Matiye 25

Sinborilo kiɛ kàsiile lè

1 « gè, we bé gbɛ̀ ki tɔ́nminɔ nɛ́ sinborilo kiɛ ní. Pe cé pe fètingele líɛ gèle nɛ̀ kɛ́ bàa cefɔnwɔfɔli kpàli wè. 2 Pàli kogunɔ 'puu ledoro, bìli kogunɔ ní bèle sícilile. 3 Bìli pe 'puu ledoro dè, a pe 'pe fètingele líɛ gèle nɛ̀ kɛ́, nɛ́ sí kò piyè sùnmɔ líɛ nɛ̀ pìye kpɔniʔ. 4 Bìli sí pe 'puu sícilile bèle, a peli 'sùnmɔ líɛ nɛ̀ suʔulo pe fètingele kúrugu gèle.

5 «Bà labɔli wi kɛ́ni mɔgi baa wè, a pe mìɛni 'yɛ̀ nɛ ŋɔ́ni nɛ kpɔni, nɛ̀ kɛ́nì ŋɔ́ni pígɛ. 6 Nyìge ki pɛ́nì liɛ gè, a pe 'yékpoli láà lúʔu. A pe 'jo: ‹Cefɔnwɔfɔli wi 'pɛn, ye- yiri ye sa wi kpàli !›

7 «Kire lɛ̀lɛ nī lè a sinborilo bálì pe mìɛni 'yɛ̀ nɛ pe fètingele gbòborí gèle. 8 Bìli pe 'puu ledoro dè, a pe 'bìli yɛ̀ bèle, bàli pe 'puu sícilile bèle, nɛ́ jo: ‹Ye- weli kɛn nɛ́ yeli sùnmɔ páà ní, weli fètingele kiyē náʔa nɛ fíri.›

9 «Bìli pe 'puu sícilile bèle, a pe 'siɛnnugoro kɛn pe mɛ́ nɛ́ jo: ‹Weli sǐ gbɛ̀ kire kpíʔileʔ; sùnmɔ piǐ je weli yɛliʔ, piǐ sí ní yeli woli nyuɔ lèʔ. Gìi ki 'pɔ́ri gè, yeri waa sùnbarilɛ kúrugu bèle ye sa pàa suɔ.›

10 «A pe 'yiri nɛ̀ kɛ́ sùnmɔ suɔdiʔɛ nī gè. A labɔli wi pɛ́nì yiri. Bìli pe cé gbòbori nɛ̀ kúɔ bèle, a peli 'kɛ́ nɛ́ wi ní cepɔrigɔ pùrɔrɔ mɛ́ dè, á pe 'kɔ̀ri tɔ́n gè.

11 «Lɛ̀lɛ láà kɛ́nì tóri lè, a sinborilo bílì pe pɛ́nì yiri, nɛ̀ jo: ‹Kàfɔli, kàfɔli, -kɔ̀ri múgu gè weli mɛ́ !›

12 «A wi sí pe yɛ: ‹M'bé ki juu yeli mɛ́ kányiʔɛ nɛ̄, mi sì yeli cɛ́nʔ.›

13 «Kire nɛ̄, ye- puu nyɛminɛ; nɛ̀ taʔa gíi nɛ̄, yeli sì cɛngɛ cɛ́n gèʔ, bé nɛ́ ga jo lɛ̀lɛ lèʔ.»

Baakuɔlɔ taanri baakuɔgɛnmɛ kàsiile lè

(Luk 19.11-27)

14 «Cígini, ki bága pa buu bɛ̀ majo nàguɔ wáà wi yé je kɛ́ tánʔana nɛ̄. A wi 'wi baakuɔlɔ yeri bèle nɛ̀ pɛ́nì wi lɔri le dè pe kiyɛ nī. 15 A wi 'wàa kɛn tiɛ kpègele sirasiin dabataan (500), nɛ̀ wàa kɛn tiɛ kpègele sirakeli (200), nɛ̀ wàa kɛn tiɛ kpège. Nɛ̀ pe kɛn nɛ̀ yɛli nɛ́ pe taagɛnmɛ ní bè. Nɛ́ yiri nɛ̀ kɛ́ tánʔana nɛ̄. 16 Ŋìi wi cé taa tiɛ kpègele sirasiin dabataan gèle (500), a wire 'fali nɛ̀ fìɛlɛ nɛ̀ sɛ́nì baara nɛ́ ke ní, nɛ̀ kàli sirasiin dabataan (500) taa nɛ̀ fàri ke nɛ̄. 17 Ŋìi wi cé taa tiɛ kpègele sirakeli (200) gèle, a wire míɛni sɛ́nì baara nɛ̀ kàli sirakeli taa nɛ̀ fàri ke nɛ̄. 18 Ŋàa wi cé taa tiɛ kpège nigbe gè, a wire 'kɛ́ nɛ̀ sɛ́nì kàtiʔɛ túgu nɛ́ wi kàfɔli wi wali làrigɛ wè baa.

19 «Lɛ̀lɛ láà kɛ́nì tóri a ki 'mɔgɔ wè, a baakuɔlɔ bálì pe kàfɔli wi 'kɔ́n baa tánʔana nɛ̄ lè nɛ̀ pɛn, nɛ̀ pɛ́nì baakuɔlɔ yeri bèle pe- pa kúnɔ wire mɛ́.

20 «Ŋìi wi cé taa tiɛ kpègele sirasiin dabataan (500) gèle, a wire 'pɛn nɛ̀ pɛ́nì kàli sirasiin dabataan (500) kɛn nɛ̀ fàri gìli nɛ̄ gèle, nɛ́ jo: ‹Mi kàfɔli, tiɛ kpègele sirasiin dabataan (500) muɔ cé kɛn mi mɛ́, mi 'kàli sirasiin dabataan (500) taa nɛ̀ fàri ke nɛ̄.›

21 «A wi kàfɔli wi 'wi yɛ: ‹Nicii ! muɔ yē baakuɔcɛ̀nwɛ nɛ́ ní tɛ́ngɛmɛ siɛn. Muɔ 'nyaa tɛ́ngɛnmɛ siɛn nɛ́ cɛ̀ri ŋáà ní wè; m'bé ní kàa taʔa muɔ mɛ́ nìʔɛgɛ. Te jiin ma pa puu fundaanra nɛ̄ nɛ́ muɔ kàfɔli ní wè.›

22 «Ŋìi wi cé taa tiɛ kpègele sirakeli (200) gèle, a wire míɛni pɛn nɛ̀ pɛ́nì wi wori juu dè, nɛ́ jo: ‹Mi kàfɔli, tiɛ kpègele sirakeli muɔ cé kɛn mi mɛ́; mi 'kàli sirakeli taa nɛ̀ fàri ke nɛ̄, ke n'gɛlɛ.›

23 «A wi kàfɔli wi 'wi yɛ: ‹Nicii, muɔ yē baakuɔcɛ̀nwɛ nɛ́ ní tɛ́ngɛmɛ siɛn. Muɔ yē tɛ́ngɛmɛ siɛn nɛ́ cɛ̀ri ŋáà ní wè, m'bé ní kàa taʔa muɔ mɛ́ nìʔɛgɛ. Te báan ma pa puu fundaanra nɛ̄ nɛ́ muɔ kàfɔli ní wè.›

24 «Ŋìi wi cé taa tiɛ kpège nigbe gè, a wire míɛni pɛn nɛ̀ pɛ́nì wi wori juu dè nɛ́ jo: ‹Mi kàfɔli, mi 'ki cɛ́n fungbɛngɛ siɛn wī muɔ wè. Tiʔɛ gíì nī muɔ sì yatanʔara tánʔa dèʔ, baa muɔ nɛ̂ sɛ́nì líɛ; nɛ̀ pínɛ tiʔɛ gíì nī muɔ sì yaliire cɛri dèʔ, muɔ nɛ̂ sɛ́nì koli baa ki tiʔɛ nī gè. 25 Mi 'fíɛ muɔ nɛ̄, a mi sí sɛ́nì muɔ tiɛ kpège túgu gè nɛ̀ tɔ́n dàala nī; ki n'gɛ gàa muɔ cé kɛn mi mɛ́ gè.›

26 «A wi kàfɔli wi sí siɛnnugoro kɛn dè wi mɛ́ nɛ́ wi yɛ: ‹Baakuɔsipiiwe wī muɔ wè, nɛ́ ní sàliyɛfɔli ! Muɔ cé ki cɛ́n mi nɛ̂ sɛ́nì líɛ tiʔɛ gíì nī mi sì yatanʔara tánʔa dèʔ, nɛ̀ pínɛ mi nɛ̂ sɛ́nì koli tiʔɛ gíì mi sì yaliire cɛri dèʔ ! 27 Muɔ cé yɛli bè sa mi wali tɛ́ngɛ wè walitɛngɛsaʔa mɛ́. A wi cé sɛ́nì puu baa kire tiʔɛ nī gè, mi cî ga pa wi líɛ nɛ́ tɔ̀ni ŋáà wi cî taʔa wi nɛ̄ wè. 28 Ye- wi tiɛ kpège suɔ gè wi mɛ́, ye- kɛn tiɛ kpègele sirasiin dabataanfɔli (500) mɛ́ wè.›

29 «Nɛ́ ki cɛ́n, a yakaa yē siɛn ŋíì mɛ́, pe bé ní wi kɛn, wi bé taa nìʔɛgɛ. Ŋìi sí wī yakaa fùn wè, cɛ̀ri ŋáà tíimɛ wī siɛn mɛ́ wè, pe bé wi suɔ wi mɛ́. 30 Tɔ̀nifun baakuɔwɔ ŋáà wire wè, ye- wi cò ye wáa baa yebilige tiʔɛ nī gè kpànʔanɛ, kire tiʔɛ kire nī kɔnwaara nɛ́ gànʔana cérigige yē wè.»

Duniya kàyuʔujuujɛngɛ siɛnrɛ

31 «A wi kɛ́ni báan wi kpuɔmɔ nī bè nɛ́ wi pe mìɛni ní bèle, kire lɛ̀lɛ nī lè wi bé tɛ́ni wi kùlofɔligɔ kácunʔɔ nɛ̄ gè bè puu kpuɔmɔ nī, 32 dí kùlogolo siɛnnɛ pe mìɛni pe sí pìye pínɛ wi yiʔɛ mɛ́ gè, dí wi sí pe yori bè yige pìye nī majo mɛni yajuunaʔawa cî sìnbaara yori nɛ̀ yige síkaala nī bèle, 33 bé sí sìnbaara yérige dè wi kàliige mɛ́, síkaala bèle bé sí peli yérige wi kàmɛgɛ mɛ́.

34 «Píra ŋáà nī wè bìli bīɛlɛ kàliige mɛ́ gè, dí Kùlofɔli wi sí peli yɛ: ‹Yeri báan, yeli bálì ye 'diba taa mi Tuu mɛ́ wè, ye pa Kùlofɔligɔ ki kɔrigɔ líɛ gè, gàa ki cé tíi nɛ̀ gbòbori nɛ̀ yaʔa yeli mɛ́ bèle duniya sélimɛ lɛ̀lɛ nī lè. 35 Nɛ̀ taʔa gíi nɛ̄, fungo cé mi taa a yeli 'mi kɛn mi 'lìi. A luʔɔwuʔɔ 'mi taa a yeli 'mi kɛn luʔɔ ní a mi 'gbuɔ. Mi 'puu nabɔnwɔ, a yeli 'mi cò nabɔnrɔ nɛ̄, 36 mi 'puu bururo fùn a yeli 'yɛrɛ le mi nɛ̄. Mi 'puu yaawa a yeli sɛ́nì mi síɛri. Mi 'puu kasuu nī a yeli sɛ́nì mi wéli.›

37 «Kire lɛ̀lɛ nī lè siɛnsinminɛ pe bé jo: ‹Kàfɔli, gáa lɛ̀lɛ nī weli 'muɔ nyaa á fungo 'muɔ taa, nɛ́ muɔ kɛn a muɔ 'lìi wè ? Nɛ̀ pínɛ lɛ̀lɛ níi nī weli 'muɔ nyaa á luʔɔwuʔɔ ní muɔ nɛ̄, nɛ́ muɔ kɛn luʔɔ ní a muɔ 'gbuɔ wè ? 38 Cígini lɛ̀lɛ níi nī weli 'muɔ nyaa muɔ ní nabɔnwɔ, nɛ́ muɔ tìrige nabɔnrɔ nɛ̄ dè ? á kire 'laa muɔ ní bururo fùn, nɛ́ yɛrɛ le muɔ nɛ̄ wè ? 39 Sé weli 'muɔ nyaa muɔ ní yaawa, á kire 'laa muɔ ní kasuu nī, nɛ́ sɛ́nì muɔ wéli wè ?›

40 «Kùlofɔli wi bé siɛnnugoro kɛn dè pe mɛ́ bé jo: ‹M'bé ki juu yeli mɛ́ kányiʔɛ nɛ̄, dàa ti mìɛni mi 'tìɛ dàa dè, lɛ̀lɛ ó lɛ̀lɛ yeli 'ni làa fáala kpíʔile mi siinyɛninɛ pe wàa cíɛwɛ nɛ̄ wè, mi mɛ́ yeli 'ni kpíʔile.›

41 «Píra ŋáà nī wè dí kùlofɔli wi sí kàmɛgɛ wuulo yɛ bèle: ‹Ye- sìʔɛrɛ mi táanni yeli bèle, yeli woli ni 'cúʔɔ wī, ye- sa jíin nī gè; wire míʔɛ ní ki cé kpíʔile wire nɛ́ wi tundunminɔ ní bèle. 42 Nɛ̀ taʔa gíi nɛ̄, fungo 'mi taa yeli sì mi kɛn a mi lìiʔ. A luʔɔwuʔɔ 'mi taa, yeli sì luʔɔ kɛn mi mɛ́ʔ. 43 Mi 'puu yeli nabɔnwɔ, yeli sì mi cò nabɔnrɔ nɛ̄ʔ. A bururo 'mi laa, yeli sì yɛrɛ kɛn m'mɛ́ a mi leʔ. Mi 'puu yaawa nɛ ní kasuu nī, yeli sì sɛ́nì mi wéliʔ.›

44 «A pe sí jo: ‹Kàfɔli, gáa lɛ̀lɛ nī weli 'muɔ nyaa a fungo 'muɔ taa, á kire 'laa luʔɔwuʔɔ 'muɔ taa; muɔ ní nabɔnwɔ, á kire bɛ̀ʔ muɔ ní bururo fùn; muɔ ní yaawa, á kire bɛ̀ʔ muɔ ní kasuu nī, nɛ́ kò weli sì muɔ sáʔa wèʔ ?›

45 «Kire lɛ̀lɛ nī lè, wi bé sí pe yɛ: ‹M'bé ki juu yeli mɛ́ kányiʔɛ nɛ̄, lɛ̀lɛ ó lɛ̀lɛ nī yeli sì kele gálì kpíʔile gèle yìrile bálì pe wàa mɛ́ wèʔ, mi nɛ̄ yeli 'cíi yeli sì ki kpíʔileʔ.›

46 «Kire lɛ̀lɛ nī lè dí bàli pe sí kɛ́ bànguɔ wuʔɔgɔ tiʔɛ nī gè, dí siɛnsinminɛ bèle, peli sí kɛ́ bànguɔ sìi tiʔɛ nī gè.»