Yiʔɛlɛ sirakogunɔ wori dè
20
1 A mi 'nyìʔɛnɛ tundunwɔ wáà nyaa wi tíri nɛ báan nyìʔɛnɛ nī lè;
láʔalafun kàtiʔɛ ki kɔ̀rikaanna ni 'puu wi mɛ́ nɛ́ nyùʔɔdirige síkpilige káà ní wi mɛ́ kiyɛ nī yè.
2 A wi 'yapiʔi cò gè,
wɔ̀biliʔɛ gè,
kire gī gbòdolilo kàfɔli wè nɛ́ ní Setɛni wè.
A nyìʔɛnɛ tundunwɔ wi 'wi puɔ nɛ̀ cáan nɛ̀ taa yiʔɛlɛ sirakogunɔ (1 000).
3 Nɛ́ kúɔ nɛ́ wi wáa láʔalafun kàtiʔɛ nī gè nɛ́ ki sùʔɔ nɛ̀ tɔ́n wi nɛ̄ naamɛ gè,
nɛ́ fìɛ tɛ́ngɛ ki nɛ̄,
gìi ki bé tí wi fǎga ní de kùlogolo siɛnnɛ fáanni bèle de pùunníʔ,
fúɔ bè taa yiʔɛlɛ sirakogunɔ (1 000) ke- pa nyì.
A tire kɛ́nì tóri dè,
fúɔ ki 'yɛli pe- wi múgu bè wáa wi- lɛ̀lɛ cɛ̀ri kúɔ.
4 A mi 'kùlofɔlilɔ kácuɔnyɔ yáà nyaa.
Bìli pe 'puu tɛ́ninɛ yi nɛ̄ yè,
a pe 'kàyuʔu ki siɛnrɛ kɛn dè pe mɛ́.
Siɛnnɛ bílì nyùyɔ pe yé celile nɛ́ kágbaʔa ní gè Zezi wire wori ti juʔu kɛnmɛ nɛ̄ bè nɛ́ Kulocɛliɛ Siɛnrɛ ti kɛnmɛ nɛ̄ bè,
nɛ́ bìli piyè cé fɔ̀li nɛ̀ nyàʔayɛgɛ gbùʔɔrɔ gèʔ nɛ́ ki yafanʔa gáà gī wi líɛrɛ dèʔ,
nɛ́ bìli pe 'puu fìɛ wiì cé tɛ́ngɛ pe gbɛgɛlɛ nɛ̄ gèle nɛ́ pe kiyɛ ní yè wèʔ,
a mi 'pe nyaa a pe 'nyɛ́ nɛ̀ yiri,
nɛ̀ tɛ́ni fànʔa nɛ̄ gè nɛ́ Kirisi ní wè nɛ̀ taa yiʔɛlɛ sirakogunɔ (1 000).
5 Kúbilo sɛnminɛ bèle,
peli sì nyɛ́ʔ,
fúɔ nɛ̀ taa a yiʔɛlɛ sirakogunɔ ke pɛ́nì nyì.
Kire 'nyaa nyɛ́yirile pélile lè.
6 A siɛn ŋíì 'nyaa baa nyɛ́yirile pélile náà nī lè,
wi wuʔu kiī tànʔa,
nɛ̀ pínɛ Kulocɛliɛ wuu wī.
Peli bálì bèle,
kùu siinwuu wi fànʔa wè pe nɛ̄ʔ.
Ki 'nyaa pe bé puu Kulocɛliɛ nɛ́ Kirisi kacuɔnrilɔ wī,
pe bé tɛ́ni fànʔa nɛ̄ gè nɛ́ Kirisi ní wè bè taa yiʔɛlɛ sirakogunɔ gálì gèle.
Setɛni wi fànʔa ki 'cúʔɔ
7 A yiʔɛlɛ sirakogunɔ (1 000) ke kɛ́nì nyì gèle,
pe bé Setɛni yige wè wi kasuu nī wè.
8 Wi bé kɛ́ bè sari kùlogolo siɛnnɛ feliye fáanni yè de pùunní dàala láʔagɛlɛ tiɛyɛ sicɛri nī yè,
peli bīɛlɛ Gɔgi nɛ́ Magɔgiyéa bèle,
bè pe kɔ́ri bè gbuʔulo kapiɛnnɛ lire míʔɛ nɛ̄.
Pe bé puu nìʔɛbɛlɛ bɛ̀ kuʔɔjii dàrimiʔɛ tíɛlɛ gè.
9 A pe 'yiri nɛ̀ cɛ̀ri dàala nɛ̄ lè,
nɛ̀ Kulocɛliɛ wuulo tiʔɛ màʔa gè nɛ̀ suʔu nɛ́ Kulocɛliɛ kàʔa gáà ki 'wi dɛ́ni wè nɛ̀ pínɛ gè.
A kàsun káà 'tìgi nyìʔɛnɛ nī lè nɛ̀ pe sórigo péwu.
10 Píra ŋáà nī wè,
gbòdolilo kàfɔli wè,
pe fáannivɔli wè,
a pe 'wi wáa kàsunkpuʔɔ nī gè siʔɛ kàsun gè,
baa nyàʔayɛgɛ kúrugu gè nɛ́ jànvaa siɛnjuuwo ní wè.
Pe béri wuʔɔ de kàlí baa pìlige nɛ́ cɛnvugo,
súuri kúɔmɔ fùn.
Kàyuʔu sɛngɛ gè
11 A mi 'kùlofɔlilɔ kácunʔɔ káà nyaa kpuʔɔ fìige nɛ́ siɛn ŋáà wi 'puu ki nɛ̄ tɛ́niwɛ wè.
Dàala nɛ́ nyìʔɛnɛ ní lè ti cé fɛ̀ nɛ̀ sìʔɛrɛ wi yiʔɛ mɛ́ gè;
ti tiʔɛ kiì cé ń'nɛ̀ cɛ́nʔ.
12 A mi 'kúbilo nyaa bèle,
kpolilo bèle nɛ́ yìrile ní bèle,
yérile kùlofɔlilɔ kácunʔɔ ki yiʔɛ mɛ́ gè.
Á pe 'sɛbɛlɛ pálì múgolo,
nɛ́ ń'nɛ̀ sɛbɛ wáà múgu,
wire wi 'puu sìi wuu wè.
Píra ŋáà nī wè,
a pe 'kúbilo pe kàyuʔu juu gè nɛ̀ yɛli nɛ́ gìi ki 'puu sɛbɛgɛ baa sɛbɛlɛ nī bèle,
wàa ó wàa,
nɛ̀ yɛli nɛ́ wi kakpiʔiligele ní gèle.
13 A kuʔɔjii wi 'wi kúbilo kɛn bèle,
kùu wè nɛ́ kusiʔi ní gè,
a pe 'pe kúbilo kɛn bèle.
A pe 'pe kàyuʔu juu gè,
wàa ó wàa nɛ̀ yɛli nɛ́ wi kakpiʔiligele ní gèle.
14 Kùu wè nɛ́ kusiʔi ní gè,
a pe 'ti wáa kàsunkpuʔɔ nī gè,
kire gī kùu siinwuu wè,
kàsunkpuʔɔ gè.
15 A siɛn ŋíì míʔɛ sì cé nyaa baa sìi sɛbɛ nī wèʔ,
pe nɛ̂ cé wi wáa baa kàsunkpuʔɔ nī gè.