तुमन अपन पाप ला छोंएड़ देआ,
परमेसवर जग आए जावा अऊ बतीसमा लेआ त पाप कर छमा मिलही।
4 एसायाह अगमजानी कर किताब में,
एहूना कर बारे में लिखल हवे कि,
सुनसान जघा में एकठे चिकरोईया कर गोएठ हर सुनात हवे,
कि परभू कर डगर ला तियार करा,
ओकर बर सोज डगर बनावा।
5 सब घटीया मन ला भाएट देहल जाहीं,
अऊ सब पहार अऊ टिकरा ला खालहे करल जाहीं,
अऊ जेहर टेड़गा हवे ओला सोज बनावल जाही,
अऊ जेहर ऊंच खाल हवे,
ओला समथर डगर बनावल जाही।
6 अऊ सब मईनसे जाएत परमेसवर कती ले भेजल उदधार करोईया ला देखहीं।”a
7 जे भीड़ कर मईनसे मन एहूना जग बतीसमा लेहे बर आत रहीन,
ओमन जग ओहर एकस परचार करीस,
“ए करेत सांप कर लईका मन,
तुमन के कोन चेताए देहीस कि,
परमेसवर कर डंड ले भागा?
8 तुमन अपन जिनगी ले एला साबित कएर देआ कि सहीच में तुमन अपन पाप ला छोंएड़ देहे हा,
अऊ परमेसवर कती अपन मन ला लगाए हवा। एकस झईन सोंचा,
कि हमर पूरखा अबराहम लागे अऊ हमके कांहीच नई होही,
काबरकि परमेसवर हर,
ए पखनोच ले तो अबराहम बर लईका बनाए सकथे।
9 अझरो ले रूख कर जएर में परमेसवर कर कोरोध कर टांगी मड़हाल हवे,
एकरे बर जे-जे रूख हर सुघर फर नई फरही,
ओला काएट के आगी में जोएर देहल जाही।”
10 तेकर मईनसे मन ओकर जग पूछीन,
“त परमेसवर कर ए कोरोध ले बांचे बर हमरे का करी?”
11 तेकर एहूना हर ओमन ला कहीस,
“जेकर जग दुई गोट अंगा हे,
ओहर ओके ला दे दे,
जेकर जग एकोठे नईए,
अऊ जेमन जग खाए बर हवे,
ओहू हर वईसनेच करे।”
12 हपता लेवईयाb मन भी बतीसमा लेहे बर आईन,
अऊ ओकर जग पूछीन,
“ए गुरूजी,
हमरे का करी?”
13 एहूना हर ओमन ला कहीस,
“अपन काम में ईमानदार रहा,
रोमी सरकार हर तुमन ला जेतना लेहे कर अधिकार देहीसे,
ओकर ले अगराहा झईन लेईहा।”
14 तनीक सिपाहीयो मन ओकर जग पूछीन,
“हमरे का करी?”
एहूना हर ओमन ला कहीस,
“ककरो जग जबरजसती झईन करीहा,
अऊ ककरो ऊपरे झूठ-मूठ कर बईदनामी झईन करीहा,
अऊ अपन मजदूरी में संतोस करीहा।”
15 सबेच मईनसे मन मसीह कर आए कर असरा करत रहीन,
अऊ सब मईनसे मन अपन-अपन मन में,
एहूना कर बारे में सोंचत रहीन कि,
का एही तो मसीह ना लागे,
16 तेकर एहूना हर ओ सब झन ला कहीस,
“मंए तो तुमन ला पानी ले बतीसमा देहथों,
बकिन जेहर अवईया हवे,
ओहर मोरो ले बड़खा अऊ ढेरेच महान हवे,
कि मंए तो ओकर पनही कर बांधल डोर ला छोरोवईया एगोट गुलाम बने कर लाईक नई हों,
ओहर तुमन ला पबितर आतमा,
अऊ आगी ले बतीसमा देही।
17 ओकर सुपा ओकर हांथ में हवे,
अऊ ओहर अपन कोठार ला बढ़िहां ले सफा करही,
अऊ गहूं ला अपन कोठी में राखही,
बकिन बूसा ला ओ आगी में लेस देही जे आगी हर कभों नई बिताही।”
18 अऊ एही कस ढेरेच चेताए के एहूना हर मईनसे मन ला मसीह कर आए कर बारे में सुघर-खभेर ला सुनात रहीस।
19 राजा हेरोदेस हर अपन भाई कर परानी,
हेरोदियास ला राखे रहीस,
अऊ एकर संगे संगे अऊ ढेरेच घिनक कामो ला करे रहीस,
तेकर ले एहूना हर सब कर आगु में ओके ला घुड़काईस।
20 तेकर ले राजा हेरोदेस हर एहूना ला जेहल में हुरेक देहीस। एहर तो ओकर एकठे अऊ बड़खा गलती रहीस।
एहूना बतीसमा देवईया हर ईसू ला बतीसमा देथे
21 जेहल में जाए कर आगु,
एक दिन एहूना हर मईनसे मन ला बतीसमा देहत रहीस,
तेही घनी ईसू हर भी बतीसमा लेके पराथना करत रहीस,
त अगास हर उघेर गईस,
22 अऊ पबितर आतमा हर देंह कर रूप लेके,
परेंवा कस ओकर ऊपरे उतरीस,
अऊ सरग ले परमेसवर कर गोएठ हर सुनाईस कि,
“तंए मोर दुलरुवा बेटा लागस,
मंए तोर ले ढेरेच खुस हों।”
ईसू कर पूरखा मन कर सूची
23 जे घनी ईसू हर अपन सेवा ला सुरू करीस,
ओ घनी ओहर करीबन तीस बछर कर रहीस,
अऊ (जेकस मईनसे मन समझत रहीन कि) ईसू हर ईसुफ कर बेटा रहीस,
अऊ ईसुफ हर एली कर बेटा,
24 अऊ एली हर मतात कर बेटा,
अऊ मतात हर लेवी कर बेटा,
अऊ लेवी हर मलकी कर बेटा,
अऊ मलकी हर एना कर बेटा,
अऊ एना हर ईसुफ कर बेटा,
25 अऊ ईसुफ हर मतीयाह कर बेटा अऊ मतीयाह हर आमोस कर बेटा,
अऊ आमोस हर नहूम कर बेटा,
अऊ नहूम हर असलयाह कर बेटा,
अऊ असलयाह हर नोगह कर बेटा,
26 अऊ नोगह हर मात कर बेटा,
अऊ मात हर मतीयाह कर बेटा,
अऊ मतीयाह हर सीमी कर बेटा,
अऊ सीमी हर एओसेख कर बेटा,
अऊ एओसेख हर एओदाह कर बेटा,
27 अऊ एओदाह हर एयोनान कर बेटा,
अऊ एयोनान हर रेसा कर बेटा,
अऊ रेसा हर जरूबाबिल कर बेटा,
अऊ जरूबाबिल हर सालतीएल कर बेटा,
अऊ सालतीएल हर नेरी कर बेटा,
28 अऊ नेरी हर मलकी कर बेटा,
अऊ मलकी हर अदी कर बेटा,
अऊ अदी हर कोसाम कर बेटा,
अऊ कोसाम हर इलमोदाम कर बेटा,
अऊ इलमोदाम हर एर कर बेटा,
29 अऊ एर हर एसू कर बेटा,
अऊ एसू हर इलाजार कर बेटा,
अऊ इलाजार हर ओरीम कर बेटा,
अऊ ओरीम हर मतात कर बेटा,
अऊ मतात हर लेवी कर बेटा,
30 अऊ लेवी हर समोन कर बेटा,
अऊ समोन हर एहूदा कर बेटा,
अऊ एहूदा हर ईसुफ कर बेटा,
अऊ ईसुफ हर ओनान कर बेटा,
अऊ ओनान हर इलयाकीम कर बेटा,
31 अऊ इलयाकीम हर मलेआह कर बेटा,
अऊ मलेआह हर मीननाह कर बेटा,
अऊ मीननाह हर मतता कर बेटा,
अऊ मतता हर नातान कर बेटा,
अऊ नातान हर दाऊद कर बेटा,
32 अऊ दाऊद हर यिसे कर बेटा अऊ,
यिसे हर ओबेद कर बेटा,
अऊ ओबेद हर बोअज कर बेटा,
अऊ बोअज हर सलमोन कर बेटा,
अऊ सलमोन हर नहसोन कर बेटा,
33 अऊ नहसोन हर अमीनादाब कर बेटा,
अऊ अमीनादाब हर अरनी कर बेटा,
अऊ अरनी हर हीसतरोन कर बेटा,
अऊ हीसतरोन हर फरीसी कर बेटा,
अऊ फरीसी हर एहूदा कर बेटा,
34 अऊ एहूदा हर आकूब कर बेटा,
अऊ आकूब हर इसहाक कर बेटा,
अऊ इसहाक हर अबराहम कर बेटा,
अऊ अबराहम हर तीरह कर बेटा,
अऊ तीरह हर नाहोर कर बेटा,
35 अऊ नाहोर हर सरूग कर बेटा,
अऊ सरूग हर रऊ कर बेटा,
अऊ रऊ हर फिलिग कर बेटा,
अऊ फिलिग हर एबीर कर बेटा,
अऊ एबीर हर सीलह कर बेटा,
36 अऊ सीलह हर केनान कर बेटा,
अऊ केनान हर अरपछद कर बेटा,
अऊ अरपछद हर सेम कर बेटा,
अऊ सेम हर नूह कर बेटा,
अऊ नूह हर लिमीक कर बेटा,
37 अऊ लीमीक हर मथूसीलह कर बेटा,
अऊ मथूसीलह हर हनोक कर बेटा,
अऊ हनोक हर इरीद कर बेटा,
अऊ इरीद हर महललेल कर बेटा,
अऊ महललेल हर केनान कर बेटा,
38 अऊ केनान हर एनोस कर बेटा,
अऊ एनोस हर सेत कर बेटा,
अऊ सेत हर आदम कर बेटा,
अऊ आदम हर परमेसवर कर बेटा रहीसc।