Tɛ́ngɛfɔli tánʔagɛnmɛ bè nɛ́ Kulocɛliɛ Pìle kɛnmɛ ní bè
8
1 Kire tiʔɛ gáà nī gè,
píra ŋáà nī wè,
bìli bīɛlɛ Zezi Kirisi wuulo bèle,
kàyuʔu yafiɛn ní wè pe nɛ̄ʔ.
2 Ki 'nyaa fànʔa gáà gī Kulocɛliɛ Pìle wuʔu gè níɛ sìi kanʔa wè bɛ̀ weli yē pínɛnɛ nɛ́ Zezi Kirisi ní wè,
ki fànʔa ki 'muɔa suɔ nɛ̀ yige kapiile fànʔa nī gè nɛ́ kùu ní wè.
3 Nɛ̀ taʔa gíi nɛ̄,
kaala níì Misa Fànʔa Siɛnrɛ tiǐ cî gbɛ̀ kpíʔile wèʔ,
bɛ̀ ki 'nyaa céri ti fànʔa ki 'cɛ́ri wè,
a Kulocɛliɛ wi sí wi Jaa tíimɛ tórigo wè wi ní céri ní bɛ̀ kapiile céri tíɛlɛ.
A kire 'kpíʔile a Kulocɛliɛ wi 'kàyuʔu juu kapiile nɛ̄ lè siɛn céri nī dè.
4 Gìi ki bé tí sínmɛ bíì Fànʔa Siɛnrɛ tiī nɛ nyu nɛ gbɛ̀ngí wè,
ki sínmɛ pi siɛnrɛ ti- fori weli nī,
weli bálì we ní wè nɛ tíin nɛ tári céri kanɛdanʔana nɛ̄ gèle wèʔ,
fúɔ macɛn Kulocɛliɛ Pìle tánʔagɛnmɛ nɛ̄ bèʔ.
5 Ki 'nyaa bìli bīɛlɛ pe nyɛ́ni pe sìi tári wè nɛ yɛligi nɛ́ céri kɛnmɛ ní bè,
céri kele peli nàa sɔ̀ngí;
bìli sí bīɛlɛ Kulocɛliɛ Tiɛlɛfun Pìle wuulo bèle,
kire Pìle kele peli nàa sɔ̀ngí.
6 Céri kasɔngilɔ keli sí yē nɛ waa kùu koligo nī,
nɛ̀ sí ki taa Kulocɛliɛ Pìle kasɔngilɔ keli nɛ waa sìi nɛ́ yanyige koligo nī.
7 Ki 'nyaa céri kasɔngilɔ kiyē leguuro nɛ̄ nɛ́ Kulocɛliɛ ní wè,
nɛ̀ taʔa gíi nɛ̄,
kire siɛnnɛ bèle pe nɛ̌ yéri ki nɛ̄ʔ bè lúʔu Kulocɛliɛ Fànʔa Siɛnrɛ mɛ́ dèʔ;
piyě cɛ gbɛ̀ jáa wīʔ.
8 Bìli bīɛlɛ pe pìye cáan céri kakpiʔiligele nɛ̄ gèle,
pe kɛnmɛ piǐ gbɛ̀ Kulocɛliɛ dɛ́ni wèʔ.
9 Yeli sí bèle,
yeli ní wè nɛ yeli sìi tári wè nɛ céri kanɛdanʔana kúuʔ,
Kulocɛliɛ Pìle tánʔana yeli nɛ tári,
bɛ̀ ki 'nyaa wi Pìle niī yeli nī kòrilo lèb.
Ki sí n'gɛ,
Pìle náà nī Kirisi Pìle lè,
a ni wè siɛn ŋíì nī wèʔ,
kire siɛn wi wè wi wuuʔ.
10 A ki sí yē Kirisi wiī yeli nī bèle,
a ki cɛ́nì nyaa céri ti bé kùu kapiile kɛnmɛ nɛ̄ bè yo,
siɛn pìle lè lire bé puu sìi nɛ̄ bɛ̀ ki 'nyaa Kulocɛliɛ wi 'yeli kpíʔile yeli yē sínminɛ bèle.
11 Kulocɛliɛ ŋáà wi 'Zezi nyɛ́ wè nɛ̀ yige kúbilo nī bèle,
bɛ̀ ki 'nyaa wi Pìle niī yeli nī kòrilo lè,
wi bé sìi kɛn yeli céri mɛ́ dè bè pínɛ,
yeli céri dáà dī kùu céri dè,
wi Pìle lire fànʔa nɛ̄ gè nàa nī yeli nī kòrilo lè.
12 A ki sí yē bɛ̀ gè,
nɛ siinyɛninɛ,
fuɔlɔ yē weli nɛ̄;
weli sì ní nɛ̀ yɛli bèri weli sìi tári wè de yɛligi nɛ́ céri kɛnmɛ ní bè díɛʔ.
13 A kire 'laa,
a ki yē yeli nɛ yeli sìi tári wè nɛ yɛligi nɛ́ céri kɛnmɛ ní bè,
yeli bé kùu.
Nɛ̀ sí ki taa Kulocɛliɛ Pìle lire fànʔa nɛ̄ gè a yeli nɛ céri kakpiʔiligele kpúu gèle nɛ yigi yeli sìi nī wè,
yeli bé kò sìi nɛ̄.
14 Ki 'nyaa bìli bīɛlɛ Kulocɛliɛ Pìle niī nɛ pe sìi kàrigí wè,
peli yē Kulocɛliɛ pìile.
15 Nɛ́ ki cɛ́n Kulocɛliɛ Pìle náà nī yeli nī bèle,
ni wè ki mɛ́ bè yeli kpíʔile sùkuloloʔ,
bèri fíɛrɛ cògí yeli nɛ̄ wīʔ.
Ki 'nyaa kire Pìle náà lire ni 'yeli kpíʔile a yeli 'kò Kulocɛliɛ pìile.
Kire Pìle lire ni 'tí weli nìɛ yékpoli wáari Kulocɛliɛ mɛ́ wè,
níɛ̀ jo:
«Tuufɔli Aba yo !»
16 Kulocɛliɛ Pìle náà lire ni nyɛ́ni ki nyu nɛ láʔala weli funyɔ nī yè dí weli yē Kulocɛliɛ pìile.
17 Bɛ̀ sí weli yē Kulocɛliɛ wi pìile bèle,
weli bé wi yɛrɛ ti tɔ̀ni taa wè bè pínɛ;
weli bága wi yɛrɛ ti tɔ̀ni taa wè bè wúɔ ti nɛ̄ nɛ́ Kirisi ní wè wī.
Nɛ̀ taʔa gíi nɛ̄,
a weli nɛ pínɛ nɛ wuʔɔ nɛ́ wi ní wè,
bà míɛni weli bága sa wúɔ buu kpuɔmɔ nī bè nɛ́ wi ní.
Tɛ́ngɛfɔli wi sɔ̀ngirɔ taʔadiʔɛ gè
18 Mi 'ki sɔ̀ngi nɛ̀ ki 'nyaa wuʔɔgɔ gáà gī weli nɛ̄ píra ŋáà nī wè,
kiǐ gbɛ̀ tɔ́nminɔ bè wúɔ bè yɛli nɛ́ kpuɔmɔ báà nī Kulocɛliɛ wi je ga sa weli nyɔ́gɔ wèʔ.
19 Ki 'nyaa Kulocɛliɛ yafaanra tiī yériyaʔara nɛ ki siri lɛ̀lɛ níì nī Kulocɛliɛ wi bága wi pìile pe kɛnmɛ tìɛ bè kpànʔanɛ wálilɛ wè.
20 Nɛ́ ki cɛ́n Kulocɛliɛ yafaanra tiī fànʔa káà kiyɛ nī,
kanyuɔnɔfun wuʔu gī.
Kiì sí kò majo yafaanra tire ti 'ki kɔ̀rirɔʔ;
ki 'nyaa Kulocɛliɛ wire wi 'ki kpíʔile bɛ̀,
nɛ́ sí sɔ̀ngirɔ taʔadiʔɛ yaʔa baa.
21 Kire 'jo,
cɛngɛ káà yē nɛ báan baa,
yafaanra ti bága paʔa bè suɔ ki fànʔa sìpiʔi gáà ki sùkulomɔ pi kiyɛ nī yè,
dí Kulocɛliɛ pìile pe sí jíin kpuɔmɔ nī bè.
22 Nɛ̀ taʔa gíi nɛ̄,
weli 'ki cɛ́n Kulocɛliɛ yafaanra ti mìɛni dè,
fùrɔgɔ yē ti nɛ̄ ti cíɛn bɛ̀ cesiiwe tíɛlɛ fúɔ nɛ̀ pɛ́nì taa bɛ̀ ki yē ŋɔ̀ wè.
23 Yafaanra tire yákuɔ sí bɛ̀ʔ díɛʔ,
weli bálì we 'Kulocɛliɛ Pìle taa lè nɛ̀ pínɛ wi yakɛnrɛ yapelige gè,
weli míɛni yē nɛ cíɛn laamɛ nī bè,
nɛ́ ní yériyaʔala nɛ ki siri Kulocɛliɛ wi- weli líɛ wi- weli kpíʔile wi pìile,
wí sí weli céri suɔ dè wi yige ki nī bè láʔa.
24 Ki 'nyaa Kulocɛliɛ wi 'weli suɔ,
nɛ̀ sí ki taa weli suɔlɔ ni wori tiī sɔ̀ngirɔ taʔadiʔɛ wī,
wiyē nɛ siri nɛ tíin wī.
A sɔ̀ngirɔ taʔadiʔɛ ki 'puu yanyaʔa gè,
kiǐ cî ní puu we- sɔ̀ngirɔ taʔa ki nɛ̄ʔ.
A kire 'laa wè,
yɛgɛ gíì ki nyɛ́ni wéli nɛ nyaʔa gè,
kire yē lé cígi sɔ̀ngirɔ taʔadiʔɛ ?
25 Nɛ̀ sí ki taa gìi weli wè nyaʔa gèʔ,
nɛ́ sí weli sɔ̀ngirɔ taʔa dè ki nɛ̄ gè,
weli nàa ki siri nɛ́ lèbaanna ní.
26 Bɛ̀ ki yē nɛ̀ pínɛ,
Kulocɛliɛ Pìle niī nɛ weli sári bà weli céri ti fànʔa ki 'cɛ́ri gè.
Ki 'nyaa weli sì ki cɛ́nʔ mɛni weli 'yɛli bèri Kulocɛliɛ náari wè de síi wèʔ.
Nɛ̀ sí ki taa Kulocɛliɛ Pìle lire tíimɛ lè,
ni nìɛ Kulocɛliɛ náari wè nɛ wi fiɛn weli kɛnmɛ nɛ̄ bè:
ni nìɛ cíɛn nɛ ŋɔ́gi nɛ tíri siɛnrɛ dáà tiǐ gbɛ̀ cɛ́n bè juu dèʔ.
27 Kulocɛliɛ wè,
bɛ̀ wire sí nɛ nyaʔa funyɔ nī yè,
wi nɛ̂ Pìle ni sɔ̀ngirɔ cɛ́n dè.
Nɛ̀ taʔa gíi nɛ̄,
Kulocɛliɛ Pìle niī nɛ Kulocɛliɛ náari wè nɛ wi fiɛn Kulocɛliɛ wi wuulo pe kɛnmɛ nɛ̄ bè nɛ̀ yɛli mɛni Kulocɛliɛ wiī nɛ ki caa gè.
Kulocɛliɛ dɛ́nigɛ kiī kpuʔɔ
28 Weli sí nyɛ́nì ki cɛ́n kele ke mìɛni kiyē nɛ kpínʔini nɛ sunʔuni kìye nɛ̄,
nɛ kacɛ̀ngɛ kpínʔini bìli mɛ́ Kulocɛliɛ wi 'pe dɛ́ni wè;
kire 'jo bìli Kulocɛliɛ wi 'nyíɛnɛ nɛ̀ kɔ̀n bèle nɛ̀ yɛli nɛ́ wi nyɛ́ni kaala ní lè.
29 Ki 'nyaa bìli wi cé kíni nɛ̀ cɛ́n nɛ̀ yaʔa bèle,
a wi 'pe kpíʔile nɛ̀ yaʔa pe- puu wi Jaa tíɛlɛ wè,
gìi ki bé tí wi Jaa wi- puu pìpeliwe wè wi siinyɛninɛ nìʔɛnɛ sunʔɔmɔ nī bè.
30 Peli bálì sí wi cé kíni nɛ̀ gbòbori nɛ̀ yaʔa bèle,
a wi 'pe yeri nɛ̀ pínɛ.
Bìli wi 'yeri bèle,
a wi 'pe tɔ́ri siɛnsinminɛ nɛ̀ pínɛ.
Bìli wi 'tɔ́ri siɛnsinminɛ bèle,
a wi 'pe nyɔ́gɔ kpuɔmɔ nī nɛ̀ pínɛ.
31 Gíi we bé ní cɛ juu cígini ?
A Kulocɛliɛ wiī weli wuu wè,
ŋáasiɛn wi bé ní jáa weli nɛ̄ ?
32 Nɛ́ ki cɛ́n,
wiì wi Jaa tíimɛ pɔ́rigɔ wè weli nɛ̄ʔ,
wi cɛ́nì wi kɛn weli we mìɛni kɛnmɛ nɛ̄ bè wī.
A ki sí yē bɛ̀ gè,
mɛni nɛ̀ síɛ wiǐ ga yɛrɛ ti mìɛni kɛnʔ weli mɛ́ waʔanɛ bè fàri wi Jaa nɛ̄ wè ?
33 Bìli Kulocɛliɛ wi cé nyíɛnɛ nɛ̀ kɔ̀n nɛ̀ yaʔa bèle,
ŋáasiɛn wi bé gbɛ̀ tìgi pe nɛ̄ ?
Nɛ́ ki cɛ́n Kulocɛliɛ wi nyɛ́ni siɛn tɔ́ri siɛnsinwɛ.
34 Ŋáasiɛn wi bága kàyuʔu cáan pe nɛ̄ ?
Nɛ́ ki cɛ́n Kirisi wi 'kùu,
kiì cɛ́nì yéri kire yákuɔ nɛ̄ʔ,
wi ń'nɛ̀ nyɛ́ nɛ̀ yiri kúbilo nī bèle,
wiī tɛ́niwɛ Kulocɛliɛ kàliige mɛ́ gè,
níɛ Kulocɛliɛ náari wè nɛ wi fiɛn weli kɛnmɛ nɛ̄.
35 Gáayɛgɛ ki bága weli yige Kirisi dɛ́nigɛ nī gè ?
Fùrɔgɔ lé,
á kire 'laa yawarirɛ lé,
á kire 'laa tɛ́ngɛlɛ wuʔɔgɔ gè lé,
á kire 'laa funduuro lé,
á kire 'laa yalere fuunmɔ lé,
á kire 'laa kagbɛnnɛ lé,
a kire 'laa ŋɔsii kùu lé ?
36 Majo bɛ̀ ki 'sɛbɛ wè nɛ́ jo:
Bè líɛ bè pa cɛngɛ kúɔ gè,
piyē nɛ weli caa nɛ́ kpúumɔ ní muɔ kɛnmɛ nɛ̄ bè.
Piyē nɛ weli tɔ́ri bɛ̀ sìnbaara tíɛlɛ,
dàa ní pe waa kpúudiʔɛ nī gèc.
37 Nɛ̀ sí ki taa kire gáà ki mìɛni láara gè,
weli yē jáafɔlilɔ feliye yi mìɛni,
ŋàa wī weli woli ni 'kpúʔɔ wi mɛ́ lè,
wire fànʔa nɛ̄.
38 Mi 'tɛ́ngɛ ki nɛ̄,
mi wè káalaʔ,
yakaa fáala sǐ gbɛ̀ jáa bè weli yige Kulocɛliɛ dɛ́nigɛ nī gèʔ:
kùu sǐ gbɛ̀ jáaʔ,
bè kò sìi nɛ̄ kire sǐ gbɛ̀ jáaʔ,
nyìʔɛnɛ tundunminɔ sǐ gbɛ̀ jáaʔ,
gbòdolilo sǐ gbɛ̀ jáaʔ,
yakaa fáala pàngɛ ŋáà nī wè kiǐ gbɛ̀ jáaʔ,
yakaa fáala gàa ki báan nɛ tíin gè kiǐ gbɛ̀ jáaʔ,
fànʔa káà fáala sǐ gbɛ̀ jáaʔ.
39 Nɛ̀ pínɛ yakaa fáala baa naamɛ wómi,
kiǐ gbɛ̀ jáaʔ;
á kire 'laa yakaa fáala dàala táanmɛ gè,
kiǐ gbɛ̀ jáaʔ.
Nɛ̀ pínɛ yafanʔa káà fáala fànʔa sǐ gbɛ̀ jáa bè weli yige Kulocɛliɛ dɛ́nigɛ nī gèʔ gàa wi 'tìɛ weli Kàfɔli Zezi Kirisi nī wèʔ.