Nyìʔɛnɛ fɔnnɔ nɛ́ dàala fɔnnɔ lè
21
1 A mi 'nyìʔɛnɛ láà nyaa fɔnnɔ nɛ́ dàala fɔnnɔ ní,
ki 'nyaa nyìʔɛnɛ pélile lè nɛ́ dàala pélile ní lè,
tire cé pùunni,
kuʔɔjii míɛni wiì cé ń'nɛ̀ puu baaʔ.
2 Nɛ̀ pínɛ Kulocɛliɛ kàʔa wàlidɛngɛgɛ gè,
Zerizalɛmi kàfɔngɔ gè,
a mi 'ki nyaa a ki 'kɔ́n baa nyìʔɛnɛ nī lè Kulocɛliɛ tiʔɛ nī gè nɛ tíri,
nɛ̀ kìi gbòbori majo bɛ̀ cefɔnwɔ cî wìi fèri nɛ̀ yaʔa wi pɔli mɛ́ wè.
3 A mi 'yékpoli láà lúʔu a ni 'juu kpuʔɔ baa kùlofɔlilɔ kácunʔɔ tiʔɛ nī gè,
nɛ́ jo:
«Nyaa,
Kulocɛliɛ kòridiʔɛ kiī siɛnnɛ sunʔɔmɔ nī bè !
Je wi bága puu nɛ́ pe ní wī !
Pe bága puu wi wuulo,
dí Kulocɛliɛ wire tíimɛ wi sí puu nɛ́ pe ní,
bè puu pe Kulocɛliɛ wè.
4 Wi bága pe yéturo ti mìɛni pàari pe yiɛyɛ nī yè.
Kùu sì ń'nɛ̀ je puu baaʔ,
fuunmɔ kɔnwaara sì ń'nɛ̀ je puu baaʔ,
kòkuulo sǐ ní puu baaʔ,
yayaʔa sì ń'nɛ̀ je puu baaʔ.
Ki 'nyaa kaliʔɛlɛ keli 'tóri wī.»
5 Ŋàa wi 'puu tɛ́niwɛ kùlofɔlilɔ kácunʔɔ nɛ̄ gè,
a wi 'jo:
«Nyaa,
mi 'kele ke mìɛni kpíʔile fɔngɔlɔ !»
A wi ń'nɛ̀ jo:
«-Ti sɛbɛ !
Nɛ́ ki cɛ́n mi siɛnrɛ ti 'yɛli nɛ́ tɛ́ngɛlɛ ní,
tiī kányiʔɛ.»
6 A wi 'mi yɛ:
«Ti n'dɛ,
ti sí nyɛ́nì kpíʔile !
Mi wī Alifa wè nɛ́ Omegaa wè,
mi wī sélimɛ nɛ̄ bè nɛ́ ní láʔala nɛ̄ lè.
Mi wè,
a luʔɔwuʔɔ yē siɛn ŋíì nɛ̄,
m'bé wi kɛn wi- gbuɔ sìi lawiile ni luʔɔ nɛ̄ gè waʔanɛ.
7 A siɛn ŋíì kɛ́nì jáa wè,
wi bé yɛrɛ dáà taa dè kɔrigɔ.
M'bé puu wi Kulocɛliɛ dí wi sí puu mi pùɔ.
8 «Bìli sí bīɛlɛ fíɛrɛfɔlilɔ bèle,
nɛ́ sìndɛngɛlɛ bèle,
siɛncuʔɔlɔ bèle nɛ́ siɛnkpuulo ní bèle,
kanuʔɔrɔfɔlilɔ bèle nɛ́ dìɛlɛ ní bèle,
yasunzunminɔ bèle nɛ́ káfinɛvinɛnɛ pe mìɛni bèle,
peli liɛlɛ ni bé nyaa baa siʔɛb kàsun nī gè.
Kire gī kùu siinwuu wè.»
Zerizalɛmi kàfɔngɔ gè
9 Nyìʔɛnɛ tundunminɔ kɔlisiin bílì mɛ́ yagbuʔɔlɔ kɔlisiin ke 'puu cògolo gèle nɛ́ ní nyìgele wuʔɔgboliyo kɔlisiin nɛ̄ yè,
a wàa nigbe 'pɛn nɛ̀ pɛ́nì juu nɛ́ mi ní nɛ́ mi yɛ:
«Te báan,
m'bé pa cefɔnwɔ tìɛ wè muɔ nɛ̄,
Sìnbapile ni cuɔ wè.»
10 A Kulocɛliɛ Pìle ni 'mi yiʔɛ múgu gè,
a mi 'mìɛ nyaa nyagurukpuʔɔ káà naamɛ,
kpàʔaligɛ,
nɛ̀ sɛ́nì Kulocɛliɛ kàʔa wàlidɛngɛgɛ tìɛ gè mi nɛ̄,
Zerizalɛmi wè,
ki cé kɔ́n nyìʔɛnɛ nī lè Kulocɛliɛ tiʔɛ nī gè nɛ tíri nɛ báan.
11 Kulocɛliɛ nàjɛnrɛ ti 'puu kàʔa nɛ̄ gè,
ki ní nɛ nyíʔɛnɛ bɛ̀ lagbɛnrɛ sìndɛnigɛ tíɛlɛ majo jasipi sìndɛnigɛ gī,
nɛ wéli nɛ sùuri kirisitali tíɛlɛ.
12 Gungbaʔaligɛ lìrige káà cé ki màʔa nɛ̀ suʔu,
nɛ̀ pínɛ kɔ̀rikpoliyo kiɛ nɛ́ siin 'puu baa;
nyìʔɛnɛ tundunminɔ kiɛ nɛ́ siin 'puu ki kɔ̀riyɔ nyáà nɛ̄ yè.
Míɛyɛ kiɛ nɛ́ siin 'puu sɛbɛyɛ kɔ̀riyɔ nɛ̄ yè;
ki míɛyɛ nyáà yè,
Isirayɛli pìile saaya tùluyo kiɛ nɛ́ siin míɛyɛ yire yī.
13 Cɛngɛnyɛnifoligɔli mɛ́ gè,
kɔ̀riyɔ taanri;
cɛngɛnyɛnifoligɔli kàmɛgɛ mɛ́ gè,
kɔ̀riyɔ taanri;
cɛngɛnyɛnifoligɔli kàliige mɛ́ gè,
kɔ̀riyɔ taanri;
cɛngɛnyɛnijiingɔli mɛ́ gè,
kɔ̀riyɔ taanri.
14 Kàʔa ki gunliriye yè,
pe cé yi tɛ́ngɛ kàdɛniyɛ kiɛ nɛ́ siin nɛ̄ yire yi 'puu kàkpuɔnnɔ bèle,
nɛ́ sí Sìnbapile ni tundunminɔ kiɛ nɛ́ siin pe míɛyɛ kiɛ nɛ́ siin sɛbɛ yè kàdɛniyɛ nɛ̄ yè.
15 Ŋàa wi 'puu nɛ nyu nɛ́ mi ní wè,
tiɛ yatɔnminigɔ kàgbiile 'puu wi mɛ́ còlo,
bè kàʔa tɔ́nminɔ gè nɛ́ kɔ̀riyɔ ní yè,
nɛ́ kàʔa ki gunlirige ní gè.
16 Kàʔa ki 'puu gɔ̀ninɔ sicɛri,
ki sìtɔnimɔ ní bè nubo nɛ́ ki píɛlimɛ ní bè.
A wi 'ki tɔ́nminɔ nɛ́ kàgbiile ní lè,
a ki 'yɛ̀ culolo sirakiɛ nɛ́ nigbe nɛ́ culolo togo (2 200);
ki tɔnigɛnmɛ nɛ́ ki píɛlimɛ,
nɛ́ ki kpàʔalimɛ ní bè,
ti mìɛni 'puu nuro.
17 A wi 'kàʔa ki gunlirige tɔ́nminɔ gè,
a ki kpàʔalimɛ pi 'yiri kabuunyiʔɛnɛ tekɔlisiin nɛ́ kabuunyiʔɛnɛ sicɛri (144)c,
siɛnnɛ tɔ́rigɛnmɛ nɛ̄ bè;
kire nyìʔɛnɛ tundunwɔ wi 'tɔ́nminɔ nɛ̀ taa.
18 Gunlirige ki 'puu fanʔa nɛ́ jasipi sìndɛnigɛ ní,
kàʔa gè pe cé kire faan nɛ́ tiɛ cìiliwe ní,
tiɛ ŋáà wi 'puu cìiliwe nɛ wéli nɛ sùurí wè.
19 Pe cé kàʔa ki gunliriye kàkpuɔnnɔ kpíʔile bèle nɛ́ lagbɛnrɛ sìndɛnicɛnyɛ feliye yi mìɛni ní.
Kàkpuɔn péliwe wè,
wire 'puu jasipi;
siinwuu wè,
safiiri;
taanriwuu wè,
kaliseduwani;
sicɛriwuu wè,
emerɔdi;
20 kogunɔ- wuu wè,
saridonisi;
kɔliniwuu wè,
sariduwani;
kɔlisiinwuu wè,
kiriso- liti;
kataanriwuu wè,
berili;
kacɛri- wuu wè,
topazi;
kiɛwuu wè,
kirizo- pirazi;
kiɛ nɛ́ nigbe wuu wè,
yasɛnti;
kiɛ nɛ́ siinwuu wè,
amɛtiisi.
21 Kɔ̀riyɔ kiɛ nɛ́ siin yi 'puu kofii woyo,
yi mìɛni nigbe nigbe yi cé kpíʔile nɛ́ kofii nigbe ní.
Kàʔa ki kogbuʔɔ gè,
kire 'puu tiɛ cìiliwe wuʔu nɛ wéli nɛ sùurí.
22 Mi sì cé Gbùʔɔrɔsaʔa nyaa gè baa kàʔa nī gèʔ.
Ki 'nyaa Kàfɔli Kulocɛliɛ wè,
Fànʔa ki mìɛni Kàfɔli wè,
wire wī kàʔa ki Gbùʔɔrɔsaʔa gè,
wire nɛ́ Sìnbapile ní lè.
23 Nɛ̀ pínɛ kàʔa ki màakuu sì cé puu cɛngɛ nɛ̄ʔ nɛ́ yege níʔ bèri kpìɛnmɛ cáanri ki nɛ̄ʔ.
Ki 'nyaa Kulocɛliɛ wi nàjɛnrɛ ti 'puu nɛ càanná nɛ kúu,
nɛ̀ pínɛ kàʔa ki fètinnɛ lire nī Sìnbapile lè.
24 Kire kpìɛnmɛ pire nɛ̄ kùlogolo siɛnnɛ pe bága de nyaʔa de tári,
nɛ̀ pínɛ wire mɛ́ dàala kùlofɔlilɔ pe bága de waa nɛ́ pe kpuʔɔrɔ yɛrɛ ní dè.
25 Nɛ̀ pínɛ kàʔa ki kɔ̀riyɔ yiì je ga tɔ́n bè nyaa cɛngɛ káà fáala nīʔ,
nɛ́ ki cɛ́n pìlige sì je ga wúɔ baaʔ.
26 Kire tiʔɛ nī kùlogolo siɛnnɛ pe bága de waa nɛ́ pe nàjɛnrɛ ní dè nɛ́ pe kpuʔɔrɔ ní dè.
27 Siɛn ŋáà wi wè cìiliwe wèʔ,
nɛ́ ŋàa wi nyɛ́ni tètii kele kúu gèle,
nɛ́ ŋàa wi finɛnɛ wè,
peli wáà sì je ga jíin baa kàʔa nī gèʔ,
nɛ̀ yiri bìli míɛyɛ yi 'sɛbɛ Sìnbapile ni sìi sɛbɛ nī wè.