Yajuupiʔi nɛ́ nyàʔayɛgɛ ní gè
13
1 A mi 'yajuʔu káà nyaa ki yigi kuʔɔjii nī wè.
Ki 'puu nɛ́ nyɛgɛlɛ kiɛ ní,
nɛ́ nyùyɔ kɔlisiin ní;
kùlofɔlilɔ ndɔ̀nyɔ kiɛ 'puu ki nyɛgɛlɛ nɛ̄ gèle.
Kulocɛliɛ míɛcuʔɔgɔ míɛyɛ 'puu ki nyùyɔ nɛ̄ yè.
2 Nyàʔayɛgɛ gíì mi cé nyaa gè,
ki 'puu bɛ̀ sàndiɛn tíɛlɛ,
ki tɔliyɔ yi 'puu bɛ̀ kàdafiige woyo tíɛlɛ,
ki nyuɔ ní gè bɛ̀ jàri nyuɔ tíɛlɛ.
A yapiʔi ki 'ki ŋɔri kɛn dè nɛ́ ki kùlofɔlilɔ kácunʔɔ ní gè nyàʔayɛgɛ mɛ́ gè,
nɛ̀ fànʔa kɛn nyàʔayɛgɛ mɛ́ gè kpuʔɔ.
3 Ki nyùgo káà nigbe 'puu majo pe cé ki kɔni bè ki kpúu wī,
nɛ̀ sí ki taa a ki nɔmigɔ ki 'koli nɛ̀ puʔɔ.
A dàala wuulo pe mìɛni 'yɛ̀ nɛ cúru nyàʔayɛgɛ gáà nɛ̄ gè,
nɛ́ taʔa ki kúrugu.
4 A pe 'tìgi nɛ̀ yiɛyɛ cúbulo yè nɛ yapiʔi gbùʔɔrɔ́ gè,
bɛ̀ ki cé fànʔa kɛn gè nyàʔayɛgɛ mɛ́ gè.
A pe sɛ́nì tìgi nɛ̀ yiɛyɛ cúbulo yè nɛ̀ pínɛ nyàʔayɛgɛ ki yiʔɛ mɛ́ gè níɛ nyu nɛ́ jo:
«Ŋáasiɛn wi bé gbɛ̀ wúɔ bè yɛli nɛ́ nyàʔayɛgɛ ní gè ?
Ŋáasiɛn wi bé gbɛ̀ cáan nɛ́ ki ní ?»
5 A nyàʔayɛgɛ ki 'larigɛ taa nɛ nyu nɛ̀mɛ ní,
nɛ Kulocɛliɛ míɛ cuʔɔgɔ wori nyu ki nyuɔ nī gè.
Ki cé fànʔa taa nɛ ki kele kúu gèle fúɔ nɛ̀ taa yeye togosiin nɛ́ siin.
6 A ki 'ki nyuɔ múgu gè nɛ Kulocɛliɛ míɛcuʔɔgɔ siɛnrɛ nyu dè,
nɛ wi míʔɛ córi gè nɛ́ wi kòridiʔɛ ní gè,
nɛ́ bìli bīɛlɛ baa kòrilo nyìʔɛnɛ nī lè.
7 A nyàʔayɛgɛ ki 'larigɛ taa nɛ kapiɛnnɛ kpúɔn Kulocɛliɛ wuulo nɛ̄ bèle nɛ̀ pe jáa.
A pe 'fànʔa kɛn gè ki mɛ́ ki de fànʔa kpúɔn siɛnnɛ feliye yi mìɛni nɛ̄,
kùlogolo ke mìɛni nɛ̄,
siɛnrɛ felide ti mìɛni nɛ̄,
nɛ́ duniya siɛnfeliye yi mìɛni nɛ̄ yè.
8 Dàala wuulo pe mìɛni pe béri ki gbùʔɔrɔ́,
siɛn ó siɛn ŋáà wī nɛ̀ líɛ bà duniya wi 'séli wè,
siɛn wi míʔɛ ki wè baa sɛbɛgɛ Sìnbapile ni sìi sɛbɛ nī wèʔ,
Sìnbapile náà pe 'kpúu lè.
9 A ngbúʔulo yē ŋìi nɛ̄,
wi- ti lúʔu !
10 A siɛn ŋíì sìi kɛ́nì nyaa wi 'yɛli pe- wi cò bè kɛ́ wè,
pe bé wi cò bè kɛ́ wī;
a ŋìi yē ŋɔsii ga wi kpúu wè,
ŋɔsii wi bága wi kpúu.
Kulocɛliɛ wuulo pe kpàricogo nɛ́ pe tɛ́ngɛlɛ tiɛlɛ lire nī nàa lè.
Nyàʔayɛgɛ gáà ki 'yiri dàala nī lè
11 A mi ń'nɛ̀ nyàʔayɛgɛ káà nyaa ki yigi dàala nī lè.
Ki 'puu nɛ́ nyɛgɛlɛ siin ní bɛ̀ sìnbapile tíɛlɛ,
á ki ní nɛ nyu bɛ̀ yapiʔi tíɛlɛ.
12 Ki 'puu nɛ nyàʔayɛgɛ pélige ki fànʔa kakpiʔiligele feligele ke mìɛni kúu ki 'nyaamɛ nɛ̄ bè,
nɛ́ sí nɛ dàala wuulo cɔ̀rí bèle peri nyàʔayɛgɛ pélige gbùʔɔrɔ́ gè,
gàa ki 'puu nɔmigɔ ní gè nɛ waa bè kùu wè,
nɛ́ sí kɛ́nì puʔɔ gè.
13 A ki 'yɛ̀ nɛ kanyuʔɔnigɔlɔ kpoliyo kpínʔini,
fúɔ nɛ̀ cɛ́ni kàsun tìrigí nyìʔɛnɛ nī lè nɛ cáanri dàala nɛ̄ lè,
siɛnnɛ pe ki nyaʔa.
14 Kiī nɛ dàala wuulo fáanni bèle nɛ́ ki kanyuʔɔnigɔlɔ ní gèle gàli kiī nɛ kpínʔini nyàʔayɛgɛ ki yiʔɛ mɛ́ gè,
níɛ ki nyu dàala wuulo mɛ́ bèle dí pe- jènyinɛ yafanʔa káà kpíʔile nyàʔayɛgɛ mɛ́ gè gàa gī nɛ́ ŋɔsii luɔdiʔɛ ní gè nɛ́ sí ní wiʔi gè.
15 A nyàʔayɛgɛ siinwuʔu ki 'jáa nɛ̀ sìi nyɔ́gɔ nyàʔayɛgɛ pélige ki jènyinɛ yafanʔa nī gè,
kire míɛni ki gbɛ̀ri nyu,
nɛ̀ pínɛ a siɛn ŋíì wè nyàʔayɛgɛ ki jènyinɛ yafanʔa gbùʔɔrɔ́ gèʔ,
nyàʔayɛgɛ jènyinɛ yafanʔa ki- ki siɛn kpúu wè.
16 A nyàʔayɛgɛ siinwuʔu ki 'pe mìɛni cɔ̀ri fànʔa,
yìrile yo,
kpolilo yo,
lɔrifɔlilɔ yo,
fɔ̀ngɔfɔlilɔ yo,
bàli bīɛlɛ pìye mɛ́ yo,
bàli bīɛlɛ sùkulolo yo,
nɛ́ jo pe- fìɛ tɛ́ngɛ pe kàliige kɔli nɛ̄ gè á kire 'laa gbɛlɛ nɛ̄ lè.
17 Gìi ki bé tí siɛn fǎga gbɛ̀ yakaa suɔʔ,
bé nɛ́ ga jo bè yaparigɛ páriʔ,
fúɔ macɛn a fìɛ ŋáà wiī siɛn nɛ̄ wè,
kire 'jo nyàʔayɛgɛ ki míʔɛ gè,
á kire 'laa ki míʔɛ ki tɔ́rilɔ nyuɔ gè.
18 Sìnjilige ki tiʔɛ kire gī náʔa gè:
a ŋìi yē síciliwe,
siɛn wi- nyàʔayɛgɛ ki nyuɔ tɔ́ri gè,
siɛn wi bé gbɛ̀ ki tɔ́rilɔ nyuɔ wi kɔri cɛ́n wè.
Ki tɔ́rilɔ nyuɔ kiī nɛ siɛn míʔɛ kɛnmɛ tìí;
ki nyuɔ kiī sirataanri togotaanri nɛ́ kɔlini (666).