Kulocɛliɛ funyɛrigɛ yagbuʔɔlɔ gèle
16
1 A mi 'juumɔ páà lúʔu baa Gbùʔɔrɔsaʔa nī gè,
a ki 'juu kpuʔɔ nɛ́ nyìʔɛnɛ tundunminɔ kɔlisiin ní bèle nɛ́ pe yɛ:
«Yeri waa ye sa Kulocɛliɛ funyɛrigɛ yagbuʔɔlɔ kɔlisiin sùʔu gèle ye wo dàala nɛ̄ lè !»
2 A péliwe wi 'kɛ́ nɛ̀ sɛ́nì wi wuʔu sùʔu gè nɛ̀ wo dàala nɛ̄ lè,
a ki 'yiʔɛ nɛ̀ kò fìnibiʔi siɛnnɛ nɛ̄ bèle,
bìli nɛ̄ nyàʔayɛgɛ ki fìɛ wi 'puu bèle,
á pe ní nɛ tun nɛ yiɛyɛ cúbulo yè nɛ ki yafanʔa gbùʔɔrɔ́ gè gàa gī wi liɛrɛ dè.
3 A nyìʔɛnɛ tundunwɔ siinwuu wi sɛ́nì wi yagbuɔlɔ sùʔu lè nɛ̀ le kuʔɔjii nī wè,
a ki 'yiʔɛ nɛ̀ kò sìsiɛn bɛ̀ kpúu sìsiɛn tíɛlɛ.
A yawiʔile ke mìɛni 'kùu baa kuʔɔjii nī wè.
4 A taanriwuu wi 'wi yagbuɔlɔ sùʔu lè nɛ̀ le lakoliyo nī yè nɛ́ luɔyɔ yi lawiʔile ní gèle,
a ki 'yiʔɛ nɛ̀ kò sìsiɛn.
5 Nyìʔɛnɛ tundunwɔ ŋáà wi 'puu luʔɔ kàfɔli wè,
a mi 'lúʔu wi mɛ́ a wi 'jo:
«Muɔ yē sìɛnwɛ,
muɔ ŋáà wī baa wè,
nɛ́ kíni yē baa,
nɛ́ ní tiɛlɛ fùn wè,
bà muɔ 'kele gálì
ke kàyuʔu juu gè.
6 Ki 'nyaa
peli pe 'Kulocɛliɛ wuulo
kpúu bèle nɛ́ siɛnjuulo ní bèle.
A muɔ sí pe sìsiɛn kɛn gè
pe mɛ́ pe- ki gbuɔ,
kire ki 'yɛli nɛ́ pe ní.»
7 A mi 'lúʔu gbùʔɔrɔdiʔɛ yafanʔa mɛ́ gè a ki 'jo:
«ʔaan Kàfɔli Kulocɛliɛ,
muɔ wī Fànʔa ki mìɛni Kàfɔli wè.
Muɔ nɛ kàyuuyo nyu yè
nɛ́ kányiʔɛ ní,
muɔ nɛ̂ ki juu ki nɛ̂ sìɛn.»
8 A nyìʔɛnɛ tundunwɔ sicɛriwuu wi 'wi yagbuɔlɔ sùʔu lè nɛ̀ wo cɛngɛ nɛ̄ gè,
a kire 'ki kɛn a ki gbɛ́nɛ siɛnnɛ sórigi bèle nɛ́ ki kàsun ní gè.
9 A siɛnnɛ pe 'súʔu kpuʔɔ,
a pe 'yɛ̀ nɛ nyu nɛ Kulocɛliɛ míʔɛ córi gè,
wire ŋáà mɛ́ fànʔa ki yē a wi 'ki wuʔɔgboliyo nyáà jáa yè.
Piyè pe funyɔ yiʔɛ yèʔ bé sí kpuʔɔrɔ taʔa Kulocɛliɛ nɛ̄ wèʔ.
10 A kogunɔwuu wi 'wi yagbuɔlɔ sùʔu lè nɛ̀ wo nyàʔayɛgɛ ki kùlofɔlilɔ kácunʔɔ nɛ̄ gè,
a ki kùlofɔligɔ ki 'kò yebilige,
a siɛnnɛ pe 'yɛ̀ nɛ pe nyigele nɔgi gèle bà ki yáʔa ki cé cíi pe nɛ̄ bèle.
11 A pe 'yɛ̀ nɛ siɛncuʔɔrɔ nyu nɛ nyìʔɛnɛ Kulocɛliɛ wi míʔɛ córi gè pe yayaara tire kɛnmɛ nɛ̄ bè,
nɛ́ pe fìnide ní dè;
piyè fɔ̀li nɛ̀ pe funyɔ yiʔɛ yè nɛ̀ láʔa pe kakpiʔiligele nɛ̄ gèleʔ.
12 A nyìʔɛnɛ tundunwɔ kɔliniwuu wi 'wi yagbuɔlɔ sùʔu lè nɛ̀ le Efirati cáʔa nī gè,
a ki luʔɔ ki 'lìri,
gìi ki bé tí kùlofɔlilɔ bílì pe yɛ̀gí cɛngɛnyɛnifoligɔli mɛ́ gè pe- tóridiʔɛ taa.
13 A mi 'gbòdolilo taanri nyaa pe ni bɛ̀ kpìile tíɛlɛ,
a pe 'yiri yapiʔi ki nyuɔ nī gè,
nɛ́ nyàʔayɛgɛ nyuɔ nī gè,
nɛ́ jànvaa siɛnjuuwo wi nyuɔ nī gè.
14 Ki 'nyaa gbòdolilo bīɛlɛ,
piyē nɛ fìɛlɛ kpínʔini,
nɛ́ sí nɛ waa dàala kùlofɔlilɔ kúrugu bèle nɛ pe pínɛ níɛ cɛngbuʔɔ siri gè,
kapiɛnnɛ cɛngɛ gè.
Fànʔa ki mìɛni Kàfɔli Kulocɛliɛ wi cɛngɛ kire gī.
15 Kàfɔli wi 'jo:
«Nyaa,
m'bága pɛn bɛ̀ kàyuuwo cî siɛn fuu mmɛ.
A siɛn ŋíì yē nyɛwɛ nɛ́ kò nɛ́ wi bururo ní dè,
kire siɛn wi wuʔu kiī tànʔa,
nɛ́ ki cɛ́n wiǐ de tári bè puu yalere fùnʔ peri wi fìɛrɛ tiʔɛ nyaʔa gèʔ.»
16 A gbòdolilo pe sɛ́nì dàala kùlofɔlilɔ pínɛ bèle tiʔɛ gíì nī pe ye eburu siɛnrɛ nī dè Arimagedɔna wè.
17 A nyìʔɛnɛ tundunwɔ kɔlisiinwuu wi 'wi yagbuɔlɔ sùʔu lè nɛ̀ wáa káfaligɛ nī gè,
a yékpoli láà 'juu kpuʔɔ baa Gbùʔɔrɔsaʔa nī gè,
baa ni cé kɔ́n kùlofɔlilɔ kácunʔɔ tiʔɛ nī gè nɛ́ jo:
«Ki 'kpíʔile nɛ̀ kúɔ !»
18 A nyìʔɛnɛ ni 'nyíʔɛnɛ,
a tùnmɔ páà 'tun,
a kàsakpɛnigɛ ki 'kpɛ̀ni nɛ̀ taʔala,
a dàala ni 'cúngo kpuʔɔ,
dàala niì fìɛ cúngo kpuʔɔ nɛ̀ nyaa kire felige mmɛ gèʔ nɛ̀ líɛ bɛ̀ siɛnnɛ piyē bile duniya nī wèʔ.
19 A kàkpuʔɔ ki 'wáligi tiɛyɛ taanri,
a kùlogolo ke kàaya yi 'tuu nɛ̀ màʔa.
A Kulocɛliɛ wi 'sɔ̀ngi nɛ̀ taa nɛ́ Babilɔni kakpuʔɔ kɛnmɛ nī bè,
a wi 'wi funyɛrigɛ diviɛn yagbuɔlɔ kɛn lè ki mɛ́ a ki 'gbuɔ.
20 A luʔɔ sunʔɔmɔ dàʔala ke mìɛni 'fɛ̀,
a nyaguruyo yi 'pùunni.
21 A kàsasindari kpolido táà 'tìgi nyìʔɛnɛ nī lè nɛ̀ tuu siɛnnɛ nɛ̄ bèle,
ti sìlubumɔ pi 'puu nɛ waa bè culolo togosiin kúɔ ki nigbe gè.
A pe 'yɛ̀ nɛ nyu nɛ Kulocɛliɛ míʔɛ córi gè,
kàsasindari dáà tire wuʔɔgbuʔɔ kɛnmɛ nɛ̄ bè.
Ki 'nyaa ki wuʔɔgbuʔɔ gáà ki 'tɔ̀ni nɛ̀ puu sìpiʔi kátii.