Tìɛlɛ 9

Nyìʔɛnɛ tundunwɔ kogunɔwuu wi 'wi kàkpanʔa wíi gè

1 A kogunɔwuu wi 'wi kàkpanʔa wíi gè, a mi 'ŋɔnɔ̀ láà nyaa a ni 'kɔ́n baa nyìʔɛnɛ nī lè nɛ̀ tuu dàala nɛ̄ lè. Pe cé ki kɔ̀rikaanna kɛn lè ni mɛ́. 2 A ŋɔnɔ̀ ni 'láʔalafun kàtiʔɛ múgu gè, a wírige 'yɛ̀ nɛ yigi ki nī muɔ bé jo dìbige kpuʔɔ wírige gī. A tiʔɛ ki 'yiʔɛ nɛ̀ kò yebilige wírige kire kɛnmɛ nɛ̄ bè. 3 A kàbarirɛ 'yiri wírige gáà nī gè nɛ̀ cɛ̀ri dàala nɛ̄ lè, a ti 'fànʔa taa bɛ̀ dàala náana tíɛlɛ bèle.

4 A pe 'ki juu ti mɛ́ ti- fǎga kaala kpíʔile dàala ni nyàʔa nɛ̄ gèʔ, nɛ́ wariyɛrɛ felide ti mìɛni ní dèʔ, nɛ́ tiire ní dèʔ, fúɔ macɛn siɛnnɛ bílì bīɛlɛ Kulocɛliɛ fìɛ wi wè pe nɛ̄ gbɛgɛlɛ nɛ̄ gèleʔ. 5 A ki 'kpíʔile kàbarirɛ dáà ti fǎga gbɛ̀ siɛnnɛ kpúu bèleʔ, fúɔ macɛn tiri pe wuʔɔ kpuʔɔ bè taa yeye kogunɔ. Ki wuʔɔgɔ gáà ki bé puu bɛ̀ náa nɔgɔ tíɛlɛ. 6 Kire cɛnyɛ nyáà nī yè, siɛnnɛ pe bága de kùu caa wè, kùu wiǐ sí nɔ̀ pe nɛ̄ʔ; kùu láa bé pe taa, nɛ̀ sí ki yaʔa kùu wi béri fé pe nɛ̄.

7 Kàbarirɛ dáà dè, pe cé kapiɛngbuɔn yɛrɛ le ti nɛ̄ nɛ̀ ti gbòbori nɛ̀ yaʔa. Ndɔ̀nyɔ 'puu ti nɛ̄ nyùyɔ nī yè bɛ̀ tiɛ ndɔ̀nyɔ tíɛlɛ, ti yiɛyɛ ní yè bɛ̀ siɛnnɛ yiɛyɛ tíɛlɛ. 8 Ti nzìire ti 'puu bɛ̀ cɛlilɛ nzìire tíɛlɛ, gànʔana ní gèle bɛ̀ jàri wuʔulo tíɛlɛ. 9 Timɔzigeyɛrɛ 'puu ti nɛ̄ lere sìndinyɛ nī yè, pe fíkɛnyɛ yi tùnmɔ pi 'puu muɔ bé jo suɔnniʔɛyɛ wotorilo pe fé nɛ wáa kapiɛngbuɔndiʔɛ nī. 10 Ti 'puu nɛyɛ ní yè sífiriye bɛ̀ náana tíɛlɛ, nɛ̀ pínɛ fànʔa káà 'puu ti nɛyɛ nī yè bè gbɛ̀ siɛnnɛ wuʔɔ bèle bè taa yeye kogunɔ. 11 Ŋàa wi 'puu pe kùlofɔli wè, wire 'nyaa láʔalafun kàtiʔɛ ki nyìʔɛnɛ tundunwɔ wè; siɛnrɛ nī dè wi míʔɛ gè, pe nɛ̂ jo «Abadɔni», girɛki siɛnrɛ nī dè, pe ki ye «Apoliyɔn», ki kɔri wi 'jo Yacuʔɔwɔ.

12 Kapiile pélile lire 'tóri, píra ŋáà nī wè kapiʔile kálì siin nɛ báan nɛ tíin gàa kàduʔumɛ gè.

13 A nyìʔɛnɛ tundunwɔ kɔliniwuu wi 'kàkpanʔa wíi gè, a mi 'yékpoli láà juumɔ lúʔu baa nyɛgɛlɛ sunʔɔmɔ nī bè, tiɛ yafanʔa tiʔɛ nī gè gàa ki 'puu Kulocɛliɛ yiʔɛ mɛ́ gè. 14 Wi 'puu nɛ ki nyu nyìʔɛnɛ tundunwɔ kɔliniwuu mɛ́ wè ŋàa wi cé kàkpanʔa cò gè, nɛ́ wi yɛ: «-Nyìʔɛnɛ tundunminɔ sicɛri sáʔala bèle, bàli bīɛlɛ puɔlɔ Efirati cáʔa nɛ̄ gè !» 15 A pe 'nyìʔɛnɛ tundunminɔ sicɛri sáʔala bèle, peli bálì pe 'puu yériyaʔala nɛ ki lɛ̀lɛ siri lè, ki cɛngɛ gáà gè, ki yege gáà gè, ki yiɛlɛ náà lè, bè siɛnnɛ pe tílaya taanri tiʔɛ nigbe kpúu gè.

16 Suɔnyɔ kapiɛngbuɔnnɔ tòyo yi 'puu mininyuɔnɔ sirakeli (200 000 000), a pe 'pe nyuɔ juu gè a mi 'ki lúʔu. 17 Bà mi 'suɔnyɔ nyaa yè kire kɛnmɛ nɛ̄ bè nɛ́ bàli ní pe 'puu tɛ́ninɛ yi nɛ̄ bèle. Timɔzigeyɛrɛ 'puu ti nɛ̄ sìndinyɛ nī yè nyìɛrɛ kàsun tíɛlɛ, nɛ́ namiige céri bɛ̀ siʔɛ tíɛlɛ, nɛ́ bɛ̀ bulɔ tíɛlɛ. Suɔnyɔ yi nyùyɔ yi 'puu bɛ̀ jàri nyùyɔ tíɛlɛ. Kàsun nɛ́ wírige nɛ́ siʔɛ 'puu nɛ yigi pe nyuɔyɔ nī yè. 18 A siɛnnɛ pe tílaya taanri tiʔɛ nigbe ki 'kùu wuʔɔgboliyo nyáà taanri yi kɛnmɛ nɛ̄ bè, kàsun nɛ́ wírige nɛ́ siʔɛ tire kɛnmɛ nɛ̄ bè, bɛ̀ ti 'puu nɛ yigi pe nyuɔyɔ nī yè. 19 Ki 'nyaa suɔnyɔ yi fànʔa kiī yi mɛ́ nyuɔyɔ nī nɛ́ nɛyɛ nī yè nɛ̀ pínɛ. Nɛ̀ taʔa gíi nɛ̄, pe nɛyɛ yiī bɛ̀ wɔ̀burɔ nyùyɔ tíɛlɛ; pe nìɛ kapiʔi kpínʔini gè nɛ́ yi ní.

20 Píra ŋáà nī wè, siɛnsɛnminɛ bálì pe 'kò wuʔɔgboliyo nyáà yiì pe kpúu bèleʔ, a pe sí kò piyè làa yiʔɛ pe kakpiʔiligele nī gèle wèʔ, nɛ́ sí kò nɛ gbòdolilo gbùʔɔrɔ́ bèle, nɛ́ yasunro ní dè tiɛ wori dè, nɛ́ wali wori dè, nɛ́ káfiire wori dè, nɛ́ kàdɛnigɛ wori dè, nɛ́ tiige wori dè, tire dáà ti wè gbɛ̀nɛ nyaʔa dèʔ, ti wè gbɛ̀nɛ lúru dèʔ, ti wè gbɛ̀nɛ tári dèʔ. 21 Kire siɛnnɛ pe 'cíi piyè làa yiʔɛ pe siɛnkpuʔu nī gèʔ, piyè làa yiʔɛ pe dìʔɛ nī gèʔ, piyè làa yiʔɛ pe kanuʔɔrɔ kele nī gèleʔ, piyè làa yiʔɛ pe kàyuuro nī dèʔ.