Tìɛlɛ 14

Siɛnnɛ siramuʔɔyɔ togo nɛ́ kpɔrigɔ nɛ́ kɔlini pe ŋúnugo gè

1 A mi ga wéli wè, nɛ̀ Sìnbapile nyaa yérile nɛ̄ gè, nɛ́ siɛnnɛ siramuʔɔyɔ togo nɛ́ kpɔrigɔ nɛ́ kɔlini ní (144 000), ni míʔɛ gè nɛ́ Tuufɔli míʔɛ ní gè, yi 'puu sɛbɛyɛ pe gbɛgɛlɛ nɛ̄ gèle. 2 A mi 'tùnmɔ páà lúʔu baa nī lè bɛ̀ lakpoliyo nìʔɛyɛ tùnmɔ tíɛlɛ, kpuʔɔ bɛ̀ kàsakpɛnigɛ tùnmɔ tíɛlɛ. Nɛ̀ pínɛ ki tùnmɔ pi 'puu muɔ bé jo gɔrikpuɔnnɔ pe nyɛ́ni pe gɔrilɔ kpúɔn bèle. 3 Pe 'puu nɛ ŋúnugo káà ŋú ki ní bɛ̀ ŋúnuvɔngɔ tíɛlɛ kùlofɔlilɔ kácunʔɔ ki yiʔɛ mɛ́ gè nɛ́ yawiiye sicɛri yiʔɛ mɛ́ gè, yire nɛ́ ní bèle. Siɛn sì puu bè gbɛ̀ ki ŋúnugo gáà tɛnmɛ gèʔ, nɛ̀ yiri siɛnnɛ siramuʔɔyɔ togo nɛ́ kpɔrigɔ nɛ́ kɔlini (144 000) peli nī bèleʔ, bàli pe 'suɔ dàala nɛ̄ lè. 4 Peli bálì bèle, piyè pìye le fuɔnrɔ nī nɛ́ cɛlilɛ níʔ, ki 'nyaa piyè cɛlilɛ kele cɛ́nʔ. Peli bèle, piyē Sìnbapile kúrugu lè tiʔɛ ó tiʔɛ nī ni waa wè. Peli bálì bèle, peli cé suɔ siɛnnɛ nī bèle bè puu yasɛnpelide dè Kulocɛliɛ mɛ́ wè nɛ́ Sìnbapile mɛ́ lè. 5 Peli bèle, káfinɛrɛ fáala sì kɛ́nì yiri nɛ̀ nyaa pe nyuɔyɔ nī yèʔ. Piyē tuudiɛlɛ fùn.

Nyìʔɛnɛ tundunminɔ taanri bèle

6 A mi ń'nɛ̀ wáà nyaa wi lali mi nyùgo nī gè baa nyìʔɛnɛ laamɛ nī bè; táà 'puu wi mɛ́ dàa tiǐ je ga kúɔ bè nyaa dèʔ, bè juu dàala wuulo mɛ́ bèle, nɛ́ siɛnnɛ feliye yi mìɛni yè, nɛ́ saaya tùluyo yi mìɛni yè, nɛ́ siɛnrɛ felide ti mìɛni wuulo mɛ́ bèle, nɛ́ kùlogolo ke mìɛni ní gèle.

7 Wi 'puu nɛ nyu kpuʔɔ níɛ waa: «Yeri Kulocɛliɛ fìʔɛ́ wè, yéri wi kpóri ! Ki 'nyaa lɛ̀lɛ níì nī Kulocɛliɛ bè kàyuʔu juu gè siɛnnɛ nɛ̄ bèle, kire lɛ̀lɛ lire ni 'nɔ̀. Ye- tuu ye yiɛyɛ cúbulo yè yeri wi gbùʔɔrɔ́; wire wi 'nyìʔɛnɛ nɛ́ dàala faan lè, nɛ́ kuʔɔjii ní wè, nɛ́ lawiʔile ní gèle.»

8 A nyìʔɛnɛ tundunwɔ wáà ń'nɛ̀ pɛ́nì fàri péliwe nɛ̄ wè, a pe 'kúɔ siin, a wire 'jo: «Ki 'tuu ! Je ki 'tuu wī ! Babilɔni kàkpuʔɔ gè je ki 'tuu wī ! Ki 'kùlogolo siɛnnɛ feliye yi mìɛni kɛn a pe 'gbuɔ ki kanuʔɔrɔ diviɛn gbɛ̀nwɛ nɛ̄ wè.»

9 A mi ń'nɛ̀ nyìʔɛnɛ tundunwɔ wáà nyaa, a wi 'taʔa bìli kúrugu bèle, a pe 'kúɔ taanri.

A wi 'yɛ̀ nɛ nyu kpuʔɔ níɛ wáa: «A siɛn ŋíì 'tìgi nɛ̀ yiʔɛ cúbulo nɛ́ nyàʔayɛgɛ gbùʔɔrɔ́ gè, kire nɛ́ ki jènyinɛ yafanʔa ní gè, nɛ́ ki fìɛ tɛ́ngɛ wè wi gbɛlɛ nɛ̄ lè, á kire 'laa kɔli nɛ̄ gè, 10 kire siɛn míɛni wi bé taa bè gbuɔ Kulocɛliɛ funyɛrigɛ diviɛn nɛ̄ wè, diviɛn ŋáà wi 'le fundanʔanigɛ yabuɔlɔ nī lè, wiì luʔɔ nyaʔami wi nī wèʔ. Kire siɛn wi bága de wuʔɔ kàsun nī gè, siʔɛ kàsun gè nyìʔɛnɛ tunduncɛ̀nminɛ pe nyaamɛ nɛ̄ bè, peli nɛ́ Sìnbapile ní lè !

11 «Pe wuʔɔgɔ ki wírige kiī nɛ yɛ̀gí súuri bànguɔ nī wī, pìlige nɛ́ cɛnvugo. Ŋɔ́daala wè pe mɛ́ʔ peli bálì pe nyɛ́ni yiɛyɛ cúbulo yè dàala nɛ̄ lè nɛ nyàʔayɛgɛ gbùʔɔrɔ́ gè, kire nɛ́ ki jènyinɛ yafanʔa ní gè, nɛ̀ pínɛ siɛn ó siɛn ŋáà nɛ̄ wi míʔɛ ki fìɛ wi yē wè.»

12 Kulocɛliɛ wuulo pe kpàricogo tiʔɛ kire gī náʔa gè, bàli pe nyɛ́ni lúru Kulocɛliɛ kajuʔulo mɛ́ gèle nɛ́ sí tɛ́ngɛ Zezi nɛ̄ wè.

13 A mi ń'nɛ̀ juumɔ páà lúʔu baa nyìʔɛnɛ nī lè a ki 'jo: «-Ki sɛbɛ: ‹Bɛ̀ ki yē ŋɔ̀ wè, bàli pe nyɛ́ni kúu nɛ́ ní pínɛnyɛnigɛ nɛ̄ nɛ́ ní wè, pe wuʔu kiī tànʔa›. ʔaan, lire ni 'ki juu bɛ̀, ‹ki 'nyaa pe bé ŋɔ́ bè taa pe wuʔɔgɔ nī gè, nɛ́ ki cɛ́n pe kakpiʔilijɛ̀ngɛlɛ kiyē nɛ́ pe ní› ».

Pe 'dàala yaliire kún dè nɛ́ ti koli

14 A mi ga wéli wè, nɛ̀ kàsadibagɛ káà nyaa fìige; siɛn wáà 'puu tɛ́niwɛ ki naamɛ gè, wi 'puu bɛ̀ tíɛlɛ. Kùlofɔlilɔ ndɔ̀ngɔ 'puu wi nɛ̄ nyùgo nī gè tiɛ wuʔu, á wi 'nyàkɔnigɔ cò kɔli nī gè; ki nyuɔ ki 'puu tànʔa.

15 A wáà ń'nɛ̀ yiri baa nī gè, níɛ kòkuulo wáari kpuʔɔ ŋìi mɛ́ wè ŋàa wi 'puu tɛ́niwɛ kàsadibagɛ naamɛ gè nɛ́ jo: «Muɔ nyàkɔnigɔ tíʔɛ gè ma kɔni ! Nɛ́ ki cɛ́n yaliire kún lɛ̀lɛ ni 'nɔ̀, dàala yaliire ti 'liɛ.»

16 Ŋàa wi 'puu tɛ́niwɛ kàsadibagɛ naamɛ gè, a wi 'wi nyàkɔnigɔ tíʔɛ gè nɛ dàala yɛrɛ kɔni dè.

17 A nyìʔɛnɛ tundunwɔ wáà ń'nɛ̀ yiri baa Gbùʔɔrɔsaʔa nī gè, nyìʔɛnɛ wuʔu gè; nyàkɔnigɔ káà 'puu wire míɛni mɛ́ wè nɛ̀ pínɛ, ki nyuɔ ki 'puu tànʔa. 18 A nyìʔɛnɛ tundunwɔ wáà 'yiri baa nī gè; wire fànʔa ki cé kàsun jáa gè. A wi 'kòkuulo wáa kpuʔɔ ŋàa mɛ́ nyàkɔnigɔ ki 'puu gè nyuɔ ní gè tànʔa gè, nɛ́ wi yɛ: «Muɔ nyàkɔnigɔ tíʔɛ gè ma dàala kàtoyo kún yè ma gbuʔulo, nɛ́ ki cɛ́n yasɛnrɛ ti 'liɛ.»

19 A nyìʔɛnɛ tundunwɔ wi 'wi nyàkɔnigɔ tíʔɛ gè nɛ̀ dàala ɛrɛzɛn kàtoyo kúnminɔ yè nɛ̀ le nī gè, Kulocɛliɛ funyɛrigbuʔɔ wuʔu gè. 20 A pe 'ɛrɛzɛn tánʔana wè yaforigo nī gè kàʔa kúrugu gè. A sìsiɛn 'yiri ɛrɛzɛn yaforigo nī gè nɛ̀ nyì nɛ̀ nɔ̀ suɔnyɔ yi gàrifiile nɛ̄ bèle, nɛ̀ fúu nɛ̀ kɛ́ culolo sirakeli dabataan (300) felige.