Pɔli wi 'siɛngbɛnrɛ juu nɛ̀ kɛn pe mɛ́
10
1 Mi Pɔli tíimɛ wè,
mi nɛ yeli fiɛn wī,
Kirisi funnyige nɛ́ wi kacɛ̀ngɛ kire kɛnmɛ nɛ̄ bè,
mi ŋáà wī,
pàli nìɛ ki nyu níɛ̀ jo dí a mi gbɛ́nɛ yē baa yeli yiʔɛ mɛ́ gè,
mi nɛ̂ puu nyíwɛ,
nɛ̀ sí ki taa a mi yē liʔi wè,
mi nàa nyu gbɛ̀ngɛ.
2 Mi ye fiɛn wī,
ye fǎga tí a mi kɛ́nì yē baa yeli tiʔɛ nī gè,
mi sari nyu gbɛ̀ngɛʔ;
kire sí mi nɛ caa bè kpíʔile yoʔ.
Bàli pe ti nyu nɛ́ jo dí weli nɛ ki kpínʔini bɛ̀ siɛnnɛ kɛnmɛ tíɛlɛ bè,
m'bé sa siɛngbɛnrɛ táà juu pe mɛ́.
3 A weli cɛ yē nɛ́ siɛnnɛ kɛnmɛ ní wè,
weli sí wè nɛ weli cáanra cáanri dè nɛ́ siɛnnɛ sɔ̀ngirɔ ní wīʔ.
4 Nɛ́ ki cɛ́n weli kàsiitunyɛrɛ dè,
céri wori bɛ̀ʔ.
Ti fànʔa kiī nɛ kɔ́ngi Kulocɛliɛ mɛ́ wī,
ti bé làridiɛyɛ lìriye cáan yè.
Weli nɛ siɛnnɛ pe kacinʔɛjuumɔ siɛnrɛ kúu dè.
5 Nɛ̀ pínɛ nàgbuʔɔrɔ sɔ̀ngirɔ dáà ti mìɛni tiì Kulocɛliɛ cɛ́n wèʔ,
weli nɛ̂ ti mìɛni cúʔɔ.
Weli nɛ̂ sɔ̀ngirɔ felide ti mìɛni yiʔɛ,
siɛn wi nɛ̂ fulɔ nɛ̂ yéri Kirisi wori nɛ̄ dè.
6 Nɛ̀ pínɛ,
weli 'gbòbori nɛ̀ yaʔa bè siɛnciile felile pe mìɛni wuʔɔ bèle,
a yeli kɛ́ni yē nɛ́ ngbóluʔulo ní nɛ lúru cɛ̀ngɛ yeli tíimɛ bèle.
7 Gìi yeli nɛ wéli nɛ nyaʔa nyapile nɛ̄ lè,
ye fǎri kire tɔ́riʔ.
A siɛn 'tɛ́ngɛ ki nɛ̄ wire yē Kirisi wuu wè,
siɛn wi- ki cɛ́n weli míɛni bèle,
kire weli yē.
8 A ki cɛ́nì nyaa mi nɛ nàgbuʔɔrɔ kpínʔini kpuɔmɔ larigɛ gíì nī Kàfɔli wi 'weli tɛ́ngɛ wè,
kire wè fìɛrɛ tɔ́ngi mi nɛ̄ʔ.
Ki 'nyaa wi 'weli tɛ́ngɛ kire larigɛ nī gè yeli nyuɔmɔ pire kɛnmɛ nɛ̄ wī,
kiì kò majo weli 'yɛli bè yeli woli cúʔɔ lè wīʔ.
9 Ki wè mi sɔ̀ngirɔ nī dèʔ mi sɛbɛlɛ pe siɛnrɛ ti de fíɛrɛ cògí yeli nɛ̄ wīʔ.
10 Nɛ́ ki cɛ́n,
pe 'jo mi sɛbɛlɛ pe siɛnrɛ tiī sìluburo nɛ́ ní gbɛ̀nrɛ.
Nɛ̀ sí ki taa,
dí a mi tíimɛ gbɛ́nɛ yē baa wè,
mi nɛ̂ puu ŋɔri fùn,
mi siɛnrɛ ti nɛ̌ puu nɛ́ pìle níʔ.
11 Siɛn ŋáà wi nyɛ́ni tire nyu dè,
wi- ti lúʔu cɛ̀ngɛ:
kɛnmɛ bíì nɛ̄ weli sɛbɛlɛ pe siɛnrɛ ti juugɛnmɛ pi yē bè,
bɛ̀ weli nɛ̌ puu baa wèʔ,
kire kanumɔ nɛ̄ weli yē nɛ̀ pínɛ weli kakpiʔiligele nī gèle,
a weli 'kɛ́ baa wè.
12 Ki sɔ̀ngirɔ ti cɛ wè weli nī bèri ki caa bè wúɔ yɛli nɛ́ pàli ní wèʔ,
á kire 'laa bèri wìye tɔ́nminɔ nɛ́ pàli níʔ,
bàli pe cî nɛ pìye tìí bèleʔ.
Pe- ki cɛ́n peli bīɛlɛ laamɛfunfɔlilɔ,
níɛ pìye tɔ́nminɔ nɛ́ peli tíimɛ kɛnmɛ ní bè.
13 Weli bèle,
weli wè caa bèri wìye nyíɛnɛ de tóriʔ.
Yéridiʔɛ gíì Kulocɛliɛ wi 'tìɛ gè,
kire nī weli yē,
níɛ wi baara kúu dè dàa wi 'le weli kiyɛ nī yè.
Kire baara tire sí ti 'kpúʔɔ fúɔ nɛ̀ kɛ́ baa yeli tiʔɛ nī gè.
14 Weli sì weli yéridiʔɛ fɛ́nigɛ gèʔ,
wàa fǎga ki nyaa majo dùʔɔ weli sì nɔ̀ baa yeli tiʔɛ nī gè wīʔ.
Nɛ́ ki cɛ́n weli cɛ we sɛ́nì yiri pélile bèle yeli tiʔɛ nī gè nɛ́ Kirisi wi Kataanna Siɛnjaarirɛ ní dè.
15 Weli wè nàgbuʔɔrɔ kpínʔini nɛ ki líi nɛ tórigi pàli baara kúɔguɔrɔ nɛ̄ʔ.
A ki 'taa yē yeli tɛ́ngɛlɛ lire nɛ kpóri nɛ waa yiʔɛmɛ wè,
kire tiɛlɛ lire nɛ̄ weli sɔ̀ngirɔ ti yē:
weli baara ti de waa yiʔɛmɛ yeli sunʔɔmɔ nī bè,
bè yɛli nɛ́ weli láʔala ní lè.
16 Bɛ̀ weli bé gbɛ̀ sa Kataanna Siɛnrɛ jáari dè tiɛyɛ nyíì yī baa yeli kúrugu bèle,
dí weli fǎri wìye nyíɛnɛ nɛ́ pàli baara kúɔguɔrɔ ní dèʔ.
17 A siɛn ŋíì je de wìi nyíɛnɛ,
wiri wìi nyíɛnɛ gàa Kàfɔli wi 'kpíʔile gèa.
18 Nɛ́ ki cɛ́n,
ŋàa wi nyɛ́ni wi tíimɛ míɛtanʔa yeri gè,
wire bɛ̀ʔ Kàfɔli wi nyɛ́ni tɔ́riʔ,
fúɔ macɛn siɛn ŋáà wire 'tìɛ wè.