Nyìʔɛnɛ tundunwɔ nɛ́ sɛbɛpile wori dè
10
1 A mi ń'nɛ̀ nyìʔɛnɛ tundunwɔ wáà nyaa wi tíri nyìʔɛnɛ nī lè;
wi 'puu nɛ́ fànʔa ní.
Kàsadibagɛ káà cé wi màʔa nɛ̀ suʔu,
kàsaŋɔnɔ 'puu wi nyùgo nī gè.
Wi yiʔɛ ki 'puu muɔ bé jo cɛngɛ gī,
wi tɔliyɔ ní yè bɛ̀ kàsunnyige tùluyo tíɛlɛ.
2 Sɛbɛpile láà 'puu wi mɛ́ kɔli nī gè múguyaʔala,
á wi 'kàliige tɔligɔ taʔa gè kuʔɔjii nɛ̄ wè,
nɛ́ sí kàmɛgɛ wuʔu taʔa gè dàala nɛ̄ lè.
3 A wi 'kòkuulo wáa kpuʔɔ muɔ bé jo jàri wi 'cuulo.
Bɛ̀ wi 'kòkuulo wáa lè mmɛ gè,
a kàsakpɛniyɛ kɔlisiin yi 'kpɛ̀ni.
4 Bà kàsakpɛniyɛ kɔlisiin yi 'kpɛ̀ni yè,
mi 'puu nɛ caa bè ki siɛnrɛ sɛbɛ dè.
Kire lɛ̀lɛ nī lè,
a mi 'juumɔ páà lúʔu baa nyìʔɛnɛ nī lè,
a siɛnrɛ ti 'jo:
«Siɛnrɛ dáà kàsakpɛniyɛ kɔlisiin yi 'juu dè,
-ti yaʔa ti kò siɛnlaridɛ !
Fǎga ti sɛbɛʔ !»
5 Nyìʔɛnɛ tundunwɔ ŋáà mi cé nyaa wí ní yériwe kuʔɔjii nɛ̄ wè nɛ́ dàala ní lè,
a wi 'wi kàliige yɛ̀gɛ gè nyìʔɛnɛ nī lè,
6 nɛ́ kàli Kulocɛliɛ nɛ̄,
wire ŋáà wī sìi nɛ̄ súuri kúɔmɔ fùn wè.
Wire wi 'nyìʔɛnɛ yige lè nɛ́ ni yɛrɛ ti mìɛni ní dè,
nɛ́ dàala faan lè nɛ́ ni yɛrɛ ti mìɛni ní dè,
nɛ̀ lakpoliyo yige yè nɛ́ yi yɛrɛ ti mìɛni ní dè.
A wi 'kàli Kulocɛliɛ nɛ̄ wè,
nɛ́ jo:
«Lɛ̀lɛ láà sì ń'nɛ̀ je kɛn cíginiʔ !
7 Cɛngɛ gíì sí nyìʔɛnɛ tundunwɔ kɔlisiinwuu wi bága wi kàkpanʔa wíi gè,
dí pe sí ki wíimɛ lúʔu bè,
kire cɛngɛ gè,
Kulocɛliɛ kalarilɛ ni bé yiri kpànʔanɛ bè yɛli nɛ́ tunduro díì wi cé kɛn wi baakuɔlɔ mɛ́ bèle,
wi siɛnjuulo bèle.»
8 Cígini,
yékpoli níì mi cé lúʔu baa nyìʔɛnɛ nī lè,
a ni ń'nɛ̀ juu nɛ́ mi ní nɛ́ mi yɛ:
«Te waa ma sa sɛbɛ suɔ wè sɛbɛ múguyaʔawa wè nyìʔɛnɛ tundunwɔ mɛ́ wè n'ŋɛ yériwe baa kuʔɔjii nɛ̄ wè nɛ́ dàala ní lè.»
9 A mi 'kɛ́ nyìʔɛnɛ tundunwɔ kúrugu wè,
nɛ̀ sɛ́nì wi yɛ:
«-Sɛbɛpile kɛn lè mi mɛ́ !»
A wi 'mi yɛ:
«Suɔ,
-ni káa.
Ni bé tanʔana muɔ liyɛ nī yè,
bé sí puu tàanna muɔ nyuɔ nī gè bɛ̀ sárigɛ tíɛlɛ.»
10 A mi 'sɛbɛpile suɔ lè nyìʔɛnɛ tundunwɔ wi kɔli nī gè,
nɛ̀ ni káa.
Ni 'puu tàanna bɛ̀ sárigɛ tíɛlɛ.
Bɛ̀ mi sì kɛ́nì ni káa nɛ̀ kúɔ lè,
a ni 'tanʔana mi liyɛ nī yè.
11 A mi 'lúʔu:
«Ki 'yɛli ma ní koli ma kele kálì nyaa ma juu kùlogolo ke wori nɛ̄ dè,
nɛ́ siɛnfeliye wori dè,
nɛ́ siɛnrɛ felide wori ní dè,
nɛ́ kùlofɔlilɔ wori ní dè,
tiī nìʔɛrɛ.»