SƐBƐ KOGUNƆWUU
(107–150)
Weri Yewe síɛri wi bànguɔ dɛ́nigɛ wuʔu nɛ̄ gè
107
1 We‑ Yewe síɛri wè, nɛ́ ki cɛ́n wi nyɛ́nì nyuɔ;wi bànguɔ dɛ́nigɛ kiī baa súuria.
2 Bàli Yewe 'fùgu nɛ̀ suɔ bèle, pe‑ ki juu,
bàli wi 'suɔ nɛ̀ yige pe parifɔlilɔ mɛ́ bèle,
3 nɛ́ pe pínɛ nɛ̀ yige kùlogolo ke mìɛni nī gèle:
cɛngɛnyɛnifoligɔli mɛ́ gè, nɛ́ cɛngɛnyɛnijiingɔli mɛ́ gè,
nɛ́ cɛngɛnyɛnifolimɛ kàmɛgɛ kɔli mɛ́ gè,
nɛ́ cɛngɛnyɛnifolimɛ kàliige kɔli mɛ́ gèb.
4 Pàli 'puu nɛ nyaari nɛ mári nyàʔa nī gè, waama kùlo nī lè,
piyè cé kàʔa taaʔ gàa nī pe bé gbɛ̀ tɛ́ni gèʔ.
5 Fungo 'puu pe nɛ̄, luʔɔwuʔɔ yé pe taa,
pe céri ti yé kùu pe nī.
6 Pe funbiɛnrɛ nī dè, a pe 'kòkuulo wáa Yewe kúrugu wè,
a wi 'pe yige pe wuʔɔgɔ nī gèc.
7 A wi 'pe yiʔɛ kíni gè nɛ̀ kozinʔɛ tìɛ gè pe nɛ̄,
fúɔ nɛ̀ sɛ́nì nɔ̀ kàʔa káà nɛ̄ gàa nī pe bé gbɛ̀ tɛ́ni gè.
8 Ki 'yɛli peri Yewe síɛri wè wi bànguɔ dɛ́nigɛ
nɛ́ wi kakpoliyo wuʔu nɛ̄ gè lewiile mɛ́ bèle !
9 Bàli nɛ̄ luʔɔwuʔɔ ki 'puu gè, a wi 'luʔɔ kɛn pe mɛ́ a pe 'gbuɔ,
nɛ́ bàli nɛ̄ fungo ki 'puu gè, a wi 'yacɛ̀nrɛ kɛn dè pe mɛ́d.
10 Pàli 'puu tɛ́ninɛ yebiliwuɔlɔ nī lè nɛ́ kùu nyúmɔ láara bèe,
pe 'puu kasuulebile bálì pe 'fùrɔ nyùʔɔdiriye nī yè.
11 Nɛ́ ki cɛ́n pe yé Kulocɛliɛ siɛnrɛ wáa dè;
wire ŋáà wī Duniya wi Mìɛni Nyùgo nɛ̄ gè, pe yé wi yɛrimɛ cíi bè.
12 A wi 'pe funyɔ tìrige yè nɛ́ baagbɛnrɛ ní dè,
a pe 'kò nɛ kúrugi nɛ mári; siɛn sì taa nɛ̀ pe sáʔaʔ.
13 Pe funbiɛnrɛ nī dè, a pe 'kòkuulo wáa Yewe kúrugu wè,
a wi 'pe yige pe wuʔɔgɔ nī gè.
14 A wi 'pe yige yebiliwuɔlɔ nī lè nɛ́ kùu nyúmɔ láara bè,
nɛ́ pe nyùʔɔdiriye kabari yè.
15 Ki 'yɛli peri Yewe síɛri wi bànguɔ dɛ́nigɛ
nɛ́ wi kakpoliyo wuʔu nɛ̄ gè lewiile mɛ́ bèle !
16 Nɛ́ ki cɛ́n wi nyɛ́nì kàaya yi kányiɛrɛ kɔ̀riyɔ kabari yè,
nɛ́ yi timɔri kpèlibariyɛ cúʔɔ yèf.
17 Pàli 'puu ledoyo nɛ kacuʔɔgɔlɔ kele kpínʔini gèle,
pe nyɛ́nì wuʔɔyɔ taa pe kolimɔ kɛnmɛ nɛ̄ bè.
18 Yaliire ti mìɛni yé kò pe mɛ́ laabiri yɛgɛ,
pe 'puu nɛ sìʔɛrɛ́ nɛ kpɔni kùu wìile nɛ̄ lè.
19 Pe funbiɛnrɛ nī dè, a pe 'kòkuulo wáa Yewe kúrugu wè,
a wi 'pe yige pe wuʔɔgɔ nī gè.
20 A wi 'wi siɛnrɛ tíʔɛ dè nɛ̀ pe puʔɔ,
a wi 'pe píle nɛ̀ suɔ nyɛgɛ mɛ́ gè.
21 Ki 'yɛli peri Yewe síɛri wè wi bànguɔ dɛ́nigɛ
nɛ́ wi kakpoliyo wuʔu nɛ̄ gè, lewiile mɛ́ bèle !
22 Pe‑ kacɛ̀ngɛ síɛrilɛ yakɔnrɔ kɔ̀n dè,
pe‑ wi kakpiʔiligele wuʔu juu gè nɛ́ fundaanra yékpuʔulo ní.
23 Pàli yé kɛ́ kuʔɔjii nɛ̄ wè kɔ́rikpoliyo nī yè,
pe yé puu nɛ pe jaʔa wáari wè lakpoliyo naamɛ gè.
24 A pe 'Yewe kakpiʔiligele nyaa gèle,
nɛ́ wi kakpoliyo ní yè, nyàa wi 'kpíʔile luɔyɔ sícuuyo naamɛ gè.
25 A wi 'juu, a káfaligbuʔɔ ki 'yɛ̀ nɛ̀ lakuruyo yɛ̀gɛ yè.
26 Lakuruyo yi 'puu nɛ kɔ́rikpoliyo yɛ̀gí yè nyìʔɛnɛ kɔli mɛ́ gè,
níɛ yi tìrigí luɔyɔ sícuuyo nɛ̄ yè, a pe funyɔ yi 'nyaʔami pe nī.
27 Pe 'puu nɛ fíigi nɛ mári bɛ̀ sungbuɔdinwɛ tíɛlɛ,
a pe kacɛ́nnɛ ni 'kúɔ pe nī.
28 Pe funbiɛnrɛ nī dè a pe 'kòkuulo wáa Yewe kúrugu wè,
a wi 'pe yige pe wuʔɔgɔ nī gè.
29 A wi 'káfaligbuʔɔ yérige gè a ki 'kò nɛ wáari yɛ́rirɛ,
a lakuruyo yi 'tìgi nɛ̀ sínɛ.
30 A pe 'fundaanra kpíʔile bà pe 'ki nyaa lakuruyo yi 'sínɛ yè.
A Yewe 'pe kɔ́ri nɛ̀ kɛ́ pe nyɛ́ni yéridiʔɛ mɛ́ gè.
31 Ki 'yɛli peri Yewe síɛri wè wi bànguɔ dɛ́nigɛ
nɛ́ wi kakpoliyo wuʔu nɛ̄ gè, lewiile mɛ́ bèle !
32 Peri wi kpóri siɛnnɛ gboli nī lè,
peri wi gbùʔɔrɔ́ liɛlɛ juudiʔɛ nī gè.
33 Yewe nɛ̂ cáaya lìri yè yi nɛ̂ kò waama kùlo,
nîɛ lawiʔile yiʔɛ gèle ke nɛ̂ kò dàawaʔala.
34 Wiī nɛ dàataanna yiʔi lè ni nɛ̂ kò yasuʔɔgɔ dàala
ki tiʔɛ siɛnnɛ pe kapiʔile kɛnmɛ nɛ̄ bè.
35 Wi nɛ̂ waama kùlo kpíʔile ni nɛ̂ kò lanyinɛ,
nîɛ dàawaʔala yiʔɛ lè ni nɛ̂ kò lawiʔile.
36 Wi nɛ̂ fungofɔlilɔ tɛ́ngɛ bèle baa, pe‑ pe kàʔa faan gè baag.
37 Pe nìɛ siiye fali yè nɛ́ ɛrɛzɛn siiye ní yè; yi nìɛ yaliicɛ̀nrɛ sɛngi dè.
38 Yewe nɛ̂ diba taʔa wè pe nɛ̄; pe nɛ̂ sii nɛ̀ niʔɛ.
Wiì ki yaʔaʔ kàa yiri pe yajuuro nī dèʔ.
39 A ki pɛ́nì nyaa 'kàa yiri siɛnnɛ nyuɔ nī gè,
á piyē nɛ gbɔbilɔ fùrɔgɔ kɛnmɛ nɛ̄ bè,
nɛ́ wuʔɔgbuʔɔ nɛ́ funbiɛnrɛ nɛ̄ dè.
40 Yewe wi nɛ̂ siɛnkpolilo cɛ́rigɛ bèle níɛ̀ ki kpíʔile
pe nìɛ nyaari nɛ mári waama kùlo nī lè, baa koligo wè yē gèʔ.
41 Nɛ̀ ki yaʔa wi nɛ̂ fɔ̀ngɔfɔlilɔ yige bèle pe fuunmɔ nī bè,
níɛ̀ pe nariyɛ niʔɛ yè bɛ̀ sìnbatoyo tíɛlɛ.
42 A siɛnsinminɛ 'kire nyaa gè, pe nìɛ fundaanra kpínʔini,
nɛ̀ ki yaʔa kakoligbiʔilile pe mìɛni bèle, peli nyuɔyɔ yi nɛ̂ tɔ́n.
43 Ŋàa wi 'cìlige wè, wi de kele gálì cògí gèle,
wi sí de sɔ̀ngí Yewe bànguɔ dɛ́nigɛ kele nɛ̄ gèleh.