Korɛntiyé 2 4

Kulocɛliɛ wi 'weli kpíʔile lɔri yɛrɛ

1 Kire kɛnmɛ nɛ̄, bɛ̀ Kulocɛliɛ wi 'nyinimɛ taa weli nɛ̄ nɛ́ ki baara kɛn dè weli mɛ́ dè, weli wè céri yɛri dè ti kúu weli nɛ̄ʔ. 2 Kele gílì ke sî nɛ kpínʔini làrimɛ nī bè, níɛ̀ puu fìɛrɛ wuʔulo gèle, weli 'cíi ke nɛ̄. Weli wè tári jànvaa nɛ̄ʔ, bé nɛ́ ga jo bè Kulocɛliɛ siɛnrɛ yiʔɛ dèʔ. Gìi ki 'pɔ́ri gè, weli nɛ tári nɛ kányiʔɛ tìí gè, níɛ ki caa siɛnnɛ pe mìɛni pe- ki cɛ́n weli siɛnrɛ tiī kányiʔɛ Kulocɛliɛ yiʔɛ mɛ́ gè. 3 Nɛ̀ sí ki taa dáà weli 'jáari dè, tiī nɛ tíin fuudɔnrɔ bìli mɛ́ pe waa cúʔɔgoligo nī gè. 4 Kire siɛnnɛ bálì bèle, tɛ́ngɛlɛfun siɛnnɛ bèle, Setɛni wè, duniya ŋáà wi kàfɔli wè, wi 'pe sìnjilige fuu gè nɛ̀ tɔ́n pe nī, pe fǎga gbɛ̀ jáa bè kpuɔmɔ Kataanna Siɛnrɛ ti kpìɛnmɛ nyaa bèʔ, Kirisi wire ŋáà wī Kulocɛliɛ líɛrɛ dè.

5 Weli wè weli tíimɛ míɛtanʔa nyu nɛ mári wīʔ; ki 'nyaa Zezi Kirisi ŋáà wī wè, wire wori weli nɛ nyu. Weli tíimɛ bèle, weli nɛ wìye tɔ́ri yeli baakuɔlɔ wī Zezi wire kɛnmɛ nɛ̄ bè. 6 Nɛ̀ taʔa gíi nɛ̄, Kulocɛliɛ ŋáà wi cé ki juu nɛ́ jo: «Kpìɛnmɛ pi de càanná yebilige sunʔɔmɔ nī bè», wire wi nyɛ́ni wi kpìɛnmɛ cáanri bè weli funyɔ nī yè, gìi ki bé tí we- wire kpuɔmɔ cɛ́n bè, bàa pi nyíʔɛnɛ Zezi Kirisi yiʔɛ nī gè.

7 Kire lɔri cɛ̀nrɛ dáà tiī weli nī a weli 'ti le wìye nɛ̄, á weli ní bɛ̀ puuro yakpiʔilide tíɛlɛ, gìi ki bé tí Kulocɛliɛ fànʔa gáà ki 'kpúʔɔ nɛ̀ tóri gè ki- cɛ́n, ki fǎga puu weliʔ. 8 Weli yē cɔ̀rilɔ feliye yi mìɛni nɛ̄ʔ, nɛ̀ sí ki taa weli ŋɔri tiì kúɔʔ. Weli sɔ̀ngirɔ ti nàa curugu, nɛ̀ sí ki taa ki nɛ̌ weli funyɔ kpúu yèʔ. 9 Piyē nɛ weli wuʔɔ, nɛ̀ sí ki taa Kulocɛliɛ wiì fɛ̀ nɛ́ weli wáaʔ. Piyē nɛ weli kpúɔnri nɛ cáanri, nɛ̀ sí ki taa weli woli niì cúʔɔʔ. 10 Lɛ̀lɛ ó lɛ̀lɛ piyē nɛ weli caa nɛ́ kpúumɔ ní bɛ̀ Zezi tíɛlɛ wè, kire sí ki bé tí pe- ki cɛ́n dí Zezi sìi wiī weli nī. 11 Ki 'nyaa weli bálì bīɛlɛ bile sìi nɛ̄ wè, piyē nɛ weli caa súuri nɛ́ kpúumɔ ní Zezi kɛnmɛ nɛ̄ bè. Kire sí ki bé tí pe- ki cɛ́n dí Zezi sìi wiī weli nī, bè weli yaʔa nɛ́ weli céri dáà ní dè dàa dī kùu wi 'ti jáa dè. 12 Bɛ̀ ki yē kire kɛnmɛ nɛ̄ bè á kùu wiī ní weli kúrugu. Yeli bèle sìi sí yē yeli mɛ́.

13 Bɛ̀ ki 'juu baa nī dè nɛ́ jo: Mi tɛ́ngɛ, kire nɛ̄ mi nɛ ki nyu, kire tɛ́ngɛlɛ lire míɛni nī weli mɛ́, tɛ́ngɛlɛ lè. Weli 'tɛ́ngɛ, kire nɛ̄ weli nɛ ki nyu. 14 Weli 'ki cɛ́n Kulocɛliɛ ŋáà wi 'Kàfɔli Zezi nyɛ́ wè nɛ̀ yige kúbilo nī bèle, wi bága weli míɛni nyɛ́ bè yige nɛ́ Zezi ní wè, dí weli sí pínɛ bè yiri nɛ́ yeli ní wi yiʔɛ mɛ́ gè. 15 Nɛ́ ki cɛ́n, gàa ki mìɛni ki nyɛ́ni weli tari gè, kiī nɛ kpínʔini yeli kɛnmɛ nɛ̄ wī, gìi ki bé tí Kulocɛliɛ kpuʔɔrɔ ti- kpúʔɔ bè taʔala siɛnniʔɛnɛ mɛ́, dí we sí de wi síɛri de taʔala, de wi kpuɔmɔ wuʔu nyu gè.

Weri bànguɔ sìi wire caa

16 Kire nɛ̄ weli sì ki yaʔa a ki 'weli céri kpúu dèʔ. A ki nɛ́ cɛ́nì nyaa kpànʔanɛ gè weli céri tiī nɛ córi dè, laamɛ nī bè, weli nɛ fùngú fɔnminɔ cɛngɛ ó cɛngɛ wī. 17 Nɛ́ ki cɛ́n wuʔɔgɔ gáà gī weli nɛ̄ ŋɔ̀ wè, a we je ki tɔ́nminɔ gè, ki 'cɛ́ri nɛ̀ fáala kpuɔmɔ báà nī weli bága pa puu bè, bànguɔ kpuɔmɔ bè, kpuɔmɔ báà wuʔɔgɔ kiī nɛ kpínʔini nɛ yɛri weli mɛ́ bèle. 18 Kele gálì ke nyɛ́ni wéli nɛ nyaʔa nyapile nɛ̄ lè, keli bɛ̀ʔ weli nɛ wéliʔ; gìli ke wè nyaʔa nyapile nɛ̄ lè, keli weli nɛ wéli. Nɛ̀ taʔa gíi nɛ̄, kele gílì ke wéli nɛ nyaʔa nyapile nɛ̄ lè, keli bága kúɔ wī. Nɛ̀ sí ki taa gìli ke wè nyaʔa nyapile nɛ̄ lèʔ, keli yē bànguɔ nī wī.