A weli cɛ yē kolilo bèle, Yewe wire yē sínwɛ
106
1 Ye- Yewe gbùʔɔrɔ wè !Ye‑ Yewe tòbilo wè nɛ́ ki cɛ́n wi nyɛ́nì nyuɔ;
wi bànguɔ dɛ́nigɛ kiī baa súuria !
2 Ŋáa wi bé gbɛ̀ jaa de Yewe kakpoliyo yi mìɛni wuʔu nyu gè ?
Ŋáa wi bé gbɛ̀ jaa de wi gbùʔɔrilɔ ni mìɛni wuʔu nyu gè ?
3 Siɛnnɛ bálì pe kasingele kpínʔini gèle
nɛ tári nɛ yɛligi nɛ́ gàa ní ki 'sín gè súuri, peli wuʔu kiī tànʔa !
4 Yewe yo, sɔ̀ngi ma taa nɛ́ mi ní
a muɔ nɛ muɔ funjɛ̀ngɛ tìí gè muɔ siɛnnɛ nɛ̄ bèle !
Líiye cáan mi mɛ́ a muɔ nɛ pe suu bèle !
5 ‑Ki yaʔa mi‑ puu nɛ́ muɔ siɛnnyiɛnɛgɔnminɔ ní bèle,
bɛ̀ muɔ 'yanyige kɛn pe mɛ́ bèle,
dí mi sí de muguri bɛ̀ muɔ siɛnnɛ piyē fundaanra nɛ̄ dè,
dí mi de muɔ gbùʔɔrɔ́ nɛ́ bàli ní pe yē muɔ kɔrigɔ gè !
6 Bɛ̀ weli tobilo tíɛlɛ bèle, weli nyɛ́nì kapiile kpíʔile,
weli nyɛ́nì kolimɔ kpíʔile, weli nyɛ́nì kò siɛnpiile.
7 Baa Ezipiti kùlo nī lè,
weli tobilo piyè cé muɔ kanyuʔɔnigɔlɔ ke kɔri cɛ́n wèʔ.
A pe 'fìʔɛ nɛ́ muɔ bànguɔ dɛ́nigɛ kele nìʔɛgɛlɛ ní gèle,
a pe 'cíi péwu kuʔɔjii táanni wè, Nyàʔanivɛgɛ Tiire kuʔɔjii wèb.
8 Nɛ̀ ki yaʔa a wi 'pe suɔ kire ga buu wi míʔɛ ki‑ kpúʔɔ,
bè ki yaʔa pe‑ wi ŋɔri cɛ́n dè.
9 A wi 'juu nɛ̀ kpɛ̀ni Nyàʔanivɛgɛ Tiire kuʔɔjii nɛ̄ wè, a ki 'waʔa;
a wi 'wi siɛnnɛ kɔ́ri bèle a pe 'tánʔa nɛ̀ jeli ki sícuumɔ nī bè,
majo waama kùlo nī.
10 Bàli pe yé biɛn bèle, a wi 'pe suɔ pe mɛ́,
nɛ́ ń'nɛ̀ koli nɛ̀ pe suɔ nɛ̀ yige pe leguulo pe kiyɛ nī yè.
11 A kuʔɔjii luʔɔ ki 'pe lìi, bàli pe 'puu nɛ túngu nɛ́ pe ní bèle;
wàa nigbe sì cɛ́nì kò pe nīʔc.
12 A wi siɛnnɛ pe sí tɛ́ngɛ wi siɛnrɛ nɛ̄ dè
níɛ wi gbùʔɔrigɔ ŋúnuyɔ ŋú yèd.
13 Nɛ̀ ki yaʔa a pe 'fìʔɛ fáari nɛ́ wi kakpiʔiligele ní gèle,
pe sì yéri nɛ̀ wi nyɛ́ni kele sige gèleʔ,
gàli wi yé je kpíʔile gèleʔ.
14 Baa waama kùlo nī lè, a pe 'pìye kɛn pe kanɛdanʔana kele mɛ́ gèle,
a pe 'Kulocɛliɛ puu wè nɛ̀ wéli, luʔɔfun kùlo nī lèe.
15 A wi sí ki kɛn pe mɛ́ gàa pe 'puu nɛ náari gè,
nɛ̀ ki yaʔa a wi 'cériwaʔama yaabiimɛ cáan bè pe nɛ̄.
16 Baa bùguro nī dè, a yejaʔa 'yɛ̀ pe mɛ́ Misa kúrugu wè,
nɛ́ Arawɔn kúrugu wè,
wire ŋáà wi 'puu Yewe siɛnwalidɛngɛwɛ wèf.
17 Kire nɛ̄ a dàala ni 'foli nɛ̀ jaa nɛ̀ Datan júɔ wè,
nɛ́ míɛni a ni 'Abirami gboli tɔ́n lè.
18 A kàsun ki 'yɛ̀ pe gboli kúrugu lè,
a kàsunyige ki 'siɛncuʔɔlɔ bálì sórigo bèle.
19 A pe 'nɛ̀piɛyɛlilɛ faan lè Worɛbi nyagurugo táanni gè,
a pe 'tuu nɛ̀ cúbulo ki timɔri yasungo yiʔɛ mɛ́ gèg.
20 A pe 'Kulocɛliɛ kpuɔmɔ fɛ̀ni bè yafanʔa nɛ̄ gè,
gàa gī nɛ̀piɛyɛlilɛ tíɛlɛ lè nàa ni nyàʔa káa gè.
21 A pe 'fìʔɛ nɛ́ pe suɔfɔli Kulocɛliɛ ní wè,
ŋàa wi yé kakpoliyo kpíʔile yè Ezipiti kùlo nī lè,
22 nɛ́ kanyuʔɔnigɔlɔ ní gèle baa Kami kùloh nī lè,
nɛ́ bògaara kele ní gèle Nyàʔanivɛgɛ Tiire kuʔɔjii tiʔɛ nī gè.
23 Kire nɛ̄ a Kulocɛliɛ sí jo wire bé pe cúʔɔ bè yige baa.
Nɛ̀ ki yaʔa Misa wè, wi siɛnnyiɛnɛgɔnwɔ wè,
a wire 'jíin Yewe nɛ́ wi siɛnnɛ sunʔɔmɔ nī bè
nɛ̀ kàsulugo kpíʔile gè,
kire ga buu Yewe fundanʔanigɛ ki fǎga pe cúʔɔʔ.
24 A pe 'cíi, pìye jíinʔ kùtaanna nī lèʔ,
piyè tɛ́ngɛ Yewe siɛnrɛ nɛ̄ dèʔi.
25 A pe 'kò nɛ kúnʔɔri pe fɛ̀ni saaya nī yè,
piyè lúʔu Yewe nyasiɛnrɛ mɛ́ dèʔ.
26 A wi 'kɔli yɛ̀gɛ gè nɛ̀ kàli
bè pe yaʔa pe‑ kùu waama kùlo nī lè,
27 bè pe siimɛ cɛrigɛ bè duniya tiɛrɛ ti mìɛni nī,
bè pe yaʔa pe‑ kùu kùlogolo sunʔɔmɔ nī bèj.
28 A pe sɛ́ni Baali yasungo sungu gè
baa Peyɔri nyagurugo mɛ́ gè,
a pe 'kúbilo kakuɔrɔ suro líi dèk.
29 A pe 'Yewe funyɛrigɛ caa gè nɛ̀ ŋɔ́ nɛ́ pe kakpiʔiligele ní gèle,
a yaabiimɛ wuʔɔgbuʔɔ ki 'tuu pe nɛ̄.
30 A Finɛyasi sí yɛ̀ nɛ̀ ki kele cuɔnri gèle, a wuʔɔgbuʔɔ ki 'yéri.
31 A Yewe 'kire tɔ́ri Finɛyasi mɛ́ kasinnɛ,
súuri kɛ̀ngɛlɛ ke mìɛni nīl.
32 A pe 'Yewe fungo yɛ̀gɛ gè baa Mɛriba luɔyɔ táanni yè,
a Misa 'yawuʔɔ taa peli kɛnmɛ nɛ̄.
33 Bà pe yé wi fungo cúʔɔ gè kányiʔɛ nī gè,
wiì sɔ̀ngi nɛ́ juuʔm.
34 Piyè kùlogolo siɛnnɛ cúʔɔ bèleʔ,
bàli Yewe yé jo pe‑ cúʔɔ bèleʔn.
35 A pe 'nyaʔami kùlogolo kálì siɛnnɛ nī bèle,
nɛ̀ pe 'kakpiʔiligele tɛnmɛ gèleo,
36 nɛ́ baara pe yasunro mɛ́ dè, a ti 'kò gáriyɛ pe mɛ́p.
37 A pe 'pe jaala kpúu bèle, nɛ́ pe pórilo ní bèle,
nɛ̀ sun gbòdolilo mɛ́ bèleq.
38 A pe 'kanaasingbiʔilile pe sìsiɛn wo gè,
gàa gī pe jaala nɛ́ pe pórilo wuʔu gè,
a pe 'pe kɔ̀n tasunmɔ Kanaa siɛnnɛ kulocɛlɛlɛ mɛ́ bèler.
A kùlo ni 'núʔɔ Yewe yiʔɛ mɛ́ gè,
sìsiɛn kɛnmɛ nɛ̄ bè gàa ki 'wo gè siɛnkpuu wuʔu gè.
39 Pe nyɛ́nì pìye núʔɔ nɛ́ pe kakpiʔiligele ní gèle;
bà pe 'yasunro sun dè, a ki 'kpíʔile
majo nàjaafaalidɛ nɛ́ cecaafaalidɛ pe 'kpíʔile Yewe yiʔɛ mɛ́ gès.
40 A Yewe fungo ki 'yɛ̀ kpuʔɔ wi siɛnnɛ kúrugu bèle,
a pe 'kò laabiri yɛgɛ wi mɛ́, peli bálì bīɛlɛ wi kɔrigɔ gè.
41 A wi 'pe yaʔa kùlogolo kiyɛ nī yè;
bàli pe yé biɛn bèle, a pe 'pe jáa nɛ fànʔa kpúɔn pe nɛ̄.
42 A pe leguulo pe 'pe máama,
a pe 'pe kiyɛ fànʔa seri gè pe nɛ̄ nɛ̀ pe faʔa.
43 Lɛ̀gɛlɛ sáa nī a wi 'pe yige pe kiyɛ nī yè,
kire nɛ́ ki mìɛni ní a pe 'cíi níɛ cùrú nɛ jiin pe kolimɔ nī bè.
44 Nɛ̀ ki yaʔa wi 'pe kòkuʔulo lúʔu gèle
a wi sí pe funbiɛnrɛ nyaa dè.
45 A wi 'sɔ̀ngi nɛ̀ taa nɛ́ wi nyakungɛngɛ ní gè gàa wi 'kpíʔile nɛ́ pe ní gè,
a wi 'ki yaʔa pe nɛ̄, wiì pe wuʔɔʔ,
nɛ́ ki cɛ́n wi bànguɔ dɛ́nigɛ kiī kpuʔɔ pe kɔli mɛ́ gè.
46 A wi 'ki kpíʔile bàli mìɛni pe 'pe cò parituɔrɔ nɛ̄ dè,
a peli 'koli nɛ̀ nyinimɛ taa pe nɛ̄t.
47 Yewe weli Kulocɛliɛ yo, ma weli suɔ !
‑Weli yige kùlogolo sunʔɔmɔ nī bè ma weli gbuʔulo,
kire ga buu weli de muɔ gbùʔɔrɔ́, muɔ ŋáà wī tiɛlɛ fùn wè,
bà weli bé puu fundaanra nɛ̄ bèri muɔ tòbiló.
Gbùʔɔrigɔ wuʔu gáà ki 'juu gè, bè Sɛbɛ Sicɛriwuu kúɔ wè
48 Kpuʔɔrɔ 'yɛli ti de tari Yewe nɛ̄ wè, Isirayɛliyé Kulocɛliɛ wèu, lɛ̀lɛ ó lɛ̀lɛ nī súuri !
Siɛnnɛ pe mìɛni bé ki juu bé jo:
«Ki- taa ki puu bɛ̀ !»
Ye- Yewe gbùʔɔrɔ wè !