22
1 A nyìʔɛnɛ tundunwɔ wi 'sìi luʔɔ cáʔa tìɛ gè mi nɛ̄.
Ki 'puu nɛ nyíʔɛnɛ cìilige nɛ wéli nɛ sùurí,
níɛ kɛ́ngi nɛ yigi kùlofɔlilɔ kácunʔɔ nī gè,
Kulocɛliɛ wuʔu gè nɛ́ Sìnbapile ní lè,
2 nɛ fúu kàʔa ki kogbuʔɔ sunʔɔmɔ nī bè.
Sìi tiigea káà 'puu baa cáʔa ki kayɔbiyɔ siin nɛ̄ yè,
nɛ sɛngi sɛngɛlɛ kiɛ nɛ́ siin;
yege ó yege ki nɛ̂ sɛn,
nɛ̀ pínɛ ki wɛrɛ tiī nɛ kùlogolo siɛnnɛ gbari bèle.
3 Yakaa fáala sì ń'nɛ̀ je puu baa dɛ́ngɛ yɛgɛʔ.
Kulocɛliɛ nɛ́ Sìnbapile pe kùlofɔlilɔ kácunʔɔ gè,
kire ki bé puu baa,
dí Kulocɛliɛ wi baakuɔlɔ pe sí de wi gbùʔɔrigɔ kele kúu gèle.
4 Pe bé wi yiʔɛ nyaa gè,
nɛ̀ pínɛ wi míʔɛ ki bé puu sɛbɛgɛ pe gbɛgɛlɛ nɛ̄ gèle.
5 Pìlige sì ń'nɛ̀ je puu baaʔ,
nɛ̀ pínɛ pe màakuu sì ń'nɛ̀ je puu fètinnɛ kpìɛnmɛ nɛ̄ʔ nɛ́ cɛngɛ kpìɛnmɛ níʔ.
Ki 'nyaa Kàfɔli Kulocɛliɛ wire wi béri kpìɛnmɛ cáanri bè wi baakuɔlɔ bálì nɛ̄ bèle,
dí pe sí puu fànʔa nɛ̄ gè súuri lɛ̀gɛlɛ ke mìɛni nī.
Ki 'kò cɛ̀ Zezi wi bé pɛn
6 A nyìʔɛnɛ tundunwɔ wi 'mi yɛ:
«Siɛnrɛ dáà ti 'yɛli nɛ́ tɛ́ngɛlɛ ní,
tiī kányiʔɛ.
Kàfɔli wè,
siɛnjuulo pe pígele Kulocɛliɛ wè,
wi 'wi nyìʔɛnɛ tundunwɔ tórigo wè wi- pa ki tìɛ wi baakuɔlɔ nɛ̄ bèle dí ki 'kò cɛ̀ kele gílì ke 'yɛli bè tóri gèle.»
7 A Zezi wi 'jo:
«Ma sí ti lúʔu,
ki 'kò cɛ̀ m'bé pɛn.
Siɛn ŋíì wi 'Kulocɛliɛ kajuulo siɛnrɛ cò dè,
dàa dī náʔa sɛbɛ ŋáà nī wè,
wire wuʔu kiī tànʔa.»
8 Mi Zan wè,
mi mi 'kele gálì lúʔu gèle,
nɛ́ ke nyaa nɛ̀ pínɛ.
Bà sí mi 'ti lúʔu nɛ́ ti nyaa dè,
nyìʔɛnɛ tundunwɔ ŋáà wi 'puu nɛ ki kele gálì tìí gèle mi nɛ̄ gèle,
a mi 'tìgi nɛ̀ yiʔɛ cúbulo wi yiʔɛ mɛ́ gè bè wi gbùʔɔrɔ.
9 A wi 'mi yɛ:
«Fǎga ki puu bɛ̀ʔ,
mi yē baakuɔwɔ bɛ̀ muɔ tíɛlɛ,
nɛ́ bɛ̀ muɔ siinyɛninɛ tíɛlɛ bèle bìli bīɛlɛ Kulocɛliɛ siɛnjuulo bèle,
nɛ́ bìli ní pe 'tári sɛbɛ ŋáà wi siɛnrɛ nɛ̄ dè.
Te Kulocɛliɛ wire gbùʔɔrɔ́ !»
10 A wi ń'nɛ̀ mi yɛ:
«Kulocɛliɛ kajuulo siɛnrɛ dáà dī sɛbɛ ŋáà nī wè,
fǎga ti làrigɛʔ,
ma ki cɛ́n lɛ̀lɛ ni 'kò túɔn wī.
11 Siɛn ŋáà wī koliwo wè,
wi- kàa taʔa wi kolimɔ nɛ̄ bè;
ŋìi wi nyɛ́ni wìi nɔ́ri wè,
wi- ní kàa taʔa wi núʔɔmɔ nɛ̄ bè.
Ŋìi wī sínwɛ wè,
wi- ní kàa taʔa wiri sínmɛ kakpiʔiligele kúu.
Ŋìi wī Kulocɛliɛ wuu wè,
wi- yiʔɛ le wi- wìi wàli wi tɛ́ngɛ Kulocɛliɛ mɛ́ wè.»
12 A Zezi wi 'jo:
«Ma ti lúʔu,
ki 'kò cɛ̀ m'bé pɛn.
Sàri ŋáà mi bága kɛn wè,
wiī náʔa mi mɛ́ bè kɛn siɛn ó siɛn mɛ́ bè yɛli nɛ́ wi kakpiʔiligele ní gèle.
13 Mi wī Alifa wè nɛ́ Omega wè,
péliwe wè nɛ́ sɛnwɛ wè,
sélimɛ bè nɛ́ láʔala lè.
14 «Bìli pe nyɛ́ni pe burugboliyo jíri yè bé sí taa bè pe liɛlɛ taa lè sìi tiige nī gè,
nɛ̀ pínɛ bé sí taa bè tóri kɔ̀riyɔ nī yè bè jíin kàʔa nī gè wè,
peli wuʔu kiī tànʔa.
15 «Pɔ̀nminɔ bèle,
nɛ́ dìɛlɛ ní bèle,
nɛ́ kanuʔɔrɔfɔlilɔ ní bèle,
nɛ́ siɛnkpuulo ní bèle,
nɛ́ yasunzunminɔ ní bèle,
nɛ́ bìli pe mìɛni bīɛlɛ káfinɛrɛ ti 'pe dɛ́ni á piyē nɛ ti tári dè,
peli yē baa kpànʔanɛ.
16 «Mi Zezi wè,
mi 'mi nyìʔɛnɛ tundunwɔ tórigo wè wi- sa kele gálì juu gèle yeli mɛ́ tɛ́ngɛfɔlilɔ gbuʔulo ke wori nɛ̄ dè.
Mi wī Dawuda siimɛ wuu wè nɛ́ ní wi saʔa tùlugo wuu wè;
mi wī kpìɛnduumɛ ŋɔnɔ̀.»
17 Kulocɛliɛ Pìle lè nɛ́ cefɔnwɔ ní wè,
pe 'jo:
«Te báan !»
Ŋìi míɛni wi ti lúru dè,
wi- jo:
«Te báan !»
A luʔɔwuʔɔ yē ŋìi nɛ̄,
wiri báan.
A ŋìi nɛ ki caa bè gbuɔ wè,
wi- pa sìi luʔɔ suɔ gè waʔanɛ.
Ki 'kò cɛ̀ Kàfɔli wi bé pɛn
18 M'bé sí ki juu bè láʔa,
siɛn ó siɛn wi nyɛ́ni Kulocɛliɛ kajuulo siɛnrɛ dáà lúru dè,
dàa dī náʔa sɛbɛ ŋáà nī wè,
a siɛn 'tàa taʔa ti nɛ̄ dè,
Kulocɛliɛ bága wuʔɔgboliyo taʔa ki siɛn nɛ̄ wè,
wuʔɔgboliyo nyáà yī baa sɛbɛyɛ sɛbɛ ŋáà nī wè.
19 A siɛn sí ń'nɛ̀ tàa yige Kulocɛliɛ kajuulo siɛnrɛ dáà nī dè,
dàa dī sɛbɛ ŋáà nī wè,
Kulocɛliɛ bága wi liɛlɛ yige lè sìi tiige nī gè,
nɛ́ kàʔa wàlidɛngɛgɛ nī gè bè pínɛ,
tire dáà dī baa sɛbɛrɛ sɛbɛ ŋáà nī wè.
20 Ŋàa wi nyɛ́ni kele gálì nyu gèle nɛ láʔala wè,
wi 'jo:
«ʔaan,
ki 'kò cɛ̀ m'bé pɛn.»
Ki- taa ki puu bɛ̀ !
Te báan,
Kàfɔli Zezi !
21 Kàfɔli Zezi wi kpuʔɔrɔ ti- puu siɛnnɛ pe mìɛni nɛ̄.