Nàjaacuɔ wori dè
17
1 Nyìʔɛnɛ tundunminɔ kɔlisiin nī bèle,
bàli mɛ́ yagbuʔɔlɔ kɔlisiin ke 'puu gèle,
a wàa 'yiri baa pe nī,
nɛ̀ pɛ́ni nyu nɛ́ mi ní nɛ́ jo:
«Te báan náʔa,
m'bé pa ki tìɛ muɔ nɛ̄ kàyuʔu gáà ki je ga tuu nàjaacuɔ nɛ̄ wè,
wi míʔɛ ki 'yiri tiɛyɛ yi mìɛni nī yè,
wiī tɛ́niwɛ lakpoliyo nɛ̄ yè.
2 Dàala kùlofɔlilɔ pe 'pe kanuʔɔrɔ kpíʔile dè nɛ́ ki nàjaacuɔ ŋáà ní wè,
a dàala wuulo pe 'kanuʔɔrɔ diviɛn gbuɔ wè nɛ̀ tín nɛ́ wi ní.»
3 A nyìʔɛnɛ tundunwɔ wi 'mi yiʔɛ múgu gè,
a mi 'mìɛ nyaa waama tiʔɛ káà nī.
A mi sɛ́nì cɛliwɛ wáà nyaa tɛ́niwɛ nyàʔayɛgɛ káà nɛ̄;
ki 'puu nyìʔɛ níɛ nyíʔɛnɛ.
Kulocɛliɛ míɛcuʔɔgɔ míɛyɛ yi 'puu ki nɛ̄ nɛ̀ ki tɔ́n nɛ̀ màʔa,
nyùyɔ kɔlisiin ní ki nɛ̄,
nɛ́ nyɛgɛlɛ kiɛ ní.
4 Cɛliwɛ ŋáà wi cé yɛrɛ le kábebe céri wori,
tàa ní nyìɛrɛ kpólokpolo;
nɛ́ wìi fèri nɛ́ tiɛ ní,
nɛ́ lagbɛnrɛ yatoro ní,
nɛ́ kofii ní wè.
Tiɛ yagbuɔlɔ láà 'puu wi mɛ́ còlo,
ni 'puu nyìnɛ tètii yɛrɛ nɛ́ kanuʔɔrɔ fuɔnrɔ ti yɛrɛ ní dè.
5 Míʔɛ káà 'puu sɛbɛgɛ wi mɛ́ gbɛlɛ nɛ̄ lè,
kalarilɛ míʔɛ gī,
ki 'jo:
«Babilɔni kàkpuʔɔ,
nàjaacɛlilɛ nɛ́ dàala tètii yɛrɛ
ti yàa wè.»
6 Mi cé cɛliwɛ ŋáà nyaa wè wi ní gbuɔdinwɛ Kulocɛliɛ wuulo pe sìsiɛn nɛ̄ gè,
peli nɛ́ Zezi wori ti juufɔlilɔ sìsiɛn ní gè.
A ki 'tɔ̀ni nɛ̀ mi fungo wúɔ kpuʔɔ bà mi 'wi nyaa wè.
7 A nyìʔɛnɛ tundunwɔ wi 'mi yɛ:
«Gáa nɛ̄ muɔ 'ki yaʔa a ki 'fungo wúɔ muɔ nī ?
Cɛliwɛ ŋáà wè nɛ́ nyàʔayɛgɛ gáà nɛ̄ wi yē tɛ́niwɛ wè,
nyùyɔ kɔlisiin nɛ́ nyɛgɛlɛ kiɛ nyàʔayɛgɛ gè,
m'bé pe kalarilɛ juu lè muɔ mɛ́.
8 Nyàʔayɛgɛ gáà muɔ 'nyaa gè,
ki yé puu,
ki sí ní wè tíinʔ.
Píra ŋáà nī wè,
ki bé sí yiri láʔalafun kàtiʔɛ nī gè bé sí kɛ́ cúʔɔgoligo nī wī.
«Dàala wuulo pe béri cúru ki wori nɛ̄ dè,
peli bálì bèle pe míɛyɛ yi wè baa sɛbɛyɛ sìi sɛbɛ nī wèʔ nɛ̀ líɛ bà duniya wi 'faan wè.
Pe béri cúru nyàʔayɛgɛ ki nyaʔa nɛ̄ gè,
nɛ̀ taʔa gíi nɛ̄,
ki 'puu bile,
nɛ́ sí kɛ́nì yē ki ní wè bileʔ,
nɛ̀ sí ki taa ki bé ní ga pɛn.
9 «Náʔa gè,
siɛn 'yɛli wi- puu síciliwe wi siɛnrɛ dáà ti kɔri cɛ́n wè:
nyùyɔ kɔlisiin yè,
nyaguruyo kɔlisiin yī,
yire nɛ̄ cɛliwɛ wi yē tɛ́niwɛ wè.
Kùlofɔlilɔ kɔlisiin bīɛlɛ nɛ̀ pínɛ.
10 Pàli kogunɔ nyɛ́nì tuu pe nī,
wàa nigbe nɛ tíin baa,
ŋìi sɛnwɛ wiì fìɛ pɛnʔ.
A wi kɛ́nì pɛn wè,
wiǐ je mɔgɔʔ,
lɛ̀lɛ cɛ̀ri wi bé kúɔ.
11 «Nyàʔayɛgɛ gíì ki cé kíni nɛ̀ puu gè,
nɛ́ kɛ́ni yē ki ní wè baa gèʔ,
kire gī kùlofɔli kataanriwuu wè nɛ́ ní baa kɔlisiin nī bèle,
ki sí yē nɛ waa cúʔɔgoligo nī wī.
12 «Nyɛgɛlɛ kiɛ gálì muɔ 'nyaa gèle,
kùlofɔlilɔ kiɛ bīɛlɛ;
piyè fìɛ tɛ́ni kùlofɔligɔ nɛ̄ gèʔ.
Nɛ̀ sí ki taa pe bága liɛri nigbe taa bè puu fànʔa nɛ̄ gè bɛ̀ kùlofɔlilɔ tíɛlɛ nɛ́ nyàʔayɛgɛ ní gè.
13 Peli bèle,
pe 'pe wuʔu cáan gè nigbe nɛ̄:
pe ŋɔri dè nɛ́ pe fànʔa ní gè,
bè ti kɛn nyàʔayɛgɛ mɛ́ gè.
14 Pe bága tuu kapiɛnnɛ nɛ̄ nɛ́ Sìnbapile ní lè;
Sìnbapile ni bé sí pe jáa.
Nɛ́ ki cɛ́n wire wī kàfɔlilɔ pe Kàfɔli wè,
nɛ́ kùlofɔlilɔ pe Kùlofɔli wè.
Nɛ̀ pínɛ bìli bīɛlɛ nɛ́ wi ní bèle,
bàli wi 'yeri bèle nɛ́ bìli wi 'nyíɛnɛ nɛ̀ kɔ̀n bèle,
nɛ̀ fàri bìli bīɛlɛ tɛ́ngɛmɛ siɛnnɛ bèle,
pe bé 'kapiɛnnɛ jáa lè nɛ́ wi ní.»
15 A nyìʔɛnɛ tundunwɔ wi ń'nɛ̀ mi yɛ:
«Luɔyɔ nyáà muɔ 'nyaa yè,
á nàjaacuɔ ní wè tɛ́niwɛ yi nɛ̄ yè,
kùlogolo gīɛlɛ nɛ́ siɛnniʔɛmɛ ní,
siɛnfeliye yī nɛ́ siɛnrɛ felide ní.
16 Nyɛgɛlɛ kiɛ gálì muɔ 'nyaa gèle,
nɛ́ nyàʔayɛgɛ ní gè,
nàjaacuɔ wi bága pe biɛn,
pe bé wi kari bè wáa bè wi yɛrɛ fòlilo dè wi nɛ̄ wi- kò fòribiɛ.
Pe bága wi kaara káa dè bé sí sɛnrɛ sórigo dè kàsun nī.
17 Ki 'nyaa Kulocɛliɛ wi 'ki le pe funyɔ nī yè pe wire nyɛ́ni kaala kúɔ lè;
pe bé pe funyɔ cáan yè nigbe nɛ̄ bé pe fànʔa kɛn gè nyàʔayɛgɛ mɛ́ gè,
fúɔ bè taa Kulocɛliɛ siɛnrɛ ti pa fori.
18 «Cɛliwɛ ŋíì sí muɔ 'nyaa wè,
kàkpuʔɔ kire gī,
kire ki nyɛ́ni fànʔa kpúɔn dàala kùlofɔlilɔ nɛ̄ bèle.»