7
1 Mi siinyɛninɛ,
yeli bálì ye mi dɛ́ni bèle,
bɛ̀ kire nyafɛnigɛ ki siɛnrɛ dáà ti sí juu weli mɛ́ dè,
ye tí we- wìye cìile we céri fuɔnrɔ ti mìɛni láʔa dè nɛ́ dìi dī pìle wori dè,
we- ti láʔa wìye nɛ̄,
wé sí wìye wàli we tɛ́ngɛ we láʔa,
we- Kulocɛliɛ fíɛrɛ yaʔa ti- puu weli nī.
Pɔli fundaanra kɔri wè
2 Ye- larigɛ yaʔa weli mɛ́ baa yeli funyɔ nī yè;
weli sì sìpiʔi kpíʔile siɛn nɛ̄ʔ,
weli sì siɛn woli cúʔɔʔ,
weli sì siɛn nùʔɔrɔʔ.
3 Mi wè tire nyu bè kàyuʔu cáan yeli nɛ̄ wīʔ.
Mi 'ki juu nɛ̀ kúɔ nɛ́ yeli yɛ dí yeli woli niī náʔa weli funyɔ nī yè.
Sìi ŋáà wiǐ gbɛ̀ we láʔala wìye nɛ̄ʔ,
kùu míɛni sǐ gbɛ̀ we láʔala wìye nɛ̄ʔ.
4 Mi tɛ́ngɛrɛ yē yeli nɛ̄ kpuʔɔ,
nɛ̀ pínɛ mi nɛ fíkɛnyɛ wúʔuro yeli kɛnmɛ nɛ̄ bè.
Mi laamɛ pi mìɛni yē nyíbe,
nɛ̀ pínɛ fundaanra yē mi nī kpuʔɔ fùrɔyɔ nyáà yi mìɛni yī weli nɛ̄ bèle.
5 Nɛ́ ki cɛ́n bɛ̀ weli 'kɛ́ Maseduwani tɛ́nimɛ nī bè,
weli sì kɛ́nì larigɛ taa púlo nɛ̀ weli césɛngɛ ŋɔ́ gè nɛ̀ taaʔ,
ga laa yawarirɛ felide ti mìɛni bɛ̀ʔ dè:
a kiì nyaa cáanraʔ,
fíɛrɛ ti nɛ̂ puu.
6 Kire gáà ki mìɛni láara gè,
Kulocɛliɛ wire ŋáà wi nyɛ́ni siɛnfurɔlɔ funyɔ nyígi yè,
wire wi 'weli funyɔ tɛ́ngɛ yè tiɛnugo nī,
bɛ̀ Tiiti cé kɛ́nì pɛn wè.
7 Wi pɛnnɛ lire yákuɔ sí bɛ̀ʔ,
ki 'nyaa funnyige siɛnrɛ dáà wire tíimɛ wi 'taa yeli mɛ́ bèle nɛ̀ pínɛ wè.
Wi 'ki juu weli mɛ́ bɛ̀ mi nyaa láa kiī yeli nɛ̄ bèle,
a wi 'yeli yéturo wori juu dè nɛ̀ pínɛ,
nɛ́ bɛ̀ mi woli ni 'kpúʔɔ yeli nàzɔnnɔ nī bèle.
A kire ki mìɛni ki 'fundaanra kɛn mi mɛ́ kpuʔɔ.
8 A ki sí nyaa mi sɛbɛ wi siɛnrɛ ti 'laamɛ piɛn yeli nī bèle,
kire sì kàa cúʔɔʔ.
Ki funbiɛnrɛ ti sî gbɛ̀ jíin mi nī yoʔ,
nɛ́ ki cɛ́n mi 'ki nyaa sɛbɛ ŋáà wi 'pɛn nɛ́ funbiɛnrɛ ní yeli mɛ́ lɛ̀lɛ láà nī.
9 Píra ŋáà nī wè,
mi yē fundaanra nɛ̄,
kiì sí kò majo bɛ̀ yeli yē funbiɛnrɛ nɛ̄ wèʔ,
kire kɛnmɛ nɛ̄ʔ.
ʔéʔe,
ki 'nyaa bɛ̀ yeli funbiɛnrɛ ti 'yeli kɛn a yeli 'làa yiʔɛ yeli funyɔ nī yè wè.
Ki 'nyaa ti 'laamɛ piɛn yeli nī nɛ̀ yɛli nɛ́ Kulocɛliɛ nyɛ́ni kaala ní lè,
a kire 'ki kɛn weli kɛnmɛ piì kapiʔi kpíʔile yeli nɛ̄ʔ.
10 Nɛ́ ki cɛ́n funbiɛnrɛ dáà ti 'yɛ̀ Kulocɛliɛ mɛ́ wè,
tire yē nɛ baara nɛ siɛn fungo yiʔi wī,
dí wi sí suɔlɔ taa lè;
siɛn wi fǎri ki yáaʔ.
Nɛ̀ sí ki taa funbiɛnrɛ díì ti sî puu siɛn nī duniya wire kɛnmɛ nɛ̄ bè,
kire funbiɛnrɛ tiī nɛ báan nɛ́ kùu ní wī.
11 Ye sí ki wéli mɛni Kulocɛliɛ wi 'wi nyɛ́ni kaala fori lè nɛ́ funbiɛnrɛ ní dè.
Ki funbiɛnrɛ ti 'ki kɛn a kayaʔa jíin yeli nī,
yeli nɛ ki caa bèri kányiʔɛ koligo tári gè.
A ti ń'nɛ̀ fíɛrɛ nyɔ́gɔ yeli nī a mi láa 'kò yeli nī kpuʔɔ.
Ki funbiɛnrɛ dáà ti 'ki kɛn a yeli 'kapiigbiʔiliwe le wè koligo nī.
Kire gáà ki mìɛni ki 'ki tìɛ yeli wè baa ki kele gálì nī gèleʔ.
12 A yeli 'mi nyaa mi 'sɛbɛ ŋáà tórigo wè yeli mɛ́ wè,
kiì nyaa majo ŋàa wi 'kapiile kpíʔile lèʔ,
á kire 'laa ŋàa nɛ̄ pe 'ni kpíʔile lè,
peli kɛnmɛ nɛ̄ mi wi tórigoʔ.
Bè ki juu Kulocɛliɛ yiʔɛ mɛ́ gè,
mi 'sɛbɛ tórigo wè bè ki tìɛ mɛni yeli cé ki láa yaʔa weli nī bɛ̀ weli cé kɛ́ baa yeli mɛ́ bèle.
13 A ki 'ŋɔri nyɔ́gɔ weli nī,
kire yákuɔ sí cɛ bɛ̀ʔ.
Ki 'fundaanra kɛn weli mɛ́ bɛ̀ ki 'nyaa Tiiti wi cé fundaanra taa yeli tiʔɛ nī gè.
Nɛ̀ taʔa gíi nɛ̄,
wi fungo ki cé nyígi yeli ye mìɛni kɛnmɛ nɛ̄ bè.
14 M'bé gbɛ̀ de fíkɛnyɛ wúʔuro yeli kɛnmɛ nɛ̄ bè.
Ki 'nyaa kɛnmɛ bíì nɛ̄ mi cé yeli míɛtanʔa yeri gè Tiiti yiʔɛ mɛ́ gè,
yeli sì fìɛrɛ tɔ́n mi nɛ̄ ki tiɛlɛ nī lèʔ.
Bɛ̀ weli 'dàli nɛ kányiʔɛ nyu gè yeli mɛ́ gè,
bɛ̀ sí ki yē,
dìi weli cé juu Tiiti mɛ́ wè yeli wori nɛ̄ dè,
ti sɛ́nì yiri kányiʔɛ.
15 Ye- ki cɛ́n,
yeli woli ni 'kpúʔɔ Tiiti mɛ́ wè bɛ̀ ki caa mmɛ.
Ki 'nyaa bɛ̀ ye mìɛni ye 'wi siɛnrɛ lúʔu dè,
nɛ́ wi kpàli nɛ́ fundaanra díì ní dè,
nɛ́ kpuʔɔrɔ taʔa dè wi nɛ̄ fúɔ nɛ̀ cɛ́nì yìye cɛ́rigɛ wi yiʔɛ mɛ́ gè,
wiì fìʔɛ nɛ́ ki tiɛlɛ ní lèʔ.
16 Kiī mi mɛ́ fundaanra,
nɛ̀ taʔa gíi nɛ̄,
mi 'tɛ́ngɛ yeli nɛ̄ kele ke mìɛni nī gèle.