Bàli mɛ́ Yewe yē Kulocɛliɛ wè, peli wuʔu kiī tànʔa !
144
1 Dawuda wuʔu gī.
Kpuʔɔrɔ 'yɛli de tari Yewe nɛ̄ wè, mi kàdɛnigbaala lèa,
wire ŋáà wi 'mi kiyɛ tɛnmɛ yè kapiɛnnɛ nɛ̄ lè
nɛ́ mi kabiʔɛlɛ ní gèle kàsii kpúɔngɛnmɛ nɛ̄ bèb.
2 Wire wī mi Kulocɛliɛ ŋáà mi nyɛ́nì dɛ́ni wèc,
wire wī mi làridiʔɛ lìrige nɛ́ ní mi líʔirejodiʔɛ gè,
wire ŋáà wi 'mi píle nɛ̀ suɔ wè.
Wiī mi timɔzigege; wire láara mi nɛ fé nɛ làrí;
wire wi kùlogolo siɛnnɛ cɛ́rigi bèle mi mɛ́d.
3 Yewe yo, ŋáa wī siɛn wè, dí muɔ de wi wéli wè,
lewiile bèle, dí muɔ de sɔ̀ngí de taʔa nɛ́ pe níe ?
4 Siɛn wiī bɛ̀ ŋɔ́nɔ tíɛlɛ;
wi cɛnyɛ yiī bɛ̀ nyúmɔ tíɛlɛ bàa pi tóri bèf.
5 Yewe yo, ma muɔ nyìʔɛnɛ múgu lè ma tìgig,
cò ma taa nyaguruyo nɛ̄ yè, yi de wírigih.
6 Ma kàsakpɛnigɛ nyíʔɛnimɛ tìrige bè, ma leguulo cɛrigɛ bèle !
‑Muɔ ŋaaya ŋɔ yè ma pe cìra pe fɛ̀i !
7 Bè muɔ yaʔa nyìʔɛnɛ nī lè,
‑muɔ kiyɛ sáʔa yè ma tìrige ma mi suɔ,
ma mi cò ma yige lasicuuyo nī yè nɛ́ nabɔnminɔ pe kiyɛ nī yèj,
8 bàli bīɛlɛ pe nyuɔyɔ yi káfinɛrɛ nyu dè,
bàli piyē nɛ pe kàliige kiyɛ yɛ̀gí yè
lɛ̀lɛ líì nī piyē nɛ kàlí bèri siɛnnɛ fáanni bèlek.
9 Kulocɛliɛ yo, je m'béri ŋúnuvɔngɔ ŋú muɔ mɛ́,
béri màʔagɛlɛ kiɛ bɔ̀licɛrigɛ kpúɔn gè muɔ mɛ́l.
10 Muɔ ŋáà wī kùlofɔlilɔ pe suɔfɔli wè;
muɔ ma 'muɔ baakuɔwɔ Dawuda suɔ wè
kapiɛngbuɔn ŋɔsii mɛ́ wè ŋàa wi kùu kanʔa wè.
11 Ma mi suɔ, ma mi cò ma yige nabɔnminɔ pe kiyɛ nī yè,
bàli nyuɔyɔ yi káfinɛrɛ nyu dè,
bàli piyē nɛ pe kàliige kiyɛ yɛ̀gí yè
lɛ̀lɛ líì nī piyē nɛ kàlí bèri siɛnnɛ fáanni bèlem.
12 Bà ki bé puu dí weli jaala bèle, pe nàgapunmɔ lɛ̀lɛ nī lè,
pe bé puu bɛ̀ tiipunyɔ tíɛlɛ nyàa yi yɛ̀gí nɛ sìɛn yè.
Weli pórilo pe bé puu bɛ̀ tiindugugolo tíɛlɛ
gàli pe 'tɛn gèle bè nàkpanʔa fèri gè.
13 Weli síkaanya yi bé nyì yaliire ti mìɛni feliye nɛ̄,
weli sìnbatoyo yi bé sii bè niʔɛ, nìʔɛboyo nìʔɛboyo, bè yi nàʔadiɛyɛ nyì yè.
14 Weli nìɛyɛ yi bé kpólilo bè sùnmɔ le.
Weli leguulo piyě gbɛ̀ jaa bè tuu weli nɛ̄
bè weli cò fànʔa nɛ̄ bè kɛ́ nɛ́ weli níʔn.
Funwuɔrɔ kɔnrɔ sǐ ní wáa weli kàaya dàliyɛ nī yèʔ.
15 Siɛnnɛ bálì mɛ́ ki kpínʔini mmɛ gè, peli wuʔu kiī tànʔao !
Bàli mɛ́ Yewe yē pe Kulocɛliɛ wè, peli wuʔu kiī tànʔap !