Korɛntiyé 2 1

Sɛbɛ siinwuu ŋáà Pɔli 'tórigo Korɛntiyé mɛ́ bèle

Korɛntiyé siinwuu

Pɔli nɛ́ Timote síɛrilɛ lè

1  ŋáà wī Zezi Kirisi tundunwɔ wè nɛ̀ yɛli nɛ́ Kulocɛliɛ nyɛ́ni kaala ní lè, wire nɛ́ siinyɛni Timote ní wè, peli pe 'sɛbɛ nɛ̀ tórigo wuulo mɛ́ bèle Korɛnti kàʔa mɛ́ gè, peli nɛ́ tɛ́ngɛfɔlilɔ pe mìɛni ní bèle bàli bīɛlɛ Akayi tɛ́nimɛ pi mìɛni nī bè. 2 Kulocɛliɛ wè, wire ŋáà wī weli Tuu wè, nɛ́ Zezi Kirisi ní wè, pe- taʔa ye nɛ̄, pe- yanyige kɛn ye mɛ́.

Pɔli wi 'síɛrigɛ kɛn Kulocɛliɛ mɛ́

3  ti 'yɛli Kulocɛliɛ nɛ̄, wire ŋáà wī weli Kàfɔli Zezi Tuu wè. Wire wī Tuufɔli ŋáà wi nyɛ́ni nyinimɛ tari wè, nɛ̀ pínɛ wire wī Kulocɛliɛ wè ŋàa wi sî siɛn fungo nyígi gè feliye yi mìɛni wè. 4 A yawuʔɔ ó yawuʔɔ 'weli taa wè, wire wi nɛ̂ weli funyɔ nyígi yè. Kire nɛ̂ ŋɔri kɛn weli mɛ́ weli gbɛ̀ jáa bè pàli funyɔ nyígi a yawuʔɔ 'wàa taa wè, kɛnmɛ bíì nɛ̄ Kulocɛliɛ wi 'weli funyɔ nyígi yè. 5 Ki 'nyaa bɛ̀ Kirisi wi 'wuʔɔgɔ suɔ kpuʔɔ weli kɛnmɛ nɛ̄ bè, bɛ̀ míɛni weli funyɔ yi nɛ̂ nyígi kpuʔɔ Kirisi wire fànʔa nɛ̄ gè. 6 A fùrɔgɔ sí weli taa wè, kire ki bé nàzɔnnɔ lìri bèle yeli nī dí yeli sí suɔ. A ki sí yē weli funyɔ yi 'nyígi yè, kire ki bé tí yeli funyɔ yi nyígi bínɛ, dí yeli sí ŋɔri taa bè yeli wuʔɔyɔ kpàri yè bè cò, kire wuʔɔyɔ feliye yire yī weli nɛ̄. 7 Sɔ̀ngirɔ taʔadiʔɛ gáà gī weli nī yeli kɔli mɛ́ gè, yafiɛn sǐ gbɛ̀ ki láʔaʔ. Nɛ́ ki cɛ́n bɛ̀ yeli yē nɛ pínɛ nɛ wuʔɔ nɛ́ weli ní wè, yeli funyɔ yi bága nyígi pínɛ bɛ̀ weli tíɛlɛ.

8 Siinyɛninɛ, ki 'nyaa wuʔɔgɔ gíì ki 'weli taa baa Azii tɛ́nimɛ nī bè, weli sǐ ki làrigɛ yeli nɛ̄ʔ. Ki wuʔɔgɔ gáà ki 'tɔ̀ni nɛ̀ weli fùrɔ kátii fúɔ nɛ̀ weli fànʔa kúɔ gè a weli tíimɛ 'kò nɛ kaala weli sìi wi wori nɛ̄ dè. 9 Ki 'nyaa weli tíimɛ cé tɛ́ngɛ ki nɛ̄ nɛ̀ láʔa weli bé kùu wī; sɔ̀ngirɔ táà sì cé ní nɛ̀ puu weli nīʔ, nɛ̀ yiri Kulocɛliɛ ŋáà wi nyɛ́ni kúbilo nyɛ́gi bèleʔ. 10 Wire wi 'weli suɔ ki kùu piiwe ŋáà wi feliwe mɛ́ wè, wire sí wi bé ní de weli suu. Kulocɛliɛ wire nɛ̄ weli 'weli sɔ̀ngirɔ taʔa dè, nɛ̀ tɛ́ngɛ ki nɛ̄ wire wi bé ní koli bè weli suɔ. 11 A yeli míɛni wúɔ nɛ́ weli ní wè, níɛ náari weli mɛ́ wè, kire ki bé ki kɛn weli bé kpuʔɔrɔ taa siɛnniʔɛnɛ náarigɛ kɛnmɛ nɛ̄ bè. Ki bé sí kacɛ̀ngɛ kpíʔile pàli nìʔɛnɛ nɛ̄.

Pɔli wi 'wi tánʔana lɛ̀lɛ yiʔɛ lè

12 N'gɛ weli bé gbɛ̀ sìndinge kpúɔn bé ti juu, weli funyɔ yi 'tɛ́ngɛ tire nɛ̄: ki 'nyaa weli 'puu nɛ weli sìi tári wè nɛ wìye cɛ́rigi nɛ́ kányiʔɛ ní siɛnnɛ yiʔɛ mɛ́ gè nɛ́ yeli mìɛni ní bèle. Kiì sí kò majo weli 'ki kpíʔile nɛ́ weli sícilige ní wīʔ. ʔéʔe, Kulocɛliɛ dī. 13 Siɛnrɛ dáà weli nɛ sɛbɛ nɛ tórigi yeli mɛ́ dè, tàa tìiyɛ bɛ̀ʔ tire dèʔ, yeli sì kò yeli sì ti cɛ́n wīʔ. Mi sí tɛ́ngɛ ki nɛ̄ yeli bé ti sɔ́migɔ bè cɛ́n cɛ̀ngɛ. 14 Bɛ̀ yeli sí ki cɛ́n nɛ̀ cɛ́n weli yē yeli nàgbuʔɔrɔ ti kɔri wè, bɛ̀ míɛni yeli bága puu weli mɛ́ weli nàgbuʔɔrɔ ti kɔri wè weli Kàfɔli Zezi Kirisi wi gè.

15 Mi cé sí tɛ́ngɛ kire nɛ̄, a mi sí nɛ ki caa bè kɛ́ baa yeli tiʔɛ nī gè, gìi ki bé tí yeli kpuʔɔrɔ taa tɔliyɔ siin. 16 A mi kɛ́nì yiri baa yeli tiʔɛ nī gè, m'bé tóri Maseduwani tɛ́nimɛ mɛ́. A mi ní nɛ̀ kɛ́nì kɔ́n baa kire tiʔɛ nī gè, m'bé tóri baa yeli mɛ́. Yeli nɛ̄ mi tánʔana ni tugoro ti bé sí puu a mi kɛ́nì je kɛ́ tɛ́nimɛ nī bè. 17 A mi sí kire kpíʔile gè, kire 'ki tìɛ lé mi 'ti juu nɛ́ káaliyɛ ní wī lé ? Á kire 'laa, gàa mi je kpíʔile gè, mi 'ki sɔ̀ngi lé bɛ̀ duniya wuulo kɛnmɛ tíɛlɛ bè wī lé, bè jo «ʔaan, ʔaan», bé ní yiʔɛ bè jo «ʔéʔe, ʔéʔe» lé ? 18 Kulocɛliɛ wiī tɛ́ngɛmɛ siɛn, wi 'ki cɛ́n nyasiɛnrɛ dáà weli 'juu yeli mɛ́ dè, káaliyɛ wè baa ti nīʔ. 19 Nɛ̀ taʔa gíi nɛ̄, Kulocɛliɛ Jaa wè, Zezi wè, wi wori dáà weli 'jáari yeli mɛ́ dè, mi nɛ́ Silivɛn nɛ́ Timote ní wè, káaliyɛ wè ti nīʔ; gìi ki 'cɛ́n gè, tiī kányiʔɛ wī. 20 Nɛ́ ki cɛ́n Kulocɛliɛ nyafɛniyɛ yi mìɛni yi 'fori nɛ́ Zezi Kirisi ní wè, níɛ ní kányiʔɛ. Kire nɛ̄ weli sî «» juu wè nɛ́ Zezi wire míʔɛ ní gè nɛ̀ taʔa Kulocɛliɛ nɛ̄ wè. 21 Kulocɛliɛ wire sí wi 'ŋɔri kɛn weli mɛ́, yeli nɛ́ weli ní bèle Kirisi pínɛnyɛnigɛ nī gè, nɛ̀ weli tɛ́ngɛ wìyeyɛ wi wuulo. 22 Wire wi 'wi fìɛ tɛ́ngɛ wè weli nɛ̄, nɛ́ sí le lè weli funyɔ nī yè bè ki tìɛ weli yē wire wuulo.

23 M'bé sí ki juu, Kulocɛliɛ wire wi 'ki cɛ́n nɛ́ mi ní, a mi 'finɛ wi- mi sìi líɛ wè. Ki 'nyaa bɛ̀ miì koli nɛ̀ kɛ́ baa Korɛnti kàʔa mɛ́ gèʔ, mi 'kire kpíʔile bè yeli ŋɔ́ bè taa wī. 24 Kiì nyaa majo weli je de yeli cɔ̀rí yeli tɛ́ngɛlɛ nī lè wīʔ. Weli nɛ pínɛ nɛ baara, gìi ki bé tí yeli fundaanra taa, nɛ́ ki cɛ́n yeli 'sɔ́migɔ nɛ̀ yéri tɛ́ngɛlɛ nī lè.