Ma mi suɔ míɛcuʔɔgɔfɔlilɔ mɛ́ bèle !
140
1 Ŋúnuŋuminɔ yiɛginiwɛ wuʔu gī. Dawuda ŋúnudanʔa gī gàa pe ŋú nɛ́ yakpuɔnrɔ ní dè.
2 Yewe yo, ma mi píle ma suɔ siɛnpiile mɛ́ bèle,
ma mi suɔ fungbɛnyɛfɔlilɔ mɛ́ bèle !
3 Piyē nɛ kapiʔi sɔ̀ngí gè nɛ̀ ki gbòbori pe funyɔ nī yè.
Lɛ̀lɛ ó lɛ̀lɛ nī, piyē nɛ kapari kele kpínʔini gèle.
4 Pe nɛ̂ pe nyigele 'juɔ gèle sífirigele bɛ̀ wɔ̀bugɔ woli tíɛlɛ;
pe nyasɛnyɛ nī yè, wɔ̀mɔri suɔnrɔ ti yigi baaa. Ye‑ ŋɔ́ cɛ̀.
5 Yewe yo, ‑mi wéli, ma mi suɔ siɛnpiile pe kiyɛ nī,
ma mi líili fungbɛnyɛfɔlilɔ nɛ̄ bèle,
peli bálì pe 'gbòbori nɛ̀ yaʔa bè mi cáan wè !
6 Fungbuʔɔfɔlilɔ pe 'gáriyɛ pari mi yiʔɛ mɛ́ gè,
nɛ́ pe màʔagɛlɛ nɛ́ jùɔlɔ cáan bèle mi koligo nī gè.
Pe nyɛ́nì pɛngɛlɛ pari gèle mi yiʔɛ mɛ́ gè. Ye‑ ŋɔ́ cɛ̀.
7 A mi sí ki juu Yewe mɛ́ nɛ́ jo, «Muɔ wī mi Kulocɛliɛ wè !
Yewe yo, ma lúʔu mi mɛ́; mi nɛ muɔ fiɛn wī, ma nyinimɛ taa mi nɛ̄ !
8 Yewe yo, mi Kàfɔli, muɔ yē ŋɔri ní, nɛ́ ní mi suɔfɔli.
Muɔ 'kɔli wúʔuro gè mi nyùgo nɛ̄ gè kapiɛnnɛ cɛngɛ gè.
9 Yewe yo, fǎga ki yaʔa gàa siɛnpiile pe caa gè, ki‑ kpíʔileʔ !
Fǎga ki yaʔa pe nyuɔlere ti‑ foriʔ
kire ga buu pe‑ ŋɔri taaʔ !» Ye‑ ŋɔ́ cɛ̀.
10 Bàli pe 'mi màʔa nɛ̀ suʔu bèle,
ki 'yɛli pe kapiʔi gáà pe gbòborí mi kɔli mɛ́ gè
ki‑ koli tuu pe nyùyɔ nɛ̄ yè !
11 Ki 'yɛli kàsunnɛganʔana ke‑ sùʔu bè wo pe nɛ̄ !
Dí Kulocɛliɛ‑ pe wáa kàsun nī gè, nɛ́ kàwiʔi sícuugo nī gè,
gàa nī piyě ní gbɛ̀ yiri wèʔ !
12 Kiì yɛli míɛcuʔɔgɔfɔlilɔ pe ní puu bile kùlo nī lèʔ !
Ki 'yɛli yawuʔɔ ki‑ taʔa fungbɛnyɛfɔlilɔ nɛ̄ bèle bè pe kpúɔn bè cáan !
13 Mi 'ki cɛ́n Yewe nɛ kàyuʔu nyu gè nɛ́ sínmɛ ní fuunmɔfɔlilɔ mɛ́ bèle,
wiī nɛ tànʔa kanʔa fɔ̀ngɔfɔlilɔ mɛ́ bèleb.
14 Kányiʔɛ nɛ̄, siɛnsinminɛ pe béri muɔ míʔɛ gbùʔɔrɔ gè,
funviiyefɔlilɔ pe bé tɛ́ni muɔ yiʔɛ mɛ́ gè.