Kulocɛliɛ kajuudiʔɛlɛ gèle nɛ́ kaliʔɛlɛ ní gèle
15
1 Kire tiʔɛ gáà nī gè,
a Fànʔa Siɛnrɛ sɛbɛcɛ́nminɛ bèle,
nɛ́ Fariziɛnnɛ ní bèle Zerizalɛmi kàʔa nī gè,
a peli 'pɛn Zezi kúrugu wè nɛ̀ pɛ́nì wi yɛ:
2 «Gáa nɛ̄ muɔ pìtɛnmɛnɛ pe wè nɛ kaliʔɛlɛ kpóri gèle,
gàli we 'yɛ̀ nɛ̀ nyaa liɛlɛ mɛ́ bèle ?
níɛ̀ nɛ búru káa wè kiyɛ ní yè sìnjige nī yè ?»
3 A wi sí 'siɛnnugoro kɛn pe mɛ́ nɛ́ pe yɛ:
«A yeli bèle,
gáa nɛ̄ yeli nɛ Kulocɛliɛ kajuudiʔɛlɛ kɛ́ngi gèle nɛ wáari,
nɛ́ kò yeli kaliʔɛlɛ keli nɛ̄ gèle ?
4 A kire 'laa wè,
Kulocɛliɛ wiì ki juu léʔ nɛ́ jo:
Te muɔ tuu nɛ́ muɔ yàa
kpóri wèa,
dí a siɛn ó siɛn wi tuu faʔa,
á kire 'laa nɛ̀ wi yàa faʔa wè,
ki siɛn wi 'yɛli pe- wi kpúu wīb.
5 «Nɛ̀ sí ki taa yeli nɛ̂ jo dí a siɛn 'ki juu wi tuu mɛ́,
á kire 'laa wi yàa mɛ́,
nɛ́ wi yɛ:
‹Gìi ki 'puu náʔa m'mɛ́ mi gbɛ̀ muɔ sáʔa wè,
mi kɛ́nì ki kɛn Kulocɛliɛ mɛ́.›
6 siɛn wi nɛ̌ ní wi tuu kpúʔɔ wèʔ.
Kire kɛnmɛ báà nɛ̄ bè yeli nɛ̂ Kulocɛliɛ siɛnrɛ faʔa dè nɛ́ yeli kaliʔɛlɛ ní gèle.
7 Jànvaafɔlilɔ bīɛlɛ yeli bèle !
Kulocɛliɛ siɛnjuuliɛwɛ Ezayi wi tànʔa ki 'puu yeli nɛ̄,
bà wi cé kíni nɛ̀ yeli wori juu dè nɛ̀ yaʔa,
nɛ́ jo:
8 Nyawari nɛ̄ siɛnnɛ bálì
piyē nɛ mi kpóri yákuɔ,
nɛ̀ sí ki taa pe funyɔ nī yè
pe 'líili mi nɛ̄.
9 Kpuʔɔrɔ díì piyē nɛ tari mi nɛ̄ dè,
ti mìɛni yē wíra wī.
Ki 'nyaa siɛnnɛ kajuʔulo
nɛ́ siɛnnɛ kaliʔɛlɛ yákuɔ nɛ̄
piyē nɛ siɛnnɛ tɛnmɛ bèlec.»
Yɛrɛ díì ti nyɛ́ni siɛn nɔ́ri wè Kulocɛliɛ yiʔɛ mɛ́ gè
10 A wi 'fali nɛ̀ siɛnniʔɛmɛ yeri bè,
nɛ̀ pɛ́nì pe yɛ:
«Yeri lúru,
yéri siɛnrɛ ti kɔri cɛ́ngi wè.
11 Gìi ki nyɛ́ni jiin nyuɔ nī gè,
kire bɛ̀ʔ ki nyɛ́ni siɛn nɔ́ri wèʔ,
nɛ̀ sí ki taa gìi ki nyɛ́ni yigi nyuɔ nī gè kire ki sî siɛn núʔɔ wè.»
12 Kire tiʔɛ gáà nī gè,
a wi pìtɛnmɛnɛ pe 'sìʔɛrɛ nɛ̀ kpɔni wi nɛ̄ nɛ́ wi yɛ:
«Muɔ 'cɛ́n lé bà Fariziɛnnɛ pe 'muɔ siɛnrɛ dáà lúʔu dè,
a ti 'pe biɛn lé ?»
13 A Zezi wi 'pe yɛ:
«Mi Tuu ŋáà wī baa nyìʔɛnɛ nī lè,
tiige ó tiige wiì cɔ́ri gèʔ,
ki tiige ki bága kɔ́n bè wáa wī.
14 Ye- pe yaʔa baa,
fúɔnnɔ bīɛlɛ,
pe pe fúɔnnyɛninɛ cògí.
A fúɔn sí je fúɔn wáà cò wè,
pe siin pe bága láʔa tuu kàtiʔɛ káà nī.»
15 A Piɛri sí wi yɛ:
«Kàsiile náà kɔ̀n lè weli mɛ́.»
16 A Zezi wi 'pe yɛ:
«Yeli míɛni nɛ tíin sìnjilige fùn wī lé ?
17 Yeli sì cɛ́nʔ lé,
gìi míɛni ki sî jíin siɛn nyuɔ nī gè,
kiī nɛ waa liyɛ nī wī lé,
á siɛn wi nɛ̂ kɛ́nì kɛ́ kàfuʔu lé ?
18 Siɛnrɛ díì sí ti sî yiri siɛn nyuɔ nī gè,
tire sî kɔ́n fungo nī wī;
tire sí ti nyɛ́ni siɛn nɔ́ri wè Kulocɛliɛ yiʔɛ mɛ́ gè.
19 Nɛ̀ taʔa gíi nɛ̄,
fungo nī sɔ̀ngibiire tiī nɛ kɔ́ngi,
nɛ́ siɛnkpuʔu ní gè,
nɛ́ ceyuugo ní gè,
nɛ́ kanuʔɔrɔ ní dè,
nɛ́ kàyuugo ní gè,
nɛ́ káfinɛrɛ kajuumɔ ní bè,
nɛ́ míɛcuʔɔgɔ siɛnrɛ ní dè.
20 Dàa tire ti nɛ̂ siɛn núʔɔ wè.
Á kire 'laa wè,
bè lìi nɛ́ kiyɛ ní yè sìnjige nī yè,
kire nɛ̌ siɛn núʔɔ wèʔ.»
Kanaa wuulo cuɔ wáà 'tɛ́ngɛ Zezi nɛ̄ wè
21 Bà Zezi wi 'yiri baa kire tiʔɛ nī gè,
nɛ̀ kɛ́ Tiiri nɛ́ Siidɔn tɛ́nimɛ nī.
22 A Kanaa kùlo cuɔ wáàd 'yiri nɛ̀ taʔa wi nɛ̄,
nɛ yékpoli wáari wi kúrugu níɛ wáa:
«ʔé Kàfɔli,
Dawuda Jaa,
nyinimɛ taa mi nɛ̄ !
gbòdoli wáà nɛ mi póri wuʔɔ wè !»
23 A Zezi wi 'píɛ,
wiì yafiɛn juu nɛ́ wi níʔ.
A wi pìtɛnmɛnɛ pe 'sìʔɛrɛ nɛ̀ kpɔni wi nɛ̄ nɛ́ wi yɛ:
«Cɛliwɛ ŋáà cìra wè wi- koli weli kúrugu,
wiī nɛ kpáala nɛ nii we nī.»
24 A wi sí jo:
«Kulocɛliɛ wiì mi tun yafiɛn mɛ́ʔ,
ka laa Isirayɛli kùlo sìnbaara tire kúrugu bɛ̀ʔ,
sìnbaara dáà ti 'pùunni dè.»
25 A cɛliwɛ wi sɛ́nì káguro wáa wi táanni nɛ́ jo:
«ʔé Kàfɔli,
-mi sáʔa !»
26 A Zezi wi 'wi yɛ:
«Kiì yɛli we pìile pe suro líɛ bè wáa panbigele mɛ́ʔ.»
27 A cɛliwɛ wi sí jo:
«ʔaan,
kányiʔɛ gī Kàfɔli,
panbigele ke nɛ̂ sí nɛ ke kàfɔlilɔ pe siliiworo káa dè lìidiʔɛ nī gè.»
28 Kire tiʔɛ nī gè a Zezi wi sí wi yɛ:
«Cí,
cɛliwɛ muɔ,
muɔ tɛ́ngɛlɛ ni tɔ̀ni yē kpuɔlɔ !
Gìi muɔ nɛ caa gè,
ki bé kpíʔile.»
Kire lɛ̀lɛ nī lè a cɛliwɛ wi pori wi 'fali nɛ̀ puʔɔ sɛni.
Zezi wi 'yaala puʔɔ nìʔɛbɛlɛ
(Mar 7.31)
29 A Zezi wi 'yiri baa kire tiʔɛ nī gè nɛ̀ kɛ́ Galile kuʔɔjii kɔli mɛ́,
nɛ̀ sɛ́nì tánʔa nɛ̀ tɛ́ni baa nyagurugo nɛ̄ gè.
30 A siɛnnɛ pe 'kɛ́ wi kúrugu nìʔɛbɛlɛ nɛ́ pe yaala ní bèle:
bìli yē lolilo,
bìli yē yaakpɔlilɔ,
bìli yē fúɔnnɔ,
bìli yē bobobilo,
nɛ̀ fàri yaala feliye sáa nɛ̄.
A pe sɛ́nì pe cáan wi yiʔɛ mɛ́ gè a wi 'pe puʔɔ.
31 A kire 'ki kɛn a siɛnnɛ pe 'yɛ̀ nɛ nyu nɛ cúru,
bà pe 'bobobilo nyaa bèle pe nyu bèle,
lolilo ní bèle nɛ tári bèle,
nɛ́ yaakpɔlilɔ ní bèle pe pori bèle,
á fúɔnnɔ ní bèle nɛ nyaʔa bèle.
A siɛnnɛ pe 'tuu nɛ Isirayɛli Kulocɛliɛ tòbiló wè.
Zezi wi 'siɛnnɛ siramuʔɔ kɛn a pe 'lìi
32 A Zezi wi 'wi pìtɛnmɛnɛ yeri bèle nɛ̀ pɛ́nì pe yɛ:
«Siɛnniʔɛmɛ báà pi nyinimɛ yē mi nī:
ki cɛnyɛ taanri yī ŋɔ̀ wè bɛ̀ piyē mi kúrugu bèle,
yafiɛn wè pe mɛ́ bè káaʔ.
Mi sí wè caa bè pe yɛ peri waa nɛ́ fungo ní gèʔ.
Pe ŋɔri ti baa kúɔ koligo nɛ̄.»
33 A wi pìtɛnmɛnɛ pe 'siɛnnugoro kɛn wi wi mɛ́ nɛ́ wi yɛ:
«Sé sí we bé búru taa wè náʔa sìnbirige gáà nī gè,
bé sí siɛnniʔɛmɛ báà kɛn bè pe- káa bè tín wè ?»
34 A Zezi wi 'pe yúgo:
«Búrulo jori bīɛlɛ baa yeli mɛ́ ?»
A pe 'wi yɛ:
«Búrulo kɔlisiin,
nɛ́ fúɔpigele cɛ̀ri ní.»
35 A wi 'ki juu nɛ̀ gbɛ̀ngɛ siɛnniʔɛmɛ mɛ́ bè,
pe- tɛ́ni dàala nɛ̄ lè.
36 Nɛ́ fali nɛ̀ búrulo kɔlisiin líɛ bèle nɛ́ fúɔlɔ ní bèle,
nɛ̀ Kulocɛliɛ síɛri.
Nɛ́ wi celile nɛ̀ kɛn pìtɛnmɛnɛ mɛ́ bèle,
a pe 'wi liɛlɛ siɛnnɛ nɛ̄ bèle.
37 A siɛnnɛ pe mìɛni 'káa nɛ̀ tín.
A pìtɛnmɛnɛ pe 'juɔnyiʔɛnɛ kɔlisiin le ke 'nyì káagoriro nɛ̄ dè.
38 Siɛnnɛ bílì pe cé búru káa wè,
pe 'puu nàguɔlɔ siramuʔɔ (4 000);
piyè cé cɛlilɛ nɛ́ pìile tɔ́ri bèle nɛ̀ le baaʔ.
39 Bà wi kɛ́nì siɛnnɛ tórigo bèle nɛ̀ kúɔ bèle,
a wi 'jíin kɔ́ri nī gè nɛ̀ kɛ́ Magadan tɛ́nimɛ kayɔbigɔ mɛ́.