Yewe wī siɛnfurɔlɔ sáʔafɔli wè
146
1 Ye‑ Yewe gbùʔɔrɔ wè !Mi fungo, te Yewe gbùʔɔrɔ́ wè !
2 Bè mi yaʔa sìi nɛ̄ wè, m'béri Yewe gbùʔɔrɔ́ wè.
M'béri yakpuɔnrɔ kpúɔn dè mi Kulocɛliɛ mɛ́ wè mi sìi cɛnyɛ yi mìɛni nī.
3 Ye fǎga yeli sɔ̀ngirɔ taʔa dè siɛnkpolilo nɛ̄ bèleʔ,
nɛ́ lewiile nɛ̄ bèle, bàli piyě gbɛ̀ siɛn suɔ wèʔ !
4 A pe ŋɔ́zɛnnɛ ni kɛ́nì yiri pe nī bèle, a pe 'koli nɛ̀ jíin dàala nī lè,
pe kele ke mìɛni nɛ̂ kúɔ nɛ̀ jíin baa nɛ́ pe ní.
5 Ŋàa mɛ́ Yakuba Kulocɛliɛ wi yē sáʔafɔli wè,
a wi 'wi sɔ̀ngirɔ taʔa dè Yewe wi Kulocɛliɛ nɛ̄ wè, wi wuʔu kiī tànʔa !
6 Nɛ́ ki cɛ́n Yewe wi nyɛ́nì nyìʔɛnɛ nɛ́ dàala faan lè,
nɛ́ kuʔɔjii ní wè, nɛ́ ti laamɛ yɛrɛ ti mìɛni ní dèa.
Weli bé gbɛ̀ tɛ́ngɛ wi nɛ̄ lɛ̀lɛ ó lɛ̀lɛ nī.
7 Wiī nɛ tànʔa kanʔa bàli mɛ́ siɛnnɛ 'pe wuʔɔ bèle,
nɛ yaliire kanʔa bàli nɛ̄ fungo ki yē gè.
Yewe nɛ̂ kasuulebile nyùʔɔdiriye celile yè.
8 Yewe nɛ̂ fúɔnnɔ nyapigele múgu gèleb;
bàli bīɛlɛ kùrulo bèle, Yewe nɛ̂ pe yɛ̀gɛ nɛ̀ pe sìɛnc.
Siɛnsinminɛ pe 'Yewe dɛ́ni wè.
9 Yewe nɛ̂ nabɔnminɔ wéli bèle,
wi nɛ̂ círile nɛ́ lakicɛlilɛ sáʔa bèled,
nɛ̀ ki yaʔa wiī nɛ siɛnpiile koliyo córi yè.
10 Yewe yē Kùlofɔli lɛ̀lɛ ó lɛ̀lɛ nī.
Siyɔn kàʔa yo, wiī muɔ Kulocɛliɛ kɛ̀ngɛlɛ ke mìɛni nī !
Ye- Yewe gbùʔɔrɔ wè !