Siɛnnɛ peri Yewe gbùʔɔrɔ́ wè !
147
1 Ye‑ Yewe gbùʔɔrɔ wè !Nɛ́ ki cɛ́n kiī tànʔa weri ŋú weri weli Kulocɛliɛ gbùʔɔrɔ́ wè,
kiī pɔ́rigɔ siɛn de sɔ́migi de ŋú wi mɛ́.
2 Yewe ń'nɛ koli nɛ Zerizalɛmi kàʔa faanri gè,
nɛ́ siɛnnɛ bálì pe 'cò bèle, wi nɛ̂ pe pínɛ pìye nɛ̄ nɛ̀ pe kɔ́ri nɛ̀ pɛna.
3 Bàli pe funyɔ yi 'cúʔɔ yè, wi nɛ̂ pe funyɔ nyígi yè,
níɛ̀ pe funbiɛnrɛ nɔmiyɔ jíge yèb.
4 Wi nɛ̂ ŋɔgɔlɔ tɔ́ri gèle níɛ̀ míɛyɛ le ke mìɛni nɛ̄c.
5 Weli Kàfɔli wi 'kpúʔɔ, wi ŋɔri ti 'niʔɛ,
wi sícilimɛ piī kúɔmɔ fùn.
6 Siɛnnɛ bálì ní pe wè tɔ́ri bèleʔ, Yewe wi nɛ̂ pe yɛ̀gɛ,
níɛ̀ siɛnpiile máama bèle fúɔ dàala nɛ̄ lèd.
7 Yeri kacɛ̀ngɛ síɛrilɛ ŋúnuyɔ ŋú Yewe mɛ́ wè,
yeri gɔripile kpúɔn lè weli Kulocɛliɛ mɛ́ wè !
8 Wi nɛ̂ nyìʔɛnɛ tɔ́n lè nɛ́ kàsadibarɛ ní dè,
níɛ̀ kàsaʔa gbòbori gè ki nɛ̂ tuu dàala nɛ̄ lè,
wi nɛ̂ nyàʔa fìin gè nyaguruyo nɛ̄ yè.
9 Wi nɛ̂ yaliire kɛn yawiire mɛ́ dè,
nɛ́ míɛni dìbawuɔlɔ pìile mɛ́ bèle a piyē nɛ nyɛni bèle.
10 Sunʔɔ ki ŋɔri ti wè nɛ tɔ́ri Yewe wi nyaamɛ nɛ̄ʔ,
kapiɛngbuɔnwɔ wi yaliiye lìriye yire bɛ̀ʔ wiī nɛ wéliʔ.
11 Bàli pe fìʔɛ́ Yewe nɛ̄ wè, wi nɛ̂ fɔ̀li pe nɛ̄,
ʔaan, bàli pe 'pe sɔ̀ngirɔ taʔa dè wi bànguɔ dɛ́nigɛ nɛ̄ gèe.
12 Zerizalɛmi kàʔa yo, te Yewe tòbiló wè !
Siyɔn kàʔa yo, yɛ̀ ma Kulocɛliɛ gbùʔɔrɔ wè !
13 Nɛ́ ki cɛ́n wire wi nɛ̂ ŋɔri nyɔ́gɔ dè
muɔ kàʔa wìile kɔ̀riyɔ yi kpàteliye nī yè,
wi nɛ̂ diba taʔa wè muɔ pìile nɛ̄ bèle muɔ kàʔa laamɛ nī bè.
14 Wi nɛ̂ yanyige kɛn muɔ kùlo mɛ́ lè,
wi nɛ̂ muɔ tín yaliicɛ̀nrɛ nɛ̄ dè.
15 Wi nɛ̂ wi nyasiɛnrɛ tun dè dàala nɛ̄ lè;
ti nɛ̂ fɛ̀ kpuʔɔ nɛ̀ nɔ̀.
16 Wi nɛ̂ nɛ̀wirilef tìrige lè nɛ̀ tiʔɛ fílige gè bɛ̀ sìnbasiire tíɛlɛ,
wi nɛ̂ kámɛgɛg yɛ́ligɛ gè dàala nɛ̄ lè bɛ̀ cúnʔɔ tíɛlɛ.
17 Wi nɛ̂ kàsasindari wáa dè bɛ̀ sìndɛnibiire tíɛlɛ;
ŋáa wi bé gbɛ̀ yéri wiikunu nī wè, ŋàa wi yige wè ?
18 Wi nɛ̂ wi siɛnrɛ juu dè nɛ̀ gbɛ̀ngɛ; ti mìɛni nɛ̂ nyɛgɛh.
Wi nɛ̂ wi káfaligɛ fiɛ gè; luɔyɔ yi nɛ̂ fúu.
19 Wi nɛ̂ wi siɛnrɛ jáari dè Yakuba siimɛ nɛ̄ bè,
wi fànʔa kele nɛ́ wi kàyuʔujuuro ní dè Isirayɛliyé mɛ́ bèlei.
20 Wiì yé ki kpíʔile mmɛ gè nɛ́ kùlogolo gílì ní gèleʔj,
kire nɛ̄ ke siɛnnɛ piyè wi kàyuʔujuuro cɛ́n dèʔ.
Ye- Yewe gbùʔɔrɔ wè !