Matiye 24

Zezi wi 'Kulocɛliɛ Gbùʔɔrɔsaʔa ki cáan wori juu dè

(Mar 13.1-2; Luk 21.5-6)

1 Bà Zezi wi kɛ́nì yiri Kulocɛliɛ nī gè nɛ waa wè, a wi pe 'kɛ́ wi kúrugu nɛ̀ sɛ́ni Kulocɛliɛ Gbùʔɔrɔsaʔa tìí gè wi nɛ̄, nɛ ki cɛ̀nmɛ wori nyu dè wi mɛ́.

2 A Zezi wi 'siɛnnugoro kɛn dè pe mɛ́ nɛ́ pe yɛ: «M'bé ki juu yeli mɛ́ kányiʔɛ nɛ̄, sìndɛnigɛ káà fáala sì je ga kò bile taʔaga kàa nɛ̄ʔ, ti mìɛni bága ŋɔrigɔ bè cáan.»

Zezi wi 'ti juu nɛ̀ yaʔa wuʔɔgɔ gáà ki báan gè

(Mar 13.3-13; Luk 21.7-19)

3 A wi 'kɛ́ nɛ̀ sɛ́nì tɛ́ni nɛ̄ gè, a pe 'kɛ́ wi kúrugu peli yákuɔlɔ, nɛ̀ sɛ́nì wi yɛ: «-Ki juu weli mɛ́, gáa lɛ̀lɛ nī kele gálì ke bága kpíʔile ? Nɛ̀ pínɛ fìɛ ŋíì wi bága muɔ pɛn lɛ̀lɛ tìɛ lè nɛ́ duniya kúɔ lɛ̀lɛ ní lè ?»

4 A Zezi wi 'pe yɛ: «Yeri yìye ciʔige, siɛn fǎa ga yeli fáanni bè yeli pùunniʔ. 5 Nɛ́ ki cɛ́n siɛnniʔɛnɛ bága pɛn bè pari nyu nɛ́ mi míʔɛ ní bé jo peli bīɛlɛ wè, bè nìʔɛnɛ fáanni bè pùunni. 6 Nɛ̀ pínɛ yeli bága de kapinʔɛnɛ tùnmɔ lúru, de kapinʔɛnɛ wori lúru dè de mári. Ye fǎga ki yaʔa ki de fíɛrɛ cògí yeli nɛ̄ʔ, ki 'kàri fànʔa wī kire kele gálì ke 'yɛli bè kpíʔile, nɛ̀ sí ki taa duniya wi kúɔ lɛ̀lɛ lire bɛ̀ʔ ni 'nɔ̀ʔ. 7 Ki 'nyaa kùlo láà bága yɛ̀ bè sa tuu kùlo láà nɛ̄, fànʔa káà bága yɛ̀ bè sa tuu fànʔa káà nɛ̄, fungo bága tuu tiɛyɛ yáà nī, dí dàala ni sí de cúungu tiɛyɛ yáà nī. 8 Kire gáà ki mìɛni bé nyaa fùrɔgbuʔɔ káà sélimɛ bè, majo bɛ̀ cesiiiwe liyɛ cî nɛ wi yáa yè.

9 «Kire lɛ̀lɛ nī lè, pe béri yeli cògí de kanʔa peri yeli wuʔɔ béri yeli kpúu, nɛ̀ pínɛ yeli bága sìndɛngɛlɛ pe mìɛni biɛn mi míʔɛ kire kɛnmɛ nɛ̄. 10 Kire lɛ̀lɛ náà nī lè, pàli nìʔɛnɛ bé kúrugo bè tuu, bìli béri pìye cògí de kanʔa leguulo mɛ́ bèle, siɛnnɛ pe bé yiʔɛ bè pìye biɛn.

11 «Kulocɛliɛ siɛnjuulo jànvaafɔlilɔ nìʔɛnɛ bé yiri, pe bé siɛnniʔɛnɛ fáanni bè pùunni. 12 Síciramɛ kele ke bé sii bè niʔɛ, kire bé ki kɛn siɛnmɛ nìge ki bé kúɔ siɛnnɛ nìʔɛbɛlɛ nī. 13 A siɛn ŋíì sí ki kpàri nɛ̀ cò nɛ̀ pɛ́nì paʔa wè, kire siɛn wire wi bága sa suɔ. 14 Nɛ̀ pínɛ Kùlofɔligɔ ki dáà ti bé jáari bè tóri duniya tiɛrɛ ti mìɛni nī, ki- puu kacɛ́nnɛ kùlogolo ke mìɛni mɛ́ gèle; píra ŋáà nī wè, dí duniya kúɔ lɛ̀lɛ ni sí nɔ̀.»

Zezi wi 'siɛnnɛ sɔ̀mi bèle wi pɛnjɛngɛ wori nɛ̄ dè

(Mar 13.14-23; Luk 21.20-24)

15 «A yeli sí kɛ́nì tètii kaala nyaa lè, nàa wori Daniyɛli wi cé juu wè, a ni sɛ́nì yéridiʔɛ kɔ̀n baa Kulocɛliɛ nī gè, siɛn ŋíì wi nyɛ́ni siɛnrɛ dáà wéli dè, wi- ti kɔri cɛ́n wè, 16 kire lɛ̀lɛ nī lè a bìli yē tɛ́nimɛ nī peri fé peri waa nyaguruyo mɛ́. 17 A siɛn ŋíì yē binge naamɛ, siɛn wi fǎga jo wi bé tìgi bàa wi yɛrɛ líɛ dè bè yige saʔa nī gèʔ. 18 Nɛ̀ pínɛ, a ŋìi yē siʔi mɛ́, wi fǎga jo wi bé koli pɛn kpáa mɛ́ bè pa burugbuʔɔ líɛʔ.

19 «Kire cɛnyɛ nyáà nī yè, yawuʔɔ bé laʔalafɔlilɔ taa bèle, peli nɛ́ bìli ní pe pìile kanʔa pe ŋɔri wè ! 20 Yeri Kulocɛliɛ náari yeli fɛ̀jɛngɛ ki fǎa ga pa nyaa wiire lɛ̀lɛ nīʔ, bé nɛ́ ga jo cɛngɛ nīʔ. 21 Ki 'nyaa wuʔɔgbuʔɔ káà felige ki bé tuu duniya nɛ̄ wè, ki felige fìɛ kpíʔileʔ, nɛ̀ líɛ duniya sélimɛ nɛ̄ bè, nɛ̀ pɛ́nì nɔ̀ pàngɛ gèʔ; ki felige míɛni sì ní ga kpíʔile bè nyaaʔ. 22 A kiì cé nyaa Kulocɛliɛ wi je ki cɛnyɛ nyáà yaʔa yè yi- puu weriye wè, siɛn sì cî suɔʔ. Nɛ̀ sí ki taa bìli Kulocɛliɛ wi 'nyíɛnɛ nɛ̀ kɔ̀n bèle, peli kɛnmɛ nɛ̄ bè, a wi 'ki cɛnyɛ nyáà yaʔa yè yi- puu weriye.

23 «Kire nɛ̄, a siɛn 'yeli yɛ: ‹ wiī náʔa gɛ !› á kire 'laa, ‹Wiī baa mmɛ !› ye fǎga tɛ́ngɛ wi nɛ̄ʔ. 24 Nɛ́ ki cɛ́n jànvaafɔlilɔ pálì bága pa yiri bé jo peli bīɛlɛ Kirisi wè, nɛ́ Kulocɛliɛ siɛnjuulo jànvaafɔlilɔ ní. Pe béri kanyuʔɔnigɔlɔ kpoliyo kpínʔini, nɛ́ kakpoliyo ní de pínɛ. Fúɔ a ki cɛ́nì taa bìli tíimɛ Kulocɛliɛ wi 'nyíɛnɛ nɛ̀ kɔ̀n bèle, pe bé pe fáanni bè pùunni. 25 N'dɛ, mi 'yeli sɔ̀mi nɛ̀ yaʔa nɛ̀ kúɔ.»

26 «A pe sí ní nɛ̀ yeli yɛ: ‹N'ŋɛ, wiī baa waama kùlo nī !› Ye fǎga kɛ́ baaʔ. Cígini a pe ní nɛ̀ jo: ‹N'ŋɛ, wiī baa làriwɛ saʔa nī !› Ye fǎga tɛ́ngɛ ti nɛ̄ʔ. 27 Nɛ̀ taʔa gíi nɛ̄, mɛni nyìʔɛnɛ ni sî nyíʔɛnɛ cɛngɛnyɛnifoligɔli mɛ́ gè, níɛ̀ sɛ́nì nyíʔɛnɛ cɛngɛnyɛnijiingɔli mɛ́ gè, kire kɛnmɛ pire nɛ̄ pɛngɛnmɛ pi bága puu. 28 Tiʔɛ gíì nī yakuugo ki yē gè, kire tiʔɛ nī dìbarɛ ti nìɛ tìi pínɛ.»

Zezi wi 'juu kele gílì ke bága tóri wire pɛnjɛngɛ gè

(Mar 13.24-27; Luk 21.25-28)

29 «A kire cɛnyɛ nyáà yi wuʔɔgbuʔɔ gáà ki pɛ́nì tóri gè,

Tiɛnugo nī gè cɛngɛ ki bé yiʔɛ

bè kò yebilige,

yege kiǐ ní de kpìɛnmɛ cáanriʔ,

nɛ̀ pínɛ ŋɔgɔlɔ ke bé tìgi

nyìʔɛnɛ nī lè bè tuu,

fànʔa tiɛyɛ nyáà yī

baa nyìʔɛnɛ nī lè

yi bé cúungo.»

30 «Píra ŋáà nī wè dí fìɛ wi sí yiri baa nyìʔɛnɛ nī lè. Kire lɛ̀lɛ nī lè duniya siɛnnɛ feliye yi mìɛni béri kɔnrɔ wáari de yobilo, dí pe sí Siɛn Pùɔ nyaa wè wiri báan kàsadibarɛ naamɛ gè nyìʔɛnɛ nī lè nɛ́ fànʔa ní, nɛ́ kpuɔmɔ ní bɛ̀ ki caa mmɛ.

31 «Dí wi sí wi tórigo bèle nɛ́ kàkpanʔa wíimɛ ní kpuʔɔ; pe pa wi wuulo kɔ́ri bèle bìli wi 'nyíɛnɛ nɛ̀ kɔ̀n bèle, duniya labinʔɛnɛ sicɛri nī gèle, bè pe pínɛ, bè ki líɛ duniya láʔala láà mɛ́ bèri waa nìi mɛ́ lè.»

Tɛnmɛnɛ níì we 'yɛli we taa sàanfiidiige siɛnrɛ nī dè

(Mar 13.28-31; Luk 21.29-33)

32 «Ye- sí tɛnmɛnɛ taa sàanfiidiige kàsiile nī lè: lɛ̀lɛ níì nī ki sî lèvɔnrɔ yige dè nɛ́ wabunro yige dè, yeli nɛ̂ ki cɛ́n ŋùʔɔ ki 'jíin. 33 Yeli míɛni bèle, a yeli kɛ́nì kele gálì ke mìɛni nyaa ke kpínʔini gèle, ye- ki cɛ́n wiī bile wìile nɛ̄ lè, wi pɛn lɛ̀lɛ ni 'kò túɔn. 34 M'bé ki juu yeli mɛ́ kányiʔɛ nɛ̄, lɛ̀lɛ náà wuulo piyě ga kùu kúɔʔ, dí kele gálì ke mìɛni ke sí kpíʔile. 35 Nyìʔɛnɛ nɛ́ dàala ní lè tire bága tóri, mi siɛnrɛ tiǐ sí ga tóri bè nyaaʔ.

Zezi wi 'juu wi pɛnjɛngɛ wori nɛ̄ dè

(Mar 13.32-37; Luk 17.26-30, 34-36)

36 «Gìi ki 'kire cɛngɛ kúɔ gè nɛ́ ki lɛ̀lɛ ní lè, siɛn sì ki cɛ́nʔ; tíimɛ piyè ki cɛ́nʔ, nɛ̀ Jaafɔli pínɛ wè, nɛ̀ yiri Tuufɔli wire nigbe nī. 37 Kɛnmɛ nɛ̄ bíì kele ke cé tóri lɛ̀lɛ nī lè, bɛ̀ ki bága puu. 38 Kire cɛnyɛ nī yè, sɛ́ni kàsakpiile ni tìgi lè, siɛnnɛ pe 'puu nɛ líi níɛ gbun, nɛ cepɔriyɔ kpínʔini, nɛ pe pìile cepɔriyɔ kpínʔini nɛ pínɛ; fúɔ nɛ̀ taa cɛngɛ gíì Nɔwe wi kɛ́nì jíin nī gè; 39 piyè cé tɛ́ngɛ ki nɛ̄ʔ, fúɔ nɛ̀ taa a kàsakpiile ni kɛ́nì pɛ́nì pe koli píi bèle. Bɛ̀ c ki bága puu kire tíɛlɛ. 40 Siɛnnɛ siin bága puu siʔi mɛ́; pe bé wàa nigbe líɛ, bé wàa nigbe yaʔa. 41 Cɛlilɛ siin bága puu de tire tírɛ nɛ̄; pe bé wàa nigbe líɛ, bé wàa yaʔa. 42 Kire nɛ̄, ye- puu nyɛminɛ, bɛ̀ yeli sì yeli Kàfɔli wi pɛnjɛngɛ cɛ́n gèʔ.

43 «Ye- sí dàa lúʔu dè: a ki yē saʔafɔli wi cî ki cɛ́n lɛ̀lɛ níì nī kàyuuwo wi bága pɛn wè, wi cî kò nyɛwɛ, kàyuuwo wi fǎa ga pa wire saʔa kpúɔn gè kaaʔ. 44 Kire nɛ̄, yeli míɛni bèle ye- puu gbòboriyaʔala, nɛ̀ taʔa gíi nɛ̄, lɛ̀lɛ níì yeli wè sɔ̀ngí lèʔ, kire lɛ̀lɛ lire nī Siɛn Pùɔ wi bága pɛn.»

Sùkulolo siin kàsiile lè

(Luk 12.41-48)

45 «Sùkulowo ŋíi wi bé taa, dí wi kàfɔli wi pa wi nyaa wi- puu tɛ́ngɛmɛ siɛn, bé sí puu síciliwe wè, dí wi kàfɔli wi sí wi tɛ́ngɛ wi saʔa kele nɛ̄ gèle wi de lìile kanʔa lè ni kɛn lɛ̀lɛ nī lè ? 46 Kire baakuɔwɔ wi wuʔu kiī tànʔa, a wi kàfɔli wi kɛ́nì pɛn nɛ́ pɛ́nì wi nyaa wi kire kpínʔini gè. 47 M'bé ki juu yeli mɛ́ kányiʔɛ nɛ̄, wi bé wi tɛ́ngɛ wi kɔliyɛrɛ ti mìɛni nyùgo nɛ̄.

48 «A ki sí nyaa baakuɔwɔ sìpiiwe ŋáà wi 'ki sɔ̀ngi wi fungo nī gè nɛ́ jo: ‹Mi kàfɔli wi kɛ́ni mɔgi baa›, 49 nɛ́ fali nɛ̀ tuu nɛ wi baakuɔnyɛninɛ kpúɔn bèle, níɛ líi níɛ gbun nɛ́ sungbuɔlɔ ní bèle, 50 a kire baakuɔwɔ ŋáà wi kàfɔli wi kɛ́nì pɛ́nì yiri wè, nɛ̀ ki yaʔa baakuɔwɔ wiì puu nɛ kire cɛngɛ sɔ̀ngí gèʔ, nɛ́ ki lɛ̀lɛ ní lè wè, 51 wi kàfɔli wi bé tún nɛ́ wi ní bé wi wàli bè wáa wi sa puu nɛ́ jànvaafɔlilɔ ní bèle. Kire tiʔɛ kire nī kɔnwaara nɛ́ gànʔana cérigige bága puu wè.»