Yeri Yewe síɛri wè, nɛ́ ki cɛ́n wi nyɛ́nì nyuɔ
118
1 Yeri Yewe síɛri wè, nɛ́ ki cɛ́n wi nyɛ́nì nyuɔ,wi bànguɔ dɛ́nigɛ kiī baa súuria !
2 Isirayɛliyé pe‑ ki juu pe jo:
wi bànguɔ dɛ́nigɛ kiī baa súuri !
3 Arawɔn wi siimɛb pi‑ ki juu pi jo:
wi bànguɔ dɛ́nigɛ kiī baa súuri !
4 Bàli pe fìʔɛ́ Yewe nɛ̄ wè, pe‑ ki juu pe jo:
wi bànguɔ dɛ́nigɛ kiī baa súuri !
5 Mi wuʔɔgɔ nī gè, a mi 'kòkuulo wáa Yewe kúrugu wè,
a Yewe wi 'lúʔu mi mɛ́, nɛ̀ mi tɛ́ngɛ larigbuʔɔ káà nī.
6 Yewe wi yē nɛ́ mi ní; mi wè nɛ fìʔɛ́ yakaa nɛ̄ʔ.
Gáa siɛnnɛ pe bé gbɛ̀ kpíʔile mi nɛ̄c ?
7 Yewe yē nɛ́ mi ní; wiī mi sáʔafɔli.
Bàli mi 'biɛn bèle, m'bé pe tuugɛnmɛ nyaa bè.
8 Sɛ́ni wi‑ wi sɔ̀ngirɔ taʔa dè siɛnnɛ nɛ̄ bèle,
kiī pɔ́rigɔ siɛn wi‑ líʔire jó Yewe mɛ́.
9 Sɛ́ni wi‑ wi sɔ̀ngirɔ taʔa dè siɛnkpolilo nɛ̄ bèle,
kiī pɔ́rigɔ siɛn wi‑ líʔire jó Yewe mɛ́.
10 Kùlogolo kálì siɛnnɛ pe mìɛni yé mi màʔa nɛ̀ suʔu;
Yewe míʔɛ nɛ̄ gè, a mi 'pe cúʔɔ.
11 Pe 'mi màʔa nɛ̀ suʔu, ʔaan, pe 'mi màʔa nɛ̀ suʔu;
Yewe míʔɛ nɛ̄ gè, a mi 'pe cúʔɔ.
12 Pe 'mi màʔa nɛ̀ suʔu bɛ̀ sámugo tíɛlɛ,
a pe 'fuu nɛ̀ fígi bɛ̀ wawaʔara kàsun tíɛlɛ;
Yewe míʔɛ nɛ̄ gè, a mi 'pe cúʔɔ.
13 Pe 'puu nɛ mi ŋɔrigi bè cáan,
nɛ̀ ki yaʔa Yewe pɛ́nì mi sáʔa.
14 Yewe wire wī mi ŋɔri dè nɛ́ ní mi ŋúnugo nyùgo gèd,
wire wi 'mi suɔe.
15 Fundaanra yékpuʔulo gálì ke yigi suɔlɔ wuʔu nɛ̄ gè,
keli nɛ lúru baa siɛnsinminɛ bùguro nī dè.
Yewe kàliige kɔli kiī nɛ kele kpínʔini gèle nɛ́ ŋɔri ní,
16 Yewe wi 'kàliige kɔli yɛ̀gɛ gè,
Yewe kàliige kɔli kiī nɛ kakpoliyo kpínʔini.
17 ʔéʔe, miǐ ga tíi kùu díɛʔ !
M'bé kò sìi nɛ̄, bèri Yewe kakpiʔiligele jáari gèle !
18 Yewe 'mi kpúɔn kpuʔɔ; wiì ki yaʔa a mi 'kùuʔf.
19 Ye‑ Gbùʔɔrɔsaʔa kɔ̀riyɔ múgu yè mi mɛ́,
nyàa nī siɛnsinminɛ pe jiin bèle !
M'bé jíin bè Yewe síɛri wè !
20 Yewe kɔ̀ri kire gī;
kire nī siɛnsinminɛ piyē nɛ jiing bèle.
21 Mi nɛ báan bè pa muɔ síɛri, nɛ́ ki cɛ́n muɔ nyɛ́nì lúʔu mi mɛ́,
muɔ wī ma yē mi suɔfɔli wè.
22 Kàdɛnigɛ gíì saafaanna pe cé kɔ̀n nɛ̀ wáa gè,
kire ki kɛ́nì kò saʔa kàdɛnipelige gè, kàluulo nī lèh,
gàa ki 'saʔa cò gè nɛ̀ yérige gè.
23 Kire sí nyɛ́nì taa Yewe wire mɛ́, nɛ́ sí ní kakpuʔɔ weli mɛ́i.
24 Kire cɛngɛ gè, kire gī gàa Yewe 'kpíʔile gè:
weri fundaanra kpínʔini weri muguri kire cɛngɛ gè !
25 Yewe yo, weli nɛ muɔ fiɛn wī, te báan ma pa weli suɔj !
ʔé ! Yewe, weli nɛ muɔ fiɛn, ‑weli yaʔa weli‑ pe jáa !
26 Siɛn ŋáà wi báan Yewe wi míʔɛ nɛ̄ gè, Yewe wi‑ kpuʔɔrɔ taʔa dè wi nɛ̄ !
Nɛ̀ ki líɛ baa Yewe saʔa nī gè, weli nɛ kpuʔɔrɔ tari dè yeli nɛ̄k !
27 Yewe wiī Kulocɛliɛ, wire wi 'wi kpìɛnmɛ cáanri bè weli nɛ̄l.
Ye‑ táanni yìye nɛ̄ yeri báan nɛ́ tiire lère ní dè yeli kiyɛ nī yè,
yeri waa fúɔ ye sa nɔ̀ gbùʔɔrɔdiʔɛ yafanʔa ki nyɛgɛlɛ nɛ̄ gèle.
28 Muɔ yē mi Kulocɛliɛ, m'bága de muɔ síɛri;
muɔ yē mi Kulocɛliɛ, m'bága de muɔ kpóri !
29 Yeri Yewe síɛri wè nɛ́ ki cɛ́n wi nyɛ́nì nyuɔ,
wi bànguɔ dɛ́nigɛ kiī baa súuri !