Korɛntiyé 2 8

Maseduwani wuulo pe walikɛnrɛ wori dè

1 Nɛ siinyɛninɛ, weli nɛ caa ye- ki cɛ́n dáà Kulocɛliɛ wi 'kpíʔile mɛ́ gèle Maseduwani tɛ́nimɛ nī bè. 2 Ki 'nyaa fùrɔgɔ 'puu pe nɛ̄ kpuʔɔ. Nɛ̀ sí ki taa, pe nɛ́ pe fɔ̀ngɔ ki mìɛni ní gè, a pe 'fundaanra taa, nɛ̀ pe kiyɛ sáʔala yè bɛ̀ ki caa mmɛ, nɛ̀ kàa kɔ̀n nɛ̀ kɛn nìʔɛgɛ. 3 Ki 'yɛli mi kàa juu pe wuʔu nɛ̄ gè. Pe 'ki kpíʔile a ki 'tóri gìi nɛ̄ pe cî gbɛ̀ jáa gè, nɛ́ pe fungo ní gè, siɛn sì pe cɔ̀riʔ. 4 Pe yé cɛ́nì weli fiɛn, we- fǎga peli kúnʔ kɔ̀nnɔ níì ni 'yɛli bè kɔ̀n Kulocɛliɛ wuulo mɛ́ bèleʔ. 5 Gìi cɛ weli sì puu nɛ sɔ̀ngí gèʔ, a pe kíni nɛ̀ pìye kɛn gbíɛn Kàfɔli mɛ́ wè peli tíimɛ bèle, nɛ́ sí pìye cáan weli tɛ́ngɛmɛ nɛ̄, nɛ̀ yɛli nɛ́ Kulocɛliɛ nyɛ́ni kaala ní lè. 6 A kire tí a weli 'ŋɔri nyɔ́gɔ Tiiti nī wè, baacɛ̀nrɛ dáà wi 'séli baa yeli tiʔɛ nī gè wali kɔ̀nnɔ koligo nī gè, wi- ti kúɔ wi láʔa.

7 Yeli 'tɔ̀ni nɛ̀ jáa kele ke mìɛni nɛ̄ gèle: tɛ́ngɛlɛ lè yo, siɛnrɛ dè yo, á kire 'laa kacɛ́nnɛ lè yo, bè puu sícaʔawa kakpiʔiligele ke mìɛni nī gèle yo; nɛ̀ pínɛ weli woli ni 'kpúʔɔ yeli funyɔ nī yè. Kire nɛ̄ yeri kanʔa yeri láʔala. 8 Miì jo ye ki kpíʔile fànʔa wīʔ. Ki 'nyaa bɛ̀ bìli sɛnminɛ piyē sícaʔala nɛ kanʔa wè, mi je ki wéli a ki yē yeli dɛ́nigɛ kiī baa kányiʔɛ wè. 9 Yeli tíimɛ bèle yeli nyɛ́nì we Kàfɔli Zezi wi kpuʔɔrɔ wori cɛ́n dè. Wiī yakaafɔli, nɛ̀ sí ki taa wi 'wìi kpíʔile fɔ̀ngɔfɔli yeli kɛnmɛ nɛ̄ bè, gìi ki bé tí wire fɔ̀ngɔ láara gè, yeli gbɛ̀ jáa bè kò yakaafɔlilɔ.

10 M'bé mi fungo sɔ̀ngirɔ juu dè tiɛlɛ náà nī lè. Ki 'pɔ́ri yeri waa yiʔɛmɛ nɛ́ baara ní dè dàa yeli 'séli yalaa gè. Yeli ye 'puu siɛnpelile bèle nɛ̀ baara dáà ti nyuɔ kún gè. 11 Píra ŋáà nī wè, ye sí ti kúɔ ye láʔa. Ye- yìye kɛn ti mɛ́ majo mɛni ti láa ki 'puu yeli nī bèle. Ye- ti kúɔ ye láʔa ye yɛli nɛ́ gìi ní yeli bé jáa gè. 12 Nɛ́ ki cɛ́n a siɛn 'kpuʔɔrɔ kpíʔile Kulocɛliɛ mɛ́ wè nɛ́ funviige ní gè, gàa siɛn wi 'taa nɛ̀ kɛn gè, kire Kulocɛliɛ wiī nɛ wéli. Gàa ki wè siɛn mɛ́ wèʔ, wi wè kire wéliʔ.

13 Kiì nyaa majo weli nɛ ki caa ye- kò fɔ̀ngɔfɔlilɔ wīʔ, yé sí pàli sáʔaʔ. ʔéʔe, gìi ki 'yɛli gè, weri kire caa. 14 Bɛ̀ ki yē ŋɔ̀ wè, gìi yeli 'taa a ki 'niʔɛ nɛ̀ tóri gè, ki bé gbɛ̀ pàli woli nyuɔ bàli mɛ́ ki 'laa wè, gìi ki bé tí cɛngɛ káà a peli míɛni kɛ́nì taa a ki 'niʔɛ nɛ̀ tóri gè, pe- yeli kɛn a ki 'yeli laa wè. Kire gī ki yɛlimɛ bè. 15 Kire ti 'juu nɛ́ jo:

Ŋàa wi cé jó nɛ̀ taa nìʔɛgɛ wè,

wi wori tiì cé niʔɛ nɛ̀ tóriʔ.

Ŋàa sí wiì cé jó nɛ̀ taa sáa wèʔ,

wi wori tiì wi kóligoʔ.

Tiiti nɛ́ wi kobinɛnyɛninɛ wori dè

16  ti 'yɛli Kulocɛliɛ nɛ̄, wire wi 'ki kɛn a yeli woli ni 'kpúʔɔ Tiiti fungo nī gè bɛ̀ mi tíɛlɛ wè. 17 Nɛ̀ taʔa gíi nɛ̄, wi 'fɔ̀li nɛ̀ weli náarigɛ lúʔu gè. Bɛ̀ sí ki woli ni 'puu wi nàzɔn nɛ̄ wè, a wi 'ki yɛ̀gɛ wire tíimɛ wè nɛ̀ kɛ́ baa yeli tiʔɛ nī gè. 18 Weli 'pe pínɛ nɛ̀ tórigo wire nɛ́ siinyɛni ŋáà wori pe nyu nɛ wi míɛtanʔa yeri gè ke mìɛni nī gèle, baara ti wuʔu nɛ̄ gè. 19 Kire yákuɔ sí cɛ bɛ̀ʔ, ki 'nyaa wire tɛ́ngɛfɔlilɔ gbuʔulo ke 'tìɛ wi- puu weli kobinɛnyɛni wè, wali kɔ̀nnɔ baara dáà nī dè. Weli 'wìye cáan kire baara nɛ̄ dè bèri wire kpuɔmɔ tìí bè, bé sí de ki tìí weli nɛ baara nɛ́ weli funyɔ yi mìɛni ní. 20 Weli sí yē nɛ ciʔige, ki fǎga ga nyaa siɛn ga yakaa juu ti- weli còʔ, wali nìʔɛwɛ ŋáà pe 'kɛn weli mɛ́ weli de baara yeli sunʔɔmɔ nī bè. 21 Ki 'nyaa weli nɛ ki caa weli tánʔagɛnmɛ pi 'puu cɛ̀nbɛ Kàfɔli wi yiʔɛ mɛ́ gè. Ki fǎga cɛ yéri Kàfɔli wire yákuɔ nɛ̄ʔ, weli nɛ ki caa nɛ pínɛ weli tánʔagɛnmɛ pi- puu cɛ̀nbɛ siɛnnɛ yiʔɛ mɛ́ gè wī.

22 Weli 'pe pínɛ nɛ̀ tun nɛ́ weli siinyɛni wáà ní, weli 'tɔ̀ni nɛ̀ wi kakpiʔiligele siʔɛ gèle nɛ̀ wéli kele nìʔɛgɛlɛ nī, nɛ̀ wi sícaʔama wori cɛ́n dè. Bɛ̀ sí ki yē ŋɔ̀ wè, wiī nɛ ki caa ki de waa yiʔɛmɛ bè tóri kire nɛ̄, ki 'nyaa wi 'tɛ́ngɛ yeli nɛ̄ nɛ̀ láʔa. 23 Tiiti wire wè, mi kobinɛnyɛni wī, nɛ́ ní yeli baakuɔnyɛni nɛ̀ pínɛ. Gìi sí ki we siinyɛninɛ kúɔ bèle, peli bīɛlɛ tɛ́ngɛfɔlilɔ gbuʔulo ke 'tórigo; piyē nɛ baara nɛ pínɛ wi kpuɔmɔ wori nɛ̄ dè. 24 Kire nɛ̄, ye tí pe- ki cɛ́n peli woli ni 'yeli dɛ́ni kányiʔɛ; bɛ̀ pe bé tɛ́ngɛ ki nɛ̄ weli tànʔa gī bɛ̀ weli yē fundaanra nɛ̄ yeli kɛnmɛ nɛ̄ bè.