Yewe yo, -mi suɔ siɛnpiile mɛ́ bèle !
141
1 Dawuda ŋúnudanʔa gī gàa pe ŋú nɛ́ yakpuɔnrɔ ní dè.
Yewe yo, je mi nɛ muɔ yeri wī, te báan fáari ma pa mi sáʔa !
Ma líiye cáan mi yékpoli mɛ́ lè a mi nɛ muɔ yeri wè !
2 Dí mi náarigɛ ki sí puu bɛ̀ wusunaa tíɛlɛ ŋàa nɛ̄ muɔ 'fɔ̀li wè,
mi kiyɛ yɛ̀gɛlɛ ni‑ puu
bɛ̀ cɛnguʔɔ táanni kakuɔrɔ yakɔnrɔ tíɛlɛ dè.
3 Yewe yo, ma gàrifii le mi nyuɔ nɛ̄ gè,
mari mi nyasɛnyɛ wéli yè.
4 Fǎga ki yaʔa mi fungo ki- cɛ̀li kapiʔi kɔli mɛ́ gèʔ,
bè kacuʔɔgɔlɔ kpíʔile kapiigbiʔilile sunʔɔmɔ nī bèʔ.
‑Mi cò ma yérige mi fǎga pe yaliitaanra táà lìiʔ.
5 ‑Ki yaʔa siɛnsinwɛ wi‑ mi kpúɔn, kire yē kacɛ̀nnɛ mi mɛ́;
wi‑ mi sànʔa bɛ̀ ki bé puu
majo wi 'sùnmɔ wo mi nyùgo nɛ̄ gè wī,
bà mi sǐ cíi ki nɛ̄ʔ.
Gìi sí gī baa gè, mi náarigɛ ki béri waa súuri
siɛnpiile pe kapiigbiʔiligele kɔli mɛ́ gè.
6 ‑Ki yaʔa pe- pe kàyuʔujuulo ŋɔrigɔ bèle wáa
nyagurukpaʔaligɛ jùlɔgɔ nī gè !
Bà ki bé kpíʔile dí pe sí mi siɛnrɛ lúʔu dè,
bè ki cɛ́n kányiʔɛ yē ti nīb.
7 Majo bɛ̀ tàfaliwɛ cî nɛ dàala kpúɔn lè nɛ̀ celile,
bɛ̀ weli kácere ti bága cɛrigɛ kusiʔi wìile nɛ̄ lè.
8 Kire nɛ̄ mi 'mi yiʔɛ wáa gè muɔ kɔli mɛ́, Kàfɔli Yewe,
mi nɛ làridiʔɛ caa muɔ nī.
Fǎga mi sìi wáa wè bè yaʔa kùu mɛ́ wèʔ !
9 ‑Mi suɔ pɛnnɛ mɛ́ lè nàa pe 'cáan mi yiʔɛ mɛ́ gè,
nɛ́ kapiigbiʔilile pe gáriyɛ mɛ́ yè !
10 ‑Ki yaʔa siɛnpiile bálì ‑pe cò pe tíimɛ gáriyɛ nɛ̄ yè,
dí mi sí sùuri bè suɔ !