Korɛntiyé 2 5

1 Ki 'nyaa weli 'ki cɛ́n weli céri dáà dī weli nɛ̄ bɛ̀ bùguro saʔa tíɛlɛ náʔa duniya nī wè, a ki kɛ́nì tuu gè, Kulocɛliɛ saafanʔa káà yē baa weli mɛ́ nī lè, kire saʔa gè siɛn kɔli wofanʔa bɛ̀ʔ, kiì je ga tuu bè nyaaʔ. 2 Bɛ̀ sí wiyē náʔa bùguro saʔa nī gè, weli yē nɛ yiʔile weli saʔa kúrugu gè gàa gī baa nyìʔɛnɛ nī lè; ki láa yē weli nɛ̄ bè jíin ki nī. 3 A we sí jíin baa kire saʔa nī gè, weli sǐ puu náboriloʔ. 4 Nɛ́ ki cɛ́n bɛ̀ wiyē náʔa bùguro saaya nī yè, tugoro yē we nɛ̄ we cíɛn ti láara. Ki 'nyaa weli wè ki mɛ́ bè puu náboriloʔ. ʔéʔe, weli nɛ ki caa bururo- puu weli nɛ̄ wī, bè sìi céri le dàa ti bé dìi ti larigɛ líɛ gè, céri dáà kùu wi 'jáa wè. 5 Kulocɛliɛ wire ŋáà sí wi 'weli faan kire kɛnmɛ nɛ̄ bè, wi 'wi kɛn lè weli mɛ́ bè ki tìɛ wire bé ki kpíʔile.

6 Kire nɛ̄ kiī nɛ ŋɔri nyɔ́gi weli nī súuri; weli sí nyɛ́nì ki cɛ́n, bè weli yaʔa nɛ́ weli céri dáà ní dè, weli yē liilile nɛ̄ wè wī. 7 Ki 'nyaa tɛ́ngɛlɛ sɔ̀ngirɔ ní weli nɛ tári; gàa nyapile nɛ nyaʔa, kire nɛ̄ bɛ̀ʔ weli nɛ táriʔ. 8 Kiī nɛ lèbaanna nyɔ́gi weli nī kpuʔɔ, nɛ̀ sí ki taa weli 'ki nyaa ki bé pɔ́ri weli mɛ́ we- yiri céri dáà nī dè we- kɛ́ Kàfɔli kúrugu wè. 9 Kire nɛ̄, ki láa yē weli nɛ̄ weli kɛnmɛ pi- wi dɛ́ni, a ki nɛ́ nyaa weli yē nɛ́ weli céri dáà ní dè yo, á kire 'laa a weli 'yiri ti nī dè. 10 Nɛ́ ki cɛ́n ki 'kàri fànʔa we mìɛni bèle we ga sa yéri kàyuʔujuudiʔɛ ki yiʔɛ mɛ́ gè, dí we mìɛni nigbe nigbe sí we liʔɛlɛ taa gèle bè yɛli nɛ́ we kakpiʔiligele ní gèle, gìi we 'puu nɛ kpínʔini nɛ́ weli cetinnɛ ní lè, a ki yē cɛ̀ngɛ yo, a ki yē sìpiʔi yo.

Weri siɛnnɛ nyu de taʔala peli nɛ́ Kirisi ní wè

11 Bɛ̀ wi fíɛrɛ ti sí yē weli nī bèle, weli nìɛ ti nyu nɛ láʔala. Nɛ́ ki cɛ́n Kulocɛliɛ wiī nɛ weli wéli nɛ nyaʔa wálilɛ. Mi nɛ sɔ̀ngí yeli míɛni yeli 'weli kɛnmɛ cɛ́n bè yeli funyɔ nī yè. 12 Weli wè nɛ weli tíimɛ wuʔu nyu gè yeli mɛ́ cíginiʔ; gìi weli nɛ caa gè, kire gī ye- puu nyùyɔ ní yè yɛ̀riyɛ weli baara ti wuʔu nɛ̄ gè. Gìi ki bé tí ye- siɛnnugoro taa ye kɛn bìli mɛ́ pe nyɛ́ni pìye nyíɛnɛ siɛnnɛ pe nyaamɛ nɛ̄ bè, nɛ̀ sí ki taa pe funyɔ nī yè pe wè kireʔ. 13 Nɛ́ ki cɛ́n a ki cɛ́nì nyaa weli 'kele kálì kúɔ ke ní nyùgo fùn yo, Kulocɛliɛ wire mɛ́ weli 'ti kúɔ. A ki sí yē weli sɔ̀ngirɔ tiī cɛ̀nrɛ dè, weli 'kire kpíʔile yeli kɛnmɛ nɛ̄ wī. 14 Ki 'nyaa dɛ́nigɛ kire 'ki weli funyɔ nyì yè. Kire sí weli 'cɛ́n, nɛ̀ ki cɛ́n dí siɛn nigbe wi 'kùu siɛnnɛ pe mìɛni kɛnmɛ nɛ̄; kire ki 'tìɛ siɛnnɛ pe mìɛni kùu wī. 15 Nɛ̀ pínɛ wi 'kùu siɛnnɛ pe mìɛni kɛnmɛ nɛ̄, gìi ki bé tí bìli bīɛlɛ wiile bèle, pe fǎri pe sìi tári wè peli tíimɛ kɛnmɛ nɛ̄ʔ, peri wi tári ŋàa wi 'kùu pe kɛnmɛ nɛ̄ bè nɛ́ koli nɛ̀ nyɛ́ nɛ̀ yiri wè.

16 Kire kɛnmɛ nɛ̄, bɛ̀ ki yē píra ŋáà nī wè, weli ní wè nɛ siɛnnɛ kɛnmɛ wéli bè nɛ yɛligi nɛ́ siɛnnɛ funzɔngirɔ níʔ. Gbíɛn wè, weli 'puu nɛ Kirisi kɛnmɛ nyaʔa bè nɛ́ siɛnnɛ funzɔngirɔ ní wī, bɛ̀ sí ki yē píra ŋáà nī wè, weli ní wè wi nyaʔa kire kɛnmɛ nɛ̄ bèʔ. 17 Kire nɛ̄, a siɛn yē pínɛnyɛnigɛ nɛ̄ nɛ́ Kirisi ní wè, wi 'kò siɛnfɔnwɔ wī; kaliɛmɛ pi 'tóri, píra ŋáà nī wè kanvɔnmɔ pi 'pɛn. 18 Kire ki mìɛni ki 'yɛ̀ Kulocɛliɛ mɛ́, wire ŋáà wi 'ki kpíʔile a we 'koli nɛ̀ bìɛ wire nɛ́ weli ní bèle Kirisi wire kɛnmɛ nɛ̄ bè, nɛ́ sí ki baara kɛn dè weli mɛ́ weri siɛnnɛ nyu bèle de taʔala peli nɛ́ Kirisi ní wè. 19 Nɛ́ ki cɛ́n Kulocɛliɛ wi cé fàri Kirisi nɛ̄ wè, nɛ̀ ki kpíʔile a wire tíimɛ 'koli nɛ̀ bìɛ nɛ́ duniya wuulo ní bèle. Wi wè nɛ pe kacuʔɔrɔ tɔ́ri dè pe kúruguʔ, nɛ́ sí siɛnrɛ le dè weli nī, weri siɛnnɛ nyu bèle de taʔala peli nɛ́ Kirisi ní wè.

20 Kirisi weli yē, á Kulocɛliɛ wi sí nɛ weli tíʔi nɛ nyu nɛ siɛnnɛ yɛrigi bèle. Weli nɛ ye fiɛn wī Kirisi wire míʔɛ nɛ̄ gè, ye- ki yaʔa ye koli ye bìɛ yeli nɛ́ Kulocɛliɛ ní wè. 21 Zezi wire ŋáà wiì kapiile kpíʔile nɛ̀ nyaa wèʔ, a Kulocɛliɛ wi 'wi tɔ́ri kapiigbiʔiliwe weli larigɛ nī, gìi ki bé tí Zezi wire kɛnmɛ nɛ̄ bè, a Kulocɛliɛ wi 'weli tɔ́ri siɛnsinminɛ.