Tìɛlɛ 18

Babilɔni kàʔa ki tuu wori dè

1 Bà tire 'tóri dè, a mi wáà nyaa cígini, wi tíri nī lè; fànʔa 'puu wi mɛ́ kpuʔɔ. Wi nyíʔɛnimɛ pi kpìɛnmɛ pi 'puu nɛ dàala càanná lè. 2 A wi 'kòkuulo wáa nɛ̀ juu kpuʔɔ nɛ́ jo:

«Ki 'tuu ! Babilɔni kàkpuʔɔ ki 'tuu !

Ki 'kò gbòdolilo súɔndiʔɛ,

nɛ̀ pínɛ ki 'kò yakanʔara felide ti mìɛni kòridiʔɛ,

nɛ́ sínjinʔɛnɛ gálì kiyè nyuɔ gèleʔ ke feligele ke mìɛni kòridiʔɛ,

[yajuuro dáà tiì nyuɔʔ ti felide ti mìɛni kòridiʔɛ], dìi ti 'siɛn biɛn dè.

3 Ki 'nyaa kùlogolo siɛnnɛ feliye yi mìɛni nyɛ́nì wi kanuʔɔrɔ diviɛn gbɛ̀nwɛ gbuɔ wè,

a dàala kùlofɔlilɔ pe 'pe kanuʔɔrɔ kele kpíʔile gèle nɛ́ wi ní.

Nɛ̀ pínɛ lagbɛnrɛ nàbuɔrɔ yē wi nɛ̄, ti sí yē fànʔa ní,

a dàala yasuɔbarilɛ pe 'tire tíʔɛ nɛ̀ pe lɔri caa dè nɛ̀ kò lɔrifɔlilɔ.»

4 A mi ń'nɛ̀ yékpoli láà lúʔu baa nyìʔɛnɛ nī lè a ni 'jo:

«Mi kùlo wuulo, yeri yigi baa wi tiʔɛ nī gè,

gìi ki bé tí yeli fǎga fàri wi nɛ̄ bèri wi kapiʔile kpínʔini gèleʔ,

dí wi wuʔɔgboliyo nyáà yi wi siri yè yi fǎga yeli taaʔ.

5 Nɛ̀ taʔa gíi nɛ̄, wi kapiʔile ke 'taʔala kìye nɛ̄

fúɔ nɛ̀ sɛ́nì nɔ̀ baa nyìʔɛnɛ nī lè.

A Kulocɛliɛ wi sí 'sɔ̀ngi nɛ̀ taa nɛ́ wi kacuʔɔrɔ ní dè.

6 Ye- ki felige núgo gè wi mɛ́ gìi wire tíimɛ 'puu nɛ kpínʔini bìli nɛ̄ bèle,

ye- ki feliye siin kpíʔile wi nɛ̄, gìi wi 'puu nɛ kpínʔini gè.

Wi yagbuɔlɔ níì ní wi 'puu nɛ bìli wuʔu kíri gè nɛ kanʔa wè,

ye- ki feliye siin kíri ye le wi mɛ́.

7 Kɛnmɛ bíì nɛ̄ wi 'puu nɛ wìi nyíɛnɛ wè, níɛ wi lagbɛnrɛ nàbuɔrɔ tìí dè,

ye- wuʔɔgɔ taʔa wi nɛ̄ kpuʔɔ kire felige, wi de fuunmɔ kɔngɔ wáari.

Nɛ̀ taʔa gíi nɛ̄, wi 'puu nɛ ki sɔ̀ngí baa wi fungo nī gè níɛ̀ jo:

‹Mi yē tɛ́niwɛ nɛ ní kùlofɔli, lakicuɔ bɛ̀ʔ mi wèʔ,

nɛ̀ pínɛ mi sì ń'nɛ̀ je ga fuunmɔ kɔngɔ wáa bè nyaa púloʔ.›

8 Kire nɛ̄, wuʔɔgboliyo nyáà yi 'yɛli nɛ́ wi ní yè,

yi bé wi pínɛ bè taa cɛnnugo nī:

kùu nɛ́ fuunmɔ kɔngɔ,

nɛ́ funduuro, nɛ̀ pínɛ wi bága súʔu kàsun nī.

Nɛ̀ taʔa gíi nɛ̄, fànʔa yē Kàfɔli Kulocɛliɛ mɛ́ wè,

wire ŋáà wi 'wi kàyuʔu juu gè.»

9 Duniya kùlofɔlilɔ bílì pe 'kanuʔɔrɔ kpíʔile nɛ́ wi ní wè, nɛ́ cé puu nɛ pe lagbɛnrɛ nàbuɔrɔ ti nàgbuʔɔrɔ kpínʔini dè, pe bága de nyɛni de wi wuʔu yáa gè, a pe kɛ́nì wi sórigi a wírige kiī yɛ̀gí pe ki nyaʔa gè. 10 Pe bága yéri liʔi fíɛrɛ tire kɛnmɛ nɛ̄ bè bɛ̀ wiī nɛ kàlí wè, bé sí de nyu bé jo:

«ʔé, kiī fuunmɔ wuʔu ! ʔé, je kiī fuunmɔ wuʔu !

Cí, kàkpuʔɔ gè, Babilɔni kàʔa gè, ŋɔri kàʔa gè lé !

Kàyuʔu ki 'fali nɛ̀ tuu muɔ nɛ̄ círɛcirɛ mmɛ gè lé ?»

11 Duniya yasuɔbarilɛ pe 'yɛ̀ nɛ nyɛni nɛ fuunmɔ kɔngɔ wáari, ki 'nyaa siɛn sì cé ń'nɛ̀ puu nɛ yafiɛn suu pe yaparirɛ nī dèʔ. 12 Tiɛ tugolo, nɛ́ walifiiwe, nɛ́ lagbɛnrɛ sìndari, nɛ́ kofii, nɛ́ fɛ̀ni cɛ̀nwɛ, nɛ́ kábebe céri fɛ̀ni ŋáà wi nyíʔɛnɛ wè, nɛ́ kɔ̀rimiimɛ fɛ̀ni ŋáà pe ye suwa wè, nɛ́ fɛ̀ni nyìɛwɛ ŋáà wi nyíʔɛnɛ wè, nɛ́ nùdaanna kásɛnrɛ, nɛ́ soli gàanya yakpiʔiligele ní, nɛ́ lagbɛnrɛ tiicɛ̀nrɛ yakpiʔiligele ní gèle, nɛ́ kányiɛrɛ, nɛ́ timɔri, nɛ́ sìndɛnigɛ gáà pe ye mabiri wè, 13 nɛ́ nùdaanna yasuuro dáà pe ye kanɛli wè, nɛ́ yasuʔɔrɔ dáà pe ye amɔmi wè, nɛ́ nùdaanna yɛrɛ, nɛ́ sùnmɔ, nɛ́ wusuna, nɛ́ diviɛn, nɛ́ sùnmɔ, nɛ́ míivuɔnimɔ, nɛ́ , nɛ́ yajuuro tòyo, sìnbaara, suɔnyɔ, nɛ́ suɔnyɔ wotorilo, nɛ́ sùkulolo nɛ̀ fàri siɛnwarilɛ nɛ̄. 14 Ki sí n'gɛ, yɛrɛ díì kúrugu muɔ 'puu nɛ yaʔala dè, ti 'suɔ muɔ mɛ́. Nɛ̀ pínɛ muɔ yacɛ̀nrɛ dè nɛ́ muɔ lɔri ní dè, ti mìɛni ti 'cúʔɔ muɔ kiyɛ nī yè, tiǐ ń'nɛ̀ je ga nyaa cíginiʔ. 15 Yasuɔbarilɛ bílì wi cé kpíʔile a pe 'kò lɔrifɔlilɔ nɛ́ ki yɛrɛ dáà ní dè. Pe bága yéri liʔi fíɛrɛ tire kɛnmɛ nɛ̄ bè bɛ̀ wiī nɛ kàlí wè; bèri nyɛni de yobilo, 16 béri wáa:

«ʔé kapiile ! ʔé kapiile !

Kàkpuʔɔ gè, gàa ki 'puu nɛ lɛn fɛ̀ni cɛ̀nwɛ bururo nii dè,

nɛ́ kábebe céri fɛ̀ni bururo ní dè, nɛ́ dìi ti sî puu nyìɛrɛ dè,

nɛ́ tiɛ wori ní dè, nɛ́ lagbɛnrɛ sìndari ní dè, nɛ́ kofii ní wè !

17 Ki 'nyaa lɔri dáà ti mìɛni ti 'fali nɛ̀ cúʔɔ círɛcirɛ mmɛ gè lé ?»

Kɔ́rikpoliyo yi fɛ̀vɔlilɔ bèle, nɛ́ yasuɔbarilɛ bílì pe nyaari kɔ́riyɔ nī yè, nɛ́ bìli pe baara kɔ́riyɔ nī yè, nɛ́ bìli pe nyɛ́ni pe nyalii tari wè kuʔɔjii luʔɔ nī gè, a pe 'yéri baa liʔi. 18 A pe 'yɛ̀ nɛ kòkuʔulo wáari bà pe 'kàʔa nyaa gè ki sóri níɛ wírigi gè. Pe 'puu nɛ ki nyu níɛ wáa: «Kàʔa gíi ki cé wúɔ nɛ̀ yɛli nɛ́ kàkpuʔɔ ní gè ?» 19 A pe 'yɛ̀ nɛ tárigɛ kunu nɛ wáari pìye nɛ̄ nyùgo nī gè, níɛ kòkuʔulo wáari nɛ nyɛni nɛ fuunmɔ kɔngɔ wáari, níɛ wáa:

«ʔé, kapiile ! ʔé kapiile !

Je kàkpuʔɔ kire gī !

Kuʔɔjii kɔ́rikpoliyofɔlilɔ pe mìɛni bèle,

kàkpuʔɔ kire nī pe 'pe lɔri nìʔɛrɛ taa dè.

Cí ! Kire kàʔa kire gī lé

ki 'kò nɛ waa kpànʔa sɛni mmɛ gè lé ?

20 Nyìʔɛnɛ yo, ma puu fundaanra nɛ̄ ki wori nɛ̄ dè !

Yeli míɛni bèle Kulocɛliɛ wuulo bèle, nɛ́ wi tundunminɔ ní bèle,

nɛ́ ní bèle, ye- puu fundaanra nɛ̄.

Nɛ̀ taʔa gíi nɛ̄, Kulocɛliɛ wi 'kàyuʔu juu gè kàʔa gáà nɛ̄ gè nɛ̀ yeli kɛn.»

21 A nyìʔɛnɛ tundunwɔ wáà, ŋàa wī ŋɔri ní kpuʔɔ wè, a wi 'sìndɛnigbuʔɔ líɛ ki ní bɛ̀ tírɛ sìndɛnigbuʔɔ tíɛlɛ, nɛ̀ ki wáa kuʔɔjii nī wè nɛ́ jo:

«Kayaʔa gáà kire felige ní pe bága Babilɔni kàkpuʔɔ wáa gè !

Kiì ń'nɛ̀ je ga nyaa púlo cígini wīʔ.

22 Gɔrikpuɔnnɔ tùnmɔ, nɛ́ yakpuɔnrɔfɔlilɔ,

nɛ́ maʔanafɔlilɔ, nɛ́ kàkpanʔa wíifɔlilɔ,

tire táà sì ń'nɛ̀ je lúʔu baa muɔ tiʔɛ nī gè cíginiʔ.

Nɛ̀ pínɛ yakpiʔiliwe wáà fáala sì ń'nɛ̀ je nyaa baa muɔ tiʔɛ nī gè cíginiʔ;

tírɛ tùnmɔ míɛni sì ń'nɛ̀ je lúʔu baa muɔ tiʔɛ nī gè cíginiʔ.

23 Fètinnɛ kpìɛnmɛ sì ń'nɛ̀ je nyaa muɔ tiʔɛ nī gè cíginiʔ,

nɛ̀ pínɛ nàgapɔrivɔnwɔ nɛ́ cefɔnwɔ yékpoli sì ń'nɛ̀ je lúʔu muɔ tiʔɛ nī gèʔ.

Nɛ̀ taʔa gíi nɛ̄, muɔ yasuɔbarilɛ peli pe 'puu duniya siɛnkpolilo bèle,

nɛ̀ pínɛ muɔ dìʔɛ kire ki 'siɛnnɛ feliye yi mìɛni fáanni nɛ̀ le kobuunnigo nī gè.

24 Baa muɔ tiʔɛ nī gè, Kulocɛliɛ siɛnjuulo pe sìsiɛn kiī baa,

nɛ́ Kulocɛliɛ wuulo pe sìsiɛn ní gè,

nɛ́ siɛnnɛ bílì pe mìɛni pe 'kpúu dàala nɛ̄ lè.»