Isirayɛli yirile nɛ́ wi suɔlɔ lɛ̀lɛ nī lè
114
1 Bà Isirayɛli siɛnnɛ pe 'yiri Ezipiti kùlo nī lèa,ʔaan, Yakuba narigɛ gè ki 'yiri siɛnfelige gáà sunʔɔmɔ nī bè
gàa siɛnrɛ piyè puu nɛ lúru dèʔb,
2 Zuda wi yé kò wi saawalidɛngɛgɛc,
a Isirayɛli míɛni wi 'kò wi kùlofɔligɔd.
3 A kuʔɔjii wi 'pe nyaa, a wi 'fɛ̀e,
a Zurudɛn cáʔa ki 'koli nɛ̀ sùnʔɔrɔ kàduʔu mɛ́f.
4 A nyaguruyo yi 'yo bɛ̀ sìnbapɔlilɔ tíɛlɛ,
a nyagurupigele ke 'yo bɛ̀ sìnbapɛngɛlɛ tíɛlɛg.
5 Kuʔɔjii yo, gáa kɛnmɛ nɛ̄ muɔ 'fɛ̀ ?
Zurudɛn cáʔa yo, gáa kɛnmɛ nɛ̄ muɔ 'koli nɛ̀ sùnʔɔrɔ kàduʔu mɛ́ ?
6 Nyaguruyo yo, gáa kɛnmɛ nɛ̄ yeli 'koli nɛ yogi bɛ̀ sìnbapɔlilɔ tíɛlɛ ?
Nyagurupigele yo, gáa kɛnmɛ nɛ̄ yeli 'koli nɛ yogi bɛ̀ sìnbapɛngɛlɛ tíɛlɛ ?
7 Dàala yo, te cúungu Kàfɔli wi yiʔɛ mɛ́ gè,
te cúungu Yakuba Kulocɛliɛ wi yiʔɛ mɛ́ gè,
8 wire ŋáà wi 'kàdɛnigbaala yiʔɛ lè a ni 'kò pìndiʔɛ gèh,
nɛ́ kàdɛnigbaala fìile 'kpíʔile lè lawiile lèi.