Yewe kajuudiʔɛlɛ kiyē kpìɛnmɛ mi mɛ́
119
1 Siɛnnɛ bálì pe tánʔagɛnmɛ pi 'sín bè, peli wuʔu kiī tànʔaa,bàli pe tári nɛ yɛligi nɛ́ Yewe Fànʔa Siɛnrɛ ní dè.
2 Bàli pe Yewe nyakungɛngɛ siɛnrɛ cògí dè,
níɛ wi caa nɛ́ pe funyɔ yi mìɛni ní yè, peli wuʔu kiī tànʔa.
3 Nɛ̀ taʔa ki nɛ̄ piyè kakoliyo kpíʔileʔ;
pe nyɛ́nì tánʔa wi koligo nī gè.
4 Muɔ 'ki juu nɛ̀ gbɛ̀ngɛ nɛ́ jo
pe‑ muɔ kacinʔɛnɛ kele sɔ́migɔ gèle pe cò.
5 Cí, ki 'yɛli mi tánʔagɛnmɛ pi‑ sɔ́migɔ pi nyuɔ
bè muɔ fànʔa kele fori gèle !
6 Kire bé ki yaʔa fìɛrɛ sì ga tíi mi taaʔ,
bà mi nɛ sɔ̀ngí muɔ kajuudiʔɛlɛ ke mìɛni nɛ̄ gèle.
7 M'béri muɔ gbùʔɔrɔ́ nɛ́ funzinʔɛ ní gè,
bèri muɔ kàyuʔujuuro tɛnmɛ dè, dàa ti 'sín dè.
8 M'béri muɔ fànʔa kele sɔ́migi gèle de cògí;
ma fǎga cíi mi nɛ̄ púloʔ !
9 Mɛni sí nàgapunwɔ wi bé jáa bè wi tánʔagɛnmɛ sìɛn bè
pi‑ kò fuɔnrɔ fùn ?
Kire gī a wiī nɛ muɔ siɛnrɛ sɔ́migi de nɛ cògí dè.
10 Mi nɛ muɔ caa nɛ́ mi fungo ki mìɛni ní;
fǎga mi yaʔa mi‑ líili muɔ kajuudiʔɛlɛ nɛ̄ gèleʔ.
11 Mi 'muɔ nyasiɛnrɛ sɔ́migɔ dè nɛ̀ cò mi fungo nī gè,
kire ga buu mi fǎga kapiile kpíʔile muɔ nɛ̄ʔ.
12 Mi nɛ kpuʔɔrɔ tari dè muɔ nɛ̄, Yewe !
‑Mi tɛnmɛ muɔ fànʔa kele nɛ̄ gèle.
13 Mi nyuɔ ní gè mi nɛ muɔ kàyuʔujuuro ti mìɛni nyu
dàa muɔ nyuɔ ki 'juu gè.
14 Bèri tári muɔ nyakungɛngɛ siɛnrɛ nɛ̄ dè
kire nɛ fundaanra kanʔa mi mɛ́,
majo lɔriniʔɛrɛ dī dàa mi 'taa dè.
15 M'béri sɔ̀ngí muɔ kacinʔɛnɛ kele nɛ̄ gèle,
béri muɔ koligo kele sɔ́migi gèle de wéli.
16 Fundaangbuɔrɔ yē m'mɛ́ muɔ fànʔa kele kɔli mɛ́ gè;
mi wè nɛ fìʔɛ nɛ́ muɔ siɛnrɛ ní dèʔ.
17 Ma kacɛ̀ngɛ kpíʔile mi nɛ̄, mi ŋáà wī muɔ baakuɔwɔ wè,
kire ga buu mi‑ kò sìi nɛ̄ bè sí de muɔ siɛnrɛ cògí dè.
18 ‑Mi nyapigele múgu gèle
kire ga buu mi de muɔ Fànʔa Siɛnrɛ ti kanyuʔɔnigɔlɔ
sɔ́migi gèle de nyaʔa.
19 Mi yē nabɔnwɔ wī dàala nɛ̄ lè;
ma fǎga muɔ kajuudiʔɛlɛ làrigɛ gèle mi nɛ̄ʔ !
20 Funyaʔa yē mi nī lɛ̀lɛ ó lɛ̀lɛ nī
bè muɔ kàyuʔujuuro cɛ́n dè.
21 Muɔ 'pe fígiri nɛ́ dɛ́ngɛ taʔa wè pe nɛ̄,
bàli pe 'pìye nyíɛnɛ bèle níɛ̀ cíi muɔ kajuudiʔɛlɛ nɛ̄ gèle.
22 ‑Siɛnnɛ pe tiʔɛligɛlɛ nɛ́ pe faʔara láʔa dè mi nɛ̄,
nɛ́ ki cɛ́n mi nɛ tári nɛ yɛligi nɛ́ muɔ nyakungɛngɛ siɛnrɛ ní dè.
23 A ki cɛ́nì nyaa fànʔafɔlilɔ pe 'tɛ́ni nɛ̀ juu mi wuʔu nɛ̄ gè,
mi ŋáà wī muɔ baakuɔwɔ wè, mi nìɛ sɔ̀ngí muɔ fànʔa kele nɛ̄ gèle.
24 ʔaan, muɔ nyakungɛngɛ siɛnrɛ ti 'mi dɛ́ni kpuʔɔ;
tiī nɛ nyu nɛ tìí mi nɛ̄.
25 Mi ŋɛ, mi nɛ fulolo tárigɛ nī gè,
‑sìi kɛn m'mɛ́ bè yɛli nɛ́ muɔ nyasiɛnrɛ ní dè.
26 Mi nyɛ́nì mi sìi kele juu gèle nɛ̀ tìɛ muɔ nɛ̄, a muɔ 'lúʔu m'mɛ́;
‑mi tɛnmɛ muɔ fànʔa kele nɛ̄ gèle.
27 ‑Sícilige kɛn m'mɛ́ mi‑ muɔ kacinʔɛnɛ koligo cɛ́n gè,
bà m'béri sɔ̀ngí muɔ kakpiʔiligele nɛ̄ gèle, funwuɔrɔ wuʔulo gèle.
28 Mi fungo ki 'nyɛni funbiɛnrɛ nɛ̄ dè;
ma ŋɔri nyɔ́gɔ mi nī nɛ̀ yɛli nɛ́ muɔ nyasiɛnrɛ ní dè.
29 ‑Káfinɛrɛ koligo líili gè mi nɛ̄;
nɛ́ muɔ kpuʔɔrɔ ní dè,
ma sí ki yaʔa mi‑ taʔa muɔ Fànʔa Siɛnrɛ nɛ̄ dè.
30 Mi nyɛ́nì kányiʔɛ koligo nyíɛnɛ gè nɛ̀ kɔ̀n;
mi 'yéri ki nɛ̄ bè taʔa muɔ kàyuʔujuuro nɛ̄ dè.
31 Mi nìɛ puɔ muɔ nyakungɛngɛ siɛnrɛ nɛ̄ dè;
Yewe yo, fǎga ki yaʔa fìɛrɛ‑ mi taaʔ.
32 Mi nɛ fé muɔ kajuudiʔɛlɛ koligo nī gè,
nɛ́ ki cɛ́n muɔ nɛ sícilige kanʔa mi mɛ́ mi de ki kpínʔini.
33 Yewe yo, ‑mi tɛnmɛ muɔ fànʔa kele koligo nɛ̄ gè,
kire ga buu mi‑ ke cò fúɔ bè nɔ̀ ki kúɔmɔ nɛ̄ bè.
34 Ma sícilige kɛn m'mɛ́ kire ga buu
mi de lúru muɔ Fànʔa Siɛnrɛ mɛ́ dè;
m'béri ti koligo tari gè nɛ́ mi fungo ki mìɛni ní.
35 ‑Mi yiʔɛ kíni muɔ kajuudiʔɛlɛ koligo nɛ̄ gè,
nɛ́ ki cɛ́n kire ki 'mi dɛ́ni.
36 ‑Mi nàzɔn cɛ̀li wè muɔ nyakungɛngɛ siɛnrɛ kɔli mɛ́ gè,
ma fǎga ki yaʔa wi‑ yiʔɛ walinùʔɔriwɔ taala kɔli mɛ́ gèʔ.
37 ‑Mi yiʔɛ láʔa gè tɔ̀nifun yɛrɛ nɛ̄ dè,
ma ki yaʔa mi‑ taʔa muɔ koligo nɛ̄ gè.
38 ‑Muɔ nyasiɛnrɛ fori dè mi kɔli mɛ́ gè,
mi ŋáà wī muɔ baakuɔwɔ wè,
dàa muɔ 'kɛn peri fìʔɛ́ muɔ nɛ̄ wè.
39 ‑Fìɛrɛ líili dè mi nɛ̄ dàa nɛ̄ mi nɛ fìʔɛ́ dè,
nɛ́ ki cɛ́n muɔ kàyuʔujuuro ti nyɛ́nì nyuɔ.
40 Ki n'gɛ, funyaʔa yē mi nī muɔ kacinʔɛnɛ kele kɔli mɛ́ gè bèri ke kpínʔini;
bɛ̀ muɔ 'sín wè, ‑sìi kɛn wè m'mɛ́.
41 Dí muɔ bànguɔ dɛ́nigɛ gè, Yewe, ki sí de báan fúɔ bè pa nɔ̀ mi nɛ̄,
ma mi suɔ nɛ̀ yɛli nɛ́ muɔ nyasiɛnrɛ ní dè.
42 Dí mi sí siɛnrɛ taa bè juu ŋàa mɛ́ wi mi teri wè,
nɛ́ ki cɛ́n mi 'mi sɔ̀ngirɔ taʔa dè muɔ siɛnrɛ nɛ̄ dè.
43 Dí muɔ fǎga sí muɔ kányiʔɛ siɛnrɛ líili dè mi nɛ̄ púloʔ !
Nɛ́ ki cɛ́n mi sɔ̀ngirɔ ti mìɛni yē muɔ kàyuʔujuuro nɛ̄ dè.
44 M'béri muɔ Fànʔa Siɛnrɛ sɔ́migi dè de cògí,
súuri lɛ̀lɛ ó lɛ̀lɛ nī.
45 M'bé sí de tári wálilɛ !
Nɛ́ ki cɛ́n lèbaanna yē mi nī muɔ kacinʔɛnɛ kele kɔli mɛ́ gè.
46 M'bé sí de muɔ nyakungɛngɛ siɛnrɛ nyu dè kùlofɔlilɔ yiʔɛ mɛ́ gè;
fìɛrɛ sǐ ga tíi puu mi nɛ̄ʔ.
47 Mi nɛ fundaangbuɔrɔ tari muɔ kajuudiʔɛlɛ nī gèle,
nɛ́ ki cɛ́n ke 'mi dɛ́ni.
48 M'bé mi kiyɛ yɛ̀gɛ yè muɔ kajuudiʔɛlɛ kɔli mɛ́ gè
gàli ke 'mi dɛ́ni gèle,
bà m'béri sɔ̀ngí muɔ fànʔa kele nɛ̄ gèle.
49 Sɔ̀ngi ma taa nɛ́ muɔ siɛnrɛ ní dè, dàa muɔ 'juu mi mɛ́,
mi ŋáà wī muɔ baakuɔwɔ wè,
tire dàa nɛ̄ mi 'tɛ́ngɛ dè.
50 Tire tiī nɛ mi fungo gbiʔɛlɛ gè mi wuʔɔgɔ nī gè:
muɔ nyasiɛnrɛ tiī nɛ sìi kanʔa m'mɛ́.
51 Bàli pe pìye nyíɛnɛ bèle, piyē nɛ mi tíʔɛ,
nɛ̀ ki yaʔa mi sì muɔ Fànʔa Siɛnrɛ wáa dèʔ.
52 Yeweyo, mi nɛ sɔ̀ngí nɛ taʔa nɛ́ muɔ faʔa kàyuʔujuuro ní dè;
tiī nɛ mi gbiʔɛlɛ.
53 Funyɛrigbuʔɔ káà nɛ mi cògí siɛnpiile kɛnmɛ nɛ̄ bè,
bàli pe 'cíi muɔ Fànʔa Siɛnrɛ nɛ̄ dè.
54 Muɔ fànʔa kele ke 'kò mi ŋúnuyɔ,
kòridiʔɛ gíì nī mi yē nabɔnwɔ wè.
55 Yewe yo, pìlige nī gè, mi nɛ sɔ̀ngí nɛ taʔa nɛ́ muɔ míʔɛ ní gè,
bé sí muɔ Fànʔa Siɛnrɛ cò dè.
56 Gàa gī mi wuʔu gè,
kire gī mi de muɔ kacinʔɛnɛ kele cògí gèle.
57 M'bé ki juu bé jo: Yewe yo, muɔ wī mi liɛlɛ lè;
m'bé muɔ siɛnrɛ cò dè.
58 Mi nɛ muɔ fiɛn nɛ́ mi fungo ki mìɛni ní:
‑kpuʔɔrɔ taʔa dè mi nɛ̄ nɛ̀ yɛli nɛ́ muɔ nyasiɛnrɛ ní dè.
59 Mi nyɛ́nì sɔ̀ngi mi tánʔagɛnmɛ nɛ̄ bè,
mi nɛ mi tɔliyɔ líi yè nɛ waa muɔ nyakungɛngɛ siɛnrɛ kúrugu dè.
60 Mi nɛ ŋàʔaná nɛ waa,
mi nɛ fìɛlɛ bè muɔ kajuudiʔɛlɛ kpíʔile gèle.
61 Siɛnpiile màʔagɛlɛ ke 'mi puɔ,
nɛ̀ sí ki yaʔa miì fìʔɛ nɛ́ muɔ Fànʔa Siɛnrɛ ní dèʔ.
62 Nyìjaliɛlɛ nɛ̄ lè, mi nɛ̂ yɛ̀ nɛ muɔ gbùʔɔrɔ́
muɔ kàyuʔujuuro sínnɛ wuʔu nɛ̄ gè.
63 Mi yē gbuɔnyɛnigɛ nɛ̄ nɛ́ bàli pe mìɛni ní pe fìʔɛ́ muɔ nɛ̄ wè,
bàli pe muɔ kacinʔɛnɛ kele cògí gèle.
64 Yewe yo, duniya wiī nyìwɛ muɔ bànguɔ dɛ́nigɛ nɛ̄ gè;
‑mi tɛnmɛ muɔ fànʔa kele nɛ̄ gèle.
65 Yewe yo, muɔ nyɛ́nì kacɛ̀ngɛ kpíʔile mi mɛ́,
mi ŋáà wī muɔ baakuɔwɔ wè,
nɛ̀ yɛli nɛ́ muɔ siɛnrɛ ní dè.
66 Ma mi tɛnmɛ mi de laaduumɔ nɛ́ sícilimɛ kele
sɔ́migi gèle de cɛ́ngi,
nɛ́ ki cɛ́n mi nyɛ́nì tɛ́ngɛ muɔ kajuudiʔɛlɛ nɛ̄ gèle.
67 Náʔanɛ muɔ 'wuʔɔgɔ taʔa mi nɛ̄ gè, mi puu nɛ pùunní;
píra ŋáà nī wè mi yē nɛ muɔ nyasiɛnrɛ cògí dè.
68 Muɔ nyɛ́nì nyuɔ, nɛ́ gàa muɔ nɛ kpínʔini gè, ki 'nyuɔ.
‑Mi tɛnmɛ muɔ fànʔa kele nɛ̄ gèle.
69 Bàli pe 'pìye nyíɛnɛ bèle, piyē nɛ finɛnɛ nɛ tari mi nɛ̄,
nɛ̀ ki yaʔa mi wè,
mi nɛ muɔ kacinʔɛnɛ kele cògí gèle nɛ́ mi fungo ki mìɛni ní.
70 Pe funyɔ yiī tɔ́nyɔ múɔri majo sùnmɔ bī;
mi wè, mi sí fundaangbuɔrɔ taa muɔ Fànʔa Siɛnrɛ nī dè.
71 Ki yé pɔ́ri mi mɛ́ mi‑ wuʔɔgɔ taa,
bè muɔ fànʔa kele tɛnmɛ gèle.
72 Fànʔa Siɛnrɛ dè, dàa ti 'yiri muɔ nyuɔ nī gè,
ti nyɛ́nì pɔ́ri nɛ̀ tóri tiɛ nɛ́ wali siramuʔɔyɔ siramuʔɔyɔ nɛ̄.
73 Muɔ kiyɛ yi 'mi faan, nɛ́ mi sɔ́migɔ nɛ̀ yérige;
ma mi kɛn sícilige ní,
kire ga buu mi‑ muɔ kajuudiʔɛlɛ cɛ́n gèle.
74 Bàli pe muɔ fìʔɛ́ wè, a pe 'mi nyaa wè,
fundaangbuɔrɔ bé puu pe mɛ́,
nɛ́ ki cɛ́n mi 'mi sɔ̀ngirɔ taʔa dè muɔ siɛnrɛ nɛ̄ dè.
75 Yewe yo, mi 'ki cɛ́n muɔ kàyuʔujuuro ti 'sín;
muɔ kányiʔɛ kaala lire kɛnmɛ nɛ̄ muɔ 'wuʔɔgɔ taʔa gè mi nɛ̄.
76 ‑Ki yaʔa muɔ bànguɔ dɛ́nigɛ ki‑ mi gbiʔɛlɛ,
nɛ̀ yɛli nɛ́ muɔ nyasiɛnrɛ ní dè dàa muɔ 'kɛn mi mɛ́,
mi ŋàa wī muɔ baakuɔwɔ wè.
77 ‑Ki yaʔa muɔ nyinidaaguugo ki‑ nɔ̀ mi nɛ̄, dí mi sí kò sìi nɛ̄,
nɛ́ ki cɛ́n muɔ Fànʔa Siɛnrɛ tiī nɛ fundaanra kanʔa m'mɛ́.
78 Fìɛrɛ‑ tɔ́n pe nɛ̄, bàli pe pìye nyíɛnɛ bèle
níɛ mi wuʔɔ nɛ́ pe káfinɛrɛ ní dè !
Mi wè, mi sɔ̀ngirɔ tiī muɔ kacinʔɛnɛ kele nɛ̄ gèle.
79 ‑Ki yaʔa bìli pe fìʔɛ́ muɔ nɛ̄ bèle, pe‑ yiʔɛ mi kɔli mɛ́,
bàli pe 'muɔ nyakungɛngɛ siɛnrɛ cɛ́n dè.
80 Dí mi fungo ki‑ sí fílige muɔ yiʔɛ mɛ́ gè, nɛ̀ yɛli
nɛ́ muɔ fànʔa kele ní gèle,
kire ga buu fìɛrɛ fǎga mi taaʔ.
81 Mi nyɛ́nì fùrɔ bɛ̀ mi nɛ muɔ suɔlɔ siri lè;
mi 'mi sɔ̀ngirɔ taʔa dè muɔ siɛnrɛ nɛ̄ dè.
82 Mi nyapigele ke 'wéli nɛ̀ fùrɔ bɛ̀ mi nɛ muɔ nyasiɛnrɛ siri dè,
a mi sí jo: Lɛ̀lɛ líi nī muɔ bága mi gbiʔɛlɛ ?
83 Mi yē bɛ̀ sɛ̀ngɛ forigo tíɛlɛ gàa ki 'waʔa wírige nī gè;
mi sì fìʔɛ nɛ́ muɔ fànʔa kele ní gèleʔ.
84 Mi muɔ baakuɔwɔ wè, mi sìi cɛnyɛ yi 'kò jori ?
Lɛ̀lɛ jori ni 'kò dí muɔ 'kàyuʔu juu gè bàli nɛ̄ pe mi cìrá bèle ?
85 Bàli pe pìye nyíɛnɛ bèle, pe nyɛ́nì kàtiɛyɛ túgu bè mi cò,
kire ki 'muɔ Fànʔa Siɛnrɛ biɛn dè.
86 Muɔ kajuudiʔɛlɛ ke mìɛni yē kányiʔɛ,
nɛ̀ sí ki taa piyē nɛ mi cìra nɛ́ nyùgofun káfinɛrɛ ní dè.
‑Mi sáʔa yo !
87 Ki 'kò cɛ̀ri, pe cî mi ŋɔrigɔ jáan dàala nɛ̄ lè;
mi wè, mi sì muɔ kacinʔɛnɛ kele yaʔa gèleʔ.
88 Koli ma sìi kɛn m'mɛ́ ma yɛli nɛ́ muɔ bànguɔ dɛ́nigɛ ní gè,
kire ga buu mi‑ muɔ nyakungɛngɛ siɛnrɛ fori dè.
89 Yewe yo, muɔ siɛnrɛ tiī nɛ mɔgi súuri;
tiī tɛ́ngɛrɛ nyìʔɛnɛ nī lè lɛ̀lɛ ó lɛ̀lɛ nī.
90 Muɔ kányiʔɛ kaala niī nɛ mɔgi kɛ̀ngɛlɛ ke mìɛni mɛ́.
Muɔ nyɛ́nì dàala sɔ́migɔ lè nɛ̀ cɔ́ri a ni 'yéri.
91 Ti mìɛni tìi cò nɛ̀ yéri fúɔ nɛ̀ pɛ́nì nɔ̀ pàngɛ nɛ̄
nɛ̀ yɛli nɛ́ muɔ kàyuʔujuuro ní dè,
nɛ́ ki cɛ́n yafaanra ti mìɛni tiī nɛ baara muɔ mɛ́.
92 A muɔ Fànʔa Siɛnrɛ tiì cé fundaangbuɔrɔ kɛn m'mɛ́ dèʔ,
bìinɛ mi cé kùu mi wuʔɔgɔ nī gè.
93 Miǐ je fìʔɛ nyaa fíewu nɛ́ muɔ kacinʔɛnɛ kele ní gèleʔ,
nɛ́ ki cɛ́n keli ke 'ki yaʔa a mi 'koli nɛ̀ sìi taa.
94 Mi yē muɔ wuu ! Te báan ma pa mi suɔ !
Nɛ́ ki cɛ́n mi nyɛ́nì ki caa bè muɔ kacinʔɛnɛ kele cɛ́n gèle.
95 Siɛnpiile piyē nɛ mi palilɛ bè mi cúʔɔ;
mi wè, mi 'líiye cáan muɔ nyakungɛngɛ siɛnrɛ mɛ́ dè.
96 Mi 'ki ciʔige nɛ̀ ki nyaa kúɔdiʔɛ yē yɛrɛ ti mìɛni nɛ̄;
nɛ̀ ki yaʔa muɔ kajuudiʔɛlɛ gèle, keli yē kúɔmɔ fùn.
97 Cí! Muɔ Fànʔa Siɛnrɛ ti 'mi sɔ́migɔ nɛ̀ dɛ́ni !
Mi nɛ sɔ̀ngí ti nɛ̄ lɛ̀lɛ ó lɛ̀lɛ nī.
98 Muɔ fànʔa kajuʔulo ke 'mi cìlige nɛ̀ tóri mi leguulo nɛ̄ bèle,
nɛ́ ki cɛ́n kiyē nɛ́ mi ní lɛ̀lɛ ó lɛ̀lɛ nī.
99 Sìnjilige yē mi mɛ́ nɛ̀ tóri mi tɛnmɛfɔlilɔ pe mìɛni nɛ̄ bèle,
nɛ́ ki cɛ́n muɔ nyakungɛngɛ siɛnrɛ tire nɛ̄ mi nɛ sɔ̀ngí.
100 Mi sícilimɛ pi 'niʔɛ nɛ̀ tóri liɛlɛ nɛ̄ bèle,
nɛ́ ki cɛ́n mi nyɛ́nì muɔ kacinʔɛnɛ kele cò gèle.
101 Mi nɛ mi tɔliyɔ ciʔige yè kpuʔɔ kobiiye nɛ̄ yè,
bè muɔ siɛnrɛ cò dè.
102 Mi sì kàduʔu wáa muɔ kàyuʔujuuro mɛ́ dèʔ,
nɛ́ ki cɛ́n muɔ ma nyɛ́nì mi tɛnmɛ.
103 ʔé! Muɔ nyasiɛnrɛ tiī tàanra mi nyasɛnyɛ nɛ̄ yè,
ti 'tɛ́ni nɛ̀ tóri sárigɛ nɛ̄ mi nyuɔ nī gè.
104 Mi 'sícilimɛ taa muɔ kacinʔɛnɛ kele keli kɛnmɛ nɛ̄,
kire nɛ̄ káfinɛrɛ koligo ki 'mi biɛn.
105 Muɔ siɛnrɛ tiī fètinnɛ mi tɔliyɔ yiʔɛ mɛ́ gè
nɛ́ ní kpìɛnmɛ mi koligo nī gè.
106 Mi nyɛ́nì kàli bè ki fori,
m'bé muɔ kàyuʔujuuro cò dè, dàa ti 'sín dè.
107 Mi nyɛ́nì wuʔɔ kpuʔɔ;
Yewe yo, koli ma sìi kɛn m'mɛ́ ma yɛli nɛ́ muɔ siɛnrɛ ní dè.
108 Yewe yo, mi nɛ muɔ fiɛn wī,
ma fɔ̀li mi nyasiɛnrɛ nɛ̄ dè bɛ̀ kinɛdɛnigɛ yakɔngɔ tíɛlɛ,
ma sí mi tɛnmɛ muɔ kàyuʔujuuro nɛ̄ dè.
109 Mi sìi wi yē kùu wìile nyuɔ nɛ̄ gè,
nɛ̀ ki yaʔa mi sì fìʔɛ nɛ́ muɔ Fànʔa Siɛnrɛ ní dèʔ.
110 Siɛnpiile pe 'gáriyɛ pari yè mi yiʔɛ mɛ́ gè,
kire nɛ́ ki mìɛni ní mi sì laʔa muɔ kacinʔɛnɛ nɛ̄ gèleʔ.
111 Muɔ nyakungɛngɛ siɛnrɛ tiī mi kɔrigɔ súuri,
nɛ́ ki cɛ́n tiī nɛ fundaanra kanʔa mi fungo mɛ́ gè.
112 Mi nɛ nìɛ ŋàʔaná bè muɔ fànʔa kele fori gèle,
cɛngɛ ó cɛngɛ fúɔ bè sa nɔ̀ ki kúɔmɔ nɛ̄ bè.
113 Siɛnnɛ bálì pe pe funyɔ yiʔi yè, pe 'mi biɛn !
Muɔ Fànʔa Siɛnrɛ tire ti 'mi dɛ́ni.
114 Muɔ yē mi làridiʔɛ nɛ́ mi timɔzigeyɛgɛ.
Mi 'mi sɔ̀ngirɔ taʔa dè muɔ siɛnrɛ nɛ̄ dè.
115 Kapiigbiʔilile yo, ye‑ núgo mi táanni !
Nɛ́ ki cɛ́n m'bé mi Kulocɛliɛ kajuudiʔɛlɛ cò gèle.
116 Yewe yo, ‑mi tuʔɔ ma yérige ma yɛli nɛ́ muɔ nyasiɛnrɛ ní dè,
dí mi sí puu sìi nɛ̄,
kire ga buu fìɛrɛ fǎga tɔ́n mi nɛ̄ʔ,
bɛ̀ mi 'mi sɔ̀ngirɔ taʔa dè muɔ nɛ̄ wè.
117 ‑Mi sigi ma yérige, dí mi‑ sí suɔlɔ taa lè,
kire ga buu mi de mi sɔ̀ngirɔ yɛri dè muɔ fànʔa kele nɛ̄ gèle súuri.
118 Bàli pe 'líili muɔ fànʔa kele nɛ̄ gèle, muɔ nɛ̂ cíi pe mìɛni nɛ̄,
nɛ́ ki cɛ́n pe sɔ̀ngirɔ tiī nɛ siɛn fáanni nɛ́ ní káfinɛrɛ yákuɔ.
119 Muɔ nɛ̂ siɛnpiile pe mìɛni yige bèle dàala nɛ̄ lè bɛ̀ timɔvire tíɛlɛ,
kire kɛnmɛ nɛ̄ muɔ nyakungɛngɛ siɛnrɛ ti 'mi dɛ́ni.
120 Mi céri tiī nɛ fún nɛ yàʔará, funwuɔrɔ nɛ̂ mi cò muɔ yiʔɛ mɛ́;
fíɛrɛ 'mi cò muɔ kàyuʔujuuro nɛ̄ dè.
121 Mi kakpiʔiligele ke 'kpíʔile
nɛ̀ yɛli nɛ́ gàa ní ki siɛn gè nɛ́ gàa ki ní sín gè;
fǎga mi yaʔa mi wuʔɔvɔlilɔ mɛ́ bèleʔ.
122 Mi yē muɔ baakuɔwɔ, ma mi kaala nyuɔ lè;
fǎga ki yaʔa bàli pe pìye nyíɛnɛ bèle peri mi wuʔɔʔ.
123 Mi nyapigele ke 'wéli nɛ̀ fùrɔ bɛ̀ mi nɛ muɔ suɔlɔ siri lè
nɛ́ muɔ nyafɛnigɛ ki kányiʔɛ kaala ni forijɛngɛ ní gè.
124 Mi yē muɔ baakuɔwɔ; ma mi nàʔa ma yɛli nɛ́ muɔ bànguɔ dɛ́nigɛ ní gè,
ma mi tɛnmɛ muɔ fànʔa kele nɛ̄ gèle.
125 Mi yē muɔ baakuɔwɔ;
‑sícilige kɛn m'mɛ́ mi‑ muɔ nyakungɛngɛ siɛnrɛ cɛ́n dè.
126 Lɛ̀lɛ ni 'nɔ̀ muɔ mɛ́, Yewe, ma yakaa kpíʔile:
piyē nɛ muɔ Fànʔa Siɛnrɛ córi dè.
127 Nɛ́ ki cɛ́n muɔ kajuudiʔɛlɛ ke 'mi dɛ́ni nɛ̀ tóri tiɛ nɛ̄,
fúɔ nɛ̀ tóri tiɛciiliwe nɛ̄ wè.
128 Kire kɛnmɛ nɛ̄ mi 'ki nyaa a muɔ kacinʔɛnɛ kele ke mìɛni 'sín;
káfinɛrɛ koliyo yi mìɛni 'mi biɛn.
129 Muɔ nyakungɛngɛ siɛnrɛ tiī funwuɔrɔ wori,
kire kɛnmɛ nɛ̄ mi 'ti cò.
130 Muɔ siɛnrɛ tiī wìile, lire nī kpìɛnmɛ piī nɛ nyíʔɛnɛ
bèri sícilige kanʔa bàli mɛ́ piyè fìɛ kaala cɛ́n wèʔ.
131 Mi 'mi nyuɔ múgu gè níɛ ŋɔ́gi nɛ láʔa,
bɛ̀ muɔ kajuudiʔɛlɛ láa kiī mi nɛ̄ wè.
132 Yiʔɛ mi kɔli mɛ́, ma kpuʔɔrɔ taʔa dè mi nɛ̄,
nɛ̀ yɛli nɛ́ dàa muɔ 'juu nɛ̀ ceri bè kpíʔile bàli mɛ́ muɔ 'pe dɛ́ni bèle.
133 ‑Mi tɔliyɔ cò yè ma yɛli nɛ́ muɔ nyasiɛnrɛ ní dè;
fǎga kapiile láà fáala yaʔa ni‑ fànʔa taa mi nɛ̄ʔ.
134 Siɛnnɛ bálì pe mi máami bèle, ma mi cò ma yige pe kiyɛ nī yè,
kire ga buu mi‑ muɔ kacinʔɛnɛ kele cò gèle.
135 Ma mi wéli nɛ́ funjɛ̀ngɛ ní, mi ŋáà wī muɔ baakuɔwɔ wè,
‑mi tɛnmɛ muɔ fànʔa kele nɛ̄ gèle.
136 Yétuniʔɛrɛ nɛ ŋu mi nyapigele nī gèle,
nɛ́ ki cɛ́n siɛnnɛ pe wè nɛ muɔ Fànʔa Siɛnrɛ cògí dèʔ.
137 Yewe yo, muɔ nyɛ́nì sín,
a muɔ kàyuʔujuuro ti 'sìɛn míɛni.
138 Muɔ nyakungɛngɛ siɛnrɛ dáà muɔ 'kɛn dè,
ti nyɛ́nì sín, tiī tɛ́ngɛlɛ wori.
139 Mi wè, mi fungo ki 'sɔ́migɔ nɛ̀ yɛ̀ mi leguulo kúrugu bèle,
nɛ́ ki cɛ́n pe 'fìʔɛ nɛ́ muɔ siɛnrɛ ní dè.
140 Muɔ nyasiɛnrɛ ti 'sɔ́migɔ nɛ̀ siʔɛ nɛ̀ wéli;
mi ŋáà wī muɔ baakuɔwɔ wè, ti 'mi dɛ́ni.
141 Mi yē siɛn cíɛwɛ, pe wè nɛ tɔ́ri nɛ́ mi níʔ,
nɛ̀ ki yaʔa mi sì fìʔɛ nɛ́ muɔ kacinʔɛnɛ kele ní gèleʔ.
142 Muɔ sínnɛ niī bànguɔ sínnɛ,
muɔ Fànʔa Siɛnrɛ tiī kányiʔɛ.
143 Funbiɛnrɛ nɛ́ wuʔɔgbuʔɔ ti 'mi cò,
nɛ̀ ki yaʔa muɔ kajuudiʔɛlɛ kiyē fundaangbuɔrɔ mi mɛ́.
144 Muɔ nyakungɛngɛ siɛnrɛ ti 'sín lɛ̀lɛ ó lɛ̀lɛ nī;
‑sícilige kɛn m'mɛ́ mi‑ kò sìi nɛ̄.
145 Yewe yo, mi nɛ muɔ yeri nɛ́ mi fungo ki mìɛni ní;
ma sí lúʔu mi mɛ́;
m'bé taʔa muɔ fànʔa kele nɛ̄ gèle.
146 Mi nɛ muɔ yeri, ma mi suɔ,
kire ga buu mi‑ muɔ nyakungɛngɛ siɛnrɛ cò dè.
147 Sɛ́ni kpìɛnmɛ pi 'tuu bè, mi nɛ̂ yɛ̀ nɛ̀ muɔ náari ma mi sáʔa:
mi 'mi sɔ̀ngirɔ taʔa muɔ siɛnrɛ nɛ̄ dè.
148 Mi nyapigele kiyē múguyaʔagɛlɛ nyìjaliɛlɛ nɛ̄ lè,
bèri sɔ̀ngí muɔ nyasiɛnrɛ nɛ̄ dè.
149 Yewe yo, ma mi yékpoli lúʔu lè
ma yɛli nɛ́ muɔ bànguɔ dɛ́nigɛ ní gè !
Ma sí koli ma sìi kɛn m'mɛ́ nɛ̀ yɛli nɛ́ muɔ kàyuʔujuuro ní dè !
150 Bàli pe fé kapiʔi kakpiʔiligele kúrugu gèle,
pe nyɛ́nì kpɔni mi nɛ̄,
a pe sí líili muɔ Fànʔa Siɛnrɛ nɛ̄ dè.
151 Nɛ̀ ki yaʔa Yewe, muɔ sí nyɛ́nì kpɔni mi nɛ̄;
muɔ kajuudiʔɛlɛ ke mìɛni yē kányiʔɛ.
152 Nɛ̀ ki líɛ baa faʔa gè, mi 'ki cɛ́n,
muɔ yé muɔ nyakungɛngɛ siɛnrɛ tɛ́ngɛ dè siɛnnɛ mɛ́ bèle
ti‑ puu baa súuri.
153 Ma mi wuʔɔgɔ wéli gè, ma mi líɛ ma yige !
Nɛ́ ki cɛ́n mi sì fìʔɛ nɛ́ muɔ Fànʔa Siɛnrɛ ní dèʔ.
154 Ma mi juu ma yige, ma sí mi suɔ ma yige kùu nī wè
nɛ̀ yɛli nɛ́ muɔ nyasiɛnrɛ ní dè.
155 Suɔlɔ ni nyɛ́nì líili siɛnpiile nɛ̄ bèle,
nɛ́ ki cɛ́n pe wè nɛ muɔ fànʔa kele caa gèleʔ.
156 Yewe yo, muɔ nyinidaaguugo kele ke nyɛ́nì sɔ́migɔ nɛ̀ niʔɛ díɛʔ !
Ma sìi kɛn wè mi mɛ́ ma yɛli nɛ́ muɔ kàyuʔujuuro ní dè.
157 Bàli pe mi cìrá bè mi wuʔɔ wè, nɛ́ mi parifɔlilɔ ní bèle,
pe nyɛ́nì niʔɛ díɛʔ !
Nɛ̀ ki yaʔa mi sì cíi muɔ nyakungɛngɛ siɛnrɛ nɛ̄ dèʔ.
158 Mi nɛ siɛnfaanninɛ nyaʔa bèle laabiri wuulo,
bɛ̀ pe wè nɛ lúru muɔ nyasiɛnrɛ mɛ́ dèʔ.
159 Yewe yo, ma ki wéli
kɛnmɛ bíì nɛ̄ muɔ kacinʔɛnɛ kele ke 'mi dɛ́ni gèle;
ma sìi kɛn m'mɛ́ ma yɛli nɛ́ muɔ bànguɔ dɛ́nigɛ ní gè.
160 Muɔ siɛnrɛ ti mìɛni bìnɛ tiī kányiʔɛ,
nɛ̀ pínɛ muɔ kàyuʔujuuro ti sín níɛ mɔgi súuri.
161 Fànʔafɔlilɔ pe 'taʔa mi nɛ̄ nyùgo fùn,
nɛ̀ ki yaʔa muɔ siɛnrɛ tire yákuɔ ti fíɛrɛ wáari mi nɛ̄.
162 Mi nɛ fundaanra kpínʔini muɔ nyasiɛnrɛ nɛ̄ dè
majo siɛn ŋáà wi 'lɔniʔɛrɛ taa dè.
163 Káfinɛrɛ ti 'mi sɔ́migɔ nɛ̀ biɛn, tiī mi kanabiɛnnɛ;
muɔ Fànʔa Siɛnrɛ tire sí mi dɛ́ni wī.
164 Mi nɛ muɔ kpóri tɔliyɔ kɔlisiin cɛngɛ nī gè
muɔ kàyuʔujuuro tire kɛnmɛ nɛ̄ bè, dàa ti 'sín dè.
165 Bàli muɔ Fànʔa Siɛnrɛ ti 'dɛ́ni dè, piyē yanyige nɛ̄ kpuʔɔ,
peli mɛ́ bèle, kúrugodiʔɛ wè baaʔ.
166 Yewe yo, mi sɔ̀ngirɔ tiī muɔ nɛ̄ ma mi suɔ !
Mi nɛ lúru muɔ kajuudiʔɛlɛ mɛ́ gèle.
167 Mi nɛ muɔ nyakungɛngɛ siɛnrɛ cògí dè;
ti 'mi dɛ́ni kpuʔɔ.
168 Mi nɛ lúru muɔ kacinʔɛnɛ kele nɛ́ muɔ nyakungɛngɛ siɛnrɛ mɛ́ dè,
nɛ́ ki cɛ́n gàa ki mìɛni mi nɛ kpínʔini gè muɔ nɛ ki nyaʔa.
169 Yewe yo, ‑mi kòkuulo yaʔa lè ni‑ nɔ̀ muɔ nɛ̄,
‑sícilige kɛn mi mɛ́ nɛ̀ yɛli nɛ́ muɔ siɛnrɛ ní dè.
170 Ma mi fiɛnnɛ lúʔu lè;
‑mi píle ma suɔ ma yɛli nɛ́ muɔ nyasiɛnrɛ ní dè.
171 ‑Ki yaʔa gbùʔɔrilɔ ni de yigi mi nyasɛnyɛ nī yè,
nɛ́ ki cɛ́n muɔ nɛ mi tɛnmɛ muɔ fànʔa kele nɛ̄ gèle.
172 ‑Ki yaʔa mi nyuɔ kiri muɔ nyasiɛnrɛ ŋú dè,
nɛ́ ki cɛ́n muɔ kajuudiʔɛlɛ ke mìɛni nyɛ́nì sín.
173 ‑Muɔ kɔli yaʔa gè ki‑ puu bile bè mi sáʔa,
nɛ́ ki cɛ́n mi nyɛ́nì muɔ kacinʔɛnɛ kele nyíɛnɛ gèle nɛ̀ kɔ̀n.
174 Yewe yo, mi láa yē muɔ suɔlɔ kúrugu lè;
muɔ Fànʔa Siɛnrɛ tiī mi fundaangbuɔrɔ.
175 ʔé ! ‑Ki yaʔa mi‑ kò sìi nɛ̄ bèri muɔ gbùʔɔrɔ́,
dí muɔ kàyuʔujuuro ti sí mi sáʔa !
176 Mi 'pùunni bɛ̀ sìnbuɔ tíɛlɛ; te mi caa, mi ŋáà wī muɔ baakuɔwɔ wè,
nɛ́ ki cɛ́n mi sì fìʔɛ nɛ́ muɔ kajuudiʔɛlɛ ní gèleʔ.