2
1 Kire nɛ̄ mi 'ki kɔ̀rirɔ mi tíimɛ wè nɛ́ jo mi sǐ ní kɛ́ baa yeli tiʔɛ nī gèʔ nɛ́ funbiɛnrɛ níʔ.
2 Nɛ́ ki cɛ́n a mi 'laamɛ piɛn yeli nī bèle,
ŋáasiɛn wi béri fundaanra nyɔ́gi dè mi nī wè ?
Ŋàa nī mi 'laamɛ piɛn bè wire bɛ̀ʔ lé ?
3 Kire nɛ̄ mi 'siɛnrɛ dáà sɛbɛ dè,
gìi ki bé tí a mi kɛ́nì kɛ́ yeli tiʔɛ nī gè mi fǎga sa yiri nɛ́ laabiɛnmɛ níʔ,
yeli bálì ye 'yɛli bè fundaanra nyɔ́gɔ mi nī wèʔ.
Mi 'tɛ́ngɛ ki nɛ̄ yeli ye mìɛni bèle,
a mi yē fundaanra nɛ̄ wè,
kire ki bé fundaanra kɛn yeli mɛ́.
4 Fùrɔgɔ 'tɔ̀ni nɛ̀ puu mi nɛ̄ kpuʔɔ,
nɛ̀ pínɛ laamɛ pi cé tɔ̀ni nɛ̀ piɛn mi nī;
kire sunʔɔmɔ báà pire nī mi cé sɛbɛ nɛ̀ tórigo yeli mɛ́,
ki ní mi mɛ́ yéturo kpuʔɔ.
Kiì sí kò majo mi 'puu nɛ ki caa bè laamɛ piɛn yeli nī wīʔ.
ʔéʔe,
kire bɛ̀ʔ,
ki 'nyaa mi nɛ ki caa ye- ki cɛ́n dɛ́nigɛ gáà gī mi nī yeli kɔli mɛ́ gè,
ki 'kpúʔɔ nɛ̀ tóri.
A siɛn 'tánʔa nɛ̀ tuu wè we wi cò mɛni
5 A wàa 'kaala kpíʔile nàa ni bé gbɛ̀ siɛn laamɛ piɛn wè,
mi nī bɛ̀ʔ siɛn wi 'laamɛ piɛn bèʔ;
yeli pàli nɛ̄ wi 'ki kpíʔile.
A we je ti juu wè,
ye mìɛni nɛ̄ siɛn wi 'ni kpíʔile.
6 Kire siɛn feliwe wè,
gìi gboli ni 'juu wi wori nɛ̄ dè ye- ki yaʔa kire nɛ̄.
Ki fǎga tóri kire nɛ̄ʔ.
7 Gìi cɛ ki 'pɔ́ri gè,
ye- ki yaʔa wi nɛ̄,
ye- juu ye wi fungo nyígi gè,
gìi ki bé tí wi tuulo wuʔu ki fǎga wi fùrɔ bè tóriʔ,
bè laamɛ piɛn wi nī bè wi ŋɔri kúɔ dèʔ.
8 Kire nɛ̄,
mi ye fiɛn wī,
ye- wi cò nɛ́ dɛ́nigɛ fungo ní.
9 Ki 'nyaa mi 'sɛbɛ nɛ̀ tórigo yeli mɛ́ bè ki wéli a ki yē yeli 'fɔ̀li bè yéri bè lúʔu kele ke mìɛni nī gèle.
10 A yeli 'ki yaʔa siɛn ó siɛn nɛ̄ wè,
mi mìɛni mi 'ki yaʔa.
Nɛ̀ taʔa gíi nɛ̄,
a kaala yē baa dí ki sí nyaa mi 'yɛli bè ki yaʔa siɛn nɛ̄ wè,
yeli kɛnmɛ nɛ̄ mi 'ki yaʔa,
Kirisi wire yiʔɛ mɛ́ gè.
11 Gìi ki bé tí we fǎga larigɛ kɛn Setɛni mɛ́ wèʔ,
nɛ́ ki cɛ́n sɔ̀ngirɔ dáà dī wi nī dè,
wiyè kò wiyè ti cɛ́n wīʔ.
Pɔli wi 'yiri Turowasi nī gè nɛ̀ kɛ́ Maseduwani mɛ́
12 Bà mi cé kɛ́ Turowasi kàʔa mɛ́ gè Kirisi Kataanna Siɛnrɛ ti jáaridiʔɛ nī gè,
a Kàfɔli wi 'koligo múgu gè mi mɛ́.
13 Nɛ̀ sí ki taa mi laamɛ piì puu mi nī tàanbaʔ,
bɛ̀ mi sì cé mi siinyɛni Tiiti nyaa wèʔ.
Bà mi 'yiri baa peli tiʔɛ nī gè,
a mi 'kɛ́ Maseduwani tɛ́nimɛ nī bè.
Pɔli wi 'ki juu nɛ̀ láʔa Kulocɛliɛ baara wire nɛ kúu
14 Kpuʔɔrɔ ti 'yɛli Kulocɛliɛ nɛ̄,
wire ŋáà wi nyɛ́ni ki kpínʔini á weli nɛ fànʔa tari kele nī gèle lɛ̀lɛ ó lɛ̀lɛ nɛ́ Kirisi ní wè,
nɛ̀ pínɛ Kulocɛliɛ wire wi 'ki kpíʔile a weli 'kacɛ́nnɛ taa nɛ wi kɛnmɛ tìí bè tiɛrɛ ti mìɛni nī,
majo nùdaanna nī.
15 Ki 'nyaa siɛnnɛ bílì bīɛlɛ suɔlɔ koligo nī gè,
nɛ́ bìli bīɛlɛ cúʔɔgoligo nī gè,
weli yē pe sunʔɔmɔ nī bè bɛ̀ Kirisi nùdaanna tíɛlɛ Kulocɛliɛ mɛ́ wè.
16 Weli yē pàli mɛ́ kùu nùgo,
gàa ki kùu kanʔa wè;
weli sí yē sìi nùgo pàli mɛ́ gàa ki sìi kanʔa wè.
Ŋáasiɛn sí wi 'nyuɔ nɛ̀ yɛli nɛ́ kire gáà ní gè ?
17 Weli sí wè majo bɛ̀ pàli kpuɔmɔ yē bèleʔ,
pe nàa jaʔa wáari nɛ́ Kulocɛliɛ siɛnrɛ ní dè.
Weli bèle,
weli funyɔ yiī fìiye;
Kulocɛliɛ wire tunduro nɛ̄ weli yē,
nɛ ti kúu Kirisi wire fànʔa nɛ̄,
Kulocɛliɛ yiʔɛ mɛ́ gè.