Ye- koli ye sɔ̀ngi Kulocɛliɛ kakpoliyo nɛ̄ yè
(Kaj1 16.8-22)
105
1 Yeri Yewe síɛri wè, yeri wi míʔɛ jáari gè !Ye‑ ki yaʔa kùlogolo siɛnfeliye yi‑ wi kakpiʔiligele cɛ́n gèle !
2 Yeri ŋú wi mɛ́ ! Yeri yakpuɔnrɔ kpúɔn dè wi mɛ́ !
Yeri wi kakpoliyo yi mìɛni wuʔu nyu gè !
3 Yeri yìye kpóri Yewe nī wè, wire ŋáà wi 'nyuɔ nɛ́ ní tiɛlɛ fùn wè !
Bàli pe Yewe caa wè pe fungo nī gè, peri fundaanra kpínʔini !
4 Ye‑ yiʔɛ Yewe kɔli mɛ́ gè ye wi ŋɔri caa dè !
Yeri ki caa bè kò nɛ́ wi ní lɛ̀lɛ ó lɛ̀lɛ nī !
5 Ye‑ sɔ̀ngi ye taa nɛ́ kakpoliyo ní yè nyàa wi nyɛ́nì kpíʔile yè,
nɛ́ wi fìɛlɛ ní bèle, nɛ́ wi kàyuʔujuuro ní dè dàa wi 'juu nɛ̀ kúɔ dè,
6 yeli bálì bīɛlɛ Birayima siimɛ bè, Yewe baakuɔwɔ wè,
yeli Yakuba pìile bèle, Yewe siɛnnyiɛnɛgɔnminɔ bèle !
7 Yewe wire wī weli Kulocɛliɛ wè,
wi kàyuʔujuuro tiī nɛ dàala ni mìɛni kàrigí.
8 Wiī nɛ sɔ̀ngí nɛ taʔa súuri nɛ́ wi nyakungɛngɛ ní gè,
nyafɛnigɛ siɛnrɛ dáà wi 'juu kɛ̀ngɛlɛ sirakogunɔ (1 000) mɛ́ gèlea.
9 Wi 'nyuɔ kún nɛ̀ kɛn Birayima mɛ́ wèb,
nɛ́ sí ki juu nɛ̀ fùgu nɛ́ kàlilɛ ní Siaga mɛ́ wèc.
10 Wi 'koli nɛ̀ ki sɔ́migɔ nɛ̀ juu ki‑ kò fànʔa kaala Yakuba mɛ́ wè,
nɛ́ Isirayɛli siɛnnɛ ní bèle, ki‑ kò nyakungɛngɛ lɛ̀lɛ ó lɛ̀lɛ nīd.
11 A wi 'jo: «M'bé Kanaa kùlo kɛn lè muɔ mɛ́,
lire bé puu muɔ mɛ́ liɛlɛ náà muɔ bé taa kɔrigɔ gè, muɔ nɛ́ muɔ siimɛ ní bè.»
12 Bà pe puu nɛ tíin siɛnnɛ cɛ̀ri yákuɔ wè, kagbuunyɛni lè,
nɛ́ ní nabɔnminɔ tɛ́ninɛ kùlo nī lèe,
13 pe 'puu nɛ waa kùlogolo mɛ́ gèle nɛ mári,
nɛ́ yiri kùlofɔligɔ káà nī nɛ̀ kɛ́ siɛnfeliye yáà mɛ́.
14 Kulocɛliɛ sì siɛn wáà fáala yaʔa a wi 'pe wuʔɔʔ;
peli kɛnmɛ nɛ̄ a wi 'juu kùlofɔlilɔ nɛ̄ bèlef,
15 nɛ́ jo: «Ye fǎga cò mi siɛnnyiɛnɛgɔnminɔ nɛ̄ bèleʔ !
Ye fǎga kapiile kpíʔile mi siɛnjuulo nɛ̄ bèleʔ !»
16 A wi 'fungo cáan dàala nɛ̄ lè, nɛ̀ yaliire ti mìɛni kúɔg.
17 A wi sí siɛn wáà tun pe yiʔɛ mɛ́:
Yusufu wè, ŋàa pe yé pári sùkulowo wèh.
18 A pe 'wi tɔliyɔ puɔ yè nɛ́ nyùʔɔdiriye ní yè,
a pe 'timɔri kajinge le wi yétiige nī gèi,
19 fúɔ nɛ̀ pɛ́nì nɔ̀ cɛngɛ gíì Yusufu siɛnrɛ ti 'fori dè,
dàa wi yé kíni nɛ̀ juu dè. A ki 'nyaa siɛnrɛ dáà Yewe yé juu dè,
a kire ki 'tìɛ tànʔa yé puu Yusufu mɛ́ wèj.
20 A kùlofɔli wi 'ki juu nɛ̀ gbɛ̀ngɛ pe‑ wi yaʔa,
wire ŋáà wi 'puu kùlogolo kàfɔli wè, a wi 'tí a pe 'wi yaʔak.
21 A kùlofɔli wi 'Yusufu tɛ́ngɛ wè wi saʔa nyùgo nɛ̄ gè
wi‑ puu wi lɔri ti mìɛni nàʔavɔlil,
22 béri kùlofɔli wi siɛnkpolilo tɛnmɛ bèle
kɛnmɛ bíì nɛ̄ wi 'ki nyaa a ki 'yɛli gè,
bèri kùlofɔli wi liɛlɛ tɛnmɛ bèle sícilimɛ nɛ̄.
23 Kire kàduʔumɛ a Isirayɛliyé pe pɛ́nì jíin Ezipiti kùlo nī lè.
Peli bálì bīɛlɛ, Yakuba wuulo bèle,
peli 'tɛ́ni nɛ̀ lɛ̀lɛ láà kúɔ Kami kùlo nī lèm.
24 Kulocɛliɛ wi yé cesiʔi tɛ́ni gè wi siɛnnɛ nɛ̄ bèle,
a wi 'pe kpíʔile ŋɔrifɔlilɔ nɛ̀ tóri pe túnvɔlilɔ nɛ̄ bèlen.
25 A wi 'Ezipitiyé funyɔ yiʔɛ yè pe kúrugu
kire ga buu pe‑ wi siɛnnɛ pari bèle, peri pe fáanni.
26 A wi 'wi baakuɔwɔ Misa tun wè pe kúrugu,
wire nɛ́ Arawɔn ŋáà wi yé nyíɛnɛ nɛ̀ kɔ̀n wèo.
27 Baa Ezipiti kùlo nī lè, a pe 'Kulocɛliɛ fìɛlɛ kpíʔile bèle
nɛ́ wi kakpoliyo ní yè Kami kùlo siɛnnɛ yiʔɛ mɛ́ gè.
28 A Kulocɛliɛ wi 'yebiliwuɔlɔ nyɔ́gɔ lè kùlo nī lè cɛnvugo nɛ̄ gè,
a yebiliwuɔlɔ ni 'tìgi dɛ́ndɛn; siɛn wáà fáala sì jáa nɛ̀ wi siɛnrɛ cíi dèʔp.
29 A wi 'pe luɔyɔ yiʔɛ yè a yi 'kò sìsiɛn, nɛ̀ fúɔlɔ kpúu bèleq.
30 A kpìile 'yiri nìʔɛnɛ nɛ̀ pe kùlo nyì lè,
a ti 'jíin míɛni pe kùlofɔli wi nàkpanʔa saaya nī yèr.
31 Wi 'juu, a gbùu wi 'yiri, nàfiɛn wi 'kùlo tiɛrɛ ti mìɛni kpàris.
32 A wi 'kàsasindari tìrige pe nɛ̄ kàsaʔa sìndiʔɛ nī,
nɛ́ ki kpíʔile a kàsakpɛnigɛ nyíʔɛnimɛ nɛ́ kàsun tuu dàala nɛ̄ lèt.
33 Wi 'pe ɛrɛzɛn fétiride nɛ́ sàanfiidiiye kpúɔn yè,
nɛ̀ pe kùlo tiire kabari dèu.
34 Wi 'juu a kàbaridɛ ti 'pɛn,
nɛ́ kòto ŋáà wiī nìʔɛwɛ, wiǐ gbɛ̀ tɔ́ri dèʔ.
35 Tire ti 'nyàʔa ki mìɛni káa pe kùlo nī lè,
nɛ́ yaliire ti mìɛni ní siiye nī yèv.
36 A wi 'pe kùlo jaafɔpelile pe mìɛni kpúɔn nɛ̀ kpúu,
pe nàgapunmɔ lɛ̀lɛ pìpelile bèlew.
37 A wi 'ki kpíʔile a wi siɛnnɛ pe 'walifiiwe nɛ́ tiɛ tugo wè nɛ̀ yiri kùlo nī lèx.
Pe saaya tùluyo nī yè, wàa fáala sì yé fùrɔ nɛ̀ kò wiì gbɛ̀ni tánʔaʔ.
38 Ezipiti kùlo ni yé puu fundaanra nɛ̄ pe yirile wuʔu nɛ̄ gè,
nɛ́ ki cɛ́n fíɛgbuɔrɔ ti yé pe còy.
39 A Yewe wi 'kàsadibagɛ káà tíʔɛ nɛ̀ pe tɔ́n,
nɛ́ kàsun kpìɛnmɛ cáan bè pìlige nī gèz.
40 Pe nyɛ́nì náari, a Kulocɛliɛ wi 'tingbɛniserire kɛn dè pe mɛ́,
nɛ̀ pe kɛn a pe 'lìi nɛ̀ tín nɛ́ nyìʔɛnɛ yaliire ní dèa.
41 A wi 'kàdɛnigbaala kpúɔn lè nɛ̀ jaa, a luʔɔ yɛ̀ nɛ cɛ̀ri nɛ yigi ni nī,
a luʔɔ ki 'fúu bɛ̀ lakoligo tíɛlɛ waama kùlo nī lèb.
42 Nɛ́ ki cɛ́n wi 'puu nɛ sɔ̀ngí nɛ taʔa nɛ́ wi nyakungɛngɛ siɛnrɛ ní dè,
dàa wire Kulocɛliɛ tíimɛ wi yé juu wi baakuɔwɔ Birayima mɛ́ wèc.
43 Bà wi yé wi siɛnnɛ yige bèle, pe 'puu fundaanra nɛ̄,
wi siɛnnyiɛnɛgɔnminɔ pe 'puu nɛ fundaanra yékpuʔulo wáari gèle.
44 A wi 'kùlogolo kálì dàʔala kɛn pe mɛ́,
a pe 'tɔ̀ni taa siɛnfeliye yáà baara nī dèd,
45 kire ga buu pe‑ wi fànʔa kele cò gèle
bé sí de lúru wi fànʔa kajuʔulo mɛ́ gèle.
Ye- Yewe gbùʔɔrɔ wè !