Yewe yo, -mi suɔ mi leguulo mɛ́ bèle !
143
1 Dawuda ŋúnudanʔa gī gàa pe ŋú nɛ́ yakpuɔnrɔ ní dè.
Yewe yo, ma mi náarigɛ lúʔu gè !
Ma líiye cáan a mi nɛ muɔ fiɛn wè !
Ma lúʔu mi mɛ́, muɔ kányiʔɛ nɛ́ muɔ sínmɛ pire kɛnmɛ nɛ̄ bè !
2 Fǎga kàyuʔu juu mi nɛ̄ʔ,
mi ŋáà wī muɔ baakuɔwɔ wèʔ,
nɛ́ ki cɛ́n, siɛnwiiwe wáà fáala wè bileʔ
ŋàa wi síngi muɔ yiʔɛ mɛ́ gèʔa.
3 Mi leguu wi 'taʔa mi kúrugu, wi 'mi cáan nɛ̀ pulɔgɔ dàala nɛ̄ lè,
wi 'ki yaʔa a mi 'tɛ́ni yebiliwuɔlɔ nī lè,
majo siɛnnɛ bálì pe 'tíi nɛ̀ kùu bèle.
4 Mi fungo ki 'kùu mi nī, funwuɔrɔ yē mi nī.
5 Mi nɛ sɔ̀ngí nɛ taʔa nɛ́ faʔa kɛnmɛ ní bè,
níɛ koli nɛ sɔ̀ngí nɛ́ gàa ki mìɛni muɔ 'kpíʔile gè,
mi nɛ nyu nɛ́ nìɛ ní muɔ kiyɛ kakpiʔiligele wuʔu nɛ̄ gè.
6 Mi nɛ kiyɛ yɛ̀gí yè muɔ kɔli mɛ́ nɛ muɔ náari;
muɔ láa yē mi nɛ̄ majo bɛ̀ luʔɔ laa cî puu dàawaʔala nɛ̄ lèb. Ye‑ ŋɔ́ cɛ̀.
7 Yewe yo, ‑mi náarigɛ cò gè fáari !
Mi fungo ki 'kùu mi nī !
Fǎga muɔ yiʔɛ làrigɛ gè mi nɛ̄ʔ !
Á kire bɛ̀ʔ gè, m'bé kò bɛ̀ bàli tíɛlɛ pe 'jíin nyɛgɛ nī gè.
8 ‑Ki yaʔa sínbinimɛ táanni bè
mi‑ ti lúʔu kɛnmɛ bíì nɛ̄ muɔ bànguɔ dɛ́nigɛ ki bé mi sáʔa gè !
Nɛ́ ki cɛ́n mi nyɛ́nì mi sɔ̀ngirɔ taʔa dè muɔ nɛ̄.
‑Ki yaʔa mi‑ koligo cɛ́n gè gàa nī m'béri tári gè !
Nɛ́ ki cɛ́n mi 'mi fungo yiʔɛ gè muɔ kɔli mɛ́.
9 Yewe yo, ‑mi píle ma suɔ mi leguulo mɛ́ bèle !
Mi nyɛ́nì líʔire jó muɔ mɛ́.
10 ‑Mi tɛnmɛ mi de muɔ nyɛ́ni kele forigi gèle,
nɛ́ ki cɛ́n muɔ yē mi Kulocɛliɛ !
Muɔ Pìle ni nyɛ́nì nyuɔ; ‑ni yaʔa ni‑ mi yiʔɛ kíni kozinʔɛ nī gè.
11 Yewe yo, muɔ míʔɛ kire kɛnmɛ nɛ̄ bè,
ma mi yaʔa mi‑ kò sìi nɛ̄ !
Muɔ sínmɛ pire kɛnmɛ nɛ̄ bè,
ma mi yige fùrɔgɔ gáà nī gè !
12 Muɔ bànguɔ dɛ́nigɛ nī gè,
ma mi leguulo cúʔɔ bèle ma yige baa !
Ma pe kpúu péwu bìli pe mìɛni pe túngu nɛ́ mi ní bèle,
bɛ̀ mi yē muɔ baakuɔwɔ wè.