Cɛliwɛ wori dè nɛ́ yapiʔi ní gè
12
1 A fìɛkpuɔwɔ wáà 'yiri baa nyìʔɛnɛ nī lè !
Cɛliwɛ wáà cé cɛngɛ le gè wìi nɛ̄ burugo,
á yege ní gè wi tɔliyɔ láara yè,
ŋɔgɔlɔ kiɛ nɛ́ siin kpuʔɔrɔ ndɔ̀ngɔ 'puu wi nɛ̄ nyùgo nī gè.
2 Laala 'puu wi nɛ̄,
a cesiʔi liyɛ yi 'yɛ̀ wi mɛ́ nɛ wi yáa;
wi kòkuulo wáari;
3 A fìɛkpuɔwɔ wáà ń'nɛ̀ yiri baa nyìʔɛnɛ nī lè:
yapiʔi káà ki 'puu,
kpuʔɔ nɛ́ ní nyìʔɛ.
Ki 'puu nɛ́ nyùyɔ kɔlisiin ní,
nyɛgɛlɛ kiɛ ní ki nɛ̄,
kùlofɔlilɔ ndɔ̀nyɔ kɔlisiin 'puu ki nyùyɔ nɛ̄ yè.
4 Ki nɛgɛ ki 'puu nɛ nyìʔɛnɛ ŋɔgɔlɔ ke tílaya taanri tiʔɛ nigbe wuʔulo píi gèle nɛ wáari dàala nɛ̄ lè.
A yapiʔi ki 'yéri cɛliwɛ wi yiʔɛ mɛ́ gè ŋàa wi yé je sii wè,
níɛ siri a wi 'wi pùɔ sii wè,
dí kire sí wi cò bè káa.
5 A cɛliwɛ wi 'nàgabile sii,
wire wi je ga kùlogolo siɛnnɛ pe mìɛni nàʔa nɛ́ timɔri kàgbiile nía.
A pe 'pùɔ fàa wè nɛ̀ líɛ nɛ̀ kɛ́ nɛ́ wi ní Kulocɛliɛ kúrugu wè baa wi kùlofɔlilɔ kácunʔɔ mɛ́ gè.
6 A cɛliwɛ wire 'fɛ̀ nɛ̀ kɛ́ waama kùlo nī.
Kulocɛliɛ wi cé tiʔɛ káà gbòbori wi mɛ́ baa,
wi sari taʔa de líi baa kire tiʔɛ nī gè bè taa cɛnyɛ sirakɔlini nɛ́ cɛnyɛ togotaanri (1 260).
7 A kapiɛnnɛ kɛ́ni yɛ̀ baa nyìʔɛnɛ nī lè:
Mikayɛli nɛ́ wi nyìʔɛnɛ tundunminɔ ní bèle pe 'puu nɛ túngu nɛ́ yapiʔi ní gè.
Yapiʔi míɛni gè nɛ́ ki tundunminɔ ní bèle pe ní ki kapiɛnnɛ nɛ̄ lè.
8 Yapiʔi kiì kɛ́nì jáa kapiɛnnɛ nɛ̄ lèʔ.
Tiʔɛ sì cé ń'nɛ̀ puu pe mɛ́ baa nyìʔɛnɛ nī lèʔ.
9 A pe 'yapiʔi kpuʔɔ cìra gè.
Kire gī wɔ̀biliʔɛb gè,
pe ki ye gbòdolilo kàfɔli wè nɛ́ Setɛni wè.
Wire wi nyɛ́ni duniya wuulo pe mìɛni fáanni nɛ pe pùunní,
a pe 'wi cìra nɛ̀ tìrige dàala nɛ̄ lè nɛ́ wi tundunminɔ ní bèle.
10 A mi 'yékpoli láà lúʔu baa nyìʔɛnɛ nī lè,
a ni 'juu kpuʔɔ nɛ́ jo:
«Píra ŋáà nī wè,
we 'suɔlɔ nyaa lè,
nɛ́ fànʔa ní gè,
nɛ́ weli Kulocɛliɛ wi Kùlofɔligɔ ní gè,
nɛ́ wi Siɛnnyiɛnɛgɔnwɔ
wi fànʔa ní gè !
Nɛ̀ taʔa gíi nɛ̄,
ŋàa wi 'puu nɛ kele nyu nɛ tari
weli siinyɛninɛ nɛ̄ bèle,
pe 'wi cìra nɛ̀ tìrige dàala nɛ̄.
Wire wi 'puu nɛ kele nyu
nɛ tari pe nɛ̄
pìlige nɛ́ cɛnvugo
Kulocɛliɛ yiʔɛ mɛ́ gè.
11 Pe sí nyɛ́nì wi jáa
Sìnbapile lire sìsiɛn fànʔa nɛ̄ gè
nɛ́ pe siɛnrɛ ti juʔu ní gè
nɛ̀ pínɛ,
piyè pe sìi woli yaʔa lè
a ni 'kpúʔɔ pe mɛ́ʔ,
a ki nɛ́ yé cɛ́nì nyaa pe- kùu wè.
12 Kire nɛ̄ nyìʔɛnɛ lè,
nɛ́ bìli bīɛlɛ baa bèle,
ye- puu fundaanra nɛ̄.
Kapiile bé sí dàala taa lè
nɛ́ kuʔɔjii ní wè !
Nɛ̀ taʔa gíi nɛ̄,
gbòdolilo kàfɔli wi 'tìgi
baa yeli kúrugu,
wi fungo ki sí yē yɛ̀rigɛ kpuʔɔ.
Ki 'nyaa wi 'ki cɛ́n
wire lɛ̀lɛ niì ń'nɛ̀ kò sáaʔ.»
13 Bà yapiʔi ki kɛ́nì ki nyaa pe 'kire cìra nɛ̀ tìrige dàala nɛ̄ lè,
a ki 'líɛ nɛ̀ taʔa cɛliwɛ nɛ̄ wè nɛ wi cìrá,
ŋàa wi cé nàgabile sii lè.
14 A nyùɔ kpuʔɔ fíkɛnyɛ siin 'yiri cɛliwɛ nɛ̄ wè,
wi- gbɛ̀ jáa bè lali bè kɛ́ wi tiʔɛ mɛ́ gè waama kùlo nī lè.
Baa wi 'puu níɛ taʔa nɛ líi nɛ̀ lɛ̀lɛ láà kúɔ,
nɛ́ lɛ̀gɛlɛ siin nɛ́ lɛ̀lɛ tílaga ní.
Wi- lali wi kɛ́ liʔi wɔ̀bugɔ nɛ̄ gè.
15 A wɔ̀bugɔ ki 'luʔɔ yige ki nyuɔ nī gè,
nɛ̀ ki wáa cɛliwɛ kúrugu wè,
ki ní lakpuʔɔ wī,
gìi ki bé tí ki- cɛliwɛ fúu wè bè líɛ.
16 Nɛ̀ sí ki taa a dàala ni 'cɛliwɛ suɔ wè:
a dàala ni 'múgu nɛ̀ lakpuʔɔ júɔ gè,
luʔɔ gáà yapiʔi ki cé yige ki nyuɔ nī gè.
17 A yapiʔi ki fungo ki 'yɛ̀ cɛliwɛ kúrugu wè,
a ki 'koli nɛ̀ kɛ́ cɛliwɛ wi cesiʔi wuulo bílì sɛnminɛ kúrugu bèle nɛ̀ sɛ́nì tuu kapiɛnnɛ nɛ̄ nɛ́ peli bálì pe nyɛ́ni lúru Kulocɛliɛ kajuʔulo mɛ́ gèle nɛ́ Zezi wi nyasiɛnrɛ cò dè.
18 A ki 'yéri kuʔɔjii dàrimiʔɛ nɛ̄ gè.