Mariki 9

1 A wi 'fali nɛ̀ ní nɛ̀ pe yɛ: «M'bé ki juu yeli mɛ́ kányiʔɛ nɛ̄, pàli yē bile we sunʔɔmɔ nī, piyě ga kùuʔ, bé nɛ́ nyaa gè ki- pɛn nɛ́ fànʔa ní.»

Zezi kɛnmɛ pi 'yiʔɛ

(Mat 17.1-13; Luk 9.28-36)

2 Cɛnyɛ kɔlini 'kúɔ kire kàduʔumɛ gè, a Zezi wi kɔ́ri, wire nɛ́ Zaki nɛ́ , a pe 'kɛ́ nyagurukpaʔaligɛ naamɛ nɛ̀ sɛ́nì kò baa pìye yákuɔlɔ. Bà piyē baa bèle, a Zezi wi kɛnmɛ pi kɛ́nì yiʔɛ pe nyaamɛ nɛ̄ bè, 3 a wi bururo ti mìɛni 'yiʔɛ nɛ fíligi pérepere, nɛ nyíʔɛnɛ ! Yajigewe wè bile duniya nī wè bè gbɛ̀ yɛrɛ jíge ti- mùnu bè yɛli nɛ́ wi yɛrɛ ti nyíʔɛnɛgɛnmɛ ní bèʔ. 4 Cɛ̀ri 'sìʔɛrɛ a pe 'fali nɛ̀ nyaa, nɛ́ , a pe 'pɛn nɛ̀ pɛ́ni nyu nɛ́ Zezi ní wè.

5 A Piɛri 'fali nɛ̀ Zezi yɛ wè: «Tɛnmɛfɔli, kiī pɔ́rigɔ bà wiyē náʔa gè; tí we kpátaaya taanri kpúɔn, kàa nigbe- puu muɔ wuʔu, kàa sí puu Misa wuʔu, dí kàa sí puu wuʔu.» 6 Ki 'nyaa fíɛrɛ siɛnrɛ Piɛri wi cé juu mmɛ gè. Bà kele gálì ke 'kpíʔile mmɛ gè, a fíɛrɛ 'jíin pe nī kpuʔɔ; Piɛri wiì ní nɛ̀ ki cɛ́n gìi wire bé juu gèʔ.

7 A kàsadibagɛ káà 'tìgi nɛ̀ pe tɔ́n. A pe 'juumɔ páà lúʔu baa kàsadibagɛ laamɛ nī bè, a pi 'jo: «Ŋàa wire wī mi Jaa wè, ŋàa wi 'mi dɛ́ni wè. Yeri lúru wi nɛ̄.»

8 Cɛ̀ri sìʔɛrɛ, a pe ga je wéli wè piyè ní nɛ̀ siɛn nyaaʔ, gá Zezi wire nigbe bɛ̀ʔ, wi 'puu baa nɛ́ pe ní bèle.

Zezi 'jo dí siɛnjuuliɛwɛ Elii wi nyɛ́nì pɛn nɛ̀ kúɔ

9 Bà pe kɛ́ni tíri nyagurugo nɛ̄ gè, a Zezi wi 'ki juu nɛ̀ gbɛ̀ngɛ pe nɛ̄, nɛ́ pe yɛ pe fǎa ga kaala náà ni wori juu dè siɛn mɛ́ʔ, gàa pe 'nyaa baa nyagurugo nɛ̄ gèʔ, fúɔ bè taa wi ga nyɛ́ yiri kúbilo sunʔɔmɔ nī bè. 10 A pe 'ki siɛnrɛ cò dè pe funyɔ nī yè, níɛ pìye yúgo kúbilo nyɛ́yirile wori nɛ̄ dè, nɛ́ jo: «Siɛnrɛ dáà tire kɔri wire yē ŋíi wī mmɛ gè, a pe 'jo bè nyɛ́ bè yiri kúbilo sunʔɔmɔ nī bè ?»

11 A pe 'fali nɛ̀ kɛ́nì wi yúgo nɛ́ wi yɛ: «Gáa kɛnmɛ nɛ̄ pe 'jo dí wi 'yɛli bè kíni pɛn wè ?»

12 A wi 'pe yɛ: «Kányiʔɛ gī, Elii wi 'yɛli bè kíni pɛn, bè pa kele ke mìɛni gbòbori bè tɛ́ngɛ mɛni ke 'kíni nɛ̀ puu gèle. A ki sí yē bɛ̀ gè, gíi nɛ̄ Kulocɛliɛ Liʔɛ siɛnrɛ ti 'ki juu nɛ́ jo dí Siɛn Pùɔ wi bága pa wuʔɔgɔ suɔ kátii siɛnnɛ kiyɛ nī yè, peri wi máami de wi kɛ́ngi de wáari wè ?

13 «M'bé sí ki juu yeli mɛ́, Elii wi nyɛ́nì pɛn nɛ̀ kúɔ, a siɛnnɛ pe 'pe nyɛni kele kpíʔile gèle wi nɛ̄ pìye fungo, nɛ̀ yɛli nɛ́ gìi ní ki cé sɛbɛ nɛ̀ yaʔa nɛ́ wi míʔɛ ní gè.»

Zezi wi 'gbòdoli cìra nɛ̀ yige pùɔ wáà nī

(Mat 17.14-21; Luk 9.37-43)

14 Bà pe kɛ́nì líɛ nɛ waa bílì kúrugu bèle, nɛ̀ sɛ́nì ki nyaa a siɛnniʔɛmɛ 'gbuʔulo nɛ̀ pe màʔa nɛ̀ suʔu, á ní bèle nɛ kìí nɛ́ pe ní. 15 Bà siɛnnɛ pe kɛ́nì Zezi wéli wè nɛ̀ nyaa wè, a pe 'fɛ̀ nɛ̀ sɛ́nì wi kpàli. Ki 'nyaa wi pɛnnɛ ni cé pe fuu kpuʔɔ.

16 A wi 'pe yúgo nɛ́ pe yɛ: «Siɛnrɛ díi nɛ̄ ye 'puu nɛ kìí nɛ́ pe ní bèle ?»

17,18 A nàguɔ wáà 'fali nɛ̀ juu baa siɛnnɛ sunʔɔmɔ nī bè nɛ́ jo: «Tɛnmɛfɔli, ki 'nyaa gbòdolilo pálì bīɛlɛ náʔa nɛ̀ mi jaa kpíʔile wè a wi 'kò bobogo, náa wi wuʔɔ. A ki gbòdolilo pe gbɛ́nɛ̀ yɛ̀ wi kúrugu tiʔɛ ó tiʔɛ nī, pe nàa wi líi nɛ cáanri, kpɔ́rigɔ nàa yigi wi mɛ́ nyuɔ nī gè, á wi nàa gànʔana káa gèle. Wi nɛ̂ fali nɛ̀ siile. Wire ní mi 'pɛn muɔ kúrugu. Mi 'muɔ pìtɛnmɛnɛ náari bèle pe- wi cìra, piyè jáa nɛ̀ gbòdoli ŋáà cìra wè nɛ̀ yige wi nīʔ.»

19 A Zezi 'fali nɛ̀ jo: «ʔé, yeli bèle yirile náà wuulo bèle, yeli yē tɛ́ngɛlɛ fùn. Lɛ̀lɛ jori yeli tùʔɔ nɛ̀ jo mi- ga kúɔ bile nɛ́ yeli ní ? Mɛni yeli tùʔɔ nɛ̀ jo mi- ga yeli cò síɛ ? Ye- wi líɛ ye sìʔɛrɛ náʔa mi mɛ́.»

20 A pe 'pùɔ líɛ wè nɛ̀ pɛn wi kúrugu. Bà gbòdolilo pe pɛ́nì Zezi nyaa wè, a pe 'fali nɛ̀ pùɔ kpúɔn wè sɛni, a pùɔ wi 'nyɛri nɛ̀ tuu, nɛ kòligí dàala nɛ̄ lè níɛ kpɔ́rigɔ yigi.

21 A Zezi wi 'tuufɔli yúgo wè nɛ́ jo: «Ki lɛ̀lɛ jori nī ŋɔ̀ wè, bà gbòdoli ŋáà wiī wi kúrugu wè ?»

A tuufɔli wi 'jo: «Ti 'wi líɛ wi pìire lɛ̀lɛ nī, 22 dí ki 'tɔliyɔ nyuɔ kúɔ, gbòdolilo bálì pe nɛ̂ kɛ́nì wi yɛ̀gɛ nɛ̀ sɛ́nì cáan kàsun nī, làa nɛ̄ pe nɛ̂ sɛ́nì wi wáa luʔɔ nī bè wi kpúu. A ki yē muɔ bé jáa, ma nyinimɛ taa weli nɛ̄ má nyuɔ weli nɛ̄.»

23 A Zezi wi 'wi yɛ: «A ki yē m'bé jáa lé ? A tɛ́ngɛlɛ yē siɛn ŋíì mɛ́, kele ke mìɛni bé gbɛ̀ kpíʔile wi mɛ́.»

24 A pùɔ wi tuu wi 'fali nɛ̀ yékpoli wáa sɛni, nɛ́ jo: «Mi 'tɛ́ngɛ muɔ nɛ̄, nyuɔ mi nɛ̄ má mi sáʔa mi tɛ́ngɛlɛ ni cíɛmɛ láara bè !»

25 Bà Zezi kɛ́nì siɛnnɛ nyaa bèle a pe je de gbunʔuni de tɔ́ngi pe nɛ̄ bèle, a wi 'juu nɛ̀ jɛnmɛ gbòdoli nɛ̄ wè nɛ́ wi yɛ: «Gbòdoli muɔ ŋáà ma nyɛ́ni siɛnnɛ kpínʔini bèle pe kòrí bobobilo nɛ́ dùnɔnɔ bèle, mi 'jo ma yiri pùɔ ŋáà nī wè, mi fǎga ní muɔ nyaa muɔ ní jíin wi nīʔ.»

26 A gbòdoli wi 'fali nɛ̀ tuu nɛ kòkuugbuɔlɔ wáari sɛni, nɛ́ fali nɛ̀ pùɔ yàʔara yàʔara wè nɛ̀ wi 'siile, nɛ́ fali nɛ̀ yiri wi nī sɛni. A pùɔ wi 'kò baa majo wi 'kùu wī, a siɛnnɛ sáa 'jo dùʔɔ wi 'kùu wī. 27 Nɛ̀ ki yaʔa bà Zezi sɛ́nì wi cò kɔli nɛ̄ gè, a wi 'nyɛ́, nɛ̀ fali nɛ̀ yɛ̀ nɛ̀ yéri.

28 Bà pe kɛ́nì kɛ́ kpáa mɛ́ gè, á ki 'nyaa peli yákuɔ pe 'puu baa nɛ́ Zezi ní wè, a wi pìtɛnmɛnɛ pe 'wi yúgo kàsɛngɛ nɛ̄ nɛ́ jo: «Gáa nɛ̄ weli sì jáa nɛ̀ gbòdoli ŋáà cìra wè nɛ̀ yige pùɔ ŋáà nī wè ?»

29 A wi 'pe yɛ: «Yafiɛn sǐ gbɛ̀ gbòdoli ŋáà wi felige yige wè siɛn nīʔ, ga náarigɛ bɛ̀ʔ.»

Zezi wi 'koli nɛ̀ wi kùu nɛ́ wi nyɛ́yirile wori juu dè

(Mat 17.22-23; Luk 9.43-45)

30 Bà pe kɛ́nì yiri baa kire tiʔɛ nī gè, a pe 'tóri kùlo mɛ́. Zezi wiì puu nɛ caa siɛnnɛ pe ki cɛ́nʔ. 31 Ki 'nyaa wi 'puu nɛ wi tɛnmɛ bèle nɛ́ pe yɛ: «Pe bé cò wè bè le siɛnnɛ pe kiyɛ nī, pe- wi kpúu. A wi sí kùu wè, cɛndaanriwuʔu nɛ̄ gè wi bé nyɛ́ bè yiri.» 32 Wi pìtɛnmɛnɛ piyè cé siɛnrɛ dáà ti kɔri cɛ́n wèʔ, piyè cé sí sori nɛ̀ wi yúgoʔ.

Siɛn ŋíì wī kpuɔwɔ wè Kulocɛliɛ yiʔɛ mɛ́ gè

(Mat 18.1-5; Luk 9.46-48)

33 A pe sɛ́nì jíin Kapɛrinawu kàʔa nī. Bà pe kɛ́ni yē saʔa nī gè, a Zezi wi 'pe yúgo: «Gíi wori nɛ̄ ye 'puu nɛ kìí baa koligo nɛ̄ gè ?» 34 A pe 'pìiri. Ki 'nyaa bà pe 'puu koligo nɛ̄ gè pe 'puu nɛ pìye kìí ŋíi wi 'kpúʔɔ pe mìɛni nī bèle.

35 A Zezi 'fali nɛ̀ tɛ́ni, nɛ́ pe mìɛni kiɛ nɛ́ siin yeri bèle nɛ̀ pɛ́nì ki juu pe mɛ́ nɛ́ pe yɛ: «A siɛn ŋíì nɛ caa bè puu péliwe wè, wi- puu bìli pe mìɛni kàdotɔnwɔ, nɛ́ pe mìɛni baakuɔwɔ.» 36 Nɛ́ fali nɛ̀ pùɔ wáà líɛ nɛ̀ pɛ́nì wi yérige pe sunʔɔmɔ nī bè, nɛ̀ wi líɛ nɛ̀ cò, nɛ́ pe yɛ: 37 «A siɛn ŋíì 'pùɔ ŋáà wi wàa cò cɛ̀ngɛ mi míʔɛ kire kɛnmɛ nɛ̄ bè, mi siɛn wi 'cò cɛ̀ngɛ. A ŋìi sí mi cò cɛ̀ngɛ wè, m'bɛ̀ʔ siɛn wi 'cò cɛ̀ngɛʔ, ki 'nyaa Ŋàa wi 'mi tun wè wire siɛn wi 'cò cɛ̀ngɛ.»

A siɛn ŋíì wè weli leguuwo wèʔ wiī nɛ́ weli ní

(Luk 9.49-50)

38 A 'fali nɛ̀ kɛ́nì wi yɛ: «Tɛnmɛfɔli, weli 'nàguɔ wáà nyaa wi gbòdolilo cìrá nɛ yigi siɛnnɛ nī bèle nɛ́ muɔ míʔɛ ní gè, nɛ̀ ki yaʔa ki nàguɔ wi wè nɛ́ weli níʔ, weli tɔ̀ni nɛ̀ puu nɛ caa bè wi cìra láʔa ki baara nɛ̄ dè.»

39 A Zezi wi 'wi yɛ: «Ye fǎri wi cɔ̀rí de láʔalaʔ, nɛ̀ taʔa gíi nɛ̄, a siɛn 'mi míʔɛ yeri gè nɛ̀ kakpuʔɔ kpíʔile wè, siɛn wiǐ ní gbɛ̀ yiʔɛ de sìpiʔi nyu de wáari mi kɔli mɛ́ gèʔ. 40 A siɛn ŋíì wè weli leguuwo wèʔ, ki siɛn wiī nɛ́ weli ní wī. 41 M'bé ki juu yeli mɛ́, a siɛn ŋíì 'luʔɔ kɛn yeli wàa mɛ́ a wi 'gbuɔ bɛ̀ yeli yē wuulo bèle, kányiʔɛ nɛ̄, siɛn wiǐ sa fɔ̀n wi tɔ̀ni nī wèʔ.

Kele gílì ke nyɛ́ni siɛn nii kapiile nī lè

(Mat 18.6-9; Luk 17.1-2)

42 «A siɛn ŋíì yē kúrugodiʔɛ pìile bálì pe wàa cíɛwɛ mɛ́ wè, bàli pe 'tɛ́ngɛ mi nɛ̄ bèle, kire siɛn wè a pe cɛ́nì tírɛ sìndɛnigbuʔɔ puɔ wi mɛ́ yétiige nī gè nɛ́ sɛ́nì wi wáa kuʔɔjii sícuumɔ tiʔɛ nī gè, kire cî pɔ́ri wi mɛ́.

43 «Nɛ̀ pínɛ, a ki yē muɔ kɔli kiī nɛ muɔ kanʔa muɔ nɛ tun kapiile nī lè, ma ki ceri ma wáa. Ki 'pɔ́ri muɔ- puu kajerige ní bé sí sa bànguɔ sìi taa wè, sɛ́ni muɔ kiyɛ yi siin yi- puu muɔ nɛ̄ dí muɔ ga sa puu kàsun nī gè, kàsun gáà ki wè fíri nɛ nyaʔa gèʔ. 44 [Ki tiʔɛ fiɛnrɛ ti wè kúu nɛ nyaʔaʔ, ki kàsun míɛni ki wè nɛ fíri nɛ nyaʔaʔ.]

45 «A ki sí yē muɔ tɔligɔ ki muɔ kanʔa muɔ nɛ tun kapiile nī lè, ma ki ceri ma wáa. Kire 'pɔ́ri muɔ- puu tajerige ní bé sa bànguɔ sìi taa wè, sɛ́ni muɔ- puu nɛ́ muɔ tɔliyɔ yi siin ní yè bága sa jíin kusiʔi tiɛpiʔi nī gè. 46 [Kire tiʔɛ fiɛnrɛ ti wè kúu nɛ nyaʔaʔ, ki kàsun míɛni ki wè nɛ fíri nɛ nyaʔaʔ.]

47 «A ki yē muɔ nyapile ni nyɛ́ni muɔ kanʔa muɔ nɛ tun kapiile nī lè, ma ni kɔ̀n ma wáa liʔi. Ki 'pɔ́ri muɔ puu nyapilenigbefɔli baa jíin nī gè, sɛ́ni muɔ- puu nɛ́ nyapigele siin ní gèle pe ga sa muɔ wáa kusiʔi kàsun nī gè. 48 Kire tiʔɛ fiɛnrɛ ti wè nɛ kúu nɛ nyaʔaʔ, ki kàsun míɛni ki wè fíri nɛ nyaʔaʔ.

49 «Kiī cɛ́ngɛ, siɛn ó siɛn, kàsun ki bága sa wi cìile bè wi gbòbori bè yaʔa Kulocɛliɛ mɛ́, majo mɛni pe sî sarigɛ gbòbori nɛ̀ yaʔa nɛ́ yasuʔɔgɔ ní kɛnmɛ bíì nɛ̄.

50 «Yacɛngɛ gī yasuʔɔgɔ gè, a ki tàanma pi sí kúɔ ki nī gè, gáa ní ye bé ki tɛ́ni ? Ye- puu tàanma nɛ̄ nɛ́ yìye ní majo bɛ̀ yasuʔɔgɔ ki sî sɔ́migɔ nɛ̀ yiri yɛgɛ nī wè.»