Pe 'fìɛlɛ tɛ́ngɛ Kulocɛliɛ wuulo gbɛgɛlɛ nɛ̄ gèle
7
1 Bà kire 'kúɔ gè,
a mi 'nyìʔɛnɛ tundunminɔ sicɛri nyaa yérile dàala kàluʔulo sicɛri nī gèle.
Pe cé dàala káfaliyɛ sicɛri cò yè nɛ̀ yérige gìi ki bé tí káfaligɛ fǎga de wáari dàala nɛ̄ lèʔ,
ki fǎga de wáari kuʔɔjii nɛ̄ wèʔ,
ki fǎri wáari tiige káà fáala nɛ̄ʔ.
2 A mi ní nɛ̀ nyìʔɛnɛ tundunwɔ wáà wiiyɛ nyaa wi yɛ̀gí baa cɛngɛnyɛnifoligɔli mɛ́ gè,
Kulocɛliɛ wewiiwe fìɛtaʔayɛgɛ ki 'puu wi mɛ́ cògo.
A wi 'kòkuulo wáa kpuʔɔ nɛ̀ tórigo nyìʔɛnɛ tundunminɔ sicɛri mɛ́ bèle,
bàli mɛ́ fànʔa ki cé kɛn pe- kapiʔi kpíʔile dàala nɛ̄ lè nɛ́ kuʔɔjii ní wè.
3 Wire cé jo:
«Ye fǎga kapiʔi kpíʔile dàala nɛ̄ lèʔ,
nɛ́ kuʔɔjii ní wèʔ,
nɛ́ tiire ní dèʔ fúɔ bè taa weli ga fìɛlɛ taʔala bèle kúɔ weli Kulocɛliɛ wi baakuɔlɔ pe gbɛgɛlɛ nɛ̄ gèle !»
4 Píra ŋáà nī wè,
bìli nɛ̄ fìɛlɛ pe cé taʔala bèle,
a pe 'pe nyuɔ juu gè nɛ̀ tìɛ a mi 'ki lúʔu:
pe 'puu siɛnnɛ siramuʔɔyɔ togo nɛ́ kpɔrigɔ nɛ́ kɔlini (144 000),
pe mìɛni ní Isirayɛli pìile saaya tùlugo wuulo,
bàli nɛ̄ pe cé fìɛlɛ tɛ́ngɛ bèle.
5 Zuda saʔa tùlugo nī gè,
a pe 'fìɛlɛ tɛ́ngɛ bèle
siɛnnɛ siramuʔɔyɔ
taanri (12 000) nɛ̄;
Wurubɛni saʔa tùlugo nī gè,
siɛnnɛ siramuʔɔyɔ
taanri (12 000);
Gadi saʔa tùlugo nī gè,
siɛnnɛ siramuʔɔyɔ
taanri (12 000);
6 Azɛri saʔa tùlugo nī gè,
siɛnnɛ siramuʔɔyɔ
taanri (12 000);
Nafitali saʔa tùlugo nī gè,
siɛnnɛ siramuʔɔyɔ
taanri (12 000);
Manase saʔa tùlugo nī gè,
siɛnnɛ siramuʔɔyɔ
taanri (12 000);
7 Simɛyɔ saʔa tùlugo nī gè,
siɛnnɛ siramuʔɔyɔ
taanri (12 000);
Levii saʔa tùlugo nī gè,
siɛnnɛ siramuʔɔyɔ
taanri (12 000);
Izakari saʔa tùlugo nī gè,
siɛnnɛ siramuʔɔyɔ
taanri (12 000);
8 Zabulɔn saʔa tùlugo nī gè,
siɛnnɛ siramuʔɔyɔ
taanri (12 000);
Yusufu saʔa tùlugo nī gè,
siɛnnɛ siramuʔɔyɔ
taanri (12 000);
Bɛnzamɛ saʔa tùlugo nī gè,
a fìɛ wi 'tɛ́ngɛ siɛnnɛ siramuʔɔyɔ
taanri (12 000) nɛ̄.
Kulocɛliɛ siɛnniʔɛmɛ bè
9 Bà tire 'tóri dè,
mi kɛ́nì je wéli wè,
nɛ̀ siɛnniʔɛmɛ páà nyaa siɛn sì cî gbɛ̀ pi tɔ́ri bè pi nyuɔ cɛ́nʔ.
Siɛnfeliye yi mìɛni 'puu pe nī,
nɛ́ kùlogolo ke mìɛni wuulo ní bèle,
nɛ́ siɛnrɛ felide ti mìɛni wuulo ní bèle.
Pe 'puu yérile kùlofɔlilɔ kácunʔɔ yiʔɛ mɛ́ gè nɛ́ Sìnbapile ni yiʔɛ mɛ́ gè,
nɛ́ burugboliyo fìiye le,
siʔɛgbari ní pe mɛ́ còro kiyɛ nī yè.
10 Á pe nɛ yékpuʔulo wáari kpuʔɔ níɛ waa:
«Weli Kulocɛliɛ
wire mɛ́ suɔlɔ ni yē,
wire ŋáà wī tɛ́niwɛ
kùlofɔlilɔ kácunʔɔ nɛ̄ gè,
nɛ́ Sìnbapile ní lè nɛ̀ pínɛ !»
11 A nyìʔɛnɛ tundunminɔ pe mìɛni 'yɛ̀ nɛ̀ yéri nɛ̀ kùlofɔlilɔ kácunʔɔ,
nɛ́ liɛlɛ,
nɛ́ yawiiye sicɛri màʔa yè,
nɛ́ tuu nɛ̀ cúbulo kùlofɔlilɔ kácunʔɔ ki yiʔɛ mɛ́ gè nɛ Kulocɛliɛ gbùʔɔrɔ́ wè.
12 Pe 'puu nɛ nyu níɛ wáa:
«Ki- taa ki puu bɛ̀ !
Gbùʔɔrigɔ gè,
nɛ́ kpuɔmɔ ní bè,
nɛ́ sícilige ní gè,
nɛ́ kacɛ̀ngɛcɛ́n síɛrigɛ ní gè,
nɛ́ kpuʔɔrɔ ní dè,
nɛ́ fànʔa ní gè,
nɛ́ ŋɔri ní dè,
weli Kulocɛliɛ wire wori dī
lɛ̀gɛlɛ ke mìɛni nī súuri !
Ki- taa ki puu bɛ̀ !»
13 A liɛwɛ wáà nigbe kɛ́nì juu baa nɛ́ mi ní,
nɛ́ mi yɛ:
«Bàli pe 'burugboliyo fìiye le yè,
báli bīɛlɛ peli bèle,
sé pe 'kɔ́n ?»
14 A mi 'wi yɛ:
«Mi kàfɔli,
muɔ ma nyɛ́nì kire cɛ́n.»
A wi 'jo:
«Bàli peli bīɛlɛ pe 'kɔ́n baa wuʔɔgbuʔɔ nī gè,
nɛ́ pɛ́nì pe burugboliyo jíge yè a yi 'fílige Sìnbapile ni sìsiɛn nī gè.
15 Kire nɛ̄ piyē baa Kulocɛliɛ wi kùlofɔlilɔ kácunʔɔ ki yiʔɛ mɛ́ gè nɛ wi gbùʔɔrɔ́ pìlige nɛ́ cɛnvugo baa wi Gbùʔɔrɔsaʔa nī gè;
ŋàa sí wī baa tɛ́niwɛ kùlofɔlilɔ kácunʔɔ nɛ̄ gè,
wire wi nyɛ́ni nyúmɔ tɔ́ngi pe nɛ̄.
16 Fungo sì ń'nɛ̀ je ga pe taaʔ,
luʔɔwuʔɔ míɛni sì ń'nɛ̀ je ga pe taaʔ,
cɛngɛ míɛni sì je gari pe wáariʔ,
cɛngɛ káfugo sì je ga pe nyíʔɛriʔa.
17 Ki 'nyaa Sìnbapile náà nī baa kùlofɔlilɔ kácunʔɔ ki sunʔɔmɔ nī bè,
lire ni béri pe nári,
bèri pe tìí sìi luʔɔ lawiʔile nɛ̄ gèle,
dí Kulocɛliɛ wi sí yéturo ti mìɛni pàari pe yiɛyɛ nī yèb.»