Yewe nyɛ́nì kacɛ̀ngɛ kpíʔile mi mɛ́
116
1 Yewe wi 'mi dɛ́ni,nɛ́ ki cɛ́n wi nyɛ́nì mi kòkuulo lúʔu lè bà mi 'wi fiɛn wè.
2 Wi nyɛ́nì líiye cáan m'mɛ́,
kire nɛ̄, m'béri wi yeri mi sìi cɛnyɛ yi mìɛni nīa.
3 Kùu màʔagɛlɛ ke cé mi mígele nɛ̀ kúɔ,
kusiʔi fùrɔgɔ ki yé mi cò, funbiɛnrɛ nɛ́ funwuɔrɔ ti 'nɔ̀ mi nɛ̄.
4 Kire nɛ̄ a mi 'kòkuulo wáa Yewe kúrugu wè:
«ʔé ! Yewe, ‑mi sìi suɔ wè !»
5 Yewe wiī sínwɛ nɛ́ ní kacɛ̀ngɛfɔli;
nyinidaaguugo yē weli Kulocɛliɛ mɛ́ wè.
6 Yewe nɛ̂ pe wéli bàli pe wè kaala yiʔɛ cɛ́ngi gèʔ;
mi yé buu ŋɔri fùn, a wi 'mi suɔ.
7 Kire nɛ̄, mi fungo yo, ma koli ma nyígi mi nī,
nɛ́ ki cɛ́n Yewe nyɛ́nì kacɛ̀ngɛ kpíʔile muɔ mɛ́.
8 Yewe yo, muɔ nyɛ́nì mi pìle nɛ̀ suɔ kùu mɛ́ wè,
a muɔ 'mi yéturo pàari dè mi nyapigele nɛ̄ gèle,
muɔ nyɛ́nì mi tɔliyɔ sigi yè nɛ̀ yérige kire ga buu mi fǎga pɔ̀liʔ.
9 Mi béri tári Yewe yiʔɛ mɛ́ gè a mi yē sìi nɛ̄ wè,
náʔa dàala nɛ̄ lè, siɛnwiile sunʔɔmɔ nī bè.
10 Mi 'mi sɔ̀ngirɔ taʔa dè Yewe nɛ̄, bà mi 'puu nɛ ki nyu nɛ́ jo:
«Mi wuʔɔgɔ ki 'niʔɛ nɛ̀ tórib !»
11 Mi sɔ̀nginiʔɛrɛ nī dè mi 'puu nɛ ki nyu:
«Lewiile pe mìɛni yē káfinɛvinɛnɛ !»
12 Gáa sí m'bé gbɛ̀ kɛn Yewe mɛ́
wi kacɛ̀ngbiʔilige ki mìɛni nɛ̄ mi kɔli mɛ́ gè ?
13 M'bé kakuɔrɔ diviɛn yagbuɔlɔ yɛ̀gɛ lèc,
bè wi síɛri mi suɔlɔ wuʔu nɛ̄ gè,
bé yékpoli wáa Yewe kúrugu wè.
14 Kire lɛ̀lɛ nī lè, wi siɛnnɛ pe mìɛni yiʔɛ mɛ́ gè,
m'bé mi nyakungɛnyɛ fori yè nyàa mi yé kpíʔile Yewe mɛ́ wè.
15 Siɛnnɛ bálì pe 'pìye puɔ wi nɛ̄ wè,
pe kùu woli niī lagbɛnrɛ yɛgɛ Yewe yiʔɛ mɛ́ gè.
16 ʔé ! Yewe yo, mi yē muɔ baakuɔwɔ,
ʔaan, mi yē muɔ baakuɔwɔ, muɔ baakuɔcuɔ wi jaa.
A muɔ 'mi puɔmaʔagɛlɛ sáʔala gèle !
17 M'bé kacɛ̀ngɛ síɛrilɛ yakɔngɔ kɔ̀n gè muɔ mɛ́,
bé yékpoli wáa Yewe kúrugu wè.
18 Kire lɛ̀lɛ nī lè, wi siɛnnɛ mìɛni yiʔɛ mɛ́ gè,
m'bé mi nyakungɛnyɛ fori yè nyàa mi yé kpíʔile Yewe mɛ́ wè,
19 baa Yewe saʔa ki dàliyɛ nī yè, Zerizalɛmi kàʔa sunʔɔmɔ nī bè.
Ye- Yewe gbùʔɔrɔ wè !