Nyakungɛngɛ fɔngɔ baakuɔlɔ// weli yē
3
1 Yeli 'jo lé weli 'koli nɛ weli tíimɛ wori nyu wī lé bè míɛtanʔa taa ?
Á kire bɛ̀ʔ,
dùʔɔ yeli sí nɛ sɔ̀ngí weli màakuu yē ki nɛ̄ bɛ̀ pàli tíɛlɛ,
we- sɛbɛ kpíʔile we kɛn bè weli kɛnmɛ tìɛ bè lé ?
Á kire 'laa we- sɛbɛ kpíʔile yeli kɛnmɛ nɛ̄ bè lé ?
2 Weli sɛbɛ wè,
yeli bīɛlɛ;
ki sɛbɛ wiī sɛbɛwɛ náʔa weli funyɔ nī yè.
Siɛnnɛ pe mìɛni nyɛ́nì wi cɛ́n,
pe mìɛni nɛ wi wéli.
3 Yeli wuʔu kiī cɛ́ngɛ,
nɛ̀ taʔa gíi nɛ̄,
yeli bīɛlɛ Kirisi sɛbɛ wè;
weli we 'baara nɛ̀ yeli kɛn.
Yeli wè sɛbɛlɛ nɛ́ tùnmu luʔɔ ní wīʔ.
ʔéʔe,
ki 'nyaa Kulocɛliɛ wewiiwe wire Pìle lire ní wi 'yeli sɛbɛ,
wiì yeli sɛbɛ kàdɛnitɛnyɛ nɛ̄ wīʔ.
ʔéʔe,
ki 'nyaa yeli yē céri yasɛbɛgɛ weli funyɔ nī yè wī.
4 Kire tɛ́ngɛlɛ lire nī weli mɛ́ Kulocɛliɛ yiʔɛ mɛ́ gè Kirisi wire fànʔa nɛ̄ gè.
5 Kiì nyaa majo weli nɛ ki sɔ̀ngí weli 'ki kpíʔile nɛ́ weli tíimɛ ŋɔri ní wīʔ;
ʔéʔe,
weli ŋɔri ti 'taadiʔɛ kiī Kulocɛliɛ mɛ́ wī.
6 Wire míɛni wi 'weli líɛ nɛ̀ ki kpíʔile a weli 'yɛli nɛ́ ki ní bè gbɛ̀ puu wi nyakungɛngɛ fɔngɔa ki baakuɔlɔ bèle.
Ki nàgorigo gè,
kiì nyaa majo Misa Fànʔa Siɛnrɛ wori dīʔ;
ʔéʔe,
ti 'kɔ́n Kulocɛliɛ Pìle mɛ́ wī.
Nɛ́ ki cɛ́n Misa Fànʔa siɛnrɛ tiī nɛ siɛn kpúu,
Kulocɛliɛ Pìle lire nɛ̂ sí sìi nyɔ́gɔ siɛn nī.
7 A ki sí yē baara díì bìli pe 'kúɔ dè,
ki siɛnrɛ ti 'puu a pe 'ti gbógo nɛ̀ sɛbɛ kàdɛniyɛ nɛ̄ wè,
ti sí cé puu nɛ́ kùu ní;
nɛ̀ sí ki taa nàjɛnrɛ táà 'puu ti nɛ̄,
fúɔ a kire 'ki kɛn Isirayɛli siɛnnɛ piyè cé gbɛ́nɛ̀ jáa nɛ̀ Misa wéli wè yiʔɛ nī gèʔ,
ki nàjɛnrɛ ti nyíʔɛnimɛ pire kɛnmɛ nɛ̄ bè,
bɛ̀ wi yiʔɛ ki 'puu nɛ nyíʔɛnɛ gèb,
nɛ̀ sí ki taa tire ti mìɛni ti kɛ́nì tóri.
8 Á Kulocɛliɛ Pìle lire baara dè do,
tire kpuɔmɔ piǐ sí ní ga kpúʔɔ bè tóri lé ?
9 A ki sí yē Misa Fànʔa Siɛnrɛ dáà ti sî nɛ kàyuʔu cáanri siɛn nɛ̄,
tire yē nɛ́ kpuɔmɔ ní wè,
Kulocɛliɛ Pìle baara dè,
tire kpuɔmɔ piǐ sí ní kpúʔɔ bè tóri wīʔ lé ?
10 Kire nɛ̄ we bé gbɛ̀ ki juu bé jo,
kpuɔmɔ báà pi kíni nɛ̀ puu faʔa gè,
piǐ gbɛ̀ tɔ́nminɔ nɛ́ bàa ní pi 'pɛn bèʔ,
pire 'nyuɔ nɛ̀ fáala.
11 Kire nɛ̄,
a ki yē kele gílì ke cî ga tóri gèle,
ke 'puu nɛ́ kpuɔmɔ ní wè,
á gìi sí ki je ga puu bile súuri gè,
kire kpuɔmɔ piǐ sí kpúʔɔ bè tóri wī lé ?
12 Bɛ̀ kire sɔ̀ngirɔ taʔadiʔɛ cɛ̀ngɛ gáà ki sí yē weli mɛ́ gè,
a weli sí weli funyɔ tɛ́ngɛ yè yanyige nɛ̄.
13 Weli wè ki kpínʔini bɛ̀ Misa tíɛlɛ wèʔ,
wire ŋáà wi 'puu nɛ fɛ̀ni tɔ́ngi wi yiʔɛ nɛ̄ gèʔ,
gìi ki bé tí Isirayɛli siɛnnɛ pe fǎga cé nyíʔɛnimɛ báà pi kúɔmɔ nyaa bèʔ,
nyíʔɛnimɛ báà piì yé je ga mɔgɔ bèʔ.
14 Fúɔ nɛ̀ pɛ́nì taa pàngɛ,
a pe gbɛ́nɛ nyakungɛngɛ liʔɛ siɛnrɛ wéli dè,
pe funyɔ yi nìɛ tíin puɔdɔnyɔ;
ki fɛ̀ni nuwɔ wiī nɛ tíin pe yiɛyɛ nī yè.
Nɛ̀ taʔa gíi nɛ̄,
siɛn 'yɛli bè puu nɛ́ Kirisi ní pínɛnyɛnigɛ nɛ̄ wī,
dí kire fɛ̀ni wi sí nɛ́ péli láʔa.
15 Nɛ̀ sí ki taa pàngɛ cɛnyɛ nyáà nī yè,
a pe gbɛ́nɛ Misa sɛbɛlɛ pe siɛnrɛ wéli dè,
fɛ̀ni wáà nɛ̂ pe funyɔ tɔ́n yè.
16 A siɛn ŋíì nɛ Kàfɔli wire wéli wè,
fɛ̀ni wi nɛ̂ nɛ́ péli nɛ̀ láʔac.
17 Nɛ́ ki cɛ́n Kàfɔli wè,
wire wī Kulocɛliɛ Pìle lè;
a Kulocɛliɛ Pìle ni sí yē tiʔɛ gíì nī gè,
siɛnnɛ pe nɛ̂ puu pìyemɛ.
18 Kire nɛ̄,
weli we mìɛni bálì bīɛlɛ yiɛyɛ ní yè múguyo yè,
weli nɛ Kàfɔli wi kpuɔmɔ wéli bè ki ní majo we ki wéli dibale nī wī.
Bɛ̀ Kàfɔli wi sí yē Kulocɛliɛ Pìle lè,
wiī nɛ weli kàrigí nɛ weli kpínʔini bɛ̀ wìi tíɛlɛ,
nɛ kàa taʔala nɛ waa weli kpuɔmɔ nɛ̄ bè.