Tìɛlɛ 11

Kulocɛliɛ wori ti juufɔlilɔ siin bèle

1 A pe 'kàgɛnigɛ káà kɛn mi mɛ́, ki ní bɛ̀ yatɔnminɔ kàgbiile tíɛlɛ, nɛ́ mi yɛ: «Yɛ̀ ma Kulocɛliɛ tɔ́nminɔ gè nɛ́ ki ní gè, má sí pe tɔ́ri bìli pe nyɛ́ni Kulocɛliɛ gbùʔɔrɔ baa wè. 2 Gbùʔɔrɔsaʔa ki dàligɛ gè, ma fǎga kire tɔ́nminɔʔ; ki 'nyaa, mi nyɛ́nì kire kɛn siɛnnɛ mɛ́ bèle. Gìi ki 'kàʔa wàlidɛngɛgɛ kúɔ gè, kùlogolo kálì siɛnnɛ bálì pe bé ki tánʔana bè ki fórigo bè taa yeye togosiin nɛ́ siin. 3 Bɛ̀ 'm'bága tí mi wori ti juufɔlilɔ siin pe gari ki nyu gàa ki báan gè bè taa cɛnyɛ sirakɔlini nɛ́ cɛnyɛ togotaanri (1 260), gbànvaʔara bururo ti bé puu pe nɛ̄ lere.»

4 Peli bīɛlɛ tiiye siin nɛ́ fètindaʔaya siin yè, nɛ́ ní yérile duniya Kàfɔli wi yiʔɛ mɛ́ gè. 5 A siɛn 'jo wi bé kapiʔi kpíʔile pe nɛ̄ bèle, kàsun káà bé yiri pe nyuɔ nī gè bè pe leguulo sórigo bèle. ʔaan díɛ, a siɛn je sìpiʔi kpíʔile pe nɛ̄ wè, kire kɛnmɛ pire nɛ̄ siɛn wi bé kùu ! 6 Kijuufɔlilɔ bálì pe siin bèle, ki fànʔa kiī pe mɛ́ bè gbɛ̀ nyìʔɛnɛ tɔ́n lè, kàsaʔa fǎga tuuʔ cɛnyɛ nyíì nī piyē nɛ Kulocɛliɛ kajuulo siɛnrɛ nyu dèʔ, kele gílì ke bága tóri gèle. Nɛ̀ pínɛ pe fànʔa yē bè gbɛ̀ luɔyɔ yiʔɛ yè yi- kò sìsiɛn, bé sí wuʔɔgboliyo feliye yi mìɛni cáan dàala nɛ̄ lè, bè taa tɔliyɔ nyuɔ gíì ki 'pe dɛ́ni wè.

7 A peli kɛ́nì pe juumɔ juu bè nɛ̀ kúɔ wè, píra ŋáà nī wè dí nyàʔayɛgɛ ki sí yiri nī gè, bèri kapiɛnnɛ kpúɔn pe nɛ̄; ki bé sí pe jáa, bè pe kpúu. 8 Kijuufɔlilɔ bálì pe wokuuyo yi bé kò cáanya baa kàkpuʔɔ ki koligo nī gè, kire kàkpuʔɔ gáà ki kɛnmɛ pi 'ki kɛn pe ki ye nɛ́ . Kire tiʔɛ nī pe cé pe kóri wè nɛ̄ gè.

9 Kùlogolo ke mìɛni gèle, nɛ́ siɛnnɛ feliye yi mìɛni yè, nɛ́ siɛnrɛ felide ti mìɛni wuulo bèle, nɛ́ duniya siɛnfeliye yi mìɛni ní yè, pe béri báan de kúbilo bálì wéli bèle bè taa cɛnboyo taanri nɛ́ tílaga, piyě sí yéri ki nɛ̄ pe- pe tɔ́nʔ. 10 Nɛ̀ pínɛ duniya siɛnnɛ pe béri fundaanra kpínʔini bèri pe tìʔɛ́, bé sí de yɛrɛ tórigi pìye mɛ́, nɛ̀ taʔa gíi nɛ̄, bálì pe siin pe cé fùrɔgɔ taʔa siɛnnɛ nɛ̄ bèle dàala nɛ̄ lè.

11 Bà cɛnyɛ taanri nɛ́ tílaga nyáà yi kɛ́nì tóri yè, a sìi ŋɔ́nɔ láà 'kɔ́n baa Kulocɛliɛ mɛ́ wè nɛ̀ pɛ́nì jíin pe nī, a pe 'yɛ̀ nɛ̀ yéri pe tɔliyɔ nɛ̄ yè. Bìli pe 'puu nɛ pe wéli bèle, a fíɛrɛ 'pe cò kpuʔɔ.

12 A kijuufɔlilɔ siin pe 'yékpoli láà lúʔu baa nī lè a ni 'juu kpuʔɔ nɛ́ pe yɛ: «Yeri yɛ̀gí náʔa !» A pe 'yɛ̀ kàsadibarɛ nī dè nɛ̀ kɛ́ nyìʔɛnɛ nī lè pe leguulo pe nyɛ́ni nɛ̄ lè. 13 Ki lɛ̀nunɔ nī lè, a dàala ni 'cúngo kpuʔɔ, a kàʔa ki tílaya kiɛ tiʔɛ nigbe 'tìgi nɛ̀ tuu, a siɛnnɛ siramuʔɔ sirakiɛ nɛ́ kogunɔ (7 000) 'kùu baa ki dàala cúngulo náà nī lè. Bìli sɛnminɛ bálì pe cé kò bèle, a fíɛrɛ 'pe cò a pe 'yɛ̀ nɛ tari nyìʔɛnɛ Kulocɛliɛ nɛ̄ wè.

14 Kapiile siinwoli ni 'tóri, ki sí n'gɛ taanriwoli niī nɛ báan baa píra píra.

Kàkpanʔa kɔlisiinwuʔu gè

15 A kɔlisiinwuu wi 'wi kàkpanʔa wíi gè, a yékpuʔulo kálì 'juu baa kpuʔɔ nyìʔɛnɛ nī lè nɛ́ jo:

«Píra ŋáà nī wè,

duniya kùlofɔligɔ

ki 'kò weli wi wuʔu,

wire nɛ́

ní wè !

Wi bé tɛ́ni fànʔa nɛ̄ gè súuri,

wi fànʔa kiǐ je ga kúɔ

bè nyaaʔ !»

16  togo nɛ́ sicɛri bèle, bàli bīɛlɛ Kulocɛliɛ wi yiʔɛ mɛ́ gè nɛ́ ní tɛ́ninɛ pe kùlofɔlilɔ kácuɔnyɔ nɛ̄ yè, a pe 'tìgi nɛ̀ pe yiɛyɛ kíri yè dàala nɛ̄ lè níɛ Kulocɛliɛ gbùʔɔrɔ́ wè, 17 níɛ ki nyu nɛ́ jo:

«Weli nɛ muɔ síɛri

Kàfɔli Kulocɛliɛ,

Fànʔa ki mìɛni Kàfɔli wè !

Muɔ yē baa,

nɛ̀ pínɛ muɔ 'kíni yē baa.

Ki 'nyaa,

bɛ̀ fànʔa yē muɔ mɛ́ kpuʔɔ wè,

a muɔ 'ki fànʔa gáà líɛ gè

nɛ̀ tɛ́ni kùlofɔligɔ nɛ̄ gè !

18 Kùlogolo siɛnnɛ pe funyɔ yi 'yɛ̀,

a muɔ fundanʔanigɛ ki 'pɛn.

Kúbilo pe kàyuʔujuu lɛ̀lɛ

ni 'nɔ̀.

A muɔ baakuɔlɔ pe sàri

wi kɛn lɛ̀lɛ ni 'nɔ̀:

bèle nɛ́ bìli bīɛlɛ

Kulocɛliɛ wuulo bèle,

nɛ́ bìli pe muɔ fìʔɛ́ bèle,

yìrile bèle

nɛ́ kpolilo ní bèle.

Bìli sí pe nyɛ́ni dàala córi lè,

muɔ bé pe cúʔɔ bè pínɛ.»

19 A Kulocɛliɛ ki 'múgu baa nī lè, a wi ki 'múgu baa Gbùʔɔrɔsaʔa nī gè. A nyìʔɛnɛ ni 'nyíʔɛnɛ, a yékpuʔulo kálì 'juu baa, a kàsakpɛnigɛ kpɛ̀ni, a dàala ni 'cúngo, kàsasindari 'puu nɛ tíri kpuʔɔ.