<<    <     Matiye     10     >    >> 
Zezi pìtɛnmɛnɛ kiɛ nɛ́ siin pe míɛyɛ yi n'yɛ
10
1 A Zezi wi 'wi pìtɛnmɛnɛ kiɛ nɛ́ siin yeri bèle,
nɛ̀ fànʔa kɛn gè pe mɛ́ pe gbɛ̀ri gbòdolilo cìrá bèle de láʔala siɛnnɛ nɛ̄ bèle,
bé sí de yaama feliye yi mìɛni gbari yè,
nɛ́ yaakpɔlilɔ feliye yi mìɛni ní yè.
2 Wi pìtɛnmɛnɛ kiɛ nɛ́ siin bílì wi cé nyíɛnɛ nɛ̀ kɔ̀n pe- puu wire tundunminɔ bèle,
pe míɛyɛ yi n'yɛ:
Péliwe wi míʔɛ gè,
Siimɔ,
pe 'puu nɛ wi ye nɛ pínɛ Piɛri,
nɛ́ wi cɔni Andire;
nɛ́ Zaki,
Zebede jaa wè,
nɛ́ wi siinyɛni Zan;
3 nɛ́ Filipi;
nɛ́ Batelemii;
nɛ́ Toma;
nɛ́ Matiye,
lanbosuɔwɔ wè;
nɛ́ Zaki Alife jaa wè;
nɛ́ Tade;
4 nɛ́ Siimɔ Zelɔti wè;
nɛ́ Zudasi ŋáà pe ye Isikariyɔti wè;
wire wi yé kɛ́nì Zezi le wè wi leguulo kiyɛ nī yè.
Zezi wi 'pìtɛnmɛnɛ kiɛ nɛ́ siin tun
5 Pìtɛnmɛnɛ kiɛ nɛ́ siin bálì peli Zezi wi cé tun nɛ́ ti juu nɛ̀ gbɛ̀ngɛ pe nɛ̄ nɛ́ pe yɛ:
«Ye fǎga kɛ́ kùlogolo kálì siɛnnɛ kúruguʔ,
nɛ̀ pínɛ ye fǎga jíin Samarii tɛ́nimɛ wuulo kàʔa káà fáala nīʔ.
6 Yeri waa Isirayɛli kùlo sìnbaara tire kúrugu,
dàa ti 'pùunni dè.
7 A ye waa bèle,
yeri ki jáari ye jo:
‹Nyìʔɛnɛ Kùlofɔligɔ ki 'sìʔɛrɛ nɛ̀ pɛn náʔa we mɛ́.›
8 Yaala bèle,
yeri pe pori;
kúbilo bèle,
yeri pe yɛ̀gí;
yaanyiɛmɛfɔlilɔ bèle,
yeri pe pori;
gbòdolifɔlilɔ bèle,
yeri gbòdolilo cìrá bèle de yigi pe nī.
«Yeli 'taa waʔanɛ,
yeri kanʔa waʔanɛ.
9 Ye fǎga tiɛ líɛʔ,
nɛ́ waliʔ,
ye fǎga cɛ wali yìriwe líɛ bè le yìye kúruguʔ.
10 Ye fǎga kpɔ̀bilɔ líɛʔ tánʔana wuuloʔ,
nɛ́ burugo siinwuʔuʔ,
nɛ́ tɔriyɔʔ,
nɛ́ kàgbiʔileʔ.
Nɛ́ ki cɛ́n baakuɔwɔ wi nyalii wi 'yɛli bèri kanʔa wi mɛ́.
11 «A yeli sɛ́nì jíin kàʔa gíì nī,
á kire 'laa vògo ó vògo nī gè,
ye- caala kpíʔile,
siɛn ŋíì wi bé gbɛ̀ yeli cò nabɔnrɔ nɛ̄ wè;
ye- kò baa kire tiʔɛ nī gè yeli kári lɛ̀lɛ ni- pa nɔ̀.
12 A yeli sɛ́nì tìrige saʔa gíì nī,
ye- pe síɛria.
13 A ki saʔa wuulo pe 'yeli tìrige bèle,
yeli yanyige ki bé puu baa ki kpáa nī gè.
A piyè sí yeli tìrige bèleʔ,
yeli yanyige ki bé koli bɛn yeli mɛ́.
14 A siɛn sì yeli cò nabɔnrɔ nɛ̄ʔ,
nɛ̀ pínɛ a siɛn sì lúʔu yeli siɛnrɛ nɛ̄ dèʔ,
ye- yiri kire saʔa nī gè,
á kire 'laa ki kàʔa nī gè,
yé sí yeli yedaʔala cúbugo cúru gè ye wáa baa ki tiʔɛ nī gèb.
15 M'bé ki juu yeli mɛ́ kányiʔɛ nɛ̄,
kàyuʔujuujɛngɛ gè,
Sodɔmi nɛ́ Gomɔri kàaya wuulo kàyuʔu ki bé ní cɛ màʔa bè puu yɔ́rigɔ bè tóri ki kàʔa gáà ki kàyuʔu nɛ̄ gèc,
baa piyè lúʔu yeli mɛ́ bèleʔ.»
Wuʔɔgɔ káà nɛ báan baa
16 «Ki sí n'gɛ,
mi 'yeli tun bɛ̀ sìnbaara tíɛlɛ kàdafiire sunʔɔmɔ nī.
Kire kɛnmɛ nɛ̄ ye- yìye cò macɛ́n bɛ̀ wɔ̀burɔ tíɛlɛ,
yé sí puu funyɔ ní yè fìiye bɛ̀ gòtogolo tíɛlɛ.
17 Yeri yìye ciʔige siɛnnɛ nɛ̄ bèle,
nɛ̀ taʔa gíi nɛ̄,
pe bága de yeli cògí de kanʔa kàyuʔujuulo gbuʔulod nī gèle pe kàyuʔujuusaaya nī yè,
peri yeli kpúɔn sápigele ní pe tɛnmɛzaaya nī yè.
18 Nɛ̀ pínɛ pe béri yeli yeri kùlofɔlilɔ kpáaya mɛ́ nɛ́ fànʔafɔlilɔ tiɛyɛ nī,
mi míʔɛ kire kɛnmɛ nɛ̄ bè.
Kire bé kpíʔile kaala,
yeli bé puu mi wori ti juufɔlilɔ pe yiʔɛ mɛ́ gè nɛ́ kùlogolo kálì siɛnnɛ mɛ́ bèle.
19 A pe sí kɛ́nì yeli cò nɛ̀ kɛn fànʔafɔlilɔ mɛ́ bèle,
ye fǎga ki yaʔa sànviige de yeli wáariʔ kɛnmɛ bíì nɛ̄ yeli báa de nyu wèʔ,
nɛ́ gìi yeli bé juu gèʔ.
Nɛ̀ taʔa gíi nɛ̄,
siɛnrɛ díì yeli 'yɛli bè juu dè,
Kulocɛliɛ bé ti kɛn yeli mɛ́ sɛni kire lɛ̀lɛ nī lè.
20 Yeli bɛ̀ʔ ye béri nyu kire lɛ̀lɛ nī lèʔ;
ki 'nyaa yeli Tuu wi Pìle lè lire ni béri nyu yeli nyuɔyɔ nī yè.
21 «Siɛn bága wi laayirinyɛni kɛn kùu mɛ́,
tuufɔlilɔ pálì bága cɛ de pe pìile kanʔa bèle peri pe kpúu.
Nɛ̀ pínɛ pìile pálì bága leguuro le nɛ́ pe siivɔlilɔ ní bèle bè pe kɛn kùu mɛ́.
22 Yeli kaala ni bága siɛnnɛ pe mìɛni biɛn mi míʔɛ kire kɛnmɛ nɛ̄.
A siɛn ŋíì sí tɔ̀ni nɛ̀ ki kpàri nɛ̀ cò nɛ̀ pɛ́nì paʔa wè,
kire siɛn wire wi bága sa suɔ.
23 A pe kɛ́ni yeli wuʔɔ kàʔa gáà nī gè,
yeri fé yeri waa kàʔa káà kiiyɛ mɛ́;
m'bé ki juu yeli mɛ́ kányiʔɛ nɛ̄,
yeli sǐ ga Isirayɛli kàaya yi mìɛni nyaari bè paʔaʔ,
dí Siɛn Pùɔ wi sí pɛn wè.
24 «Pìtɛnmɛwɛ wiì kpúʔɔ nɛ̀ tóri wi tɛnmɛfɔli nɛ̄ wèʔ,
nɛ̀ pínɛ baakuɔwɔ wiǐ gbɛ̀ kpúʔɔ wi kàfɔli nɛ̄ wèʔ.
25 Gìi ki 'yɛli nɛ́ pìtɛnmɛwɛ ní wè,
wi- taa buu bɛ̀ wi tɛnmɛfɔli tíɛlɛ wè,
dí baakuɔwɔ wire sí puu bɛ̀ wi kàfɔli tíɛlɛ wè.
A siɛnnɛ pe 'jáa nɛ̀ míʔɛ le saʔa kàfɔli nɛ̄ wè nɛ̀ jo Bɛlizebulie wè o,
á bìli sí bīɛlɛ baa saʔa nī gè do,
pe bága peli yeri gáa,
peli wuʔu kiǐ ga wìɛ í ?»
Ye fǎri fìʔɛ́ʔ
26 «Kire nɛ̄,
ye fǎri pe fìʔɛ́ʔ.
Nɛ̀ taʔa gíi nɛ̄,
kaala láà fáala sì je ga kò fuudɔnnɔʔ,
gá niì yiri kpànʔanɛʔ;
kalarilɛ míɛni sì je ga kò gá siɛn sì ni cɛ́nʔ.
27 Siɛnrɛ dáà mi nɛ nyu yeli mɛ́ yebilige nī gè,
ye- sari ti nyu kpìɛnmɛ nɛ̄,
nɛ̀ pínɛ dàa mi nɛ nyu yeli mɛ́ ngbúʔulo táanni gèle,
ye- sari ti jáari binyɛ naamɛ.
28 «Ye fǎri fìʔɛ́ʔ bìli nɛ̄ pe sî siɛn kpúu wè;
piyè sí gbɛ̀ jáa bè siɛn pìle kpúu lèʔ.
Ye- sí de fìʔɛ́ Kulocɛliɛ wire nɛ̄,
wire ŋáà wi bé gbɛ̀ siɛn pìle pínɛ lè bè ni cúʔɔ nɛ́ siɛn cetinnɛ ní lè bànguɔ kàsun nī gè.
29 Pe nɛ̌ dúʔu kàʔasiɛnrɛluʔulo siin pári tɛmɛ nigbe nɛ̄ ?
Nɛ̀ sí ki taa làa nigbe wè tun dàala nɛ̄ yeli Tuu wi dìire nīʔ.
30 Yeli bèle,
yeli nzìire ti mìɛni nyuɔ kiī cɛ́ngɛ.
31 Kire nɛ̄ ye fǎri fìʔɛ́ʔ,
yeli 'pɔ́ri kàʔasiɛnrɛluʔulo nìʔɛgɛlɛ nɛ̄.»
Siɛn 'yɛli bèri Kulocɛliɛ Siɛnnyiɛnɛgɔnwɔ wi wuʔu nyu gè
32 «Siɛn ó siɛn wi 'yéri ki nɛ̄ siɛnnɛ yiʔɛ mɛ́ gè nɛ̀ jo wire yē mi wuu wè,
mi míɛni bága wi wuʔu juu gè bè yige mi Tuu wi yiʔɛ mɛ́ gè,
mi Tuu ŋáà wī nyìʔɛnɛ nī lè,
bé jo wiī mi wuu.
33 Siɛn ŋíì sí wi 'jo wire sì mi cɛ́nʔ siɛnnɛ yiʔɛ mɛ́ gè,
mi míɛni bága jo mi sì wi cɛ́nʔ mi Tuu wi yiʔɛ mɛ́ gèʔ,
mi Tuu ŋáà wī nyìʔɛnɛ nī lè.»
Siɛn ŋíì wi 'nyuɔ nɛ̀ yɛli nɛ́ Zezi ní wè Zezi wi 'wi tìɛ
34 «Ye fǎri ki sɔ̀ngí bè jo dùʔɔ yanyige mi 'pɛn bè pa nyɔ́gɔ dàala nī lèʔ;
mi sì pɛn bè pa yanyige nyɔ́gɔ dàala nɛ̄ lè wīʔ.
Ŋɔsii ní mi 'pɛn.
35 Mi 'pɛn bè pa jaafɔli wàli wè bè láʔa wi tuu nɛ̄;
bè pa pórifɔli wàli wè bè láʔa wi yàa nɛ̄;
nɛ̀ pínɛ mi 'pɛn bè pa cɛliwɛ wàli wè bè láʔa wi pɔnuu nɛ̄.
36 Siɛn wi saʔa wuulo peli pe bé puu siɛn wi leguulo bèlef.
37 A siɛn ŋíì 'ki yaʔa a wi tuu woli ni 'kpúʔɔ wi mɛ́,
á kire bɛ̀ʔ,
a wi yàa woli ni 'kpúʔɔ wi mɛ́ nɛ̀ tóri mi nɛ̄ wè,
ki siɛn wiì sín nɛ̀ yɛli nɛ́ mi níʔ.
Nɛ̀ pínɛ a siɛn wi 'jaa woli yaʔa a ni 'wi dɛ́ni nɛ̀ tóri mi nɛ̄ wè,
á kire 'laa nɛ̀ wi póri kaala yaʔa a ni 'wi dɛ́ni nɛ̀ tóri mi nɛ̄ wè,
ki siɛn wiì sín nɛ̀ yɛli nɛ́ mi níʔ.
38 Nɛ̀ pínɛ a siɛn ŋíì sì wi tiiparigɛ líɛ gè nɛ́ taʔa mi kúrugu wèʔ,
ki siɛn wiì nyuɔ nɛ̀ yɛli nɛ́ mi níʔ.
39 A siɛn ó siɛn nɛ ki caa bè bè wi sìi suɔ wè,
wi bága pùunni wi sìi nī wè.
A ŋìi sí pùunni wi sìi nī wè mi kɛnmɛ nɛ̄ bè,
wi bága wi taa.
A siɛn ŋíì 'Kulocɛliɛ siɛnjuuwo cò cɛ̀ngɛ wè sàri yē baa
40 «A siɛn 'yeli cò cɛ̀ngɛ wè,
wi 'mi cò cɛ̀ngɛ;
a ŋìi sí mi cò cɛ̀ngɛ wè,
ŋàa wi 'mi tun wè,
wire siɛn wi 'cò cɛ̀ngɛ.
41 A siɛn 'Kulocɛliɛ siɛnjuuwo cò cɛ̀ngɛ bɛ̀ wiī Kulocɛliɛ siɛnjuuwo wè,
siɛn wi bé Kulocɛliɛ siɛnjuuwo sàri taa.
A siɛn ŋíì sí siɛnsinwɛ cò cɛ̀ngɛ bɛ̀ wiī sínwɛ wè,
ki siɛn wi bé sínmɛ sàri taa.
42 M'bé ki juu yeli mɛ́ kányiʔɛ nɛ̄,
a siɛn ŋíì 'lanyige yakuunyɛni kɛn mi pìtɛnmɛwɛ wáà mɛ́ ŋàa wi 'cɛ́ri pe mìɛni nī bèle,
bɛ̀ wiī mi pìtɛnmɛwɛ wè,
siɛn wiǐ fɔ̀n wi tɔ̀ni nī wèʔ.»