Tìɛlɛ 8

Sìnbapile ni 'yasuʔɔlɔ kɔlisiinwoli múgu lè

1 Bà Sìnbapile ni kɛ́nì yasuʔɔlɔ kɔlisiinwoli múgu lè, a tiʔɛ ki 'pìiri sémi baa nī lè nɛ̀ taa liɛri tílaga felige.

2  kɔlisiin bálì pe 'puu yérile Kulocɛliɛ yiʔɛ mɛ́ gè, a mi 'pe nyaa, pe cé pe kɛn nɛ́ kàkpaanya kɔlisiin ní.

3 A nyìʔɛnɛ tundunwɔ wáà wiiyɛ 'pɛn nɛ̀ pɛ́nì yéri baa táanni gè, tiɛ tingbopile 'puu wi mɛ́, á pe 'wi kɛn nɛ́ wusuna ní nìʔɛwɛ, wi- sa wi kɛn bè fàri Kulocɛliɛ wuulo pe mìɛni náariyɛ nɛ̄ yè gbùʔɔrɔdiʔɛ yafanʔa mɛ́ gè tiɛ wuʔu gè, baa kùlofɔlilɔ kácunʔɔ ki yiʔɛ mɛ́ gè. 4 A Kulocɛliɛ wuulo pe náariyɛ yè, nɛ́ wusuna wírige ní gè nyìʔɛnɛ tundunwɔ wi kiyɛ nī yè, a ti 'yɛ̀ nɛ yɛ̀gí Kulocɛliɛ yiʔɛ mɛ́ gè. 5 A nyìʔɛnɛ tundunwɔ wi 'tingbopile líɛ lè, nɛ̀ gbùʔɔrɔdiʔɛ yafanʔa kàsun káà kɔ̀n nɛ̀ ki le ki 'nyì, nɛ́ ki wo dàala nɛ̄ lè. A kàsakpɛnigɛ 'kpɛ̀ni, a yékpuʔulo kálì 'juu baa, a nyìʔɛnɛ ni 'nyíʔɛnɛ, a dàala ni 'cúngo.

Kàkpaanya kɔlisiin wori dè

6  kɔlisiin bálì mɛ́ kàkpaanya kɔlisiin yi 'puu yè, a pe 'gbòbori nɛ̀ yaʔa bèri yi wíi.

7 A péliwe wi 'wi kàkpanʔa wíi gè. A kàsasindari nɛ́ kàsun a ti 'pínɛ nɛ̀ nyaʔami sìsiɛn nī, nɛ̀ pɛ́nì tuu dàala nɛ̄ lè. A dàala tílaya taanri tiʔɛ nigbe 'cò kàsun nɛ̀ súʔu, nɛ̀ pínɛ a tiire tílaya taanri tiʔɛ nigbe 'cò kàsun nɛ̀ súʔu, a wariyɛrɛ dè nɛ́ nyàʔa ní gè, a ti mìɛni 'súʔu.

8 A nyìʔɛnɛ tundunwɔ siinwuu wi 'wi kàkpanʔa wíi gè. A ki 'kpíʔile majo kàsunnyige nyagurukpuʔɔ gī ki sɛ́nì tuu kuʔɔjii nī wè. A kuʔɔjii wi tílaya taanri tiʔɛ nigbe 'yiʔɛ nɛ̀ kò sìsiɛn. 9 A kuʔɔjii yawiire ti tílaya taanri tiʔɛ nigbe 'kùu, nɛ̀ pínɛ kɔ́riyɔ nyáà yi 'puu baa luʔɔ nī gè, a yi tílaya taanri tiʔɛ nigbe 'cúʔɔ péwu.

10 A tundunwɔ taanriwuu wi 'wi kàkpanʔa wíi gè. A ŋɔnɔ̀ láà 'tìgi nyìʔɛnɛ nī lè nɛ̀ tuu, ni 'puu kpuɔlɔ níɛ nyí majo kàsunnyige gī. Ni cé tuu lakpoliyo yi tílaya taanri tiʔɛ nigbe nɛ̄ gè, nɛ́ lawiʔile ní gèle. 11 Ŋɔnɔ̀ ni míʔɛ gè, pe ki ye Sìsorimɔ. A luɔyɔ yi tílaya taanri tiʔɛ nigbe 'kò sìsorigo, nɛ̀ pínɛ a siɛnniʔɛmɛ 'kùu luɔyɔ nyáà yi kɛnmɛ nɛ̄ bè bɛ̀ yi cé yiʔɛ nɛ̀ kò sìsorigo gè.

12 A nyìʔɛnɛ tundunwɔ sicɛriwuu wi 'wi kàkpanʔa wíi gè. A pe 'cɛngɛ tílaya taanri tiʔɛ nigbewuʔu kpúɔn gè nɛ́ yege tílaya taanri tiʔɛ nigbewuʔu ní gè, nɛ́ ŋɔgɔlɔ tílaya taanri tiʔɛ nigbewuʔu ní gè, gìi ki bé tí ti tílaya taanri tiɛyɛ nigbe nigbe yi- kò yebilige, dí kpìɛnmɛ tílaya taanri tiʔɛ nigbe ki- sí kò ki fǎri càannáʔ. Ki- puu kanugo pìlige nī gè pìlige tílaya taanri tiʔɛ nigbewuʔu nɛ̄ gè.

13 Mi kɛ́nì je wéli wè, nɛ̀ nyùɔ lalimɛ tùnmɔ lúʔu baa nyìʔɛnɛ nī lè mi nyùgo nī gè téwu; wi ní nɛ ki nyu kpuʔɔ níɛ wáa: «Kapiile ! Kapiile ! Kapiile bé dàala wuulo taa bèle ! Ki 'nyaa kàkpanʔa kiī nɛ tíin pe ní ki wíi wī, nɛ̀ ki cɛ́n nyìʔɛnɛ tundunminɔ taanri nɛ tíin bè pe kàkpaanya wíi yè díɛ !»