Yasundɛnyɛ yiǐ gbɛ̀ yafiɛn kpíʔileʔ; Yewe mɛ́ ŋɔri ti yē
115
1 Weli mɛ́ bɛ̀ʔ, Yewe, weli mɛ́ bɛ̀ʔ kpuʔɔrɔ ti yē;ma kpuʔɔrɔ taʔa muɔ míʔɛ nɛ̄ gè,
muɔ bànguɔ dɛ́nigɛ kɛnmɛ nɛ̄ bè, muɔ kányiʔɛ kaala kɛnmɛ nɛ̄ !
2 Gáa nɛ̄ kùlogolo ke bága de ki nyu bé jo:
«Sé pe Kulocɛliɛ wi yē ?»
3 Weli Kulocɛliɛ wiī nyìʔɛnɛ nī;
yɛgɛ ó yɛgɛ ki 'wi dɛ́ni gè, kire wi kpínʔini.
4 Pe yasunyɔ yè, yiī walifiiwe nɛ́ ní tiɛ wī;
siɛnnɛ kiyɛ yakpiʔilide dī.
5 Nyuɔ yē ti nɛ̄, ti sí wè nyuʔ.
Nyapigele yē ti nɛ̄, ti sí wè nyaʔaʔ.
6 Ngbúʔulo yē ti nɛ̄, ti sí wè lúruʔ.
Fínaʔana yē ti nɛ̄, ti sí wè nùgo suuʔ.
7 Kiyɛ yē ti nɛ̄, tiì sí gbɛ̀ yakaa còʔ.
Tɔliyɔ yē ti nɛ̄, ti sí wè gbɛ̀ni táriʔ.
Ti yékpogaanya yi wè gbɛ̀ni tùngúʔ.
8 Bàli pe ti kpínʔini dè nɛ́ pe sɔ̀ngirɔ taʔa dè ti nɛ̄ dè,
pe bé kò bɛ̀ ti tíɛlɛa.
9 Isirayɛliyé yo, ye‑ yeli sɔ̀ngirɔ taʔa dè Yewe nɛ̄ !
Wire wī yeli sáʔafɔli wè nɛ́ yeli timɔzigege gè.
10 Arawɔn siimɛ yob, ye‑ yeli sɔ̀ngirɔ taʔa dè Yewe nɛ̄ !
Wire wī yeli sáʔafɔli wè nɛ́ yeli timɔzigege gè.
11 Yeli bálì yiyē nɛ fìʔɛ́ Yewe nɛ̄ wè, ye‑ yeli sɔ̀ngirɔ taʔa dè Yewe nɛ̄ !
Wire wī yeli sáʔafɔli wè nɛ́ yeli timɔzigege gè.
12 Yewe wiī nɛ sɔ̀ngí weli wuʔu nɛ̄ gè: wi bé diba taʔa wè weli nɛ̄.
Wi bé diba taʔa wè Isirayɛli siɛnnɛ nɛ̄ bèle,
wi bé wi taʔa Arawɔn siimɛ nɛ̄ bè.
13 Yewe bé diba taʔa wè bàli nɛ̄ piyē nɛ fìʔɛ́ Yewe nɛ̄ wè,
siɛnyirile nɛ̄ bèle nɛ́ siɛnkpolilo nɛ̄ bèlec.
14 Yewe wi‑ kàa taʔa yeli nariyɛ nɛ̄ yè,
yeli woyo nɛ́ yeli pìile woyo ní yè !
15 Yewe wi‑ diba taʔa wè yeli nɛ̄,
wire ŋáà wi 'nyìʔɛnɛ nɛ́ dàala faan lè !
16 Nyìʔɛnɛ niī Yewe woli, wi 'dàala kɛn lè lewiile mɛ́ bèle.
17 Kúbilo bɛ̀ʔ piyē nɛ Yewe gbùʔɔrɔ́ wèʔ,
wàa fáalaʔ bàli pe jíin kùu pìirimɛ nī bèʔ.
18 Weli bèle, weli bé kpuʔɔrɔ taʔa dè Yewe nɛ̄ wè,
píra ŋáà nī wè nɛ́ lɛ̀lɛ ó lɛ̀lɛ nī.
Ye- Yewe gbùʔɔrɔ wè !