6
1 Bɛ̀ sí wiyē nɛ pínɛ nɛ baara wè,
weli nɛ ye fiɛn wī,
ye fǎga Kulocɛliɛ wi kpuʔɔrɔ tɔ́ri dè majo yafiɛn bɛ̀ʔ.
2 Nɛ̀ taʔa gíi nɛ̄,
wi 'jo:
Bɛ̀ ki 'puu ki lɛ̀lɛ nī lè,
mi cé muɔ náarigɛ suɔ gè.
Suɔlɔ cɛngɛ gè,
a mi 'pɛn nɛ̀ pɛ́nì muɔ sáʔaa.
Píra ŋáà nī wè,
lɛ̀jɛnnɛ lire ni 'nɔ̀;
suɔlɔ cɛngɛ ki 'nɔ̀b.
3 Weli wè caa bè kpíʔile kaala kɛnmɛ páà fáala nɛ̄ʔ bé siɛn kɛn wi- tuuʔ,
kire fǎga tí wàa ga siɛncuʔɔrɔ juu weli baara ti wuʔu nɛ̄ gèʔ.
4 Ki 'nyaa weli nɛ ki tìí feliye yi mìɛni nī dí weli yē Kulocɛliɛ wi baakuɔlɔ,
nɛ̀ ki kpàri nɛ̀ cò kpuʔɔ kagbɛngɛlɛ sunʔɔmɔ nī bè,
fuunmɔ nī bè,
nɛ́ fùrɔgɔ ní gè,
5 kpuɔnrɔ dè,
kasuulere dè,
siɛnnɛ pe tùnnɔ lè,
baagbɛnrɛ dè,
bè kò nɛ́ ŋɔ́nimɔ ní bè,
nɛ́ bè kò nɛ́ fungo ní gè.
6 Nɛ́ sí kò cìilimɛ nī bè,
nɛ́ kacɛ́nnɛ ní lè,
nɛ́ funnyige ní,
nɛ́ funjɛ̀ngɛ,
Kulocɛliɛ Pìle lire fànʔa nɛ̄ gè,
nɛ́ dɛ́nigɛ ní gè funviige wuʔu gè,
7 nɛ́ kányiʔɛ siɛnjuuro ní dè,
nɛ́ Kulocɛliɛ ŋɔri ní dè.
Nɛ̀ pínɛ sínmɛ kakpiʔiligele keli gīɛlɛ weli yakpuɔnrɔ dè,
dàa ní weli nɛ weli leguulo túngu bèle,
níɛ wìye kpɔni nɛ yɛri wè.
8 Làa nɛ̄ pe nàa weli kpóri,
làa nɛ̄ pe nàa weli faʔa.
Làa nɛ̄ weli nɛ̂ míɛpinʔɛ taa,
làa nɛ̄ weli nɛ̂ míɛtanʔa taa.
Pe nàa weli nyaʔa bɛ̀ jànvaafɔlilɔ tíɛlɛ,
nɛ̀ sí ki taa kányiʔɛ kire weli nɛ nyu.
9 Weli nɛ̂ puu majo siɛnnɛ bálì piyè cɛ́n bèleʔ,
nɛ̀ sí ki taa weli yē cɛ́nminɛ.
Piyē nɛ weli kanʔa kùu mɛ́,
weli sí m'bɛlɛ sìi nɛ̄.
Pe tɔ̀ni nɛ weli wuʔɔ,
weli sì sí kùuʔ.
10 Pe nìɛ ki sɔ̀ngí weli bè puu funbiɛnrɛ nɛ̄,
níɛ̀ sí weli nyaa fundaanra nɛ̄;
piyē nɛ weli nyaʔa bɛ̀ fɔ̀ngɔfɔlilɔ tíɛlɛ,
nɛ̀ sí ki taa weli nɛ pàli nìʔɛnɛ kpínʔini lɔrifɔlilɔ.
Piyē nɛ weli nyaʔa nɛ̀ jo yakaa wè weli mɛ́ʔ,
nɛ̀ sí ki taa weli 'yɛrɛ ti mìɛni taa.
11 Korɛnti wuulo,
weli juu nɛ́ yeli ní funviige ní,
nɛ̀ weli funyɔ múgu yè yeli mɛ́.
12 Weli sì yeli kari nɛ̀ wáa weli funyɔ nī yèʔ,
yeli ye yeli 'funyɔ tɔ́n yè.
13 M'bé sí juu bè yeli tɔ́ri bɛ̀ mi pìile tíɛlɛ:
ye- sí weli sàri kɛn wè náʔa !
Yeli míɛni bèle,
ye- yeli funyɔ múgolo yè weli mɛ́ kpuʔɔ.
Tɛ́ngɛfɔli wi fǎga wìi taʔa sìndɛngɛwɛ nɛ̄ wèʔ
14 Ye fǎga yìye puɔ sìndɛngɛlɛ nɛ̄ bèleʔ,
a yeli 'kire kpíʔile,
yeli 'ki pùngo wī.
Á kire 'laa wè,
gáa ki bé gbɛ̀ sínmɛ nɛ́ sìnzinmɛ pínɛ bè pìi nɛ̄ ?
Nɛ̀ pínɛ,
mɛni kpìɛnmɛ nɛ́ yebilige ti bé gbɛ̀ri pínɛ de tári de sii ?
15 Bìɛni ŋíi wī baa Kirisi nɛ́ Setɛni sunʔɔmɔ ní bè ?
Á kire bɛ̀ʔ,
gíi ki 'pe pínɛ tɛ́ngɛfɔli wè nɛ́ sìndɛngɛwɛ ní wè ?
16 Gáa ki 'ti pínɛ Kulocɛliɛ Gbùʔɔrɔsaʔa gè nɛ́ yasunro ní dè ?
Ki 'nyaa weli bèle,
Kulocɛliɛ wewiiwe wi Gbùʔɔrɔsaʔa weli yē,
nɛ̀ yɛli nɛ́ gìi Kulocɛliɛ wi 'juu gè,
wi 'jo:
M'bága puu kòriwo pe nī,
nɛ̀ pínɛ m'béri tári nɛ́ pe ní.
M'bé puu pe Kulocɛliɛ wè,
dí peli sí puu mi kùlo wuulo bèlec.
17 Kire nɛ̄ Kàfɔli wi 'jo:
Ye- yiri pe sunʔɔmɔ nī bè !
Ye- láʔa pe nɛ̄.
Ye fǎga cò fuɔnrɔ nɛ̄ dèʔ,
bɛ̀ m'bé fɔ̀li yeli nɛ̄d.
18 A Kàfɔli wi ní nɛ̀ ki juu,
wire ŋáà wī Ŋɔri ti Mìɛni Kulocɛliɛ wè,
nɛ́ jo:
M'bé puu yeli Tuu wè,
dí yeli sí puu mi jaala bèle nɛ́ mi pórilo bèlee.