Kpuʔɔrɔ dáà pe 'tórigo Zude wuulo mɛ́ bèle
9
1 Píra ŋáà nī wè,
gìi ki kpuʔɔrɔ wori kúɔ dè,
dàa ti 'yɛli bè tórigo Kulocɛliɛ wuulo mɛ́ bèle,
mi 'ki nyaa nyùgo ní wè ki nɛ̄ʔ mi ní de yakaa nyu yeli mɛ́ tire nɛ̄ dèʔ.
2 Nɛ̀ taʔa gíi nɛ̄,
mi 'yeli sɔ̀ngijɛnrɛ cɛ́n dè ki wuʔu nɛ̄ gè.
Mi 'tɔ̀ni nɛ yeli síɛri kire tiɛlɛ nɛ̄ lè Maseduwani wuulo yiʔɛ mɛ́ gè.
Mi 'ki juu pe mɛ́ dí Akayi tɛ́nimɛ wuulo pe 'gbòbori nɛ̀ yaʔa yalaa kátii kaala.
Yeli sícaʔama pi 'ki láa yɛ̀gɛ pàli nìʔɛnɛ nī.
3 M'bé sí siinyɛninɛ tórigo bèle baa yeli mɛ́,
ye- gbòbori ye yaʔa nɛ́ yeli kpuʔɔrɔ ní dè bɛ̀ ki 'juu gè.
Bɛ̀ mi nɛ nàgbuʔɔrɔ kpínʔini yeli kɛnmɛ nɛ̄ bè,
ye fǎga tí pe sa kò waʔanɛʔ,
a pe sɛ́nì nɔ̀ baa wèʔ.
4 Á kire 'laa,
a Maseduwani wuulo pe 'kɛ́ nɛ́ mi ní bèle,
a ki sɛ́nì nyaa yeli sì gbòbori nɛ̀ yaʔa wèʔ,
ki bé kpíʔile majo tɛ́ngɛrɛ dáà weli 'taʔa yeli nɛ̄ dè,
ki bé kò yeli fìɛrɛ wī,
bè cɛ tóri weli nɛ̄.
5 Kire nɛ̄ a mi sí ki nyaa ki 'pɔ́ri a mi siinyɛninɛ fiɛn bèle peri waa mi yiʔɛ nɛ̄ yeli tiʔɛ nī gè,
pe sa yeli kpuʔɔrɔ suɔ dè,
dàa yeli 'kɛn nɛ́ funviige ní gè,
bɛ̀ yeli 'nyafɛnigɛ líɛ ki wori nɛ̄ dè.
Ye sí ti kɛn nɛ́ funviige ní,
ye fǎri kúnʔɔriʔ.
A ŋìi nɛ kanʔa Kulocɛliɛ nìɛ kacɛ̀ngɛ kpínʔini wi mɛ́
6 Ye- sí ki cɛ́n:
a siɛn ŋíì 'yatanʔara tánʔa dè cɛ̀ dè,
bɛ̀ míɛni wi bága yaliire líɛ dè ti- puu cɛ̀.
A ŋìi sí yatanʔara tánʔa dè nìʔɛrɛ dè,
wi bága yaliiniʔɛrɛ líɛ.
7 Siɛn ó siɛn,
a gìi 'yɛ̀ wi fungo nī gè,
wi- kire kɛn;
wi fǎga ki kpíʔile nɛ́ funbiɛnrɛ níʔ,
macɛjo dùʔɔ pe 'wi cɔ̀ri wīʔ.
Nɛ̀ taʔa gíi nɛ̄,
siɛn ŋíì wi nyɛ́ni kanʔa nɛ́ fundaanra ní dè,
wire wi 'Kulocɛliɛ dɛ́ni.
8 Ye- ki cɛ́n Kulocɛliɛ wi bé gbɛ̀ yeli kɛn bè yeli funyɔ nyígi yè nɛ́ kpuʔɔrɔ felide ti mìɛni ní,
gìi ki bé tí lɛ̀gɛlɛ ke mìɛni nī gèle,
ye- yɛrɛ felide ti mìɛni taa yìye fungo,
dí tàa ní kò yeli mɛ́ yeri kacɛ̀ngɛlɛ kpínʔini nɛ́ tire ní.
9 Nɛ́ ki cɛ́n Kulocɛliɛ siɛnsɛbɛrɛ ti 'ki juu nɛ́ jo:
Wi 'kpuʔɔrɔ liɛlɛ,
nɛ̀ fuunmɔfɔlilɔ
kɛn bèle nìʔɛgɛ;
wi sínmɛ pi wè kúu
nɛ nyaʔaʔa.
10 Kire nɛ̄,
Kulocɛliɛ wire ŋáà wi nyɛ́ni yatanʔara kanʔa dè yatanʔarafɔli mɛ́ wè,
nɛ́ ní siliire ti kɛnfɔli wè,
wi bága yatanʔara kɛn dè yeli mɛ́ bé sí ti kpíʔile ti niʔɛ.
Wi bága yeli sínmɛ kakpiʔiligele kɛn gèle ke- kɛ́ yiʔɛmɛ.
11 Wi bé yeli kpíʔile ye- puu lɔrifɔlilɔ kacɛ́nmɛ pi mìɛni nɛ̄,
bɛ̀ yeli béri kanʔa kɛnmɛ pi mìɛni nɛ̄.
Kire bé tí a weli sɛ́nì yiri nɛ́ weli kpuʔɔrɔ ní dè yeli wori dè,
siɛnnɛ pe béri Kulocɛliɛ síɛri wè.
12 Nɛ̀ taʔa gíi nɛ̄,
yeli kpuʔɔrɔ dáà ti kɛnnɛ ni wè nyuʔɔ Kulocɛliɛ wuulo peli yákuɔ nɛ̄ wīʔ,
ki 'nyaa tiī nɛ ki kpínʔini nɛ pínɛ siɛnnɛ pe síɛrigɛ kanʔa kpuʔɔ Kulocɛliɛ mɛ́ wè wī.
13 Kire kpuʔɔrɔ dáà tire kɛnmɛ nɛ̄ bè,
pe béri Kulocɛliɛ míɛtanʔa yeri gè,
bɛ̀ yeli 'fɔ̀li nɛ̀ yéri ki nɛ̄ nɛ̀ Kirisi wi Kataanna Siɛnrɛ juu dè,
nɛ̀ pínɛ yeli 'yeli kɔliyɛrɛ kɛn dè peli mɛ́ nɛ̀ kɔli láʔa peli nɛ́ bìli pe mìɛni ní bèle.
14 Pe béri náariyɛ kpínʔini yeli mɛ́,
bɛ̀ yeli wuʔu kiī pe mɛ́ kpuʔɔ pe funyɔ nī yè,
nɛ́ ki cɛ́n Kulocɛliɛ wi nyɛ́nì kpuʔɔrɔ taʔa yeli nɛ̄ ti felige wèʔ.
15 Kpuʔɔrɔ ti 'yɛli Kulocɛliɛ nɛ̄,
nɛ̀ taʔa gíi nɛ̄,
kpuʔɔrɔ dáà wi 'kɛn yeli mɛ́ dè,
ti 'nyuɔ jáa juʔu nɛ̄.