19
1 Bà tire 'tóri dè,
a mi 'juumɔ páà lúʔu kpuʔɔ baa nyìʔɛnɛ nī lè,
bɛ̀ siɛnniʔɛmɛ kàgbaaligɛ tíɛlɛ;
pe nyu níɛ wáa:
«Ye- Yewe gbùʔɔrɔ wè !
Kpuʔɔrɔ ti 'yɛli Kulocɛliɛ nɛ̄ !
Suɔlɔ lè,
nɛ́ kpuɔmɔ ní bè,
nɛ́ ŋɔri ní dè,
tiī weli Kulocɛliɛ wori !
2 Ki 'nyaa wi kàyuʔujuuro tiī kányiʔɛ nɛ́ ní sìɛnrɛ.
Wi 'nàjaacuɔ wi kàyuʔu juu gè,
ŋàa wi 'puu nɛ dàala siɛnnɛ fáanni bèle nɛ́ wi nàjaara ní dè.
Kulocɛliɛ wi 'wi kayaʔa fuʔɔ tɔ́n gè,
wi baakuɔlɔ bálì nàjaacuɔ wi yé kpúu bèle.»
3 A pe ń'nɛ̀ ki juu tɔliyɔ siin nɛ́ jo:
«Ye- Yewe gbùʔɔrɔ wè !
Kpuʔɔrɔ ti 'yɛli Kulocɛliɛ nɛ̄ !
Kàkpuʔɔ ki wírige kiī nɛ yɛ̀gí súuri,
kiì je ga kúɔʔ.»
4 A liɛlɛ togo nɛ́ sicɛri bèle nɛ́ yawiiye sicɛri ní yè,
a pe 'tìgi nɛ̀ tuu Kulocɛliɛ yiʔɛ mɛ́ gè wi ní tɛ́niwɛ kùlofɔlilɔ kácunʔɔ nɛ̄ gè,
nɛ wi gbùʔɔrɔ́,
níɛ wáa:
«Ki- taa ki puu bɛ̀ !
Ye- Yewe gbùʔɔrɔ wè !»
Sìnbapile cepɔrigɔ lìile lè
5 A juumɔ páà 'yiri baa kùlofɔlilɔ kácunʔɔ tiʔɛ nī gè nɛ̀ jo:
«Yeri weli Kulocɛliɛ gbùʔɔrɔ́ wè,
yeli ye mìɛni bèle wi baakuɔlɔ bèle,
nɛ́ yeli ye mìɛni bálì ye wi fìʔɛ́ bèle,
yìrile yo,
kpolilo yo !»
6 A mi 'tùnmɔ páà lúʔu bɛ̀ siɛnniʔɛmɛ tùnmɔ tíɛlɛ,
ki ní bɛ̀ lakpuʔɔ tùnmɔ tíɛlɛ nɛ̀ pínɛ;
ki 'puu nɛ̀ pínɛ muɔ bé jo kàsakpɛnigɛ ki kpɛ̀ní kpuʔɔ nɛ taʔala.
Pe 'puu nɛ nyu níɛ wáa:
«Ye- Yewe gbùʔɔrɔ wè !
Nɛ́ ki cɛ́n weli Kàfɔli Kulocɛliɛ wi 'tɛ́ni fànʔa nɛ̄ gè,
wire wī Fànʔa ki mìɛni Kàfɔli wè !
7 Ye- puu weri fundaanra kpínʔini weri muguri,
weri kpuʔɔrɔ tari wi nɛ̄.
Ki 'nyaa Sìnbapile ni cepɔrigɔ cɛngɛ ki 'nɔ̀;
ni cuɔ wi 'wìi gbòbori nɛ̀ yaʔa.
8 Pe 'wi 'kɛn nɛ́ fɛ̀nicɛnwɛ ní a wi 'le,
lɛn fɛ̀ni ŋáà wi nyíʔɛnɛ wè.»
Ki 'nyaa lɛn lagbɛnrɛ wuu wè,
Kulocɛliɛ wuulo pe kasingele keli gīɛlɛ.
9 A nyìʔɛnɛ tundunwɔ wi 'mi yɛ:
«-Ki sɛbɛ ma jo:
Bàli pe 'yeri Sìnbapile ni cepɔrigɔ suro lìidiʔɛ nī gè,
pe wuʔu kiī tànʔa.»
A wi ń'nɛ̀ mi yɛ:
«Siɛnrɛ dáà dè,
Kulocɛliɛ wire tíimɛ nyasiɛnrɛ dī.»
10 A mi 'tìgi nɛ̀ tuu wi tɔliyɔ láara yè bè kpuʔɔrɔ taʔa wi nɛ̄.
A wi sí mi yɛ:
«Fǎga ki puu bɛ̀ʔ !
Mi yē muɔ baakuɔnyɛni wī,
nɛ́ muɔ siinyɛninɛ ní bèle nɛ̀ pínɛ,
bílì pe 'fɔ̀li Zezi wori nɛ̄ dè;
Kulocɛliɛ wire muɔ 'yɛli bèri gbùʔɔrɔ́,
nɛ̀ taʔa gíi nɛ̄,
gìi ki nyɛ́ni nyu Zezi wori nɛ̄ dè,
kire gī Kulocɛliɛ kajuulo siɛnrɛ ti nyùgo gè.»
Suɔnfiige fɛ̀vɔli wè
11 A mi 'nyìʔɛnɛ nyaa lè a ni 'múgu,
nɛ́ fali nɛ̀ suɔnfiige káà nyaa.
Ŋàa wi ki fé gè,
pe wi ye Tɛ́ngɛmɛ Siɛn nɛ́ Kányiʔɛfɔli,
nɛ̀ pínɛ wiī nɛ kàyuʔu nyu gè níɛ kapiɛnnɛ kpúɔn lè nɛ́ sínmɛ ní.
12 Wi nyapigele kiyē muɔ bé jo kàsunnyige gī,
á kùlofɔlilɔ ndɔ̀nyɔ nìʔɛyɛ ní wi nɛ̄ nyùgo nɛ̄ gè.
Míʔɛ káà 'puu wi nɛ̄ sɛbɛgɛ;
siɛn sì ki cɛ́nʔ,
nɛ̀ yiri wire nigbe nī.
13 Burugbuʔɔ káà 'puu wi nɛ̄ lege,
ki mìɛni 'puu sìsiɛn.
Wi míʔɛ gè,
pe 'puu nɛ wi ye Kulocɛliɛ Siɛnrɛ.
14 Nyìʔɛnɛ kapiɛngbuɔn tòyo yi 'puu nɛ nyaari wi kúrugu,
pe ní tɛ́ninɛ suɔnfiiye nɛ̄;
lɛn fɛ̀ni fìiwe wi wecɛ̀nwɛ pe cé le.
15 Ŋɔsii tàanwa wáà 'puu wi mɛ́ nyuɔ nī gè sìɛnwɛ wè bè kùlogolo siɛnfeliye kpúɔn yè nɛ́ wi ní,
bé sí de pe nári wire tíimɛ wè nɛ́ timɔri kàgbiile nía.
Nɛ̀ pínɛ,
wire tíimɛ wi béri ɛrɛzɛn yaforigo tánʔana gè,
gàa nī Kulocɛliɛ funyɛrigbuʔɔ diviɛn wiī nɛ yigi wè,
wire wī Fànʔa ki mìɛni Kàfɔli wè.
16 Míʔɛ káà 'puu sɛbɛgɛ wi burugbuʔɔ nɛ̄ gè nɛ́ wi cekpuɔlɔ ní lè,
ki míʔɛ gè:
Kùlofɔlilɔ Kùlofɔli
nɛ́ Kàfɔlilɔ Kàfɔli.
17 A mi 'nyìʔɛnɛ tundunwɔ wáà nigbe nyaa yériwe baa cɛngɛ laamɛ nī bè.
Wi kòkuulo wáari kpuʔɔ sínjiɛnyɛ yi mìɛni mɛ́ yè nyàa yi lali naamɛ gè,
níɛ wáa:
«Yeri báan ye pa gbuʔulo,
ye- Kulocɛliɛ lìigbuɔlɔ lìi lè !
18 Ye- kùlofɔlilɔ pe kaara káa dè,
nɛ́ kapiɛngbuɔnnɔ kàfɔlilɔ kaara ní dè,
nɛ́ ŋɔrifɔlilɔ kaara dè,
nɛ́ suɔnyɔ kaara nɛ́ yi fɛ̀vɔlilɔ pe kaara dè,
nɛ́ siɛnnɛ pe mìɛni kaara ní dè:
bìli bīɛlɛ pìyemɛ yo,
sùkulolo yo,
yìrile yo,
nɛ̀ kpolilo pínɛ !»
19 A mi 'nyàʔayɛgɛ nyaa gè nɛ́ dàala kùlofɔlilɔ ní bèle,
nɛ́ pe kapiɛngbuɔnnɔ ní bèle;
pe cé pìye pínɛ bè tuu ŋàa nɛ̄ wi 'puu tɛ́niwɛ sunʔɔ nɛ̄ gè wire nɛ́ wi kapiɛngbuɔnnɔ ní bèle.
20 Nɛ̀ sí ki taa a pe 'nyàʔayɛgɛ cò gè nɛ̀ fàri jànvaa siɛnjuuwo nɛ̄ wè,
wire ŋáà wi 'puu nɛ fìɛkpolilo kpínʔini bèle ki yiʔɛ mɛ́ gè,
níɛ siɛnnɛ fáanni bèle nɛ pùunní wè,
bìli nɛ̄ nyàʔayɛgɛ ki fìɛ wi 'puu wè,
nɛ́ bìli pe 'puu nɛ tun ki yafanʔa yiʔɛ mɛ́ gè gàa gī ki líɛrɛ dè nɛ ki gbùʔɔrɔ́ wè.
A pe 'pe wewiile siin líɛ bèle nɛ̀ wáa siʔɛ kàsunnyige kpuʔɔ nī gè.
21 Bìli pe cé kò bèle,
a sunʔɔ fɛ̀vɔli wi 'pe kpúu nɛ́ wi ŋɔsii ní wè,
ŋɔsii tàanwa ŋáà wi 'puu wi mɛ́ nyuɔ nī gè sìɛnwɛ wè;
a sínjiɛnyɛ yi mìɛni 'káa nɛ̀ tín pe kaara nɛ̄ dè.